مجمع الزوائد ومنبع الفوائد

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ کی بارگاہ میں مؤمن کی کرامت میں یہ بات بھی شامل ہے کہ اس کا لباس صاف ہو اور وہ تھوڑی چیز سے راضی ہو جائے “ ۔
یہ روایت امام طبرانی نے نقل کی ہے ۔ اس کی سند میں ایک راوی عباد بن کثیر ہے ، جسے یحیی بن معین نے ثقہ قرار دیا ہے ، اور دیگر حضرات نے اسے ضعیف کہا: ہے ایک راوی جرول بن حنفل ہے جو ثقہ ہے علی بن مدینی کہتے ہیں : اس سے منکر روایات منقول ہیں اس روایت کے بقیہ رجال ثقہ ہیں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” اسلام صفائی کا نام ہے ، تو تم لوگ صفائی اختیار کرو کیونکہ صرف صاف ستھرا شخص ہی جنت میں داخل ہو گا “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی نعیم بن مورع ہے ، اور وہ ضعیف ہے ۔