المعجم الكبير للطبراني

سیدنا ابومالک اشعری رضی اللہ عنہ سے روایت ہے، انہوں نے رسول اللہ ﷺ کو یہ فرماتے سنا: ”دنیا کی مٹھاس آخرت کی کڑواہٹ ہے، اور آخرت کی کڑواہٹ دنیا کی مٹھاس ہے۔“

سیدنا ابومالک اشعری رضی اللہ عنہ سے روایت ہے، رسول اللہ ﷺ نے فرمایا: ”تین آدمی تھے، ایک کے پاس دس دینار تھے، اس نے ان میں سے ایک دینار صدقہ کیا، دوسرے کے پاس دس اوقیہ تھے، اس نے ان میں سے ایک اوقیہ صدقہ کیا، اور تیسرے کے پاس سو اوقیہ تھے، اس نے ان میں سے دس اوقیہ صدقہ کیے۔“ پھر رسول اللہ ﷺ نے فرمایا: ”یہ سب اجر میں برابر ہیں، ہر ایک نے اپنے مال کا دسواں حصہ صدقہ کیا۔“ اللہ عزوجل نے فرمایا: ”کشادگی والا اپنی کشادگی کے مطابق خرچ کرے“ [سورۃ الطلاق: 7]۔

سیدنا ابومالک اشعری رضی اللہ عنہ سے روایت ہے کہ رسول اللہ ﷺ نے فرمایا: ”اللہ عزوجل نے تمہیں تین باتوں سے محفوظ رکھا ہے: یہ کہ تمہارا نبی تم پر بددعا نہ کرے کہ تم سب ہلاک ہو جاؤ، یہ کہ باطل والے حق والوں پر غالب نہ آئیں، اور یہ کہ تم گمراہی پر جمع نہ ہو، یہ باتیں اللہ نے تمہیں ان سے محفوظ رکھی ہیں۔ اور تمہارے رب نے تمہیں تین چیزوں سے ڈرایا ہے: دھواں، مومن کو تو یہ زکام جیسا لگے گا، اور کافر کو یہ پھلا دے گا یہاں تک کہ وہ اس کے ہر سوراخ سے نکلے گا، دوسری چیز زمین کا جانور ہے، اور تیسری دجال ہے۔“

سیدنا ابومالک اشعری رضی اللہ عنہ سے روایت ہے، رسول اللہ ﷺ نے فرمایا: ”جب کوئی آدمی چھینکے تو وہ ”الحمدللہ علی کل حال“ کہے، اور جو اس کے آس پاس ہوں وہ ”یرحمک اللہ“ کہیں، اور وہ اپنے آس پاس والوں کے لیے کہے: ”یہدیکم اللہ ویصلح بالکم“ (اللہ تمہیں ہدایت دے اور تمہاری حالت درست کرے)۔“

سیدنا ابومالک اشعری رضی اللہ عنہ سے روایت ہے، انہوں نے رسول اللہ ﷺ کو یہ فرماتے سنا: ”مجھے اپنی امت پر صرف تین باتوں کا خطرہ ہے: یہ کہ ان کے لیے مال کی کثرت ہو جائے تو وہ ایک دوسرے سے حسد کریں اور آپس میں لڑ پڑیں، یہ کہ ان کے لیے کتابیں کھول دی جائیں تو مومن اس کی تاویل تلاش کرے حالانکہ اس کی تاویل اللہ کے سوا کوئی نہیں جانتا، اور علم میں پختہ لوگ کہتے ہیں: ہم اس پر ایمان لائے، یہ سب ہمارے رب کی طرف سے ہے، اور نصیحت صرف عقل والے ہی حاصل کرتے ہیں، اور یہ کہ وہ اپنے علم کے حامل شخص کو دیکھیں اور اسے ضائع کر دیں اور اس کی کوئی پروا نہ کریں۔“

سیدنا ابومالک اشعری رضی اللہ عنہ سے روایت ہے کہ رسول اللہ ﷺ نے فرمایا: ”جو شخص ایمان لانے کے بعد اللہ کے ساتھ کسی کو شریک نہ ٹھہرائے، فرض نماز قائم کرے، فرض زکوٰۃ ادا کرے، رمضان کے روزے رکھے، سنے اور اطاعت کرے، اور اسی حال پر مرے؛ تو اس کے لیے جنت واجب ہو گئی۔“

سیدنا ابومالک اشعری رضی اللہ عنہ سے روایت ہے کہ رسول اللہ ﷺ نے حجۃ الوداع کے موقع پر قربانی کے دنوں میں لوگوں سے فرمایا: ”کیا یہ حرمت والا دن نہیں ہے؟“ لوگوں نے عرض کیا: کیوں نہیں، یا رسول اللہ! آپ ﷺ نے فرمایا: ”پس تمہارا آپس میں احترام قیامت تک اسی طرح ہے جیسے اس دن کی حرمت ہے۔ اور میں تمہیں بتاتا ہوں مسلمان کون ہے؟ مسلمان وہ ہے جس کی زبان اور ہاتھ سے دوسرے مسلمان محفوظ رہیں، اور میں تمہیں بتاتا ہوں مومن کون ہے؟ مومن وہ ہے جس پر مسلمان اپنی جانوں اور مالوں کے بارے میں اعتماد کریں، اور میں تمہیں بتاتا ہوں مہاجر کون ہے؟ مہاجر وہ ہے جس نے گناہوں کو چھوڑ دیا۔ اور مومن، مومن پر اسی دن کی طرح حرام ہے: اس کا گوشت اس پر حرام ہے کہ اسے غیبت کر کے کھایا جائے، اس کی عزت اس پر حرام ہے کہ اسے پھاڑا جائے، اس کا چہرہ اس پر حرام ہے کہ اسے طمانچہ مارا جائے، اس کا خون اس پر حرام ہے کہ اسے بہایا جائے، اس کا مال اس پر حرام ہے کہ اس پر ظلم کیا جائے، اور اسے تکلیف پہنچانا اس پر حرام ہے، اور اسے دھکیل کر ذلیل کرنا اس پر حرام ہے۔“

سیدنا ابومالک اشعری رضی اللہ عنہ سے روایت ہے کہ رسول اللہ ﷺ نے فرمایا: ”تمہارا وہ دشمن نہیں جسے اگر تم قتل کر دو تو وہ تمہارے لیے نور بن جائے، اور اگر وہ تمہیں قتل کر دے تو تم جنت میں داخل ہو جاؤ، بلکہ تمہارا سب سے بڑا دشمن تمہاری وہ اولاد ہے جو تمہاری پشت سے پیدا ہوئی، پھر تمہارا سب سے بڑا دشمن تمہارا وہ مال ہے جس کا تمہارا دایاں ہاتھ مالک ہے۔“

سیدنا ابومالک اشعری رضی اللہ عنہ سے روایت ہے، رسول اللہ ﷺ نے فرمایا: ”فتنہ بھیجا جاتا ہے اور اس کے ساتھ خواہش اور صبر بھی بھیجے جاتے ہیں، پس جو خواہش کی پیروی کرے اس کا انجام سیاہ ہوگا، اور جو صبر کی پیروی کرے اس کا انجام سفید ہوگا۔“

سیدنا ابومالک اشعری رضی اللہ عنہ سے روایت ہے، انہوں نے رسول اللہ ﷺ کو یہ فرماتے سنا: ”تین باتیں میں نے اپنے بندوں سے چھپا رکھی ہیں، اگر وہ انہیں دیکھ لیتے تو کبھی کوئی برائی نہ کرتے: اگر میں اپنا پردہ اٹھا دوں تو وہ مجھے اس طرح دیکھے کہ اسے یقین آ جائے اور وہ جان لے کہ میں اپنی مخلوق کے ساتھ کیا کرتا ہوں جب میں انہیں موت دیتا ہوں اور اپنے ہاتھ سے آسمانوں کو تھام لیتا ہوں، پھر زمین اور زمینوں کو تھام لیتا ہوں، پھر کہتا ہوں: میں بادشاہ ہوں، میرے سوا کس کی بادشاہی ہے؟ پھر میں انہیں جنت دکھاؤں اور جو کچھ میں نے ان کے لیے اس میں ہر بھلائی تیار کر رکھی ہے وہ دکھاؤں تو وہ اس پر یقین کر لیں، اور انہیں جہنم دکھاؤں اور جو کچھ میں نے ان کے لیے اس میں ہر برائی تیار کر رکھی ہے وہ دکھاؤں تو وہ اس پر یقین کر لیں، لیکن میں نے جان بوجھ کر یہ ان سے چھپا رکھا ہے تاکہ میں جان لوں کہ وہ کیسے عمل کرتے ہیں، حالانکہ میں نے یہ ان کے لیے واضح کر دیا ہے۔“

سیدنا ابومالک اشعری رضی اللہ عنہ سے روایت ہے، رسول اللہ ﷺ نے فرمایا: ”جو آدمی رات کو بیدار ہو اور اپنی بیوی کو جگائے، اگر اسے نیند غالب آ جائے تو وہ اس کے چہرے پر پانی کے چھینٹے مارے، پھر دونوں اپنے گھر میں کھڑے ہو کر رات کی کسی گھڑی اللہ عزوجل کو یاد کریں، تو دونوں کی مغفرت کر دی جاتی ہے۔“

سیدنا ابومالک اشعری رضی اللہ عنہ سے روایت ہے، رسول اللہ ﷺ نے فرمایا: ”اللہ کے نزدیک سب سے وفا دار بات یہ ہے کہ بندہ کہے: اے اللہ! تو میرا رب ہے اور میں تیرا بندہ ہوں، میں نے اپنی جان پر ظلم کیا اور اپنے گناہ کا اعتراف کرتا ہوں، اور تیرے سوا کوئی گناہ نہیں بخشتا، اے میرے رب! مجھے بخش دے۔“

سیدنا ابومالک اشعری رضی اللہ عنہ سے روایت ہے کہ رسول اللہ ﷺ نے ہمیں حکم دیا کہ ہم صبح کرتے وقت، شام کرتے وقت اور اپنے بستروں پر لیٹتے وقت یہ کہیں: ”اے اللہ! آسمانوں اور زمین کو پیدا کرنے والے، غیب اور حاضر کو جاننے والے! تو ہر چیز کا رب ہے، اور فرشتے گواہی دیتے ہیں کہ تیرے سوا کوئی سچا معبود نہیں، ہم اپنے نفسوں کے شر سے اور شیطان مردود کے شر اور اس کے شرک سے تیری پناہ مانگتے ہیں، اور اس بات سے کہ ہم اپنی جانوں پر کوئی برائی کریں یا کسی مسلمان تک اسے پہنچائیں۔“

سیدنا ابومالک اشعری رضی اللہ عنہ سے روایت ہے، رسول اللہ ﷺ نے فرمایا: ”جب ابن آدم سو جاتا ہے تو فرشتہ شیطان سے کہتا ہے: مجھے اپنا نامۂ اعمال دے، وہ اسے دے دیتا ہے، تو فرشتہ اس انسان کے نامۂ اعمال میں جو نیکی پاتا ہے اس سے شیطان کے نامۂ اعمال کی دس برائیاں مٹا دیتا ہے اور انہیں نیکیاں لکھ دیتا ہے۔ پس جب تم میں سے کوئی سونا چاہے تو وہ تینتیس بار اللہ اکبر کہے، چونتیس بار الحمدللہ کہے، اور تینتیس بار سبحان اللہ کہے، تو یہ سو ہو جائیں گی۔“

سیدنا ابومالک اشعری رضی اللہ عنہ سے روایت ہے، رسول اللہ ﷺ فرمایا کرتے تھے: ”جب آدمی اپنے گھر میں داخل ہو تو وہ کہے: اے اللہ! میں تجھ سے داخل ہونے اور نکلنے کی بہترین جگہ کا سوال کرتا ہوں، اللہ کے نام سے ہم داخل ہوئے اور اللہ کے نام سے ہم نکلے، اور اپنے رب اللہ ہی پر ہم نے بھروسہ کیا۔ پھر وہ اپنے آپ کو سلام کہے۔“

سیدنا ابومالک اشعری رضی اللہ عنہ سے روایت ہے کہ رسول اللہ ﷺ نے فرمایا: ”جب تم میں سے کوئی صبح کرے تو وہ کہے: ہم نے صبح کی اور بادشاہی بھی اللہ رب العالمین کی صبح کو پہنچی، اے اللہ! میں تجھ سے اس دن کی بھلائی، اس کی فتح، اس کی مدد، اس کے نور، اس کی برکت اور اس کی ہدایت کا سوال کرتا ہوں، اور اس دن میں جو شر ہے اور اس سے پہلے اور اس کے بعد جو شر ہے اس سے تیری پناہ مانگتا ہوں، پھر جب شام کرے تو اسی طرح کہے۔“

سیدنا ابومالک اشعری رضی اللہ عنہ سے روایت ہے، رسول اللہ ﷺ نے فرمایا: ”جب تم میں سے کوئی سونا چاہے تو وہ کہے: میں اللہ پر ایمان لایا اور طاغوت کا انکار کیا، اللہ کا وعدہ سچا ہے اور رسول سچے ہیں، اے اللہ! میں اس رات کے آنے والے حوادث سے تیری پناہ مانگتا ہوں، سوائے اس آنے والے کے جو خیر لے کر آئے۔“

سیدنا ابومالک اشعری رضی اللہ عنہ سے روایت ہے، رسول اللہ ﷺ نے فرمایا: ”سنو، اس ذات کی قسم جس کے ہاتھ میں محمد کی جان ہے! قیامت کے دن تم میں سے ایک ایسی جماعت جنت کی طرف اٹھائی جائے گی جو اندھیری رات کی مانند ہو گی، سب ایک ساتھ زمین کو گھیرے ہوئے ہوں گے، فرشتے کہیں گے: محمد کے ساتھ جو امتی آئے ہیں وہ باقی انبیاء کے ساتھ آنے والوں سے زیادہ ہیں۔“

سیدنا ابومالک اشعری رضی اللہ عنہ سے روایت ہے، رسول اللہ ﷺ نے فرمایا: ”اللہ عزوجل تمہارے جسموں کو نہیں دیکھتا، نہ تمہارے حسب و نسب کو، نہ تمہارے مالوں کو، بلکہ وہ تمہارے دلوں کو دیکھتا ہے۔ پس جس کا دل نیک ہو اللہ اس پر مہربان ہوتا ہے۔ تم سب آدم کی اولاد ہو اور تم میں سے مجھے سب سے زیادہ پیارا وہی ہے جو سب سے زیادہ متقی ہے۔“

سیدنا ابومالک اشعری رضی اللہ عنہ سے روایت ہے، رسول اللہ ﷺ نے فرمایا: ”اے اللہ! موت کو اس شخص کے لیے محبوب بنا دے جو جانتا ہے کہ میں تیرا رسول ہوں۔“

سیدنا ابومالک اشعری رضی اللہ عنہ سے روایت ہے، رسول اللہ ﷺ نے فرمایا: ”وعدہ کیا گیا دن قیامت کا دن ہے، گواہی دینے والا دن جمعہ کا دن ہے، اور جس کے بارے میں گواہی دی جائے وہ عرفہ کا دن ہے، اور جمعہ کا دن اللہ نے ہمارے لیے خاص کر رکھا ہے، اور درمیانی نماز عصر کی نماز ہے۔“

سیدنا ابومالک اشعری رضی اللہ عنہ سے روایت ہے، رسول اللہ ﷺ نے فرمایا: ”جمعہ اپنے اور اس سے پہلے جمعہ کے درمیان کے گناہوں کا کفارہ ہے، اور تین دن کی زیادتی کے ساتھ، اور یہ اس لیے کہ اللہ عزوجل نے فرمایا: ”جو کوئی نیکی لے کر آئے گا اس کے لیے اس جیسی دس نیکیاں ہیں“ [سورۃ الانعام: 160]۔“

سیدنا ابومالک اشعری رضی اللہ عنہ سے روایت ہے، رسول اللہ ﷺ نے فرمایا: ”نمازیں اپنے درمیانی گناہوں کا کفارہ ہیں، کیونکہ اللہ عزوجل نے فرمایا: ”بے شک نیکیاں برائیوں کو مٹا دیتی ہیں“ [سورۃ ہود: 114]۔“

سیدنا ابومالک اشعری رضی اللہ عنہ سے روایت ہے، رسول اللہ ﷺ نے فرمایا: ”تم ایک ایسی امت ہو جس پر رحم کیا گیا ہے اور جسے معافی دی گئی ہے، پس ثابت قدم رہو اور اپنی طاقت بھر دین کے معاملے کو اختیار کرو۔“