مجمع الزوائد ومنبع الفوائد

سیدنا معاذ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جن بھی دو مسلمان ( میاں بیوی ) کی اولاد میں سے دو بچے فوت ہو جائیں تو اللہ تعالیٰ ان دونوں ( بچوں ) پر اپنی رحمت کے فضل کی وجہ سے ان دونوں ( میاں بیوی ) کو جنت میں داخل کر دے گا لوگوں نے عرض کی : یا رسول اللہ ! اگر دو ہوئے ہوں ۔ نبی اکرم صلی اللہ علیہ وسلم نے ارشاد فرمایا : اگر دو ہوں ( تو بھی یہی اجر و ثواب حاصل ہو گا ) لوگوں نے عرض کی : اگر ایک ہوا ہو ؟ نبی اکرم صلی اللہ علیہ وسلم نے ارشاد فرمایا : اگر ایک ہوا ہو ( تو بھی یہی اجر و ثواب حاصل ہو گا ) پھر آپ نے ارشاد فرمایا : ” اس ذات کی قسم جس کے دست قدرت میں میری جان ہے مردہ پیدا ہونے والا بچہ بھی اپنی نال کے ذریعے اپنی ماں کو کھینچ کر جنت کی طرف لے جائے گا جب کہ اس عورت نے اس بچے کے حوالے سے ثواب کی امید رکھی ہو “ ۔
( علامہ ہیثمی فرماتے ہیں : ) میں یہ کہتا ہوں : امام ابن ماجہ نے اس روایت میں یہ حصہ نقل کیا ہے : ” بے شک مردہ پیدا ہونے والا بچہ “ ۔ ۔ ۔ ۔ ۔ ۔ ۔ ۔ ۔ ۔ اس سے لے کے آخر تک کا حصہ نقل کیا ہے ۔
یہ روایت امام أحمد نے اور امام طبرانی معجم کبیر میں نقل کی ہے ۔ اس کی سند میں ایک راوی یحیی بن عبیداللہ تیمی ہے میں نے کسی کو اس کی توثیق یا اس پر جرح کرتے ہوئے نہیں پایا ہے ۔

حسان بن کریب بیان کرتے ہیں : ان کا ایک بچہ فوت ہو گیا بچے کے ماں باپ کو بہت شدید صدمہ ہوا تو نبی اکرم صلی اللہ علیہ وسلم کے صحابی سیدنا حوشب رضی اللہ عنہ نے فرمایا : کیا میں تم لوگوں کو وہ بیان کروں ؟ جو میں نے نبی اکرم صلی اللہ علیہ وسلم کو ارشاد فرماتے ہوئے سنا ہے ، تمہارے بیٹے کی طرح ایک بچے کے فوت ہونے پر آپ نے وہ بات ارشاد فرمائی تھی ، نبی اکرم صلی اللہ علیہ وسلم کے اصحاب میں سے ایک صاحب کا ایک بیٹا تھا جو گھٹنوں کے بل چلتا تھا ، وہ اپنے والد کے ہمراہ نبی اکرم صلی اللہ علیہ وسلم کی خدمت میں حاضر ہوا کرتا تھا پھر اس بچے کا انتقال ہو گیا اس بچے کے انتقال کے غم کی وجہ سے وہ صاحب چھ دن نبی اکرم صلی اللہ علیہ وسلم کی خدمت میں حاضر نہیں ہوئے نبی اکرم صلی اللہ علیہ وسلم نے ارشاد فرمایا : میں فلاں شخص کو نہیں دیکھ رہا لوگوں نے عرض کی : یا رسول اللہ ! اس کا بچہ فوت ہو گیا ہے ، تو وہ اس کے حوالے سے غمگین ہے نبی اکرم صلی اللہ علیہ وسلم نے اس شخص سے فرمایا : اے فلاں ! کیا تم اس بات کو پسند کرتے ہو کہ تمہارا بچہ اس وقت تمہارے پاس موجود ہوتا اور سب سے زیادہ چاک و چوبند ہوتا یا پھر تم اس بات کو پسند کرتے ہو کہ تمہارا بیٹا تمہارے پاس ہوتا اور وہ سب سے زیادہ جرات والا بچہ ہوتا ، کیا تم اس بات کو پسند کرتے ہو کہ تمہارا بیٹا تمہارے پاس ہوتا اور سب سے زیادہ ادھیڑ عمری تک پہنچتا ، یا پھر یہ ہے کہ تم سے یہ کہا: جائے : تم سے جو چیز واپس لی گئی ہے ، اس کے ثواب میں تم جنت میں داخل ہو جاؤ“ ۔
یہ روایت امام أحمد نے نقل کی ہے ۔ اس کی سند میں ایک راوی ابن لہیعہ ہے ، اور اس کے بارے میں کلام کیا گیا ہے ۔

سیدنا قره بن ایاس رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا کرتا تھا اس کے ساتھ اس کا بیٹا ہوتا تھا نبی اکرم صلی اللہ علیہ وسلم نے دریافت کیا : کیا تم اس سے محبت رکھتے ہو اس نے عرض کی : یا رسول اللہ ! جی ہاں اللہ تعالیٰ بھی آپ سے اس طرح محبت رکھے جس طرح میں اس سے محبت رکھتا ہوں پھر ایک مرتبہ نبی اکرم صلی اللہ علیہ وسلم نے اس شخص کو غیر موجود پا کر دریافت کیا : فلاں بن فلاں کا کیا حال ہے ۔ لوگوں نے عرض کی : یا رسول اللہ ! اس کا انتقال ہو گیا ہے نبی اکرم صلی اللہ علیہ وسلم نے اس بچے کے باپ سے فرمایا کیا تم اس بات کو پسند نہیں کرتے ہو کہ تم جنت کے جس بھی دروازے پر آؤ تو اس بچے کو اس دروازے پر پاؤ کہ ” تمہارا انتظار کر رہا ہو ایک شخص نے عرض کی : یا رسول اللہ ! کیا یہ اس کے لئے مخصوص ہے ، یا ہم سب کے لئے ہے ؟ نبی اکرم صلی اللہ علیہ وسلم نے ارشاد فرمایا : ( جی نہیں ) بلکہ یہ تم سب کے لئے ہے ۔
( علامہ ہیثمی فرماتے ہیں : ) میں یہ کہتا ہوں :
یہ روایت امام نسائی رحمہ اللہ نے اختصار کے ساتھ نقل کی ہے ۔ جس میں آدمی کے یہ الفاظ ہیں : ” کیا یہ اس کے لئے مخصوص ہے “ ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا ابوہریرہ رضی اللہ عنہ بیان کرتے ہیں : ایک خاتون نبی اکرم صلی اللہ علیہ وسلم کی بارگاہ میں حاضر ہوئی اس کے ساتھ اس کا بیٹا بھی تھا جو بیمار تھا اس خاتون نے عرض کی : یا رسول اللہ ! آپ اللہ تعالیٰ سے دعا کیجئے کہ وہ میرے اس بیٹے کو شفاء نصیب کرے راوی بیان کرتے ہیں : نبی اکرم صلی اللہ علیہ وسلم نے اس خاتون سے دریافت کیا : کیا تمہارا کوئی بچہ فوت ہو چکا ہے ؟ اس نے عرض کی : جی ہاں ! یا رسول اللہ ! نبی اکرم صلی اللہ علیہ وسلم نے دریافت کیا : زمانہ جاہلیت میں ہوا تھا یا زمانہ اسلام میں ہوا تھا ؟ اس نے عرض کی : زمانہ اسلام میں ، نبی اکرم صلی اللہ علیہ وسلم نے ارشاد فرمایا : یہ مضبوط ڈھال ہے یہ مضبوط ڈھال ہے یہ مضبوط ڈھال ہے ۔
یہ روایت امام ابویعلیٰ نے نقل کی ہے ۔ اس کی سند میں ایک راوی ابوعبیدہ ناجی ہے ، اور وہ ضعیف ہے ۔

سیدنا جابر بن سمرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اپنے تین بچے دفن کر دے ( یعنی جس کے تین بچے فوت ہو جائیں ) اور وہ ان پر صبر سے کام لے اور ثواب کی امید رکھے اس کے لئے جنت واجب ہو جائے گی سیدہ اُم ایمن رضی اللہ عنہ نے عرض کی : اگر دو ہوں ؟ نبی اکرم صلی اللہ علیہ وسلم نے فرمایا : جو دو ( بچے ) دفن کرے اور ان پر صبر سے کام لے اور ثواب کی امید رکھے اس کے لئے جنت واجب ہو جائے گی سید ام ایمن رضی اللہ عنہ نے عرض کی : اگر ایک ہو ؟ تو نبی اکرم صلی اللہ علیہ وسلم خاموش ہو گئے اور رک گئے پھر آپ نے ارشاد فرمایا : اے ام ایمن ! جو شخص ایک ( بچے ) کو دفن کرے اور صبر سے کام لے اور ثواب کی امید رکھے اس کے لئے جنت واجب ہو جائے گی“ ۔
یہ روایت امام طبرانی نے معجم اوسط اور معجم کبیر میں نقل کی ہے ۔ اس کی سند میں ایک راوی ناصح بن عبداللہ ابوعبداللہ ہے ، اور وہ متروک ہے ۔

سیدنا عبداللہ بن عمر رضی اللہ عنہما بیان کرتے ہیں : انصار سے تعلق رکھنے والے ایک شخص کا ایک بیٹا تھا وہ شخص جب بھی نبی اکرم صلی اللہ علیہ وسلم کی خدمت میں حاضر ہوا کرتا تھا ، تو وہ بچہ بھی ساتھ آتا تھا نبی اکرم صلی اللہ علیہ وسلم نے اس شخص سے دریافت کیا : کیا تم اس بچے سے محبت رکھتے ہو ؟ اس نے عرض کی : اے اللہ کے نبی ! جی ہاں اللہ تعالیٰ بھی آپ سے اسی طرح محبت رکھے جس طرح میں اس سے محبت رکھتا ہوں تو نبی اکرم صلی اللہ علیہ وسلم نے ارشاد فرمایا : تم اس سے جتنی محبت رکھتے ہو اللہ تعالیٰ مجھ سے اس سے زیادہ محبت رکھتا ہے اس کے کچھ عرصے بعد اس بچے کا انتقال ہو گیا وہ شخص نبی اکرم صلی اللہ علیہ وسلم کی خدمت میں حاضر ہوا حالانکہ پہلے وہ اپنے بیٹے کو ساتھ لے کے آیا کرتا تھا نبی اکرم صلی اللہ علیہ وسلم نے دریافت کیا : کیا تم نے آہ وفغاں کی تھی اس نے عرض کی : جی ہاں ۔ نبی اکرم صلی اللہ علیہ وسلم نے فرمایا : کیا تم اس بات سے راضی نہیں ہو کہ تمہارا بیٹا میرے بیٹے ابراہیم کے ساتھ ہو ، اور وہ عرش کے سائے کے نیچے اس کے ساتھ کھیل رہا ہو اس شخص نے عرض کی : جی ہاں ۔ یا رسول اللہ !
یہ روایت امام طبرانی نے معجم کبیر میں ابراہیم بن عبید کی سیدنا عبداللہ بن عمر رضی اللہ عنہما سے نقل کردہ روایت کے طور پر نقل کی ہے ۔ اگر تو ابراہیم نامی یہ راوی ابراہیم بن عبید بن رفاعہ ہے ، تو پھر یہ ” صحیح “ کے رجال میں سے ایک ہے ، اور بظاہر یہ لگتا ہے کہ یہ وہی ہے کیونکہ میں نے تابعین میں ایسا کوئی شخص نہیں پایا جس کا نام ابراہیم بن عبید ہو یہ راوی ضعیف ہے ، اور اس کے بقیہ رجال کی توثیق کی گئی ہے ۔

قیس بن ابوحازم بیان کرتے ہیں : سیدنا عبداللہ بن مسعود رضی اللہ عنہ نے کچھ بچوں کو اپنے بیٹے کے ساتھ کھیلتے ہوئے دیکھا تو ارشاد فرمایا : یہ میرے نزدیک اتنی ہی تعداد میں جعلان ( نامی پتنگوں ) سے زیادہ بے حیثیت ہیں ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جس کا کوئی بچہ فوت ہو جائے خواہ بچہ ہو ، یا بچی ہو خواہ اس نے اس کو تسلیم کیا ہو ، یا نہ کیا ہو ، اس پر راضی ہوا ہو ، یا نہ ہوا ہو اس نے صبر سے کام لیا ہو ، یا نہ لیا ہو ، اس کا ثواب جنت سے کم نہیں ہو گا “ ۔
يہ روایت امام طبرانی نے ہم کبیر اور مجم اوسط میں نقل کی ہے ۔ اس کی سند میں ایک راوی عمرو بن خالد اعشی ہے اور وہ ضعیف ہے ۔ اس روایت کے بقیہ رجال ثقہ ہیں ۔

سیدنا سہل بن حنیف رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” تم لوگ شادی کرو کیونکہ میں تمہاری کثرت پر دیگر امتوں کے سامنے فخر کروں گا ، اور مردہ پیدا ہونے والا بچہ جنت کے دروازے پر کھڑا ہوا ہو گا اس سے کہا: جائے گا تم اندر داخل ہو جاؤ وہ کہے گا جی نہیں جب تک میرے ماں باپ داخل نہیں ہوتے ( میں اندر نہیں جاؤں گا“ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی موسیٰ بن عبیدہ ہے ، اور وہ ضعیف ہے ۔

نبی اکرم صلی اللہ علیہ وسلم کے ایک صحابی کے حوالے سے یہ بات منقول ہے ۔ انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” قیامت کے دن بچوں سے یہ کہا: جائے گا تم جنت میں داخل ہو جاؤ تو وہ عرض کریں گے اے ہمارے پروردگار جب تک ہمارے باپ اور ہماری مائیں داخل نہیں ہوں گے ( ہم داخل نہیں ہوں گے ) نبی اکرم صلی اللہ علیہ وسلم فرماتے ہیں تو وہ انکار کر دیں گے ۔ نبی اکرم صلی اللہ علیہ وسلم فرماتے ہیں تو اللہ تعالیٰ فرمائے گا کیا وجہ ہے میں دیکھ رہا ہوں کہ یہ لوگ رکے ہوئے ہیں تم لوگ جنت میں داخل ہو جاؤ نبی اکرم صلی اللہ علیہ وسلم فرماتے ہیں : تو وہ کہیں گے : اے ہمارے پروردگار ! ہمارے آباء بھی ؟ تو اللہ تعالیٰ فرمائے گا : تم اور تمہارے آباء جنت میں داخل ہو جاؤ“ ۔
یہ روایت امام أحمد نے نقل کی ہے ، اور اس کے رجال ثقہ ہیں ۔