مجمع الزوائد ومنبع الفوائد

ابوعمران جونی بیان کرتے ہیں : ایک صحابی نے مجھے یہ حدیث بیان کی ہے ہم اس وقت فارس کی سمت ایک جنگ میں حصہ لے رہے تھے ۔ انہوں نے یہ بات بیان کی کہ نبی اکرم صلی اللہ علیہ وسلم نے ارشاد فرمایا ہے : ” جو شخص گھر کی ایسی چھت پر سوئے جس کے کنارے اونچے نہ ہوں اور پھر وہ گر کے مر جائے ، تو اس سے ذمہ لاتعلق ہو جاتا ہے اور جو شخص سمندر میں طغیانی کے وقت سمندری سفر کرے اس سے ذمہ لاتعلق ہو جاتا ہے ۔ “
یہ روایت امام أحمد نے اپنے استاد ابراہیم بن قاسم کے حوالے سے نقل کی ہے اور میں اس سے واقف نہیں ہوں ۔

ابوعمران جونی بیان کرتے ہیں : ہم لوگ فارس میں موجود تھے ہمارے امیر زہیر بن عبداللہ تھے ۔ انہوں نے یہ بات بتائی کہ مجھے ایک شخص نے یہ بات بتائی ہے کہ نبی اکرم صلی اللہ علیہ وسلم نے ارشاد فرمایا : ” جو شخص گھر کی ایسی چھت پر رات بسر کرے جس کے اردگرد ( اونچے کنارے یعنی منڈیر ) نہ ہوں جو اس کے پاؤں کو لوٹا سکیں ( یعنی رکاوٹ بن سکیں ) تو اس سے ذمہ لاتعلق ہو جاتا ہے ، اور جو شخص سمندر میں طغیانی کے وقت سمندری سفر کرے اس سے ذمہ لاتعلق ہو جاتا ہے ۔ “
یہ روایت امام أحمد نے مرفوع اور موقوف ( دونوں طرح سے ) نقل کی ہے ، اور ان دونوں کے رجال صحیح کے رجال ہیں ۔

سیدنا عبداللہ بن جعفر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص رات کے وقت ہماری طرف تیر مارے وہ ہم میں سے نہیں ہے ، جو شخص ایسی چھت پر سو جائے کہ جس کی دیوار ( یعنی منڈیر ) نہ ہو ، اور پھر وہ گر کے مر جائے تو اس کا خون رائیگاں جائے گا ۔ “
یہ روایت امام طبرانی نے نقل کی ہے ۔ اس کی سند میں ایک راوی یزید بن عیاض ہے اور وہ متروک ہے ۔