السنن الكبرى للبيهقي

امام شافعی رحمہ اللہ نے فرمایا: ”شعر (بھی) ایک کلام ہے، اس کا اچھا حصہ اچھے کلام کی طرح ہے اور اس کا برا حصہ برے کلام کی طرح ہے، البتہ یہ ایسا کلام ہے جو باقی رہتا ہے اور (لوگوں میں) پھیل جاتا ہے، اور یہی عام کلام پر اس کی فضیلت (اور امتیاز) ہے۔ پس شعراء میں سے جو شخص مسلمانوں کی عیب جوئی کرنے، انہیں ایذا پہنچانے اور اس میں کثرت کرنے میں معروف نہ ہو، اور نہ ہی اس بات میں (معروف ہو) کہ جب کسی کی مدح کرے تو بہت زیادہ جھوٹ بولے، تو اس کی گواہی رد نہیں کی جائے گی۔“

عبدالرحمن بن اسود بن عبد یغوث رحمہ اللہ فرماتے ہیں کہ رسول اللہ ﷺ نے فرمایا: ”بعض شعر حکمت بھرے ہوتے ہیں۔“
(ب) ابی بن کعب رضی اللہ عنہ نبی ﷺ سے بیان کرتے ہیں کہ آپ ﷺ نے فرمایا: ”شعر حکمت ہے۔“

سیدنا ابی بن کعب انصاری رضی اللہ عنہ فرماتے ہیں کہ نبی ﷺ نے فرمایا: ”بعض شعر حکمت بھرے ہوئے ہیں۔“

ابن عباس رضی اللہ عنہما فرماتے ہیں کہ نبی ﷺ نے فرمایا: ”بعض شعر حکمت بھرے ہوئے ہیں۔“

سیدنا ابوہریرہ رضی اللہ عنہ فرماتے ہیں کہ رسول اللہ ﷺ نے فرمایا: ”سب سے سچے اشعار وہ ہیں جو عرب نے کہے کہ اللہ کے علاوہ ہر چیز باطل ہے۔“

سیدنا حسان بن ثابت رضی اللہ عنہما نے سیدنا ابوہریرہ رضی اللہ عنہ کو قسم دے کر کہا: بتاؤ! کیا آپ نے رسول اللہ ﷺ سے سنا، آپ ﷺ نے فرمایا تھا: ”میری جانب سے جواب دو، اللہ آپ کی مدد جبرائیل امین کے ذریعے فرمائے۔“ وہ کہنے لگے: ہاں ہاں۔

ابو سلمہ بن عبدالرحمٰن رحمہ اللہ نے سیدنا حسان بن ثابت رضی اللہ عنہ کو سنا، وہ سیدنا ابوہریرہ رضی اللہ عنہ سے شہادت طلب کر رہے تھے: ”میں تمہیں اللہ کی قسم دے کر پوچھتا ہوں، کیا آپ نے رسول اللہ ﷺ سے سنا ہے کہ آپ ﷺ نے فرمایا: ”اے حسان! تو میری جانب سے جواب دے، اللہ تیری جبرائیل امین کے ذریعے مدد فرمائے گا“؟“ تو سیدنا ابوہریرہ رضی اللہ عنہ فرماتے ہیں: ”ہاں۔“

سیدنا براء بن عازب رضی اللہ عنہ فرماتے ہیں کہ رسول اللہ ﷺ نے سیدنا حسان رضی اللہ عنہ سے فرمایا: ”اے حسان! کفار کی مذمت کر، جبرائیل تیرے ساتھ ہے۔“
(ب) سلیمان کی روایت ہے کہ ”ان کی مذمت کرو، ان کی مذمت کرو، جبرائیل تیرے ساتھ ہے۔“

سیدہ عائشہ رضی اللہ عنہا فرماتی ہیں کہ سیدنا حسان رضی اللہ عنہ نے کہا: اے اللہ کے رسول! ابو سفیان کے بارے میں اجازت دیں۔ آپ ﷺ نے فرمایا: ”میری اس سے قرابت کا کیا بنے گا؟“ سیدنا حسان رضی اللہ عنہ کہنے لگے: میں آپ ﷺ کو درمیان سے ایسے نکال لوں گا، جیسے تنکا آٹے سے نکال لیا جاتا ہے۔ پھر فرمایا: ”آلِ بنو ہاشم سے بزرگ کی کوہان ہے اور اے بنتِ مخزوم کی اولاد! تیرا والد تو غلام ہے۔“

سیدہ عائشہ رضی اللہ عنہا فرماتی ہیں کہ رسول اللہ ﷺ نے فرمایا: ”قریش کی مذمت (ہجو) کرو، یہ ان پر تیر پھینکنے سے زیادہ سخت ہے۔“ آپ ﷺ نے ابن رواحہ رضی اللہ عنہ کو روانہ کیا اور فرمایا: ”ان کی مذمت کرو۔“ اس نے ان کی مذمت کی لیکن آپ ﷺ راضی نہ ہوئے۔ پھر کعب بن مالک رضی اللہ عنہ کی طرف روانہ کیا۔ پھر حسان بن ثابت رضی اللہ عنہ کو روانہ کیا۔ جب حسان رضی اللہ عنہ آئے تو کہنے لگے: اب میں تمہارے لیے آیا ہوں، دم ہلانے والے شیر کی جانب روانہ کرو۔ پھر زبان باہر نکال کر اس کو حرکت دی، پھر کہا: اس ذات کی قسم جس نے آپ ﷺ کو حق کے ساتھ بھیجا ہے! میں ان کو چمڑے کے پھاڑنے کی طرح پھاڑ ڈالوں گا۔ رسول اللہ ﷺ نے فرمایا: ”اے حسان! جلدی نہ کرنا کیونکہ ابوبکر رضی اللہ عنہ قریش کے نسب کو سب سے زیادہ جاننے والے ہیں، چونکہ میرا نسب بھی ان میں ہے تو میرے نسب کو (ان سے) جدا کر لیا جائے۔“ پھر حضرت حسان رضی اللہ عنہ، ابوبکر رضی اللہ عنہ کے پاس آئے پھر لوٹ گئے۔ پھر آپ ﷺ کے پاس آئے اور کہنے لگے: اے اللہ کے رسول! آپ ﷺ کا نسب (مجھ پر) واضح کر دیا گیا۔ اس ذات کی قسم جس نے آپ ﷺ کو حق کے ساتھ مبعوث کیا ہے! میں آپ ﷺ کو ان سے ایسے نکال لوں گا جیسے آٹے سے بال نکال لیا جاتا ہے۔ سیدہ عائشہ رضی اللہ عنہا فرماتی ہیں: میں نے رسول اللہ ﷺ سے سنا، آپ ﷺ حضرت حسان رضی اللہ عنہ سے کہہ رہے تھے: ”جبرائیل تیری مدد فرماتے رہیں گے، جب تک تو رسول اللہ ﷺ کا دفاع کرے گا۔“ فرماتی ہیں کہ میں نے رسول اللہ ﷺ سے سنا، آپ ﷺ فرما رہے تھے: ”حسان نے ان کی مذمت کر کے خود بھی اور ہمیں بھی آرام دیا۔“ حسان رضی اللہ عنہ نے کہا:
1 تو نے محمد ﷺ کی مذمت کی ہے تو میں نے ان کی جانب سے جواب دیا ہے
اور اللہ کے نزدیک میرے لیے اس میں بدلہ ہے جزا ہے
2 تو نے محمد ﷺ کی برائی کی جو نیک ہیں یک سو ہیں
اللہ کے رسول ہیں، وفاداری ان کی عادت مبارکہ ہے
3 میرے ماں باپ اور میری آبرو
محمد ﷺ کی آبرو بچانے کے لیے قربان ہے
4 میں اپنی جان کھو دوں اگرچہ تم اس کو نہ دیکھو
وہ گرد و غبار کو کداء کی دونوں جانب سے اڑا دے گا
5 ایسی طاقت ور اونٹنیاں جو باگوں پر زور لگاتی ہیں اور اوپر چڑھتی ہیں
ان کے کندھوں پر تیز نوک والے برچھے ہیں جو خون کے پیاسے ہیں
6 اور ہمارے گھوڑے دوڑتے ہوئے آئیں گے
جن کے منہ عورتیں اپنے دوپٹوں سے پونچھتی ہیں
7 اگر تم ہم سے منہ پھیر لو (بات نہ کرو) تو ہم عمرہ کرلیں گے
تو فتح ہوجائے گی اور پردہ اٹھ جائے گا
8 نہیں تو اس دن کی لڑائی کے لیے صبر کرو
جس دن اللہ تعالیٰ فتح دے گا اور جسے چاہے گا عزت دے گا
9 اللہ تعالیٰ فرماتے ہیں کہ میں نے ایک بندے کو بھیجا ہے
جو ہمیشہ سچ بات کہتا ہے اس کی بات میں کوئی شبہ نہیں
0 اللہ تعالیٰ فرماتے ہیں کہ میں نے ایک لشکر تیار کیا ہے
وہ انصار کا لشکر ہے جن کا کھیل کافروں سے مقابلہ کرنا ہے
! ہم تو ہر روز ایک نہ ایک تیاری میں ہیں
گالی گلوچ ہے کافروں سے، لڑائی یا ہجو ہے کافروں سے
@ تم میں سے جو اللہ کے رسول کی ہجو کرے
اور ان کی تعریف کرے یا مدد کرے وہ سب برابر ہیں
# جبرائیل امین ہم میں اللہ کے قاصد ہیں
اور روح القدس جن کا کوئی مثل نہیں۔

مسروق رحمہ اللہ فرماتے ہیں کہ میں حضرت عائشہ رضی اللہ عنہا کے پاس آیا، ان کے پاس حسان بن ثابت رضی اللہ عنہ تھے، وہ اشعار پڑھ رہے تھے، جو ان کی جوانی کے اشعار تھے۔ شعر
وہ سنجیدہ اور پاک دامن ہیں جن پر کبھی تہمت نہیں لگائی گئی
وہ ہر صبح بھوکی ہو کر نادان بہنوں کا گوشت نہیں کھاتیں
حضرت عائشہ رضی اللہ عنہا فرمانے لگیں: آپ تو ایسے نہیں، مسروق رحمہ اللہ کہنے لگے: میں نے حضرت عائشہ رضی اللہ عنہا سے کہا: آپ ان کو اپنے پاس آنے کی اجازت کیوں دیتی ہیں؟ حالانکہ اللہ تعالیٰ فرماتے ہیں: ﴿وَالَّذِي تَوَلَّى كِبْرَهُ مِنْهُمْ لَهُ عَذَابٌ عَظِيمٌ﴾ [سورة النور: 11] ”وہ انسان جو تہمت کا والی بنا ان میں سے ان کے لیے عذاب عظیم ہے۔“ فرمانے لگیں: اندھے پن سے بڑا عذاب کیا ہے؟ اور فرمانے لگیں کہ وہ رسول اللہ ﷺ کا دفاع کیا کرتے تھے۔

عبدالرحمن بن کعب بن مالک اپنے والد (سیدنا کعب بن مالک رضی اللہ عنہ) سے نقل فرماتے ہیں کہ رسول اللہ ﷺ نے فرمایا: ”اللہ نے اشعار کے بارے میں جو نازل کیا سو کیا۔“ فرمایا: ”مومن اپنی تلوار اور زبان سے جہاد کرتا ہے، اس ذات کی قسم جس کے ہاتھ میری جان ہے، گویا کہ تم ان پر تیروں کی بارش کرتے ہو۔“

عبدالرحمن بن عبداللہ بن کعب بن مالک رحمہ اللہ فرماتے ہیں کہ سیدنا کعب بن مالک رضی اللہ عنہ رسول اللہ ﷺ کے پاس آئے، جب اللہ تعالیٰ نے اشعار کے بارے میں کچھ نازل کیا اور عرض کیا: اللہ تعالیٰ نے اشعار کے بارے میں جو نازل کیا ہے آپ اسے جانتے ہیں، آپ کا کیا خیال ہے؟ آپ ﷺ نے فرمایا: ”مؤمن اپنی تلوار اور زبان سے جہاد کرتا ہے۔“

سیدنا کعب بن مالک رضی اللہ عنہ فرماتے ہیں کہ رسول اللہ ﷺ نے فرمایا: ”اس ذات کی قسم جس کے قبضے میں میری جان ہے! جو تم اشعار ان کے بارے میں کہتے ہو، گویا کہ تم ان پر تیروں کی بارش کرتے ہو۔“

عکرمہ، ابن عباس رضی اللہ عنہما سے نقل فرماتے ہیں کہ ﴿وَالشُّعَرَاءُ يَتَّبِعُهُمُ الْغَاوُونَ﴾ [سورة الشعراء: 224] اس سے منسوخ ہوگئی ﴿إِلَّا الَّذِينَ آمَنُوا وَعَمِلُوا الصَّالِحَاتِ وَذَكَرُوا اللَّهَ كَثِيرًا﴾ [سورة الشعراء: 227] ”مگر وہ لوگ جو ایمان لائے اور نیک عمل کیے اور اللہ کا بہت زیادہ ذکر کرتے ہیں۔“

سیدنا ابوہریرہ رضی اللہ عنہ اپنے قصے بیان کرتے ہوئے رسول اللہ ﷺ کا تذکرہ کرتے کہ ”تمہارا بھائی ہے، وہ بےہودہ بات نہیں کرتا“ یعنی عبداللہ بن رواحہ۔ شعر:
1 ہمارے اندر اللہ کے رسول ہیں، جو اس کی کتاب کی تلاوت کرتے ہیں جب بھلائی والی فجر طلوع ہوتی ہے۔
2 اس نے اندھے پن کے بعد ہمیں ہدایت دی اور ہمارے دل اس کا یقین کرنے والے ہیں، جو اس نے کہہ دیا واقع ہونے والا ہے۔
3 وہ رات گزارتا ہے کہ اس کے پہلو بستر سے جدا رہتے ہیں، جس وقت کفار کے پہلو اپنے بستروں پر بھاری ہوتے ہیں، یعنی چمٹے ہوئے ہوتے ہیں۔

حضرت عائشہ رضی اللہ عنہا فرماتی ہیں کہ رسول اللہ ﷺ سے شعر کے متعلق سوال ہوا تو آپ ﷺ نے فرمایا: ”یہ کلام ہے، اچھے اشعار اچھا کلام اور برے اشعار برا کلام ہیں۔“

عکرمہ رحمہ اللہ فرماتے ہیں کہ سیدہ عائشہ رضی اللہ عنہا سے سوال کیا گیا کہ کیا رسول اللہ ﷺ کی کوئی مثال اشعار میں سے ہے؟ انہوں نے فرمایا: آپ ﷺ کبھی کبھی اس طرح کہہ لیا کرتے تھے: ”عنقریب تیرے پاس وہ شخص خبریں لائے گا، جس کو تو نے زادِ سفر بھی نہیں دیا تھا۔“

اعشیٰ مازنی رضی اللہ عنہ فرماتے ہیں کہ میں نے رسول اللہ ﷺ کے پاس آ کر اشعار پڑھے:
اے لوگوں کے رب اور عرب کے فیصلہ کرنے والے!
میری ملاقات ایک زبان دراز آدمی سے ہوئی
میں تو گھبراہٹ اور پریشانی کی حالت میں رزق تلاش کر رہا تھا۔
کراسی کی روایت: میں تو رزق کی تلاش میں نکلا، اس نے میرا پیچھا نیزوں کے ساتھ کیا، اس نے وعدہ کی خلاف ورزی کی اور گناہ میں لت پت ہو گیا۔ وہ جس پر غالب آ جاتی ہیں ان کے لیے بدترین شر ہوتی ہیں، تو نبی ﷺ نے ان کی مثال دیتے ہوئے فرمایا تھا: «وَهُنَّ شَرُّ غَالِبٍ لِمَنْ غَلَبَ» ”وہ جس پر غالب آ جاتی ہیں ان کے لیے بدترین شر ہوتی ہیں۔“

سیدنا عشی بن ماعز رضی اللہ عنہ فرماتے ہیں کہ میں اشعار پڑھتے ہوئے نبی ﷺ کے پاس آیا، انہوں نے ذکر کیا کہ میں نے ایک زبان دراز عورت سے شادی کی ہے، میں اس کی تلاش میں نکلا تو اس نے میرا پیچھا نیزوں سے کیا، لیکن پانچواں شعر ذکر نہیں کیا۔

سماک رحمہ اللہ، جابر بن سمرہ رضی اللہ عنہ سے نقل فرماتے ہیں کہ میں نے پوچھا: کیا آپ نے نبی ﷺ کو دیکھا ہے؟ کہنے لگے: ہاں، آپ ﷺ زیادہ خاموش رہتے تھے اور آپ ﷺ کے صحابہ آپ کے پاس اشعار اور جاہلیت کا تذکرہ کرتے اور ہنستے تھے لیکن آپ ﷺ صرف مسکراتے تھے، جب وہ ہنستے تھے۔

سماک رحمہ اللہ فرماتے ہیں کہ میں نے سیدنا جابر بن سمرہ رضی اللہ عنہ سے کہا: کیا آپ نبی ﷺ کے ساتھ بیٹھا کرتے تھے؟ فرمانے لگے: ہاں، آپ ﷺ زیادہ خاموش رہتے تھے، ہنستے کم، آپ ﷺ کے صحابہ اشعار پڑھتے، آپ ﷺ مسکراتے تھے۔

شعبی رحمہ اللہ فرماتے ہیں کہ میں نے نبی ﷺ کے صحابہ رضی اللہ عنہم کو بیت اللہ کے قریب اشعار پڑھتے دیکھا جب وہ بیت اللہ کے پاس ارد گرد احرام کی حالت میں تھے، (ابراہیم راوی کو شک ہے)۔

محمد بن کثیر بن افلح فرماتے ہیں کہ جب ہماری آخری مجلس حضرت زید بن ثابت رضی اللہ عنہ کے ساتھ ہوئی تو ہم اس میں اشعار پڑھتے تھے۔

ابو خالد والبی فرماتے ہیں کہ ہم صحابہ رضی اللہ عنہم کی مجلس میں ہوتے، وہ اشعار اور جاہلیت کے ایام کا تذکرہ فرماتے تھے۔

مطرف بن عبداللہ رحمہ اللہ فرماتے ہیں کہ میں عمران بن حصین رضی اللہ عنہ کے ساتھ تھا، بصرہ سے مکہ کا سفر کرتے ہوئے، وہ ہر روز مجھے اشعار سناتے اور کہتے کہ اشعار کلام ہیں اور کلام حق اور باطل بھی ہوتا ہے۔

محمد بن سیرین رحمہ اللہ فرماتے ہیں کہ صحابہ رضی اللہ عنہم میں سے عبداللہ بن رواحہ رضی اللہ عنہ، حسان بن ثابت رضی اللہ عنہ اور کعب بن مالک رضی اللہ عنہ شاعر تھے۔

عکرمہ رحمہ اللہ، ابن عباس رضی اللہ عنہما سے نقل فرماتے ہیں کہ جب تم قرآن کی تلاوت کرو اور قرآن کی تفسیر معلوم نہ ہو سکے تو اشعار میں تلاش کرلیا کرو، یہ عرب کا ادب ہے۔

عکرمہ، ابن عباس رضی اللہ عنہما سے نقل فرماتے ہیں کہ رسول اللہ ﷺ نے فرمایا: ”بعض شعر حکمت بھرے ہوئے ہیں، جب قرآن میں سے کوئی چیز تم پر خلط ملط ہو جائے تو اشعار میں سے تلاش کر لیا کرو کیونکہ یہ عربی ہے۔“