المعجم الأوسط

سیدنا ابو ہریرہ رضی اللہ عنہ سے روایت ہے کہ رسول اللہ ﷺ نے فرمایا: ”جس شخص نے (تھنوں میں دودھ روک کر) مصراۃ بکری خرید لی تو اسے اختیار ہے، چاہے تو اسے واپس کر دے اور اس کے ساتھ ایک صاع کھجور (بھی) دے۔“
امام طبرانی رحمہ اللہ فرماتے ہیں: ”اس حدیث کو اعمش سے یزید بن عطاء کے سوا کسی نے روایت نہیں کیا، اور یزید سے زہیر بن عباد کے سوا کسی نے روایت نہیں کیا، اس میں ابو الزنباع منفرد ہیں۔“

سیدنا ابو سعید خدری رضی اللہ عنہ سے روایت ہے کہ رسول اللہ ﷺ نے فرمایا: ”جو شخص لوگوں کا شکر ادا نہیں کرتا، وہ اللہ عز وجل کا بھی شکر ادا نہیں کرتا۔“
امام طبرانی رحمہ اللہ فرماتے ہیں: ”اس حدیث کو مطرف سے اسباط کے سوا کسی نے روایت نہیں کیا، اس میں یوسف بن عدی منفرد ہیں۔“

سیدنا عبداللہ بن مسعود رضی اللہ عنہ سے روایت ہے کہ رسول اللہ ﷺ سے پوچھا گیا: ”کون سا عمل سب سے افضل ہے؟“ آپ ﷺ نے فرمایا: ”نماز کو اس کے وقت پر ادا کرنا، پھر والدین کے ساتھ حسنِ سلوک کرنا، پھر اللہ کی راہ میں جہاد کرنا۔“
امام طبرانی رحمہ اللہ فرماتے ہیں: ”اس حدیث کو بیان (بن بشر) سے محمد بن فضیل کے سوا کسی نے روایت نہیں کیا اور محمد بن فضیل سے یحییٰ جعفی کے سوا کسی نے روایت نہیں کیا۔“

سیدنا انس بن مالک رضی اللہ عنہ سے روایت ہے کہ سیدنا ابو طیبہ رضی اللہ عنہ نے رسول اللہ ﷺ کو پچھنے لگائے تو آپ ﷺ نے انہیں ان کی اجرت دی، اور اگر یہ (کمائی) حرام ہوتی تو آپ ﷺ انہیں نہ دیتے۔

سیدنا ابوہریرہ رضی اللہ عنہ سے روایت ہے کہ رسول اللہ ﷺ نے فرمایا: ”کیا تم میں سے کوئی اس بات سے نہیں ڈرتا کہ جب وہ امام سے پہلے اپنا سر اٹھاتا ہے تو اللہ اس کے سر کو گدھے کے سر میں بدل دے؟“
امام طبرانی رحمہ اللہ فرماتے ہیں: ”اس حدیث کو مسعر سے زید بن حبان کے سوا کسی نے روایت نہیں کیا اور زید بن حبان سے معمر بن سلیمان کے سوا کسی نے روایت نہیں کیا، اور اس میں یوسف بن عدی منفرد ہیں۔“

شریح رحمہ اللہ سے روایت ہے کہ سیدنا عمر بن خطاب رضی اللہ عنہ نے فرمایا: ”عورتوں کے مہر میں غلو (زیادتی) نہ کرو، کیونکہ اگر یہ دنیا اور آخرت میں عزت و شرف کی بات ہوتی تو تم سب سے زیادہ اس کے حق دار اور اس کے لائق محمد رسول اللہ ﷺ اور آپ ﷺ کے اہلِ بیت ہوتے، (حالانکہ) آپ ﷺ نے اپنی بیویوں میں سے کسی عورت سے (نکاح کرتے ہوئے) اور اپنی بیٹیوں میں سے کسی بیٹی کا نکاح کرتے ہوئے بارہ اوقیہ سے زیادہ مہر نہیں رکھا۔“
امام طبرانی رحمہ اللہ فرماتے ہیں: ”اس حدیث کو شریح سے شعبی کے سوا کسی نے روایت نہیں کیا، اور شعبی سے اشعث بن سوار کے سوا کسی نے روایت نہیں کیا، اور اشعث سے قاسم بن مالک کے سوا کسی نے روایت نہیں کیا، اور اس میں یوسف بن عدی منفرد ہیں۔“

سیدنا ابوہریرہ رضی اللہ عنہ سے روایت ہے کہ رسول اللہ ﷺ نے فرمایا: ”جب میری امت اتراہٹ کی چال (متکبرانہ انداز) سے چلنے لگے گی اور فارس و روم کے لوگ ان کی خدمت کریں گے تو ان میں سے بعض کو بعض پر مسلط کر دیا جائے گا۔“
امام طبرانی رحمہ اللہ فرماتے ہیں: ”اس حدیث کو عمارہ بن غزیہ سے ابن لہیعہ کے سوا کسی نے روایت نہیں کیا۔“

سیدنا عبداللہ بن عمر رضی اللہ عنہما سے روایت ہے کہ رسول اللہ ﷺ کی دعاؤں میں سے ایک دعا یہ تھی: «اللَّهُمَّ إِنِّي أَعُوذُ بِكَ مِنْ زَوَالِ نِعْمَتِكَ، وَتَحْوِيلِ عَافِيَتِكَ، وَفُجَاءَةِ نِقْمَتِكَ، وَجَمِيعِ سَخَطِكَ» ”اے اللہ! میں تیری نعمت کے زائل ہو جانے، تیری عطا کردہ عافیت کے پلٹ جانے، تیری اچانک پکڑ اور تیری ہر طرح کی ناراضی سے تیری پناہ چاہتا ہوں۔“
امام طبرانی رحمہ اللہ فرماتے ہیں: ”اس حدیث کو ابن عمر رضی اللہ عنہما سے عبداللہ بن دینار کے سوا کسی نے روایت نہیں کیا، اور عبداللہ بن دینار سے موسیٰ بن عقبہ کے سوا کسی نے روایت نہیں کیا، اور اس میں یعقوب بن عبدالرحمن زہری منفرد ہیں۔“

سیدنا عبادہ بن صامت رضی اللہ عنہ سے روایت ہے کہ رسول اللہ ﷺ نے فرمایا: ”اے اللہ! جو شخص اہلِ مدینہ پر ظلم کرے اور انہیں خوف زدہ کرے تو تو اسے خوف زدہ کر دے، اور اس پر اللہ کی، فرشتوں کی اور تمام لوگوں کی لعنت ہو، اس سے نہ کوئی فرض قبول کیا جائے گا اور نہ نفل۔“
امام طبرانی رحمہ اللہ فرماتے ہیں: ”اس حدیث کو موسیٰ بن عقبہ سے ہشام بن عروہ کے سوا کسی نے روایت نہیں کیا، اور اس میں لیث بن سعد منفرد ہیں۔“

سیدنا عبداللہ بن عباس رضی اللہ عنہما سے روایت ہے کہ رسول اللہ ﷺ ایک شخص کے پاس سے گزرے جس نے اپنا پاؤں بکری کے پہلو پر رکھا ہوا تھا اور وہ اپنی چھری تیز کر رہا تھا جبکہ بکری اس کی طرف نظر جما کر دیکھ رہی تھی، تو آپ ﷺ نے فرمایا: ”کیا یہ کام اس سے پہلے نہیں کر سکتے تھے؟ کیا تم اسے دو مرتبہ موت دینا چاہتے ہو؟“
امام طبرانی رحمہ اللہ فرماتے ہیں: ”اس حدیث کو عاصم سے، انہوں نے عکرمہ سے، انہوں نے ابن عباس رضی اللہ عنہما سے متصل سند کے ساتھ عبدالرحیم بن سلیمان کے سوا کسی نے روایت نہیں کیا، اور اس میں یوسف بن عدی منفرد ہیں۔“

سیدنا جابر رضی اللہ عنہما سے روایت ہے کہ رسول اللہ ﷺ نے فرمایا: ”جب تم میں سے کوئی ہانڈی پکائے تو اس کا شوربا زیادہ رکھے، پھر اس میں سے اپنے پڑوسی کو بھی دے۔“
امام طبرانی رحمہ اللہ فرماتے ہیں: ”اس حدیث کو اعمش سے ابو مسلم کے سوا کسی نے روایت نہیں کیا۔“

سیدنا عبداللہ بن عمر رضی اللہ عنہما فرماتے ہیں: ”رسول اللہ ﷺ کی صاحبزادی بیمار ہو گئیں تو رسول اللہ ﷺ نے سیدنا عثمان رضی اللہ عنہ سے فرمایا: ”تم ان کے پاس ٹھہرو، کیونکہ ان کے پاس میرا یا تمہارا رہنا ضروری ہے، اور تم اس کے زیادہ حق دار ہو۔“ چنانچہ رسول اللہ ﷺ نے انہیں ان کی تیمارداری کے لیے پیچھے چھوڑ دیا۔ پھر جب اللہ نے آپ ﷺ کو فتح عطا فرمائی تو رسول اللہ ﷺ نے انہیں یہ بشارت دینے کے لیے پیغام بھیجا کہ اللہ نے تمہارے ذریعے ان کی تعداد پوری کر دی ہے۔“
امام طبرانی رحمہ اللہ فرماتے ہیں: ”اس حدیث کو وبرہ سے مجالد کے سوا کسی نے روایت نہیں کیا، اور مجالد سے احمد بن بشیر کے سوا کسی نے روایت نہیں کیا، اور اس میں یحییٰ جعفی منفرد ہیں۔“

سیدنا مستورد بن شداد رضی اللہ عنہ بیان کرتے ہیں کہ سیدنا مقداد رضی اللہ عنہ نے فرمایا: ”جب ہم نے مدینہ کی طرف ہجرت کی تو رسول اللہ ﷺ نے ہمیں دس دس افراد کی ٹولیوں میں تقسیم فرما دیا، چنانچہ میں اسی ٹولی میں تھا جو رسول اللہ ﷺ کے ساتھ تھی۔ ہمارے پاس ایک بکری تھی جس کا دودھ ہم آپس میں بانٹ کر پیتے تھے۔ ایک رات آپ ﷺ کو آنے میں دیر ہو گئی، حالانکہ ہم آپ کا حصہ آپ کے لیے الگ رکھ چکے تھے۔ میں بھوکا تھا، میں اٹھا اور وہ دودھ پی لیا۔ پھر نبی کریم ﷺ تشریف لائے، اور میں ابھی سویا نہیں تھا۔ آپ ﷺ اس برتن کے پاس گئے جس میں ہم دودھ رکھا کرتے تھے تو اس میں کچھ نہ پایا۔ میں نے عرض کیا: ”اے اللہ کے رسول! کیا میں آپ کے لیے اسے ذبح نہ کر دوں؟“ آپ ﷺ نے فرمایا: ”نہیں۔““
امام طبرانی رحمہ اللہ فرماتے ہیں: ”اس حدیث کو اسماعیل بن ابی خالد سے محمد بن جابر کے سوا کسی نے روایت نہیں کیا، اور اس میں محمد بن زنبور منفرد ہیں۔“