مجمع الزوائد ومنبع الفوائد

سیدنا ابوحمید ساعدی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مسلمان کے لئے یہ بات جائز نہیں ہے کہ وہ اپنے بھائی کا مال ناحق طور پر حاصل کرے اس کی وجہ یہ ہے کہ اللہ تعالی نے مسلمان کے مال کو دوسرے مسلمان پر حرام قرار دیا ہے “ ۔

ایک روایت میں یہ الفاظ ہیں : ” مسلمان کے لئے یہ بات حلال نہیں ہے ، کہ وہ اپنے بھائی کا عصا اس کی مرضی کے بغیر حاصل کرے “ ۔

ایک روایت میں یہ الفاظ ہیں : ” مسلمان کے لئے یہ حلال نہیں ہے کہ وہ عصا حاصل کرے “ ۔
یہ روایت امام أحمد اور امام بزار نے نقل کی ہے ان تمام روایات کے رجال صحیح کے رجال ہیں ۔

سیدنا عمرو بن یثربی رضی اللہ عنہ بیان کرتے ہیں : نبی اکرم صلی اللہ علیہ وسلم نے ہمیں خطبہ دیتے ہوئے ارشاد فرمایا : ” خبردار ! کسی شخص کے لئے اس کے بھائی کے مال میں سے کوئی چیز حلال نہیں ہے ، البتہ جو اس کی رضامندی سے ہو ، اس کا حکم مختلف ہے ، میں نے عرض کی : یا رسول اللہ ! اس بارے میں آپ کی کیا رائے ہے کہ اگر میں اپنے چچازاد کی بکریاں دیکھتا ہوں ، تو کیا میں ان میں سے ایک بکری لے سکتا ہوں ؟ نبی اکرم صلی اللہ علیہ وسلم نے فرمایا : اگر تم اسے ایسی حالت میں ملتے ہو کہ وہ بھیڑ ہو اور تم نے ” خبط الجمیش “ میں چھری اور لکڑی ( یا پتھر ) اٹھایا ہوا ہو ، تو پھر بھی تم اس کا قصد نہ کرو ! راوی کہتے ہیں : اس سے مراد ” خبط الجمیش “ ہے ، جو مکہ اور جار کے درمیان ایک جگہ ہے ، وہاں کوئی نہیں ہوتا ، اسی طرح اس کے پہلو میں بھی کوئی نہیں ہوتا ، انہوں نے لفظ ” حبت “ استعمال نہیں کیا ۔

ایک روایت میں سیدنا عمرو بن یثربی رضی اللہ عنہ کے حوالے سے یہ بات منقول ہے : وہ بیان کرتے ہیں : میں نے منی میں نبی اکرم صلی اللہ علیہ وسلم کو خطبہ دیتے ہوئے سنا آپ نے خطبہ میں یہ بات ارشاد فرمائی : کسی مسلمان کے لئے اس کے بھائی کے مال میں سے کوئی چیز حلال نہیں ہے ، البتہ اس چیز کا معاملہ مختلف ہے ، جو وہ اپنی خوشی سے دے ، راوی کہتے ہیں : جب میں نے یہ بات سنی ، تو میں نے عرض کی : یا رسول اللہ ! اگر میں اپنے چچازاد کی بکریوں سے ملتا ہوں ۔ ۔ ۔ ۔ ۔ ۔ ۔ ۔ ۔ اس کے بعد راوی نے حسب سابق حدیث ذکر کی ہے ۔
یہ روایت امام أحمد نے اور ان کے صاحبزادے اپنی ” زیادات “ میں نقل کی ہے اور امام طبرانی نے معجم کبیر اور معجم اوسط میں نقل کی ہے ۔ انہوں نے لفظ ” حبت “ نقل کیا ہے ، جو درست ہے ، امام أحمد کے رجال ثقہ ہیں ۔

سیدنا واثلہ بن اسقع رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ایک مسلمان کی جان عزت اور مال دوسرے مسلمان کے لئے قابل احترام ہیں ، مسلمان مسلمان کا بھائی ہوتا ہے وہ اس پر ظلم نہیں کرتا ، وہ اسے رسوا نہیں کرتا تقویٰ یہاں ہوتا ہے “ نبی اکرم صلی اللہ علیہ وسلم نے ہاتھ کے ذریعے دل کی طرف اشارہ کر کے یہ بات ارشاد فرمائی ۔
یہ روایت امام أحمد نے نقل کی ہے اور اس کے رجال ثقہ ہیں ۔

سیدنا عبدالله رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مسلمان کے مال کی حرمت ، اس کی جان کی حرمت کی مانند ہے “ ۔
یہ روایت امام بزار اور امام ابویعلیٰ نے نقل کی ہے ، اس کی سند میں ایک راوی محمد بن دینار ہے ، جسے ابن حبان اور ایک جماعت نے ثقہ قرار دیا ہے ، جبکہ ایک جماعت نے اسے ضعیف کہا: ہے امام ابویعلیٰ کے بقیہ رجال ثقہ ہیں ، تاہم انہوں نے یہ ایک حدیث کے ضمن میں نقل کیا ہے : ” مسلمان کو برا کہنا فسق ہے ، اور اس سے قتال کفر ہے “ ۔ امام بزار کے رجال میں عمرو بن عثمان کلابی ہے ، جسے ابن حبان نے ثقہ قرار دیا ہے ، ازدی کہتے ہیں : یہ متروک ہے ۔

ابوحرہ رقاشی ، اپنے چچا کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں : ” مسلمان شخص کا مال ، اس کی رضا مندی کے بغیر حلال نہیں ہے “ ۔
یہ روایت امام ابویعلیٰ نے نقل کی ہے ، ابوحرہ کو امام ابوداؤد نے ثقہ قرار دیا ہے اور یحیی بن معین نے انہیں ضعیف کہا: ہے ۔

طالب بن سلمیٰ بن عاصم بن حکم بیان کرتے ہیں : میرے اہل خانہ میں سے کسی نے مجھے یہ بات بتائی کہ میرے دادا نے ان لوگوں کو یہ بات بتائی تھی کہ وہ نبی اکرم صلی اللہ علیہ وسلم کے خطبہ میں موجود تھے ، نبی اکرم صلی اللہ علیہ وسلم نے ارشاد فرمایا : ” خبردار ! تمہارے اموال ، تمہاری جانیں ایک دوسرے کے لئے قابل احترام ہیں ، جس طرح اس دن میں ، یہ شہر قابل احترام ہے ، خبردار ! میں تم لوگوں کو ایسی حالت میں نہ پاؤں ، کہ تم میرے بعد دوبارہ کافر بن جاؤ اور ایک دوسرے کی گردنیں اڑانے لگو خبردار ! تم میں سے موجود شخص غیر موجود تک تبلیغ کر دے ، مجھے نہیں معلوم ہو سکتا ہے آج کے دن کے بعد میری تم سے ملاقات نہ ہو ، اے اللہ ! ان لوگوں پر گواہ ہو جا ، اے اللہ ! کیا میں نے تبلیغ کر دی ہے “ ۔
یہ روایت امام ابویعلیٰ نے نقل کی ہے ، طالب نامی راوی اور اس کے استاد کے حالات بیان کرتے ہوئے میں نے کسی کو نہیں پایا ہے ، اس نوعیت کی دیگر احادیث ، فتنوں سے متعلق باب میں اور دیگر ابواب میں آگے آئیں گی ، اگر اللہ نے چاہا ۔

سیدنا سائب بن یزید رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” تم میں سے کوئی ایک اپنے ساتھی کا سامان مذاق یا سنجیدگی کے طور پر حاصل نہ کرے ، اور جب کسی نے اپنے ساتھی کی کوئی چیز لے لی ہو ، تو وہ اُسے واپس کر دے “ ۔ ( علامہ ہیثمی فرماتے ہیں : ) میں یہ کہتا ہوں :
یہ روایت ” سنن “ میں سائب کی اپنے والد کے حوالے سے نقل کردہ روایت کے طور پر نقل کی گئی ہے ۔
یہ روایت امام طبرانی نے معجم کبیر میں ان کی نقل کردہ روایت کے طور پر نقل کی ہے ، جو انہوں نے نبی اکرم صلی اللہ علیہ وسلم کو ارشاد فرماتے ہوئے سنا ہے ، اس روایت کی سند میں ایک راوی عبداللہ بن یزید بن سائب ہے ، میں نے کسی کو اس کے حالات بیان کرتے ہوئے نہیں پایا ہے ، اس کے بقیہ رجال صحیح کے رجال ہیں ۔