مجمع الزوائد ومنبع الفوائد

سیدنا ابوذر غفاری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میری امت مسلسل بھلائی پر گامزن رہے گی جب تک وہ افطاری جلدی کرتے رہیں گے اور سحری تاخیر سے کرتے رہیں گے “ ۔
یہ روایت امام أحمد نے نقل کی ہے ۔ اس کی سند میں ایک راوی سلیمان بن ابوعثمان ہے ابوحاتم کہتے ہیں : یہ مجہول ہے ۔

سیدنا قطبہ بن قتاده رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو دیکھا جب سورج غروب ہوا تو آپ نے افطاری کر لی ۔
یہ روایت امام أحمد اور امام طبرانی نے معجم کبیر میں نقل کی ہے ۔ اس کی سند میں ایک راوی ایسا ہے ، جس کا نام بیان نہیں کیا گیا ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم روزے میں صوم وصال سے منع کرتے تھے ۔ آپ افطاری جلدی کرنے کا اور سحری تاخیر سے کرنے کا حکم دیتے تھے ۔
یہ روایت ابویعلیٰ نے نقل کی ہے ۔ اس کی سند میں ایک راوی طیب بن سلیمان ہے ، اور وہ ضعیف ہے ۔

سیدنا ابودرداء رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” میری امت اس وقت تک میری سنت پر گامزن رہے گی جب تک وہ افطاری کے لئے ستارے نکلنے کا انتظار نہیں کریں گے “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی واقدی ہے ، اور وہ ضعیف ہے اس کی توثیق کی گئی ہے ۔

اسی سند کے ساتھ سیدنا ابودرداء رضی اللہ عنہ کے حوالے سے منقول ہے : وہ بیان کرتے ہیں : نبی اکرم صلی اللہ علیہ وسلم نے جب روزہ رکھا ہوا ہوتا تھا ، تو آپ کسی شخص کو حکم دیتے تھے وہ زمین کے بلند حصے پر چڑھ جاتا تھا وہ جب یہ کہتا تھا کہ سورج غروب ہو گیا ہے ، تو آپ افطاری کر لیتے تھے ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی واقدی ہے ، اور وہ ضعیف ہے ، اور اس کی توثیق کی گئی ہے ۔

سیدنا عبداللہ بن عباس رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” بے شک ہمیں ، انبیاء کرام کے گروہ کو یہ حکم دیا گیا ہے کہ ہم افطاری جلدی کریں اور سحری تاخیر سے کریں اور نماز کے دوران اپنے دائیں ہاتھ بائیں ہاتھ پر رکھیں “ ۔
یہ روایت امام طبرانی نے معجم اوسط میں نقل کی ہے ، اور اس کے رجال ” صحیح “ کے رجال ہیں ۔ اس سے پہلے نماز سے متعلق باب میں اس روایت کے مختلف طرق گزر چکے ہیں ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” بے شک ہمیں ، انبیاء کے گروہ کو تین باتوں کا حکم دیا گیا ہے ، ہم افطاری جلدی کرنا ، سحری تاخیر سے کرنا اور نماز میں دایاں ہاتھ بائیں ہاتھ پر رکھنا“ ۔
یہ روایت امام طبرانی نے معجم صغیر اور معجم اوسط میں نقل کی ہے ۔ اس کی سند میں ایک راوی یحیی بن سعید بن سالم القداح ہے ، اور وہ ضعیف ہے ۔

سیدنا یعلی بن مرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تین چیزوں سے اللہ تعالیٰ محبت رکھتا ہے افطاری جلدی کرنا ، سحری تاخیر سے کرنا اور نماز میں ایک ہاتھ دوسرے ہاتھ پر رکھنا“ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عمر بن عبداللہ بن یعلی ہے ، اور وہ ضعیف ہے ۔

سیدنا انس بن مالک رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو بھی افطاری سے پہلے مغرب کی نماز ادا کرتے ہوئے نہیں دیکھا خواہ آپ ( افطاری میں صرف ) پانی کا گھونٹ پی لیتے ۔
یہ روایت امام ابویعلیٰ ، امام بزار اور امام طبرانی نے معجم اوسط میں نقل کی ہے ۔ امام ابویعلیٰ کے رجال ” صحیح “ کے رجال ہیں ۔

سیدہ ام حکیم بنت وداع رضی اللہ عنہا بیان کرتی ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ” افطاری جلدی کرو سحری تاخیر سے کرو“ ۔
یہ روایت امام طبرانی نے معجم کبیر میں حبابہ بنت عجلان کے حوالے سے ان کی والدہ کے حوالے سے صفیہ بنت جریر سے نقل کی ہے ۔ یہ وہ خواتین ہیں جن سے امام ابن ماجہ نے روایات نقل کی ہیں ویسے کسی نے ان پر جرح بھی نہیں کی اور ان کی توثیق بھی نہیں کی ۔

سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم نے جب روزہ رکھا ہوتا تھا ، تو آپ ( افطاری کے وقت ) سب سے پہلے کچھ پیتے تھے ، اور آپ یکبارگی نہیں پی لیتے تھے بلکہ دو یا تین مرتبہ میں پیتے تھے ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی یحیی بن عبدالحمید حمانی ہے ، اور اس کے بارے میں کلام کیا گیا ہے ۔