مجمع الزوائد ومنبع الفوائد

سیدنا عبداللہ بن مسعود رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” حقیر گناہوں سے بچ کے رہو ! کیونکہ وہ کسی شخص کے خلاف اکٹھے ہو جاتے ہیں ، یہاں تک کہ اسے ہلاکت کا شکار کر دیتے ہیں ۔ “ پھر نبی اکرم صلی اللہ علیہ وسلم نے لوگوں کے سامنے ایک مثال بیان کی : جیسے کچھ لوگ کسی ویرانے میں پڑاؤ کرتے ہیں ، کھانا تیار کرنے کا وقت ہوتا ہے ، ایک شخص جاتا ہے ایک لکڑی لے آتا ہے ، دوسرا شخص جاتا ہے دوسری لکڑی لے آتا ہے ، یہاں تک کہ وہ بہت سی لکڑیاں اکٹھی کر لیتے ہیں ، آگ جلاتے ہیں اور اس پر کچھ پکا لیتے ہیں ۔ “
یہ روایت امام أحمد نے اور امام طبرانی نے معجم اوسط میں نقل کی ہے اور ان دونوں کے رجال ” صحیح“ کے رجال ہیں ، صرف عمران بن داؤد قطان کا معاملہ مختلف ہے اور اس کی توثیق کی گئی ہے ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” شیطان اس بات سے مایوس ہو چکا ہے کہ عرب کی سرزمین پر بتوں کی عبادت کی جائے ، البتہ وہ تمہاری طرف سے اس سے کم چیز یعنی حقیر گناہوں سے بھی راضی ہو جائے گا ، اور وہ گناہ قیامت کے دن ہلاکت کا شکار کرنے والے ہوں گے ، تم سے جہاں تک ہو سکے ، ظلم کرنے سے بچو ! کیونکہ قیامت کے دن کوئی بندہ نیکیاں لے کر آئے گا اور وہ یہ سمجھے گا کہ یہ نیکیاں اسے نجات دلا دیں گی ، لیکن پھر کوئی بندہ کھڑا ہو کر یہ کہے گا : اے میرے پروردگار ! تیرے بندے نے میرے ساتھ زیادتی کی تھی ، تو پروردگار فرمائے گا : اس کی نیکیاں مٹا دو ! ایسا مسلسل ہوتا رہے گا ، یہاں تک کہ اس شخص کی کوئی بھی نیکی باقی نہیں رہے گی ، اس کی مثال یوں ہے ، جیسے کچھ لوگ سفر کرنے کے دوران کسی ویرانے میں پڑاؤ کرتے ہیں ، ان کے پاس لکڑیاں نہیں ہوتی ہیں ، وہ لکڑیاں اکٹھی کرنے کے لئے ادھر ادھر بکھر جاتے ہیں ، یہاں تک کہ لکڑی کی اکٹھی کر لیتے ہیں اور بہت سی آگ جلا لیتے ہیں ، اور جو ان کا ارادہ ہو وہ پکا لیتے ہیں ، تو گناہوں کی مثال بھی اسی طرح ہے ۔ “
یہ روایت امام ابویعلیٰ نے نقل کی ہے ، اس کی سند میں ایک راوی ابراہیم بن مسلم ہجری ہے ، اور وہ ضعیف ہے ۔

سیدنا عبداللہ بن مسعود رضی اللہ عنہ فرماتے ہیں : ” حقیر گناہوں کی مثال ، ایسے مسافر لوگوں کی مانند ہے ، جو کسی ویرانے میں پڑاؤ کرتے ہیں ، ان کے پاس کھانے کے لیے اناج ہوتا ہے ، لیکن وہ اناج صرف آگ کے ذریعے تیار ہو سکتا ہے ، تو وہ لوگ ادھر ادھر بکھر جاتے ہیں ، کوئی شخص مینگنی لے کے آتا ہے ، کوئی ہڈی لے کے آتا ہے ، کوئی لکڑی لے کے آتا ہے ، یہاں تک کہ وہ اتنی چیزیں اکٹھی کر لیتے ہیں کہ انہیں آگ لگا کر اپنا کھانا تیار کر سکیں ، تو حقیر گناہ کرنے والے کی مثال بھی اسی طرح ہے ، کبھی وہ جھوٹ بول لیتا ہے ، کبھی کوئی اور گناہ کر لیتا ہے ، اور جب یہ سب اکٹھے ہوتے ہیں ، تو ہو سکتا ہے کہ وہ اسے چہرے کے بل جہنم کی آگ میں پھینکوا دیں ۔ “
یہ روایت امام طبرانی نے دو اسناد کے ساتھ ” موقوف “ روایت کے طور پر نقل کی ہے ، اور ان دونوں میں سے ایک کے رجال ” صحیح “ کے رجال ہیں ۔

سیدنا سہل بن سعد رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” حقیر گناہوں سے بچ کے رہو ! کیونکہ حقیر گناہوں کی مثال ، ان لوگوں کی مانند ہے ، جو کسی وادی میں پڑاؤ کرتے ہیں ، ایک شخص ایک لکڑی لے کر آتا ہے ، دوسرا شخص دوسری لکڑی لے کر آتا ہے ، یہاں تک کہ اتنی لکڑیاں ہو جاتی ہیں کہ ان کے ذریعے وہ اپنی روٹی پکا سکتے ہیں ، تو حقیر گناہوں کی مثال بھی اسی طرح ہے ( کہ جب وہ بہت زیادہ اکٹھے ہو جائیں ) اور ان کے مرتکب شخص کی گرفت کی جائے ، تو وہ اس شخص کو ہلاکت کا شکار کر دیں گے ۔ “
یہ روایت امام أحمد نے نقل کی ہے اور اس کے رجال ” صحیح “ کے رجال ہیں ، امام طبرانی نے اس کو تینوں کتابوں میں دو حوالوں سے نقل کیا ہے ، ان دونوں میں سے ایک کے رجال صحیح کے رجال ہیں ، صرف عبدالوہاب بن عبدالحکم کا معاملہ مختلف ہے اور وہ ثقہ ہے ۔

سیدنا سعد بن جنادہ رضی اللہ عنہ بیان کرتے ہیں : جب نبی اکرم صلی اللہ علیہ وسلم غزوہ حنین سے فارغ ہوئے ، تو ہم نے ایک ویران جگہ پر پڑاؤ کیا وہاں کوئی چیز موجود نہیں تھی ، نبی اکرم صلی اللہ علیہ وسلم نے ارشاد فرمایا : تم لوگ جمع کرو ! جسے جو چیز ملے ، وہ لے آئے ، جسے ہڈی ملے یا کوئی اور چیز ملے ، وہ اسے لے آئے ، راوی بیان کرتے ہیں : تھوڑی ہی دیر میں ایک ڈھیر اکٹھا ہو گیا ، نبی اکرم صلی اللہ علیہ وسلم نے ارشاد فرمایا : کیا تم لوگ اسے دیکھ رہے ہو ؟ اسی طرح گناہ تم میں سے کسی ایک شخص کے خلاف اکٹھے ہو جاتے ہیں ، جس طرح تم نے اس کو اکٹھا کیا ہے ، تو آدمی کو اللہ تعالیٰ سے ڈرتے رہنا چاہیے ، اور چھوٹا یا بڑا کوئی گناہ نہیں کرنا چاہیے ، کیونکہ وہ اس شخص کے خلاف شمار ہوں گے ۔
یہ روایت امام طبرانی نے نقل کی ہے ، اس کی سند میں ایک راوی نفیح ابوداؤد ہے اور وہ ضعیف ہے ۔

سیدنا ابوسعید خدری رضی اللہ عنہ بیان کرتے ہیں : تم لوگ ایسے اعمال کرتے ہو کہ وہ تمہاری نگاہوں میں بال سے زیادہ ہلکے ہوتے ہیں ، اور نبی اکرم صلی اللہ علیہ وسلم کے زمانہ اقدس میں ، ہم لوگ انہیں ہلاکت کا شکار کرنے والے اعمال شمار کرتے تھے ۔
یہ روایت امام أحمد نے نقل کی ہے اور اس کے رجال ” صحیح “ کے رجال ہیں ۔

سیدنا عبادہ بن قرص رضی اللہ عنہ ۔ ( راوی کو شک ہے ، یا شاید یہ لفظ ہے : ) ۔ قرط فرماتے ہیں : ” آج کل تم ایسے اعمال کرتے ہو جو تمہاری نگاہوں میں بال سے زیادہ باریک ( یعنی ہلکے ) ہوتے ہیں ، اور نبی اکرم صلی اللہ علیہ وسلم کے زمانہ اقدس میں ، ہم لوگ انہیں ہلاکت کا شکار کرنے والے اعمال شمار کرتے تھے ۔ “ حمید کہتے ہیں : میں نے ابوقتادہ سے دریافت کیا : اگر وہ ہمارا زمانہ پا لیتے ، تو پھر کیا کہتے ؟ ابوقتادہ نے کہا: پھر تو یہ بات زیادہ موزوں ہونی تھی ۔
یہ روایت امام أحمد نے نقل کی ہے ، انہوں نے لفظ ” عبادہ “ نقل کیا ہے ، جبکہ امام طبرانی نے اس میں لفظ ” عباد “ نقل کیا ہے ، باقی اللہ بہتر جانتا ہے ، امام أحمد اور امام طبرانی کی اسانید کے بعض رجال ” صحیح “ کے رجال ہیں ۔

سیدنا جابر رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” ایک عورت کو ، ایک بلی کی وجہ سے عذاب دیا گیا ۔ ( یہاں بلی کے لئے استعمال ہونے والے لفظ کے بارے میں راوی کو شک ہے ) ۔ اس عورت نے اسے باندھ دیا ، یہاں تک کہ وہ مر گئی ، اس عورت نے اسے چھوڑا نہیں ، تاکہ وو بلی خود زمین سے کچھ کھا لیتی ، تو اس عمل کی وجہ سے اُس عورت کے لئے جہنم واجب ہو گئی ۔ “
یہ روایت امام أحمد نے نقل کی ہے ، اس کی سند میں ایک راوی ابن لہیعہ ہے اور وہ حسن الحدیث ہے ، اس میں ضعف پایا جاتا ہے ، اس روایت کے بقیہ رجال ” صحیح “ کے رجال ہیں ۔

علقمہ بیان کرتے ہیں : ہم لوگ سیدہ عائشہ رضی اللہ عنہا کے پاس موجود تھے ، اسی دوران سیدنا ابوہریرہ رضی اللہ عنہ بھی تشریف لے آئے ، سیدہ عائشہ رضی اللہ عنہا نے فرمایا : آپ ہی وہ فرد ہیں ، جو یہ حدیث بیان کرتے ہیں : کہ ایک عورت کو بلی کی وجہ سے عذاب دیا گیا ، اس عورت نے اس بلی کو باندھ دیا تھا اور وہ اس بلی کو کھانے کے لئے ، یا پینے کے لئے کچھ نہیں دیتی تھی ؟ سیدنا ابوہریرہ رضی اللہ عنہ نے جواب دیا : میں نے یہ بات ان کی ( یعنی نبی اکرم صلی اللہ علیہ وسلم کی زبانی سنی ہے ، سیدہ عائشہ رضی اللہ عنہا نے فرمایا : کیا آپ یہ بات جانتے ہیں کہ وہ عورت کیا تھی ؟ اپنے اس طرز عمل کے ہمراہ وہ عورت کافر بھی تھی ، اور مؤمن اللہ تعالیٰ کے نزدیک اس سے زیادہ معزز ہے کہ اللہ تعالیٰ کسی بلی کی وجہ سے اُسے عذاب دے ، جب آپ نبی اکرم صلی اللہ علیہ وسلم کے حوالے سے کوئی حدیث روایت کریں ، تو اس بات کا جائزہ لے لیا کریں کہ آپ کیا روایت کر رہے ہیں ؟
یہ روایت امام أحمد نے نقل کی ہے اور اس کے رجال ” صحیح “ کے رجال ہیں ۔

سیدنا ابودرداء رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تم لوگ جانوروں کے ساتھ جو سلوک کرتے ہو ، اگر اُس حوالے سے تمہاری مغفرت ہو گئی ، تو تمہاری بہت سی ( دوسری کوتاہیوں کی بھی ) مغفرت ہو جائے گی ۔ “
یہ روایت امام أحمد نے ” مرفوع “ روایت کے طور پر نقل کی ہے ، جیسا کہ آپ اسے ملاحظہ فرما رہے ہیں ، جبکہ ان کے صاحبزادے عبداللہ نے اسے ” موقوف “ روایت کے طور پر نقل کیا ہے اور اس کی سند عمدہ ہے ۔