مجمع الزوائد ومنبع الفوائد

سیدنا سلمان فارسی رضی اللہ عنہ بیان کرتے ہیں : کوئی بھی شخص نبی اکرم صلی اللہ علیہ وسلم سے زیادہ حرمت والا نہیں تھا ، نبی اکرم صلی اللہ علیہ وسلم کے اصحاب جب آپ کے نام کوئی خط لکھتے تھے ، تو وہ یہ تحریر کرتے تھے کہ یہ فلاں شخص کی طرف سے اللہ کے رسول سیدنا محمد ( صلی اللہ علیہ وسلم ) کی طرف ہے ۔
یہ روایت امام طبرانی نے نقل کی ہے ۔ اس کی سند میں ایک راوی قیس بن ربیع ہے ، جسے ثوری اور شعبہ نے ثقہ قرار دیا ہے ، اور دیگر حضرات نے اسے ضعیف کہا: ہے ۔ اس روایت کے بقیہ رجال ثقہ ہیں ۔

سیدنا حنظلہ کاتب رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا علی بن ابوطالب رضی اللہ عنہ اور سیدنا خالد بن ولید رضی اللہ عنہ کو یمن بھیجا اور فرمایا : ” جب تم دونوں اکٹھے ہو گے ، تو علی امیر ہو گا ، اور جب تم دونوں جدا ہو گے ، تو تم دونوں میں سے ہر ایک اپنا متعلقہ کام کرے گا ۔ “ پھر سیدنا خالد بن ولید رضی اللہ عنہ نے نبی اکرم صلی اللہ علیہ وسلم کو خط لکھا جس میں آغاز میں اپنا نام کا ذکر کیا ، تو نبی اکرم صلی اللہ علیہ وسلم نے اس حوالے سے ان پر اعتراض نہیں کیا ، سیدنا علی رضی اللہ عنہ نے نبی اکرم صلی اللہ علیہ وسلم کو خط لکھا تو اس میں انہوں نے نبی اکرم صلی اللہ علیہ وسلم کا ذکر پہلے کیا ۔
یہ روایت امام طبرانی نے نقل کی ہے ۔ اس کی سند میں ایک راوی سیف بن عمر اسدی ہے اور وہ متروک ہے ۔

سیدنا علاء بن حضرمی رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو خط لکھا تو پہلے اپنا ذکر کیا ( یعنی یہ ان کی طرف سے ہے ) ۔
یہ روایت امام بزار نے سیدنا علاء بن حضرمی رضی اللہ عنہ کے بیٹے کے حوالے سے ان کے والد سے نقل کی ہے ۔ انہوں نے ان کے بیٹے کا نام بیان نہیں کیا بظاہر یہ لگتا ہے کہ سیدنا علاء بن حضرمی رضی اللہ عنہ کے بیٹے کو بھی صحابی ہونے کا شرف حاصل ہے ۔ اس روایت کے بقیہ رجال صحیح کے رجال ہیں ۔

سیدنا ابودرداء رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب تم میں سے کسی ایک نے کسی شخص کو خط لکھنا ہو تو پہلے اپنا ذکر کرے اور جب وہ خط لکھ لے تو اپنی تحریر پر مٹی لگا لے اس طرح یہ زیادہ کامیاب ہو گی ( یعنی اس کی سیاہی نہیں مٹے گی ) ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی سلیمان بن سلمہ خبائری ہے اور وہ متروک ہے ۔

سیدنا مسلم بن حارث تمیمی رضی اللہ عنہ بیان کرتے ہیں : نبی اکرم صلی اللہ علیہ وسلم نے ان کے لئے ایک خط لکھوایا جس میں اپنے بعد کے حکمرانوں کو ان کے بارے میں تلقین کی تھی اور آپ صلی اللہ علیہ وسلم نے اس پر مہر لگوا دی ۔
یہ روایت امام أحمد نے اور امام طبرانی نے نقل کی ہے ، اور ان دونوں کے رجال ثقہ ہیں ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” خط کی عزت یہ ہے کہ اس پر مہر لگائی جائے ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی محمد بن مروان سدی صغیر ہے اور وہ متروک ہے ۔