مجمع الزوائد ومنبع الفوائد

سیدنا سعد بن ابی وقاص رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھے یہ حکم دیا کہ ایام منٰی میں یہ اعلان کر دوں کہ یہ کھانے پینے کے دن ہیں ان میں روزہ نہیں رکھا جائے گا ۔ ہ ( راوی بیان کرتے ہیں : ) ان کی مراد ایام تشریق تھے ۔
یہ روایت امام أحمد نے نقل کی ہے ۔

ان کی ایک روایت میں یہ الفاظ ہیں : ” اے سعد ! تم اٹھو اور منی میں یہ اعلان کر دو ۔ ۔ ۔ ۔ ۔ ۔ ۔ ۔ ۔ ۔ ۔ “ اس کے بعد راوی نے حسب سابق حدیث ذکر کی ہے ۔
یہ روایت امام بزار نے نقل کی ہے ۔ ان تمام روایات کے رجال ” صحیح “ کے رجال ہیں ۔

ابوشعثاء بیان کرتے ہیں : ایام تشریق کے درمیانے دن ہم لوگ سیدنا عبداللہ بن عمر رضی اللہ عنہما کی خدمت میں حاضر ہوئے راوی بیان کرتے ہیں : کھانا لایا گیا لوگ آگے ہوئے تو ان کے صاحبزادے پیچھے ہٹ گئے سیدنا عبداللہ بن عمر رضی اللہ عنہما نے ان سے کہا: تم آگے ہو ، اور کھانا کھاؤ انہوں نے کہا: میں نے روزہ رکھا ہوا ہے ، تو سیدنا عبداللہ بن عمر رضی اللہ عنہما نے فرمایا : کیا تم یہ بات نہیں جانتے ہو کہ نبی اکرم صلی اللہ علیہ وسلم نے ارشاد فرمایا ہے : ” یہ کھانے اور ذکر کرنے کے دن ہیں “ ۔
یہ روایت امام أحمد نے نقل کی ہے ۔ اس کے رجال ” صحیح “ کے رجال ہیں ۔

سیدنا یونس بن شداد رضی اللہ عنہ بیان کرتے ہیں : نبی اکرم صلی اللہ علیہ وسلم نے ایام تشریق کے روزے سے منع کیا ہے ۔
یہ روایت عبداللہ بن أحمد اور امام بزار نے نقل کی ہے ۔ وہ فرماتے ہیں یہ بات علم میں نہیں ہے کہ یونس نے صرف اس حدیث کے علاوہ کسی اور کی سند نقل کی ہو ۔ اس کی سند میں ایک راوی سعید بن بشیر ہے ، اور وہ ثقہ ہے ، لیکن وہ اختلاط کا شکار ہو گیا تھا ۔

حبیبہ بنت شریق بیان کرتی ہیں : وہ اپنے والد کے ساتھ تھیں بدیل بن ورقاء نبی اکرم صلی اللہ علیہ وسلم کی اونٹنی عضباء پر سوار تھے وہ اس کا پالان تیار کر رہے تھے انہوں نے پکار کر کہا: نبی اکرم صلی اللہ علیہ وسلم نے ارشاد فرمایا ہے : ” جس شخص نے روزہ رکھا ہوا ہے وہ روزہ ختم کر دے کیونکہ یہ کھانے پینے کے دن ہیں “ ۔
یہ روایت امام أحمد نے اور امام طبرانی نے معجم اوسط میں نقل کی ہے ، تاہم انہوں نے یہ الفاظ نقل کیے ہیں : ” وہ خاتون اپنی والدہ عجماء کے ساتھ تھیں “ ۔ امام أحمد کی سند ایک راوی ایسا ہے ، جس کا نام بیان نہیں کیا گیا ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم نے سال کے چھ دنوں میں روزہ رکھنے سے منع کیا ہے عیدالفطر کے دن عیدالاضی کے دن اور ایام تشریق کے تین دن ۔
یہ روایت امام ابویعلیٰ نے نقل کی ہے ، اور یہ اپنے تمام طرق کے حوالے سے ضعیف ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے سال کے چھ دنوں میں روزہ رکھنے سے منع کیا ہے عیدالفطر کے دن عیدالاضحی کے دن ، ایام تشریق کے دن اور وہ دن جس کے بارے میں یہ شک ہو کہ یہ رمضان کا حصہ ہے ( یا نہیں ہے ) ۔
یہ روایت امام بزار نے نقل کی ہے ۔ اس کی سند میں ایک راوی عبداللہ بن سعید مقبری ہے ، اور وہ ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے ایک اعلان کرنے والے کو بھیجا اس نے یہ اعلان کیا کہ تم ان دنوں میں روزہ نہ رکھو کیونکہ یہ کھانے پینے اور بعال کے دن ہیں ( راوی کہتے ہیں : ) بعال سے مراد خواتین کے ساتھ صحبت کرنا ہے ۔
یہ روایت امام طبرانی نے معجم کبیر میں نقل کی ہے ۔

ان کے حوالے سے معجم اوسط اور معجم کبیر میں یہ روایت منقول ہے : نبی اکرم صلی اللہ علیہ وسلم نے بدیل بن ورقاء کو بھیجا تھا ۔ پہلی روایت کی سند حسن ہے ۔

سیدہ ام حارث بنت عیاش رضی اللہ عنہ بیان کرتی ہیں : میں نے سیدنا بدیل بن ورقاء رضی اللہ عنہ کو اونٹ پر دیکھا وہ لوگوں کے پاس جا کر یہ اعلان کر رہے تھے : نبی اکرم صلی اللہ علیہ وسلم نے تمہیں یہ حکم دیا ہے کہ تم ان دنوں میں روزہ نہ رکھو کیونکہ یہ کھانے پینے کے دن ہیں ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی ضرار بن صرد ہے ، اور وہ ضعیف ہے ۔

سیدنا معمر بن عبداللہ عدوی رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھے بھیجا تاکہ میں منی میں جا کر یہ اعلان کر دوں : ایام تشریق کھانے پینے کے دن ہیں ۔
یہ روایت امام طبرانی نے معجم کبیر میں نقل کی ہے ، اور اس کی سند حسن ہے ۔

سیدنا عبداللہ بن مسعود رضی اللہ عنہ نے نبی اکرم صلی اللہ علیہ وسلم کے بارے میں یہ بات نقل کی ہے کہ آپ نے تین دنوں میں روزہ رکھنے سے منع کیا ہے ترویہ کے دن عیدالاضحی کے دن اور عیدالفطر کے دن ۔
یہ روایت امام طبرانی نے معجم صغیر اور معجم اوسط میں نقل کی ہے ۔ اس کی سند میں ایک راوی سعید بن مسلمہ ہے ، جسے امام بخاری رحمہ اللہ اور ایک جماعت نے ” ضعیف “ قرار دیا ہے ۔ ابن حبان نے اسے ثقہ کہا: ہے ، اور یہ بات بیان کی ہے کہ وہ غلطی کرتا ہے ۔

سیدنا عمر بن خطاب رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ایام تشریق کھانے پینے کے دن ہیں “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عبداللہ بن عمر بن یزید اصبھانی ہے میں نے کسی کو اس کے حالات بیان کرتے ہوئے نہیں سنا ہے ۔ اس روایت کے بقیہ رجال ثقہ ہیں ۔

سیدنا اسامہ ہذلی رضی اللہ عنہ بیان کرتے ہیں : نبی اکرم صلی اللہ علیہ وسلم نے منی کے دنوں میں ایک شخص کو سرخ اونٹ پر بھیجا اس نے یہ اعلان کیا : اے لوگو ! یہ کھانے پینے کے دن ہیں ( ان دنوں میں ) روزہ نہ رکھو ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عبیداللہ بن ابوحمید ہے ، اور وہ متروک ہے ۔

سیدنا عبداللہ بن عباس رضی اللہ عنہما بیان کرتے ہیں : میرے سامنے کچھ پسندیدہ افراد نے گواہی دے کر یہ بات بیان کی تھی جن میں سب سے زیادہ پسندیدہ میرے نزدیک سیدنا عمر رضی اللہ عنہ ہیں ( ان حضرات نے یہ بات بیان کی تھی ) نبی اکرم صلی اللہ علیہ وسلم نے عیدالفطر اور قربانی کے دن روزہ رکھنے سے منع کیا ہے ۔
( علامہ ہیثمی فرماتے ہیں : ) میں یہ کہتا ہوں : سیدنا عمر رضی اللہ عنہ کے حوالے سے منقول حدیث ” صحیح “ میں مذکور ہے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی حجاج بن نصیر ہے ، جسے ابن حبان نے ” ثقہ “ قرار دیا ہے وہ بیان کرتے ہیں : یہ غلطی کر جاتا ہے ایک جماعت نے اسے ضعیف کہا: ہے ۔