المستدرك على الصحيحين

سیدنا بریدہ رضی اللہ عنہ بیان کرتے ہیں کہ نبی کریم ﷺ نے ایک ہزار نقاب پوش سواروں کے جھرمٹ میں اپنی والدہ کی قبر کی زیارت فرمائی، اور اس دن سے بڑھ کر کبھی کسی کو روتے ہوئے نہیں دیکھا گیا۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔

سیدنا ابوہریرہ رضی اللہ عنہ سے روایت ہے کہ رسول اللہ ﷺ نے اپنی والدہ کی قبر کی زیارت فرمائی تو آپ ﷺ رو پڑے اور اپنے ارد گرد موجود لوگوں کو بھی رلا دیا، پھر فرمایا: ”میں نے اپنے رب سے ان کی قبر کی زیارت کی اجازت مانگی تو اس نے مجھے اجازت دے دی، اور میں نے ان کے لیے بخشش کی دعا کرنے کی اجازت مانگی تو مجھے اجازت نہیں دی گئی، پس تم قبروں کی زیارت کیا کرو کیونکہ یہ موت کی یاد دلاتی ہیں۔“
یہ حدیث امام مسلم کی شرط پر صحیح ہے لیکن انہوں نے اسے روایت نہیں کیا۔

سیدنا بریدہ رضی اللہ عنہ بیان کرتے ہیں کہ ہم رسول اللہ ﷺ کے ہمراہ تقریباً ایک ہزار سواروں کی معیت میں تھے، آپ ﷺ ہمارے پاس اترے اور ہمیں دو رکعت نماز پڑھائی، پھر ہماری طرف اپنا رخِ انور پھیرا جبکہ آپ ﷺ کی آنکھوں سے آنسو جاری تھے، سیدنا عمر رضی اللہ عنہ آپ ﷺ کی طرف بڑھے اور اپنے ماں باپ آپ ﷺ پر فدا کرتے ہوئے عرض کیا: اے اللہ کے رسول! آپ کو کیا ہوا؟ آپ ﷺ نے فرمایا: ”میں نے اپنے رب عزوجل سے اپنی والدہ کے لیے استغفار کی اجازت مانگی تو اس نے مجھے اجازت نہیں دی، اس لیے ان کی محبت میں میری آنکھیں بھر آئیں، اور میں نے ان کی زیارت کی اجازت مانگی تو اس نے مجھے اجازت دے دی، اور میں نے تمہیں قبروں کی زیارت سے منع کیا تھا، اب تم ان کی زیارت کیا کرو، اور ان کی زیارت تمہارے لیے خیر میں اضافے کا باعث ہونی چاہیے۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔

سیدنا عبداللہ بن ابی ملیکہ سے روایت ہے کہ سیدہ عائشہ رضی اللہ عنہا ایک دن قبرستان کی طرف سے آ رہی تھیں، میں نے ان سے عرض کیا: اے ام المؤمنین! آپ کہاں سے آ رہی ہیں؟ انہوں نے فرمایا: اپنے بھائی عبدالرحمن بن ابوبکر کی قبر سے۔ میں نے عرض کیا: کیا رسول اللہ ﷺ نے قبروں کی زیارت سے منع نہیں فرمایا تھا؟ انہوں نے فرمایا: ہاں، آپ ﷺ نے منع فرمایا تھا لیکن بعد میں ان کی زیارت کا حکم دے دیا تھا۔

سیدنا انس بن مالک رضی اللہ عنہ سے روایت ہے کہ رسول اللہ ﷺ نے فرمایا: ”میں نے تمہیں قبروں کی زیارت سے منع کیا تھا، خبردار! اب ان کی زیارت کیا کرو کیونکہ یہ دل کو نرم کرتی ہے، آنکھوں کو پرنم کرتی ہے اور آخرت کی یاد دلاتی ہے، اور (وہاں جا کر) لغو یا نازیبا باتیں نہ کیا کرو۔“

سیدنا انس بن مالک رضی اللہ عنہ سے روایت ہے کہ رسول اللہ ﷺ نے فرمایا: ”میں نے تمہیں قبروں کی زیارت سے منع کیا تھا، اب جو چاہے قبر کی زیارت کرنا چاہے تو کر لے، کیونکہ یہ دل کو رقیق (نرم) کرتی ہے، آنکھ سے آنسو جاری کرتی ہے اور آخرت کی یاد دلاتی ہے۔“