مجمع الزوائد ومنبع الفوائد

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم کو یہ بات پسند تھی کہ آپ تین کھجوروں کے ذریعے یا کسی ایسی چیز کے ذریعے افطاری کریں جو آگ پر نہ پکی ہو ۔
یہ روایت امام ابویعلیٰ نے نقل کی ہے ۔ اس کی سند میں ایک راوی عبدالواحد بن ثابت ہے ، اور وہ ضعیف ہے ۔

ان کے حوالے سے یہ بات منقول ہے : نبی اکرم صلی اللہ علیہ وسلم نے جب روزہ رکھا ہوتا تھا ، تو آپ اس وقت تک ( مغرب کی نماز ) ادا نہیں کرتے تھے ، جب تک ہم آپ کے پاس کھجوریں اور پانی نہیں لے آتے تھے ۔ آپ انہیں کھاتے اور پیتے تھے ، جبکہ کھجوریں تر ہوتی تھیں اور جب سردی کا موسم ہوتا ، تو آپ اس وقت تک نماز ادا نہیں کرتے تھے ، جب تک ہم آپ کے پاس خشک کھجور اور پانی نہیں لے آتے تھے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ایسا ہے ، جس سے میں واقف نہیں ہوں ۔

ان کے حوالے سے یہ بات منقول ہے : وہ بیان کرتے ہیں : نبی اکرم صلی اللہ علیہ وسلم نے جب روزہ رکھا ہوتا تھا ، تو آپ افطاری کے وقت دودھ پیتے تھے میں آپ کے پاس دودھ کا پیالہ لے کے آیا میں نے اسے آپ کے پہلو میں رکھ دیا آپ نے اسے ڈھانپ دیا اس دوران آپ نماز ادا کر رہے تھے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عباد بن کثیر رملی ہے اس کے بارے میں کلام کیا گیا ہے ۔ ویسے اس کی توثیق کی گئی ہے ۔

سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم رمضان کے دوران سفر کر رہے تھے تو آپ نے عجوہ کھجور کے ذریعے افطاری کی تھی ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی أحمد بن حفص بن ابراہیم بلخی ہے میں نے کسی کو اس کے حالات بیان کرتے ہوئے نہیں پایا ہے اس کے بقیہ رجال ثقہ ہیں ۔

محمد بن سیرین فرماتے ہیں : سیدنا عبداللہ بن عمر رضی اللہ عنہا بعض اوقات صحبت کر کے افطاری کرتے تھے ۔
یہ روایت امام طبرانی نے معجم کبیر میں نقل کی ہے ، اور اس کی سند حسن ہے ۔