مجمع الزوائد ومنبع الفوائد

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” کیا میں تمہیں سب سے بڑے سخی کے بارے میں نہ بتاؤں ؟ اللہ تعالیٰ سب سے بڑا سخی ہے ، اور میں اولاد آدم میں سب سے زیادہ سخی ہوں ، اور میرے بعد ان میں سب سے زیادہ سخی وہ شخص ہے ، جو علم حاصل کرے اور اپنے علم کو پھیلائے ، اسے قیامت کے دن ایک امت کے طور پر اٹھایا جائے گا ، اور ایک وہ شخص ہے ، جو اپنی جان کے ہمراہ اللہ کی راہ میں ( جنگ میں ) حصہ لے ، یہاں تک کہ شہید ہو جائے ۔ “
یہ روایت امام ابویعلیٰ نے نقل کی ہے اس کی سند میں ایک راوی سوید بن عبدالعزیز ہے ، اور وہ متروک ہے ۔

عبداللہ بن ابوبکر بیان کرتے ہیں : سیدنا ابواسید رضی اللہ عنہ یہ کہا: کرتے تھے : نبی اکرم صلی اللہ علیہ وسلم سے جب کوئی چیز مانگی جاتی تھی ، تو آپ صلی اللہ علیہ وسلم منع نہیں کرتے تھے ۔ ( علامہ ہیثمی فرماتے ہیں : ) میں یہ کہتا ہوں :
یہ روایت امام أحمد نے ایک طویل حدیث میں نقل کی ہے ، جو اس سے پہلے غزوہ بدر سے متعلق باب میں گزر چکی ہے ، اس کے رجال ثقہ ہیں تاہم عبداللہ بن ابوبکر نامی راوی نے ، سیدنا ابواسید رضی اللہ عنہ سے سماع نہیں کیا ہے ، باقی اللہ بہتر جانتا ہے ۔

سیدنا علی رضی اللہ عنہ بیان کرتے ہیں : نبی اکرم صلی اللہ علیہ وسلم سے جب کوئی چیز پوچھی جاتی تھی اور آپ کا ویسا کرنے کا ارادہ ہوتا تھا ، تو آپ فرماتے تھے : ٹھیک ہے ، اور اگر آپ کا وہ کام کرنے کا ارادہ نہیں ہوتا تھا ، تو آپ خاموش رہتے تھے ، آپ یہ نہیں کہتے تھے : جی نہیں !
یہ روایت امام طبرانی نے معجم اوسط میں ایک طویل حدیث کے ضمن میں نقل کی ہے ، جو دعاؤں سے متعلق کتاب میں ہے ، اس کی سند میں ایک راوی محمد بن کثیر کوفی ہے ، اور وہ ضعیف ہے ۔

سیدنا زید بن ثابت رضی اللہ عنہ بیان کرتے ہیں : ایک عرب شخص نبی اکرم صلی اللہ علیہ وسلم کے پاس آیا ، اس نے آپ سے دو پہاڑوں کے درمیان موجود زمین مانگی ، نبی اکرم صلی اللہ علیہ وسلم نے اس کے لئے وہ زمین لکھ دی ، وہ شخص مسلمان ہوا ، اور اپنی قوم کے پاس گیا اور ان سے کہنے لگا : تم لوگ مسلمان ہو جاؤ ! میں تم لوگوں کے پاس ایک ایسے فرد کی طرف سے آیا ہوں جو اتنا عطیہ دیدیتے ہیں کہ پھر غربت کا خوف نہیں رہتا ۔ “
یہ روایت امام طبرانی نے نقل کی ہے ، اس کی سند میں ایک راوی عبدالرحمن بن یحیی عذری ہے ، اس کے بارے میں یہ کہا: گیا ہے : یہ مجہول ہے ، اس روایت کے بقیہ رجال کی توثیق کی گئی ہے ۔

سیدہ ربیع بنت معوذ بن عفراء رضی اللہ عنہا بیان کرتی ہیں : سیدنا معوذ بن عفراء رضی اللہ عنہ نے مجھے کھجوروں کے ایک گچھے کے ہمراہ بھیجا ، اس کے ساتھ ککڑی بھی تھی ، انہوں نے اس کے ہمراہ مجھے نبی اکرم صلی اللہ علیہ وسلم کے پاس بھیجا ، نبی اکرم صلی اللہ علیہ وسلم ککڑی کو پسند کرتے تھے ، نبی اکرم صلی اللہ علیہ وسلم کے پاس بحرین سے زیورات آئے تھے ، آپ صلی اللہ علیہ وسلم نے اُن میں سے ہاتھ بھر کے وہ مجھے دیدیے ۔

ایک روایت میں یہ الفاظ ہیں : تو نبی اکرم صلی اللہ علیہ وسلم نے دونوں ہاتھ بھر کے زیور ( راوی کو شک ہے ، شاید یہ الفاظ ہیں : ) سونا مجھے عطا کیا ۔
یہ روایت امام طبرانی نے نقل کی ہے ، روایت کے یہ الفاظ ان کے نقل کردہ ہیں ، امام أحمد نے اسے نقل کیا ہے ، اور یہ الفاظ زائد نقل کیے ہیں : آپ نے فرمایا : ” تم یہ زیور پہن لینا ۔ “ ان دونوں روایات کی سند حسن ہے ۔

سیدنا عبداللہ بن عمر رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو سنا ، آپ ایک کپڑے والے کے پاس آئے ، آپ نے اس سے ایک قمیص چار درہم کے عوض میں خریدی ، پھر آپ تشریف لے گئے ، وہ قمیص آپ نے پہنی ، انصار سے تعلق رکھنے والے ایک شخص نے عرض کی : یا رسول اللہ ! آپ یہ قمیص مجھے پہننے کے لئے دے دیں ، اللہ تعالیٰ آپ کو جنت کی قمیص پہنائے ، تو نبی اکرم صلی اللہ علیہ وسلم نے وہ قمیص اتاری ، اور وہ اسے پہننے کے لئے دیدی ، پھر آپ واپس اس دوکاندار کے پاس گئے ، اور چار درہم کے عوض میں اس سے ایک اور قمیص خریدی ، اب آپ کے پاس دو درہم باقی بچ گئے تھے ، راستے میں ایک بچی رو رہی تھی ، آپ نے دریافت کیا : تم کیوں رو رہی ہو ؟ اس نے عرض کی : یا رسول اللہ ! میرے گھر والوں نے مجھے دو درہم دیے تھے ، تاکہ میں ان کے ذریعے آٹا خریدوں ، تو وہ گم ہو گئے ہیں ، نبی اکرم صلی اللہ علیہ وسلم نے باقی بچ جانے والے دو درہم اسے دیدیے ، پھر وہ لڑکی روتی ہوئی واپس مڑی ، تو نبی اکرم صلی اللہ علیہ وسلم نے اسے بلایا اور فرمایا : اب تم کیوں رو رہی ہو ؟ جبکہ تم نے دو درہم لے لیے ہیں ، وہ بولی: مجھے یہ اندیشہ ہے کہ گھر والے مجھے ماریں گے ، نبی اکرم صلی اللہ علیہ وسلم اس لڑکی کے ساتھ چلتے ہوئے اس کے گھر والوں کے پاس گئے ، آپ نے سلام کیا تو لوگوں نے آپ کی آواز پہچان لی ، آپ نے پھر سلام کیا ، پھر آپ نے سلام کیا ، جب آپ نے تیسری مرتبہ سلام کیا ، تو ان لوگوں نے جواب دیا : نبی اکرم صلی اللہ علیہ وسلم نے دریافت کیا : کیا تم لوگوں نے پہلا سلام سن لیا تھا ؟ ان لوگوں نے جواب دیا : جی ہاں ! لیکن ہماری یہ خواہش تھی کہ آپ ہمیں مزید سلام کریں ، ہمارے ماں باپ آپ پر قربان ہوں ، آپ کا کس سلسلے میں آنا ہوا ؟ نبی اکرم صلی اللہ علیہ وسلم نے فرمایا : اس کنیز کو یہ ڈر تھا کہ تم اس کی پٹائی کرو گے ، اس کنیز کے مالک نے کہا: یہ اللہ کی راہ میں آزاد ہے ، کیونکہ آپ اس کے ساتھ چل کے آئے ہیں ، تو نبی اکرم صلی اللہ علیہ وسلم نے اُن لوگوں کو بھلائی اور جنت کی خوشخبری دی اور فرمایا : اللہ تعالیٰ ان دس درہموں میں برکت دے ، اللہ تعالیٰ نے اپنے نبی کو ایک قمیص پہنائی ، انصار سے تعلق رکھنے والے ایک شخص کو قمیص پہننے کے لئے دی ، اور اس رقم کے ذریعے ایک گردن کو بھی آزاد کروا دیا ، تو میں اللہ تعالیٰ کی حمد بیان کرتا ہوں ، جس نے اپنی قدرت کے ذریعے ہمیں یہ چیز نصیب کی ہے ۔ “
یہ روایت امام طبرانی نے نقل کی ہے ، اس کی سند میں ایک راوی یحیی بن عبداللہ بابلتی ہے ، اور وہ ضعیف ہے ۔

سیدہ ام سنبلہ رضی اللہ عنہا بیان کرتی ہیں : وہ ایک تحفہ لے کر نبی اکرم صلی اللہ علیہ وسلم کی خدمت میں حاضر ہوئیں ، تو نبی اکرم صلی اللہ علیہ وسلم کی ازواج نے اسے قبول کرنے سے سے انکار کر دیا ، انہوں نے کہا: ہم یہ نہیں لیں گی ، نبی اکرم صلی اللہ علیہ وسلم نے ان ازواج کو حکم دیا ، تو ان ازواج نے اسے قبول کر لیا ، پھر نبی اکرم صلی اللہ علیہ وسلم نے ایک وادی اُسے جاگیر کے طور پر دی ۔ سیدنا عبداللہ بن جحش رضی اللہ عنہ نے سیدنا حسن بن علی رضی اللہ عنہ سے وہ زمین خرید لی تھی ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عمر بن قیظی ہے ، اور میں اس سے واقف نہیں ہوں ، اس روایت کے بقیہ رجال ثقہ ہیں ۔

سیدنا علی رضی اللہ عنہ بیان کرتے ہیں : ایک مرتبہ میں سیدنا عباس رضی اللہ عنہ ، فاطمہ اور زید بن حارثہ ، نبی اکرم صلی اللہ علیہ وسلم کے پاس موجود تھے ، سیدنا عباس رضی اللہ عنہ نے کہا: یا رسول اللہ ! میری عمر زیادہ ہو گئی ہے ، میری ہڈیاں کمزور ہو گئی ہیں ، میرے اخراجات زیادہ ہو گئے ہیں ، اگر آپ مناسب سمجھیں تو میرے لئے فلاں فلاں چیز کا حکم دیدیں ، یعنی میرے لئے اناج کے اتنے وسق کا حکم دے دیں ، تو نبی اکرم صلی اللہ علیہ وسلم نے فرمایا : ہم ایسا کر لیں گے ، فاطمہ نے عرض کی : یا رسول اللہ ! اگر آپ مناسب سمجھیں ، تو میرے لئے بھی اسی کی مانند حکم دے دیں ، جو آپ نے اپنے چچا کے لئے حکم دیا ہے ، نبی اکرم صلی اللہ علیہ وسلم نے فرمایا : ہم ایسا کر دیں گے ، سیدنا زید بن حارثہ رضی اللہ عنہ نے عرض کی : یا رسول اللہ آپ نے مجھے ایک زمین دی تھی ، میرا گزر بسر اُسی سے ہوتا تھا ، پھر آپ نے وہ واپس لے لی ، اگر آپ مناسب سمجھیں ، تو وہ واپس کر دیں ، نبی اکرم صلی اللہ علیہ وسلم نے فرمایا : ہم ایسا کر دیں گے ۔ اس کے بعد راوی نے پوری حدیث ذکر کی ہے ، یہ روایت امام ابوداؤد نے بھی نقل کی ہے ۔
یہ روایت امام أحمد ، امام ابویعلیٰ اور امام بزار نے نقل کی ہے ، انہوں نے یہ الفاظ زائد نقل کیے ہیں : میں نے عرض کی : یا رسول اللہ ! اگر آپ مناسب سمجھیں ، تو آپ مجھے اس حق کا نگران مقرر کر دیں ، جو اللہ تعالیٰ نے اپنی کتاب میں آپ کے لئے مقرر کیا ہے ، جس کا تعلق خمس سے ہے ، اسے میں آپ کی جگہ تقسیم کر دیا کروں ، تاکہ آپ کے بعد میرے ساتھ کوئی جھگڑا نہ کرے ، تو نبی اکرم صلی اللہ علیہ وسلم نے فرمایا : ہم ایسا کر دیں گے ، پھر نبی اکرم صلی اللہ علیہ وسلم نے مجھے اس کا نگران مقرر کیا ، آپ کی زندگی میں ، میں ہی اسے تقسیم کرتا رہا ، پھر سیدنا ابوبکر رضی اللہ عنہ نے مجھے اس کا نگران مقرر کیا ، اور اسے میں ہی تقسیم کرتا رہا ۔ ان دونوں روایات کے رجال ثقہ ہیں ۔

سیدنا جابر رضی اللہ عنہ بیان کرتے ہیں : جب میرے والد شہید ہو گئے ، تو نبی اکرم صلی اللہ علیہ وسلم نے مجھے بلایا اور فرمایا : کیا تم درہموں کو پسند کرتے ہو ؟ میں نے عرض کی : جی ہاں ، نبی اکرم صلی اللہ علیہ وسلم نے فرمایا : اگر ہمارے پاس مال آیا ، تو میں تمہیں اتنے اتنے دوں گا ۔ راوی کہتے ہیں : نبی اکرم صلی اللہ علیہ وسلم کے مجھے ادائیگی کرنے سے پہلے ، نبی اکرم صلی اللہ علیہ وسلم کا وصال ہو گیا ، جب سیدنا ابوبکر رضی اللہ عنہ کو خلیفہ بنایا گیا ، تو ان کے پاس بحرین سے مال آیا ، تو انہوں نے فرمایا : تم اس طرح وصول کر لو ، جس طرح نبی اکرم صلی اللہ علیہ وسلم نے تم سے ارشاد فرمایا تھا ، تو میں نے وہ وصول کر لیے ۔ ( علامہ ہیثمی فرماتے ہیں : ) میں یہ کہتا ہوں : یہ روایت ” صحیح “ میں اس سیاق کے بغیر مذکور ہے ،
یہ روایت امام بزار نے نقل کی ہے ، اور اس کی سند حسن ہے ۔