مجمع الزوائد ومنبع الفوائد

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم بنوسلمہ کی ایک محفل کے پاس آ کر ٹھہر گئے آپ نے ارشاد فرمایا : اے بنوسلمہ تمہارے درمیان رقوب کسے کہا: جاتا ہے ایک شخص نے بتایا اس کو جس کا بچہ زندہ نہ رہے نبی اکرم صلی اللہ علیہ وسلم نے ارشاد فرمایا : بلکہ رقوب وہ ہوتی ہے کہ جس کا کوئی بچہ فوت نہ ہوا ہو نبی اکرم صلی اللہ علیہ وسلم نے ارشاد فرمایا : تمہارے درمیان معدم کسے کہا: جاتا ہے لوگوں نے کہا: اس شخص کو جس کا مال نہ ہو نبی اکرم صلی اللہ علیہ وسلم نے فرمایا : جی نہیں بلکہ اس سے مراد وہ شخص ہے ، جس نے آگے کچھ نہ بھیجا ہو ، اور اللہ تعالیٰ کی بارگاہ میں اس کے لئے کوئی بھلائی نہ ہو ۔
یہ روایت امام ابویعلیٰ نے نقل کی ہے ، اور امام بزار نے اختصار کے ساتھ نقل کی ہے ، اور امام بزار کے رجال ” صحیح “ کے رجال ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم اپنے درمیان ” رقوب “ کسے شمار کرتے ہو ؟ لوگوں نے عرض کی : اسے جس کی کوئی اولاد نہ ہو ، نبی اکرم صلی اللہ علیہ وسلم نے ارشاد فرمایا : جی نہیں بلکہ رقوب وہ ہوتی ہے کہ جس کا کوئی بچہ فوت نہ ہوا ہو “ ۔
یہ روایت امام ابویعلیٰ نے نقل کی ہے ، اور اس کے رجال ” صحیح“ کے رجال ہیں ۔

ایک صاحب ، جو اس وقت موجود تھے ، جب نبی اکرم صلی اللہ علیہ وسلم خطبہ ارشاد فرما رہے تھے ، اُن کے حوالے سے یہ بات منقول ہے : وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” کیا تم لوگ یہ بات جانتے ہو ؟ رقوب سے مراد کیا ہے ؟ لوگوں نے عرض کی : وہ شخص جس کی کوئی اولاد نہ ہو ( یا جس کی اولاد زندہ نہ رہے ) نبی اکرم صلی اللہ علیہ وسلم نے ارشاد فرمایا : وہ رقوب جو مکمل رقوب ہو وہ رقوب جو مکمل رقوب ہو وہ رقوب جو مکمل رقوب ہو وہ ایسا شخص ہے کہ جس کی اولاد ہوئی ہو ، اور اس کا ایسی حالت میں انتقال ہو جائے کہ اس کی اولاد میں سے کوئی بھی فوت نہ ہوا ہو پھر نبی اکرم صلی اللہ علیہ وسلم نے دریافت کیا : کیا تم لوگ جانتے ہو صعلوک ( یعنی کنگال ) سے مراد کیا ہے ؟ لوگوں نے عرض کی : وہ شخص جس کے پاس مال نہ ہو نبی اکرم صلی اللہ علیہ وسلم نے فرمایا : ایسا صعلوک جو مکمل صعلوک ہو ایسا صعلوک جو مکمل صعلوک ہو ایسا صعلوک جو مکمل صعلوک ہو اس سے مراد وہ شخص ہے ، جس کے پاس مال موجود ہو ، اور وہ ایسی حالت میں مر جائے کہ اس نے اس مال میں سے کچھ بھی آگے نہ بھیجا ہو پھر نبی اکرم صلی اللہ علیہ وسلم نے ارشاد فرمایا : پچھاڑ دینا ( یا پہلوانی ) کیا ہے ؟ لوگوں نے عرض کی : پچھاڑ دینا نبی اکرم صلی اللہ علیہ وسلم نے ارشاد فرمایا : ایسا پچھاڑ دینا جو مکمل پچھاڑ دینا ہو ایسا پچھاڑ دینا جو مکمل پچھاڑ دینا ہو ایسا پچھاڑ دینا جو مکمل پچھاڑ دینا ہو یہ اس شخص کا ہے ، جو غصہ کرے اور اس کا غصہ شدید ہو جائے اور اس کا چہرہ سرخ ہو جائے اور اس کی جلد پھڑک رہی ہو ، اور پھر وہ اپنے غصے کو پچھاڑ دے “ ۔
یہ روایت امام أحمد نے نقل کی ہے ۔ اس کی سند میں ایک راوی ابوحصنہ ہے ( راوی کو شک ہے شاید یہ الفاظ ہیں : ) ابن حصنہ ہے حسینی فرماتے ہیں یہ مجہول ہے ۔ اس روایت کے بقیہ رجال ثقہ ہیں ۔