مجمع الزوائد ومنبع الفوائد

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب بھی اللہ تعالیٰ کسی بندے کو کوئی نعمت عطا کرتا ہے ، تو وہ اس بات کو پسند کرتا ہے کہ اس نعمت کا اثر اس بندے پر نظر آئے “ ۔
یہ روایت امام أحمد نے نقل کی ہے ۔ اس کی سند میں ایک راوی یحیی بن عبیداللہ بن موہب ہے ، اور وہ ضعیف ہے ۔

ابورجاء عطاردی بیان کرتے ہیں : سیدنا عمران بن حصین رضی اللہ عنہ ہمارے پاس تشریف لائے ان کے جسم پر ” خر “ ( ریشم ، یا ریشم اور اون سے بنا ہوا کپڑا ، اس ) کی چادر تھی ، ہم نے وہ لباس اس سے پہلے کبھی ان کے جسم پر نہیں دیکھا انہوں نے بتایا نبی اکرم صلی اللہ علیہ وسلم نے ارشاد فرمایا ہے : ” جس شخص کو اللہ تعالیٰ نے نعمت عطا کرے ، تو اللہ تعالیٰ اس بات کو پسند کرتا ہے کہ اُس کی نعمت کا اثر ، بندے پر نظر آنا چاہیے “ ۔
یہ روایت امام أحمد نے نقل کی ہے ۔ اور امام طبرانی نے نقل کی ہے ۔ امام أحمد کے رجال ثقہ ہیں ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ جمیل ہے ، وہ جمال کو پسند کرتا ہے ، اور یہ بات پسند کرتا ہے کہ اُس کی نعمت کا اثر ، اس کے بندے پر نظر آئے “ ۔
یہ روایت امام ابویعلیٰ نے نقل کی ہے ۔ اس کی سند میں ایک راوی عطیہ عوفی ہے ، اور وہ ضعیف ہے ویسے اس کی توثیق کی گئی ہے ۔

سیدنا زہیر بن ابوعلقمہ ضعبی رضی اللہ عنہ کے بارے میں یہ بات منقول ہے : وہ بیان کرتے ہیں : ایک شخص برے حال میں نبی اکرم صلی اللہ علیہ وسلم کی خدمت میں حاضر ہوا نبی اکرم صلی اللہ علیہ وسلم نے دریافت کیا : کیا تمہارے پاس مال ہے ؟ اس نے عرض کی : جی ہاں ! ہر قسم کا ہے ۔ نبی اکرم صلی اللہ علیہ وسلم نے فرمایا : پھر وہ تم پر نظر آنا چاہیے ، کیونکہ اللہ تعالیٰ اس بات کو پسند کرتا ہے کہ وہ اس کا اثر اپنے بندے پر اچھی حالت میں دیکھے ، وہ برے حال اور برا حال اختیار کرنے کو پسند نہیں کرتا ۔
یہ روایت امام طبرانی نے نقل کی ہے ۔ انہوں نے سیدنا زہیر کے ( نام کا عنوان قائم کیا ہے ) ، اور اس روایت کے رجال ثقہ ہیں ۔

محمد بن اشعث اپنے والد کے حوالے سے ، اپنے دادا کا یہ بیان نقل کرتے ہیں : نبی اکرم صلی اللہ علیہ وسلم نے ارشاد فرمایا : ” تیل ’ میل ( یا خشکی ) کو ختم کر دیتا ہے ، اور لباس خوشحالی کو ظاہر کرتا ہے ، اور خادم کے ساتھ اچھا سلوک کرنا ، دشمن کو کمزور کر دیتا ہے “ ۔
یہ روایت امام بزار نے نقل کی ہے ۔ اس کی سند میں ایک راوی سلیمان بن ابوعبیداللہ ابوایوب رقی ہے ، اور وہ ضعیف ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” لباس خوشحالی ظاہر کرتا ہے ، تیل برے حال ( یا خشکی ) کو ختم کر دیتا ہے ، اور غلام کے ساتھ اچھا سلوک کرنا ، اس کی وجہ سے اللہ تعالیٰ دشمن کو کمزور کرتا ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عبدالسلام بن عبدالقدوس کلاعی ہے ، اور وہ انتہائی ضعیف ہے ۔

سیدنا ابوحازم رضی اللہ عنہ بیان کرتے ہیں : وہ نبی اکرم صلی اللہ علیہ وسلم کی خدمت میں حاضر ہوئے ان کا ظاہری حلیہ خراب تھا ۔ نبی اکرم صلی اللہ علیہ وسلم نے دریافت کیا : تمہارے پاس مال ہے ۔ انہوں نے جواب دیا : ہر قسم کا مال ہے اللہ تعالیٰ نے مجھے اونٹ گائے بکریاں عطا کی ہیں ۔ نبی اکرم صلی اللہ علیہ وسلم نے فرمایا : جس شخص کے پاس مال موجود ہو ، تو اس ( مال ) کا اثر اس پر نظر آنا چاہیے ۔
یہ روایت امام طبرانی نے نقل کی ہے ۔ اس کی سند میں ایک راوی یحیی بن یزید بن ابوبردہ ہے ، اور وہ ضعیف ہے ۔

ابواحوص اپنے والد کے بارے میں یہ بات نقل کرتے ہیں وہ نبی اکرم صلی اللہ علیہ وسلم کی خدمت میں ایک دیہاتی کے حلیے میں بکھرے ہوئے غبار آلود بالوں کے ساتھ حاضر ہوئے نبی اکرم صلی اللہ علیہ وسلم نے دریافت کیا : کیا تمہارے پاس مال ہے ؟ انہوں نے عرض کی : ہر قسم کا مال اللہ تعالیٰ نے مجھے عطا کیا ہے ۔ نبی اکرم صلی اللہ علیہ وسلم نے ارشاد فرمایا : ” جب اللہ تعالیٰ بندے کو نعمت عطا کرتا ہے ، تو وہ اس بات کو پسند کرتا ہے کہ وہ نعمت اس پر نظر بھی آئے “ ۔
یہ روایت امام طبرانی نے معجم صغیر میں نقل کی ہے ۔ اور اس کے رجال صحیح کے رجال ہیں ۔

کریب بن ابرہہ بیان کرتے ہیں : میں نے سیدنا ابوریحانہ رضی اللہ عنہ کو یہ بیان کرتے ہوئے سنا ہے وہ کہتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” تکبر میں سے کوئی چیز جنت میں داخل نہیں ہو گی ( یعنی تکبر کرنے والا شخص جنت میں داخل نہیں ہو گا ) ۔ راوی کہتے ہیں : ایک صاحب نے عرض کی : یا رسول اللہ ! میں یہ بات پسند کرتا ہوں کہ میری سوٹی عمدہ ہونی چاہیے اور میرے جوتے کا تسمہ عمدہ ہونا چاہیے نبی اکرم صلی اللہ علیہ وسلم نے ارشاد فرمایا : یہ تکبر نہیں ہے بے شک اللہ تعالیٰ جمیل ہے ، اور جمال کو پسند کرتا ہے تکبر اس شخص کا ہوتا ہے جو حق کا انکار کرے اور لوگوں کو اپنی نظر میں کمتر سمجھے ۔
یہ روایت امام أحمد نے نقل کی ہے ۔ اس کے رجال ثقہ ہیں
یہ روایت امام طبرانی نے معجم کبیر اور معجم اوسط میں نقل کی ہے ۔

سیدنا عبداللہ بن عمر رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص اپنے کپڑے کو ، ( تکبر کے طور پر لٹکا کر ) زمین پر گھسیٹے گا ، تو اللہ تعالیٰ اس کی طرف نظر رحمت نہیں کرے گا “ ۔ تو سیدنا ابوریحانہ رضی اللہ عنہ نے عرض کی : آپ نے جو ہمیں حکم ارشاد فرمایا ہے : اللہ کی قسم ! اس نے ہمیں بیمار کر دیا اللہ کی قسم ! میں ، تو جمال کو پسند کرتا ہوں یہاں تک کہ میں اپنے جوتے کے تسمے اور اپنی لاٹھی کے دستے میں بھی عمدگی چاہتا ہوں ، تو کیا یہ چیز تکبر میں شامل ہو گی ؟ نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ جمیل ہے وہ جمال کو پسند کرتا ہے ، اور یہ بات پسند کرتا ہے کہ اپنی نعمت کا اثر وہ اپنے بندے پر دیکھے لیکن تکبر یہ ہے کہ جو شخص حق سے منہ موڑے اور لوگوں کو کمتر سمجھے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی موسیٰ بن عیسیٰ دمشقی ہے ۔ امام ذہبی کہتے ہیں : یہ مجہول ہے اس روایت کے بقیہ رجال صحیح کے رجال ہیں ۔

سیدنا عبداللہ بن عمرو رضی اللہ عنہ بیان کرتے ہیں : میں نے عرض کی : یا رسول اللہ ! کیا یہ بات تکبر میں شامل ہے کہ میرے پاس حلہ ہو ، جسے میں پہن لوں ؟ نبی اکرم صلی اللہ علیہ وسلم نے ارشاد فرمایا : جی نہیں میں نے عرض کی : کیا یہ چیز تکبر میں شامل ہے کہ میرے پاس سواری ہو کہ جس پر میں سوار ہو جاؤں نبی اکرم صلی اللہ علیہ وسلم نے ارشاد فرمایا : جی نہیں میں نے عرض کی : کیا یہ بات تکبر میں شامل ہے کہ میں کھانا تیار کروں ، اور اپنے دوستوں کی دعوت کر دوں نبی اکرم صلی اللہ علیہ وسلم نے ارشاد فرمایا : جی نہیں ! تکبر یہ ہے کہ تم حق کا انکار کرو اور لوگوں کو کمتر سمجھو “ ۔
یہ روایت امام بزار نے نقل کی ہے ۔ امام أحمد نے اسے ایک طویل حدیث کے ضمن میں نقل کیا ہے جو اس سے پہلے سیدنا نوح علیہ السلام کی وصیت والے باب میں کتاب الوصایا میں گزر چکی ہے ۔ امام أحمد کے رجال ثقہ ہے ۔

حسین نامی راوی بیان کرتے ہیں : سیدنا عبداللہ بن عمرو رضی اللہ عنہ نے عرض کی : یا رسول اللہ ! کیا یہ چیز تکبر میں شامل ہے کہ ہم میں سے کسی ایک کے پاس عمدہ قسم کی اونٹنی ہو ؟ نبی اکرم صلی اللہ علیہ وسلم نے ارشاد فرمایا : جی نہیں انہوں نے عرض کی : کیا یہ چیز تکبر میں شامل ہے کہ ہم میں سے کسی کے پاس دو عمدہ قسم کے حلے ہوں ؟ نبی اکرم صلی اللہ علیہ وسلم نے ارشاد فرمایا : جی نہیں انہوں نے عرض کی : کیا یہ چیز تکبر میں شامل ہے کہ میں کھانا تیار کروں ، اور اپنی قوم کی دعوت دوں وہ میرے پیچھے چلتے ہوئے آئیں اور میرے ہاں کھانا کھائیں نبی اکرم صلی اللہ علیہ وسلم نے ارشاد فرمایا : جی نہیں ۔ میں نے عرض کی : یا رسول اللہ ! پھر تکبر کیا ہے ۔ نبی اکرم صلی اللہ علیہ وسلم نے ارشاد فرمایا : ” یہ کہ تم حق سے روگردانی کرو اور لوگوں کو حقیر سمجھو “ ۔
یہ روایت امام طبرانی نے معجم اوسط اور معجم کبیر میں نقل کی ہے ۔ اس کی سند میں ایک راوی عبدالحمید بن سلیمان ہے ، اور وہ ضعیف ہے ۔

سیدنا جابر بن عبداللہ رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے ہمراہ ایک غزوہ میں شرکت کے لیے روانہ ہوئے ایک مرتبہ میں نے نبی اکرم صلی اللہ علیہ وسلم کے ساتھ ایک درخت کے نیچے پڑاؤ کیا میں نے نبی اکرم صلی اللہ علیہ وسلم کو دیکھا میں نے عرض کی : یا رسول اللہ ! آپ سائے کی طرف آ جائیں نبی اکرم صلی اللہ علیہ وسلم نیچے اترے میں نے تھیلے میں ایک چھوٹی ککڑی پائی نبی اکرم صلی اللہ علیہ وسلم نے دریافت کیا : یہ تمہارے پاس کہاں سے آئی ہے پھر راوی نے ایک کلمہ ذکر کیا پھر ایک شخص مڑ کے چلا گیا اس کے جسم پر دو کپڑے تھے جو پرانے ہو چکے تھے ۔ نبی اکرم صلی اللہ علیہ وسلم نے اس کی طرف دیکھا اور فرمایا کیا اس کے پاس اس کے علاوہ کپڑے نہیں ہیں ؟ میں نے عرض کی : یا رسول اللہ ! اس کے پاس تھیلے میں دو کپڑے ہیں جو آپ نے اسے پہننے کے لئے دیے تھے ۔ نبی اکرم صلی اللہ علیہ وسلم نے فرمایا : اسے بلاؤ اور اسے کہو کہ وہ ان کو پہنے میں نے اس شخص کو بلایا اس نے ان دونوں کو پہن لیا اور پھر وہ مڑ کر چلا گیا نبی اکرم صلی اللہ علیہ وسلم نے فرمایا : اسے کیا ہوا ہے ؟ اللہ تعالیٰ اس کی گردن مار دے کیا یہ زیادہ بہتر نہیں ہے اس شخص نے یہ بات سنی ، تو وہ واپس آیا اور عرض کی : کیا اللہ کی راہ میں ( میری گردن اتاری جائے گی ؟ ) نبی اکرم صلی اللہ علیہ وسلم نے فرمایا : اللہ کی راہ میں ( راوی بیان کرتے ہیں : ) تو وہ شخص اللہ کی راہ میں شہید ہوا ۔
یہ روایت امام بزار نے مختلف اسانید کے ساتھ نقل کی ہے ۔ جن میں سے ایک کے رجال صحیح کے رجال ہیں ۔
یہ روایت امام مالک نے ” موطا “ میں نقل کی ہے ۔ اور اس میں یہ الفاظ نقل کیے ہیں : ” یہ تم لوگوں کے پاس کہاں سے آئی ہے ؟ میں نے عرض کی : مدینہ سے “ ۔

عثمان بن محمد بن قیس بیان کرتے ہیں : میرے والد نے میرے ہاتھ میں ایسی چھڑی دیکھی جس کا علاقہ ( لٹکانے والا حصہ ) نہیں تھا انہوں نے فرمایا : نبی اکرم صلی اللہ علیہ وسلم نے ایک شخص سے فرمایا : ” اپنی چھڑی کے علاقہ کو اچھا رکھو کیونکہ اللہ تعالیٰ جمیل ہے ، اور جمال کو پسند کرتا ہے “ ۔
یہ روایت امام طبرانی نے نقل کی ہے ۔ اس کی سند میں ایسے راوی ہیں جن سے میں واقف نہیں ہوں ۔

سیدنا سواد بن عمرو انصاری رضی اللہ عنہ بیان کرتے ہیں : میں نے عرض کی : یا رسول اللہ ! میں ایک ایسا شخص ہوں کہ میرے نزدیک جمال کو پسندیدہ کر دیا گیا ہے ، اور مجھے اس میں سے جو کچھ دیا گیا ہے وہ آپ ملاحظہ فرما رہے ہیں یہاں تک کہ مجھے یہ بات بھی پسند نہیں ہے کہ کسی کے جوتے کا تسمہ میرے جوتے کے تسمے سے زیادہ اچھا ہو یہاں ایک لفظ کے بارے میں راوی کو شک ہے ) تو کیا یہ چیز تکبر میں شامل ہو گی ؟ نبی اکرم صلی اللہ علیہ وسلم نے ارشاد فرمایا : جی نہیں میں نے عرض کی : یا رسول اللہ ! پھر تکبر کیا ہے نبی اکرم صلی اللہ علیہ وسلم نے فرمایا : ” جو حق سے روگردانی کرے اور لوگوں کو حقیر سمجھے “ ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بے شک اللہ تعالیٰ جمیل ہے ، اور وہ جمال کو پسند کرتا ہے “ ۔
یہ روایت امام طبرانی نے نقل کی ہے ۔ اس کی سند میں ایک راوی جعفر بن زبیر ہے ، اور وہ متروک ہے ۔

سیدنا ثابت بن قیس رضی اللہ عنہ بیان کرتے ہیں : نبی اکرم صلی اللہ علیہ وسلم کے سامنے تکبر کا ذکر کیا گیا تو آپ نے اس بارے میں سختی کا اظہار کیا اور ارشاد فرمایا بے شک اللہ تعالیٰ ہر متکبر فخر کرنے والے شخص کو پسند نہیں کرتا حاضرین میں سے ایک صاحب نے عرض کی : اللہ کی قسم ! یا رسول اللہ ! میں اپنے کپڑے دھوتا ہوں ، تو مجھے ان کی سفیدی اچھی لگتی ہے ، اور مجھے اپنے جوتے کا تسمہ اچھا لگتا ہے ، اور مجھے اپنی لاٹھی کا علاقہ ( لٹکانے کی جگہ ) اچھا لگتا ہے ۔ نبی اکرم صلی اللہ علیہ وسلم نے فرمایا : ” یہ چیز تکبر نہیں ہے ، تکبر یہ ہے کہ تم حق سے رو گردانی کرو اور لوگوں کو حقیر سمجھو “ ۔
یہ روایت امام طبرانی نے معجم کبیر اور معجم اوسط میں نقل کی ہے ۔ امام بزار نے اس کی مانند روایت نقل کی ہے ۔ اس ک سند میں ایک راوی محمد بن ابولیلیٰ ہے ، اور وہ خراب حافظے کا مالک ہے اس کی نقل کردہ حدیث ان شواہد کی بنیاد پر حسن ہے جو اس سے پہلے اس باب میں گزر چکے ہیں ، البتہ عبدالرحمن نامی راوی نے سیدنا ثابت رضی اللہ عنہ سے سماع نہیں کیا ہے ۔ ( علامہ ہیثمی فرماتے ہیں : ) میں یہ کہتا ہوں ۔ اس روایت کا ایک طریق سورت نساء سے متعلق باب میں بھی ہے اس روایت کے مختلف طرق ہیں جو کتاب الایمان میں گزر چکے ہیں اور اس کے کچھ طرق کتاب الزہد میں ہیں ۔

سیدنا عبداللہ بن مسعود رضی اللہ عنہ کے غلام نفیح بیان کرتے ہیں : سیدنا عبداللہ بن مسعود رضی اللہ عنہ سب سے زیادہ عمدہ سفید کپڑا پہنتے تھے اور سب سے زیادہ پاکیزہ خوشبو لگاتے تھے ۔
یہ روایت امام طبرانی نے نقل کی ہے ۔ نفیع نامی اس راوی کا ذکر ابن ابوحاتم نے کیا ہے ۔ انہوں نے اس پر جرح نہیں کی ہے اسی طرح سلیمان بن میناء ایک راوی ہے اس روایت کے بقیہ رجال ثقہ ہیں ، البتہ ابوحاتم نے یہ کہا: ہے کہ مسعودی نے سلیمان سے سماع نہیں کیا ، تو
یہ روایت مرسل ہے ۔ ابونعیم نے مسعودی سے اختلاط کا شکار ہونے سے پہلے سماع کیا تھا ۔

سیدنا جابر رضی اللہ عنہ بیان کرتے ہیں : سیدنا تمیم داری رضی اللہ عنہ نے ایک چادر ایک ہزار کے عوض میں خریدی تھی وہ اس میں نماز ادا کرتے تھے ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں ۔