مجمع الزوائد ومنبع الفوائد

سیدنا عبداللہ بن عمر رضی اللہ عنہما بیان کرتے ہیں : میں نے غنیمت کو دیکھا کہ اسے پانچ اجزا میں تقسیم کیا جاتا اور اس کے حصے کیے جاتے ، جو حصہ نبی اکرم صلی اللہ علیہ وسلم کے لئے مخصوص ہو وہ آپ کو ملتا ، اور آپ اسے اختیار کر سکتے تھے ۔
یہ روایت امام أحمد نے نقل کی ہے ۔ اس کی سند میں ایک راوی ابن لہیعہ ہے ، جس میں ضعف پایا جاتا ہے اس کی نقل کردہ حدیث حسن ہے ۔ اس روایت کے بقیہ رجال ثقہ ہیں ۔

ابوزبیر بیان کرتے ہیں : سیدنا جابر بن عبداللہ رضی اللہ عنہ سے سوال کیا گیا ۔ نبی اکرم صلی اللہ علیہ وسلم خمس کو کیسے استعمال کرتے تھے ؟ انہوں نے جواب دیا : آپ اس میں سے اللہ کی راہ میں کسی شخص کو سواری لے کر دیتے تھے پھر کسی اور کو لے کر دیتے تھے پھر کسی اور کو لے کر دیتے تھے ۔
یہ روایت امام أحمد نے نقل کی ہے ۔ اس کی سند میں ایک راوی حجاج بن ارطاۃ ہے اور وہ مدلس ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم جب کوئی جنگی مہم روانہ کرتے تھے اور وہ لوگ مال غنیمت حاصل کرتے تھے ، تو نبی اکرم صلی اللہ علیہ وسلم مال غنیمت کو پانچ حصوں میں تقسیم کرتے تھے آپ اس کے پانچ حصے کرتے تھے پھر یہ آیت تلاوت کرتے تھے : ” تم لوگ یہ بات جان لو کہ تم جو بھی چیز غنیمت کے طور پر حاصل کرتے ہو اس کا پانچواں حصہ اللہ تعالیٰ کے لئے مخصوص ہو گا “ ۔ یہ آیت یہاں تک ہے : ” اللہ تعالیٰ کے لئے مخصوص ہے ، جو کچھ بھی آسمانوں میں اور زمین میں ہے “ ۔ تو نبی اکرم صلی اللہ علیہ وسلم اللہ کا حصہ اور رسول اکرم صلی اللہ علیہ وسلم کا حصہ ایک ہی بناتے تھے اور قریبی رشتہ داروں کے لئے ( حصہ ہو گا ) تو آپ یہ دو حصے گھوڑے اور ہتھیار کے ذریعے قوت حاصل کرنے میں استعمال کرتے تھے آپ یتیموں مسکینوں اور مسافروں کا حصہ ان کے علاوہ کسی اور کو نہیں دیتے تھے جبکہ باقی کے چار حصے آپ گھوڑے کے دو حصے اور اس کے سوار کا ایک حصہ اور پیادہ شخص کا ایک حصہ کے اصول کے تحت تقسیم کرتے تھے ۔
یہ روایت امام طبرانی نے نقل کی ہے ۔ اس کی سند میں ایک راوی نہشل بن سعید ہے اور وہ متروک ہے ۔

طارق بن شہاب بیان کرتے ہیں : اہل بصرہ نے نہاوند کے مقام پر جنگ میں حصہ لیا ، تو اہل کوفہ نے ان کی امداد کی ان کے امیر سیدنا عمار بن یاسر رضی اللہ عنہ تھے ۔ وہ لوگ غالب آ گئے اہل بصرہ نے یہ ارادہ کیا کہ وہ اہل کوفہ کو تقسیم میں کوئی حصہ نہیں دیں گے تو بنو تمیم یا بنو عطارد سے تعلق رکھنے والے ایک شخص نے کہا: اے ناک کٹے غلام کیا تم یہ چاہتے ہو کہ تم ہمارے مال غنیمت میں ہمارے شراکت دار بن جاؤ ۔ راوی کہتے ہیں : ان کے کان نبی اکرم صلی اللہ علیہ وسلم کے ساتھ رہتے ہوئے کاٹے گئے تھے ، تو انہوں نے فرمایا : تم نے میرے اچھے کانوں کو برا کہا: ہے پھر انہوں نے اس بارے میں سیدنا عمر رضی اللہ عنہ کو خط لکھا تو سیدنا عمر رضی اللہ عنہ نے جوابی خط لکھا کہ غنیمت میں اس شخص کو حصہ ملے گا ، جس نے جنگ میں حصہ لیا تھا ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

قاسم بیان کرتے ہیں : سیدنا عبداللہ بن مسعود رضی اللہ عنہ نے فرمایا : اس ذات کی قسم جس کے علاوہ اور کوئی معبود نہیں ہے اللہ تعالیٰ نے سیدنا محمد صلی اللہ علیہ وسلم کی زبانی اس مال فئے کو فارس اور روم کے فتح ہونے سے پہلے تقسیم کروا دیا تھا ( یعنی اس کا حکم بیان کر دیا تھا ) ۔
یہ روایت امام طبرانی نے نقل کی ہے اور اس کی سند منقطع ہے ۔

سیدنا ابومالک اشعری رضی اللہ عنہ بیان کرتے ہیں : وہ اور اُن کے ساتھی کشتی میں بیٹھ کر آئے ، ان کے ساتھ ایک ” ابلق “ ( یعنی سفید و سیاہ رنگ کا ) گھوڑا تھا ۔ جب وہ لوگ کشتی سے اترے تو انہوں نے مشرکین کے بہت سے اونٹ پائے انہوں نے ان کو حاصل کیا سیدنا ابومالک رضی اللہ عنہ نے ان لوگوں کو حکم دیا کہ ان میں سے ایک اونٹ قربان کریں اور اس کے ذریعے مدد حاصل کریں ( یعنی اپنی خوراک حاصل کریں ) پھر وہ لوگ چلتے ہوئے نبی اکرم صلی اللہ علیہ وسلم کی خدمت میں حاضر ہوئے انہوں نے نبی اکرم صلی اللہ علیہ وسلم کو اپنے سفر اور اپنے ساتھیوں اور ان اونٹوں کے بارے میں بتایا جو انہیں ملے تھے پھر وہ اپنے ساتھیوں کے پاس واپس آئے جو لوگ نبی اکرم صلی اللہ علیہ وسلم کے پاس موجود تھے ۔ انہوں نے عرض کی : یا رسول اللہ ! آپ اونٹوں میں سے کچھ ہمیں بھی دیں نبی اکرم صلی اللہ علیہ وسلم نے فرمایا : تم لوگ ابومالک کے پاس چلے جاؤ جب وہ لوگ سیدنا ابومالک رضی اللہ عنہ کے پاس آئے تو انہوں نے ان اونٹوں کو پانچ حصوں میں تقسیم کیا پانچواں حصہ انہوں نے نبی اکرم صلی اللہ علیہ وسلم کو بھجوا دیا اور خمس کے بعد باقی بچ جانے والے کا ایک تہائی حصہ لے کر اپنے ساتھیوں میں تقسیم کیا اور باقی دو حصے انہوں نے دوسرے مسلمانوں میں تقسیم کیے پھر وہ لوگ نبی اکرم صلی اللہ علیہ وسلم کی خدمت میں حاضر ہوئے اور بولے : ابومالک نے مال غنیمت کے بارے میں جو کیا ہے ہم نے اس طرح کی صورت حال کبھی نہیں دیکھی تو نبی اکرم صلی اللہ علیہ وسلم نے فرمایا : اگر میں نے کچھ کرنا ہوتا ، تو میں بھی اسی طرح کرتا جس طرح اس نے کیا ہے ۔
یہ روایت امام طبرانی نے اپنے استاد مقدام بن داؤد کے حوالے سے نقل کی ہے اور وہ ضعیف ہے ۔

سیدنا جبیر بن معطم رضی اللہ عنہ بیان کرتے ہیں : نبی اکرم صلی اللہ علیہ وسلم نے بنو عبد شمس اور بنو نوفل کو خمس میں سے کچھ بھی نہیں دیا تھا ۔ جب کہ آپ صلی اللہ علیہ وسلم بنو ہاشم اور بنو مطلب کو اس میں سے حصہ دیتے تھے ۔ سیدنا ابوبکر رضی اللہ عنہ جب خمس تقسیم کرتے تھے ، تو وہ بھی نبی اکرم صلی اللہ علیہ وسلم کے طریقے کے مطابق تقسیم کرتے تھے البتہ وہ نبی اکرم صلی اللہ علیہ وسلم کے رشتہ داروں کو اس طرح ادائیگی نہیں کرتے تھے جس طرح نبی اکرم صلی اللہ علیہ وسلم کرتے تھے لیکن سیدنا عمر رضی اللہ عنہ انہیں ادائیگی کرتے رہے اور ان کے بعد سیدنا عثمان رضی اللہ عنہ بھی انہیں اس میں سے ادائیگی کرتے رہے ۔ ( علامہ ہیثمی فرماتے ہیں : ) میں یہ کہتا ہوں : ” صحیح “ میں اس کا ایک حصہ منقول ہے ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا عوف بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم کے پاس جب مال غنیمت میں سے کچھ آتا تھا ، تو آپ اسی دن میں اسے تقسیم کر دیتے تھے آپ شہریوں کو دو حصے دیتے تھے اور دیہاتیوں کو ایک حصہ دیتے تھے ہمیں بلایا گیا مجھے سیدنا عمار بن یاسر رضی اللہ عنہ سے پہلے بلا لیا گیا تھا ، انہیں ایک حصہ دیا گیا تو وہ ناراض ہو گئے ، یہاں تک کہ نبی اکرم صلی اللہ علیہ وسلم کو اور حاضرین کو ان کے چہرے سے اس بات کا اندازہ ہو گیا پھر سونے کا کچھ حصہ باقی رہ گیا تھا ۔ نبی اکرم صلی اللہ علیہ وسلم نے اپنے عصا کے کونے کے ذریعے اسے اٹھایا تو وہ گر گیا پھر آپ نے اسے اٹھایا پھر وہ گر گیا آپ نے فرمایا : اس وقت تمہارا کیا عالم ہو گا کہ جب تم اس سونے کے خزانے بناؤ گے کسی نے آپ کو جواب نہیں دیا ، تو سیدنا عمار بن یاسر رضی اللہ عنہ نے عرض کی : ہماری یہ خواہش ہے ۔ اللہ کی قسم ! کہ ہمیں خزانے دیے جائیں ، تو جس نے صبر کرنا ہو وہ صبر کرے اور جس نے آزمائش میں مبتلاء ہونا ہے وہ آزمائش میں مبتلاء ہو ، تو نبی اکرم صلی اللہ علیہ وسلم نے ان سے فرمایا شاید تم اس میں سب سے زیادہ بری آزمائش میں مبتلاء ہو گے ۔ ( علامہ ہیثمی فرماتے ہیں : ) میں یہ کہتا ہوں : امام ابوداؤد نے اس روایت میں سے یہاں تک الفاظ نقل کیے ہیں : ” عربوں کو ایک حصہ دیا “ ۔
یہ روایت امام طبرانی نے نقل کی ہے اور اس کے رجال صحیح کے رحال ہیں اور اس کا متن منکر ہے ، کیونکہ نبی اکرم صلی اللہ علیہ وسلم نے اہل بدر میں سے کسی بھی شخص کے لئے اس طرح کی بات ارشاد نہیں فرمائی ہے باقی اللہ بہتر جانتا ہے ۔

سیدنا ابولیلی رضی اللہ عنہ بیان کرتے ہیں : نبی اکرم صلی اللہ علیہ وسلم نے مال غنیمت تقسیم کیا تو آپ نے اپنے اصحاب میں سے دس افراد کو ایک بکری دی ۔
یہ روایت امام ابویعلیٰ نے امام طبرانی نے معجم اوسط میں نقل کی ہے ۔ امام أحمد نے اسے زیادہ مکمل اور زیادہ طویل روایت کے طور پر نقل کیا ہے ۔ امام أحمد کی نقل کردہ حدیث اس سے پہلے لوٹ مار کی ممانعت سے متعلق باب میں گزر چکی ہے ۔ امام أحمد کے رجال صحیح کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے غزوہ حنین کے موقع پر اسی گھوڑوں کو دو دو حصے دیے تھے ۔
یہ روایت امام طبرانی نے نقل کی ہے ۔ اس کی سند میں ایک راوی کثیر ہے ، جو بنو مخزوم کا غلام ہے میں اس سے واقف نہیں ہوں اس روایت کے بقیہ رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے خچر کو کچھ نہیں دیا ، آپ نے قوت اور جودت میں اس کو عربی ( گھوڑے ) کے حصے سے کم دیا ۔ راوی کہتے ہیں : ” کودن “ سے مراد سست خچر ہے ۔
یہ روایت امام طبرانی نے نقل کی ہے ۔ اس کی سند میں ایک راوی ابوبلال اشعری ہے اور وہ ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے غزوہ بدر کے موقع پر گھڑ سوار کو دو حصے دیے تھے اور پیادہ کو ایک حصہ دیا تھا ۔
یہ روایت امام ابویعلیٰ نے نقل کی ہے ۔ اس کی سند میں ایک راوی محمد بن ابولیلی ہے وہ خراب حافظے کا مالک ہے ، لیکن
یہ روایت متابعات کے ذریعے قوی ہو جاتی ہے ۔

سیدنا زبیر رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا زبیر رضی اللہ عنہ کو ایک حصہ دیا تھا ، اور ان کی والدہ کو ایک حصہ دیا تھا ، اور ان کے گھوڑے کو دو حصے دیے تھے ۔
یہ روایت امام أحمد نے نقل کی ہے اور اس کے رجال ثقہ ہیں ۔

سیدنا ابورہم رضی اللہ عنہ اور ان کے بھائی یہ دونوں غزوہ حنین کے موقع پر گھڑ سوار تھے ، تو ان دونوں کو چھ حصے دیے گئے چار حصے ان دونوں کے گھوڑوں کے اور دو حصے ان دونوں حضرات کے تھے ، تو ان دونوں حضرات نے دو حصے ، دو جوان اونٹوں کے بدلے میں فروخت کر دیے ۔
یہ روایت امام ابویعلیٰ اور امام طبرانی نے نقل کی ہے تاہم انہوں نے یہ الفاظ نقل کیے ہیں : سیدنا ابورہم رضی اللہ عنہ کے حوالے سے یہ بات منقول ہے وہ بیان کرتے ہیں : میں اور میرا بھائی غزوہ خیبر میں شریک ہوئے ۔ ۔ ۔ ۔ ۔ ۔ ۔ ۔ ۔ ۔ اس کے بعد باقی حدیث حسب سابق ہے ۔ اس روایت کی سند میں ایک راوی اسحاق بن ابوفروہ ہے اور وہ متروک ہے ۔

سیدنا مقداد بن عمرو رضی اللہ عنہ کے بارے میں یہ بات منقول ہے : غزوہ بدر کے موقع پر وہ ایک گھوڑے پر سوار تھے جس کا نام سبحہ تھا ۔ نبی اکرم صلی اللہ علیہ وسلم نے ان کے گھوڑے کا ایک حصہ انہیں دیا تھا ، اور ان کا ایک حصہ انہیں دیا تھا ۔
یہ روایت امام طبرانی نے نقل کی ہے ۔ اس کی سند میں ایک راوی واقدی ہے اور وہ ضعیف ہے ۔

سیدنا ابوکبشہ انماری رضی اللہ عنہ بیان کرتے ہیں : جب نبی اکرم صلی اللہ علیہ وسلم نے مکہ فتح کیا تو سیدنا زبیر بن عوام رضی اللہ عنہ بائیں طرف موجود دستے کے امیر تھے اور سیدنا مقداد رضی اللہ عنہ دائیں طرف موجود دستے کے امیر تھے جب نبی اکرم صلی اللہ علیہ وسلم مکہ میں داخل ہوئے تو لوگ ان دونوں حضرات کے گھوڑے لے کے آئے نبی اکرم صلی اللہ علیہ وسلم اٹھے آپ نے ان دونوں کے چہروں سے غبار اپنے کپڑے کے ذریعے اتارا اور فرمایا : میں گھوڑے کے لئے دو حصے اور گھڑ سوار کے لئے ایک حصہ مقرر کرتا ہوں جو شخص اس کی خلاف ورزی کرے گا اللہ تعالیٰ اسے سزا دے ۔
یہ روایت امام طبرانی نے نقل کی ہے ۔ اس کی سند میں ایک راوی عبداللہ بن بشر حبرانی ہے جسے ابن حبان نے ثقہ قرار دیا ہے اور جمہور نے اسے ضعیف کہا: ہے ۔

سیدنا ابورہم رضی اللہ عنہ اپنے بھائی کے بارے میں یہ بات نقل کرتے ہیں : یہ دونوں حضرات غزوہ خیبر کے موقع پر گھڑ سوار تھے ، تو ان حضرات کو چھ حصہ دیے گئے چار حصے ان دونوں کے گھوڑوں کے لئے تھے اور دو حصے ان دونوں حضرات کے تھے ، تو انہوں نے دو جوان اونٹوں کے عوض میں دو حصے فروخت کیے ۔
یہ روایت امام طبرانی نے نقل کی ہے ۔ اس کی سند میں ایک راوی اسحاق بن ابوفروہ ہے اور وہ متروک ہے ۔

سیدنا زید بن ثابت رضی اللہ عنہ بیان کرتے ہیں : نبی اکرم صلی اللہ علیہ وسلم نے گھوڑے کے لئے دو حصے اور آدمی کے لئے ایک حصہ مقرر کیا تھا ۔
یہ روایت امام طبرانی نے نقل کی ہے ۔ اس کی سند میں ایک راوی عبدالجبار بن سعید مساحقی ہے اور وہ ضعیف ہے باقی اللہ بہتر جانتا ہے ۔