مجمع الزوائد ومنبع الفوائد

سیدنا علی بن ابوطالب رضی اللہ عنہ بیان کرتے ہیں : علقمہ بن علاثہ نبی اکرم صلی اللہ علیہ وسلم کی خدمت میں حاضر ہوا نبی اکرم صلی اللہ علیہ وسلم نے اس کے لئے کھانا منگوایا اس نے نبی اکرم صلی اللہ علیہ وسلم کے ساتھ کھانا کھانا شروع کیا اسی دوران بلال آئے اور اس نے نبی اکرم صلی اللہ علیہ وسلم کو نماز کے لئے بلایا نبی اکرم صلی اللہ علیہ وسلم نے اسے کوئی جواب نہیں دیا تو وہ واپس چلا گیا وہ مسجد میں اتنی دیر ٹھہرا رہا جتنی دیر اللہ کو منظور تھا پھر وہ واپس آیا اور عرض کی : یا رسول اللہ ! نماز کا وقت ہو گیا ہے اللہ کی قسم صبح ہو چکی ہے نبی اکرم صلی اللہ علیہ وسلم نے ارشاد فرمایا : اللہ تعالیٰ بلال پر رحم کرے اگر بلال نہ ہوتا تو ہمیں یہ توقع تھی کہ ہمارے لئے اتنی تاخیر ہو جاتی جو ہمارے اس وقت اور سورج طلوع ہونے کے درمیان ہوتی ہے “ ۔ سیدنا علی رضی اللہ عنہ نے فرمایا : اگر بلال نے حلف نہ اٹھایا ہوتا تو نبی اکرم صلی اللہ علیہ وسلم کھانا کھاتے رہتے یہاں تک کہ سیدنا جبرائیل علیہ السلام آپ سے یہ کہتے کہ آپ ہاتھ اٹھا لیں ۔
یہ روایت امام بزار نے نقل کی ہے ۔ اس کی سند میں ایک راوی سوار بن مصعب ہے ، اور وہ ضعیف ہے ۔

سیدنا علقمہ بن سہیل ثقفی رضی اللہ عنہ بیان کرتے ہیں : میں اس وفد میں شامل تھا جب لوگ نبی اکرم صلی اللہ علیہ وسلم کی خدمت میں حاضر ہوئے تھے ۔ آپ نے سیدنا مغیرہ بن شعبہ رضی اللہ عنہ کے گھر کے پاس ہمارا خیمہ لگوایا سیدنا بلال رضی اللہ عنہ ہمارے پاس آتے تھے ، اور ہمیں کھانا دیتے تھے اس وقت روشنی باقی ہوتی تھی ، اللہ کی قسم ہم یہی گمان کرتے تھے کہ یہ چیز ہمارے درمیان ہے ، ( یعنی ابھی افطاری کا وقت نہیں ہوا ہے ) ہم نے کہا: اے بلال ! کیا اللہ کے رسول نے افطاری کر لی ہے ؟ تو انہوں نے جواب دیا : جی ہاں ۔ اس ذات کی قسم جس کے دست قدرت میں میری جان ہے ، میں آپ لوگوں کے پاس اس وقت آیا ہوں ، جب اللہ کے رسول نے افطاری کر لی تھی ۔ راوی بیان کرتے ہیں : سیدنا بلال رضی اللہ عنہ ہمارے پاس سحری لے کر اس وقت آ جاتے تھے ، جب ہم گرمائش حاصل کرنا چاہ رہے ہوتے تھے ہم خیمے کا پردہ ہٹاتے تھے تو ہمارے لئے کھانا نمایاں ہو جاتا تھا ( یعنی اتنی روشنی ہوتی تھی کہ وہ نظر آ جاتا تھا ) ۔
یہ روایت امام بزار نے نقل کی ہے ۔ امام طبرانی نے معجم کبیر اور معجم اوسط میں اس کی مانند روایت نقل کی ہے ، تاہم انہوں نے یہ کہا: ہے : علقمہ بن سفیان نے عبدالکریم کے حوالے سے سیدنا علقمہ رضی اللہ عنہ سے
یہ روایت نقل کی ہے ۔ میں نے کسی ایسے راوی کو نہیں پایا ہے ، جس کا نام عبدالکریم ہو ، اور اس نے کسی صحابی سے سماع کیا ہو اس روایت کے بقیہ رجال ثقہ ہیں ۔

سیدنا بلال رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں آپ کو نماز کے لئے بلانے کے لئے آیا ابو أحمد نامی راوی نے یہ بات بیان کی ہے کہ نبی اکرم صلی اللہ علیہ وسلم کا روزہ رکھنے کا ارادہ تھا آپ نے پیالہ منگوایا اس میں سے پیا اور مجھے بھی پلایا پھر آپ مسجد کی طرف تشریف لے گئے آپ کا ارادہ نماز ادا کرنے کا تھا آپ کھڑے ہوئے اور آپ از سر نو وضو کیے بغیر نماز ادا کر لی آپ کا ارادہ روزہ رکھنے کا تھا ۔ ( علامہ ہیثمی فرماتے ہیں : ) میں یہ کہتا ہوں : اصل روایت ان ہی الفاظ میں منقول ہے شاید ایسا ہو گا کہ آپ نے کوئی ایسی چیز کھائی ہو گی جو آگ پر پکی ہو گی ۔
یہ روایت امام أحمد نے اور امام طبرانی نے معجم کبیر میں نقل کی ہے ۔

ان کے حوالے سے امام أحمد نے ایک روایت میں یہ الفاظ نقل کیے ہیں : میں نبی اکرم صلی اللہ علیہ وسلم کی خدمت میں حاضر ہوا تاکہ آپ کو نماز کے لئے بلاؤں آپ کا روزہ رکھنے کا ارادہ تھا آپ نے پانی پیا پھر آپ نے برتن میری طرف بڑھا دیا اور پھر آپ نماز کے لیے تشریف لے گئے ۔ ان دونوں روایات کے رجال ” صحیح “ کے رجال ہیں ۔

ان کے حوالے سے امام أحمد نے ایک روایت میں یہ الفاظ نقل کیے ہیں : وہ ( یعنی سیدنا بلال رضی اللہ عنہ ) نبی اکرم صلی اللہ علیہ وسلم کی خدمت میں آپ کو نماز کے لئے بلانے آئے ، تو انہوں نے نبی اکرم صلی اللہ علیہ وسلم کو اپنے گھر میں نماز کے لئے اپنی مخصوص جگہ پر سحری کرتے ہوئے پایا ۔ عیاض کے غلام شداد نے سیدنا بلال رضی اللہ عنہ کا زمانہ نہیں پایا ہے ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم دیکھو کہ مسجد میں جو موجود ہو اسے بلا کے لے آؤ میں مسجد میں داخل ہوا تو وہاں سیدنا ابوبکر رضی اللہ عنہ اور سیدنا عمر رضی اللہ عنہ موجود تھے میں نے ان دونوں کو بلا لیا پھر میں کوئی چیز لے کر آپ کے پاس آیا اور میں نے نبی اکرم صلی اللہ علیہ وسلم کے سامنے رکھی پھر وہ چیز نبی اکرم صلی اللہ علیہ وسلم نے بھی کھائی اور ان صاحبان نے بھی کھائی پھر وہ صاحبان نکلے اور نبی اکرم صلی اللہ علیہ وسلم نے انہیں صبح کی نماز پڑھائی “ ۔
یہ روایت امام بزار نے نقل کی ہے ، اور اس کی سند حسن ہے ۔

ابوزبیر بیان کرتے ہیں : میں نے سیدنا جابر رضی اللہ عنہ سے ایسے شخص کے بارے میں دریافت کیا : جو روزہ رکھنے کا ارادہ کرتا ہے ، اور برتن اس کے ہاتھ میں موجود ہوتا ہے ، جس میں سے وہ پانی پینے لگتا ہے اسی دوران وہ اذان سن لیتا ہے ، تو سیدنا جابر رضی اللہ عنہ نے فرمایا : ہم یہ بات چیت کیا کرتے تھے کہ نبی اکرم صلی اللہ علیہ وسلم نے ارشاد فرمایا ہے : ( اس طرح کی صورت حال میں اس شخص کو ) پی لینا چاہیے ۔
یہ روایت امام أحمد نے نقل کی ہے ، اور اس کی سند حسن ہے ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بلال کی اذان تمہیں سحری سے نہ روکے کیونکہ اس کی بینائی میں کچھ ( کمزوری ) ہے “ ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں اور
یہ روایت امام ابویعلیٰ نے بھی نقل کی ہے ۔

سیدنا انس رضی اللہ عنہ کے حوالے سے یہ روایت منقول ہے نبی اکرم صلی اللہ علیہ وسلم نے ارشاد فرمایا : ” بے شک بلال رات میں ( یعنی صبح صادق ہونے سے پہلے ہی ) اذان دے دیتا ہے ، تو تم لوگ اس وقت تک کھاتے پیتے رہو جب تک ابن ام مکتوم اذان نہیں دیتا “ ۔
یہ روایت بزار نے نقل کی ہے ، اور اس کے رجال ” صحیح “ کے رجال ہیں ۔

حبیب بن عبدالرحمن بیان کرتے ہیں : میں نے اپنی پھوپھی کو یہ بیان کرتے ہوئے سنا جنہیں نبی اکرم صلی اللہ علیہ وسلم کے ساتھ حج کرنے کا شرف حاصل ہے وہ بیان کرتی ہیں : نبی اکرم صلی اللہ علیہ وسلم یہ فرماتے تھے : ابن ام مکتوم رات میں ( یعنی صبح صادق ہونے سے کچھ پہلے ہی ) اذان دے دیتا ہے ، تو تم لوگ اس وقت تک کھاتے پیتے رہو جب تک بلال اذان نہیں دیتا ( راوی کو شک ہے شاید یہ الفاظ ہیں : ) بلال رات میں ہی اذان دے دیتا ہے ، تو تم لوگ اس وقت تک کھاتے پیتے رہو جب تک ابن ام مکتوم اذان نہیں دے دیتا ۔ راوی خاتون بیان کرتی ہیں : ( دونوں صاحبان کی اذان میں اتنا فرق ہوتا تھا ) کہ ایک چڑھ رہے ہوتے تھے ، اور دوسرے اتر رہے ہوتے تھے تو ہم ان سے کہتے تھے کہ ابھی آپ ٹھہر جائیں ہم سحری کر لیں ۔

ایک روایت میں یہ الفاظ ہیں : ” جب ابن ام مکتوم اذان دے تو تم کھاتے پیتے رہو “ یعنی اس روایت میں کوئی شک نہیں ہے ۔ ( علامہ ہیثمی فرماتے ہیں : ) میں یہ کہتا ہوں :
یہ روایت امام نسائی رحمہ اللہ نے اختصار کے ساتھ نقل کی ہے ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا شیبان رضی اللہ عنہ بیان کرتے ہیں : وہ مسجد کی طرف گئے اور نبی اکرم صلی اللہ علیہ وسلم کے ایک حجرے کے پاس بیٹھ گئے ۔ نبی اکرم صلی اللہ علیہ وسلم نے ان کی آواز سنی تو فرمایا : ابویحیی ہو ؟ انہوں نے عرض کی : جی ہاں ۔ نبی اکرم صلی اللہ علیہ وسلم نے فرمایا : اندر آ جاؤ وہ اندر گئے تو انہوں نے نبی اکرم صلی اللہ علیہ وسلم کو دیکھا کہ آپ ناشتہ کر رہے ہیں ۔ نبی اکرم صلی اللہ علیہ وسلم نے فرمایا : ناشتے کی طرف آؤ انہوں نے عرض کی : یا رسول اللہ ! میرا روزہ رکھنے کا ارادہ ہے نبی اکرم صلی اللہ علیہ وسلم نے فرمایا : میرا بھی روزہ رکھنے کا ارادہ ہے ہمارے مؤذن کی بینائی میں کچھ کمزوری ہے وہ صبح صادق ہونے سے پہلے اذان دے دیتا ہے ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی قیس بن ربیع ہے ، جسے شعبہ اور ثوری نے ” ثقہ “ قرار دیا ہے ، اور اس کے بارے میں کلام کیا گیا ہے ۔

سیدنا سہل بن سعد رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” بلال رات میں ہی ( یعنی صبح صادق ہونے سے کچھ پہلے ہی ) اذان دے دیتا ہے ، تو تم اس وقت تک کھاتے پیتے رہو جب تک ابن ام مکتوم اذان نہیں دیتا “ ۔ ( راوی بیان کرتے ہیں ) سیدنا ابن ( اُم ) مکتوم رضی اللہ عنہ اس وقت تک اذان نہیں دیتے تھے ، جب تک ان سے یہ کہا: نہیں جاتا تھا : صبح صادق ہو گئی ہے صبح صادق ہو گئی ہے ۔
یہ روایت امام طبرانی نے معجم اوسط میں نقل کی ہے ، اور اس کے رجال ” صحیح“ کے رجال ہیں ۔

سیدنا عبداللہ بن عمر رضی اللہ عنہما بیان کرتے ہیں : ایک رات نبی اکرم صلی اللہ علیہ وسلم نے سحری کی آپ کے پاس کچھ افراد موجود تھے علقمہ بن علاثہ عامری آئے نبی اکرم صلی اللہ علیہ وسلم نے انہیں بھی بلوا لیا پھر سیدنا بلال رضی اللہ عنہ نماز کے لئے بلانے آئے ، تو نبی اکرم صلی اللہ علیہ وسلم نے فرمایا : بلال ٹھہر جاؤ ! علقمہ سحری کر لے ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی قیس بن ربیع ہے ، جسے شعبہ اور سفیان ثوری نے ” ثقہ “ قرار دیا ہے ، اور اس کے بارے میں کلام کیا گیا ہے ۔

سیدنا عامر بن مطر رضی اللہ عنہ بیان کرتے ہیں : ہم نے نبی اکرم صلی اللہ علیہ وسلم کے ساتھ سحری کی پھر ہم نماز کے لئے اٹھ گئے ۔
یہ روایت امام طبرانی نے معجم کبیر میں نقل کی ہے ، اور اس کے رجال ثقہ ہیں ۔

سیدنا سلمان فارسی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بلال تم میں سے کسی ایک کو سحری کرنے سے نہ روکے کیونکہ بلال اس لئے اذان دیتا ہے تاکہ نوافل پڑھنے والا نماز ختم کر کے واپس چلا جائے اور سویا ہوا شخص بیدار ہو جائے “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی سہل بن زیاد ہے ، جسے ابوحاتم نے ” ثقہ “ قرار دیا ہے اس کے بارے میں ایسا کلام کیا گیا ہے ، جو نقصان دہ نہیں ہے ۔

سیدنا زید بن ثابت رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک بلال رات میں ( یعنی صبح صادق ہونے سے کچھ دیر پہلے ) اذان دے دیتا ہے ، تو تم لوگ کھاتے پیتے رہو جب تک ابن ام مکتوم اذان نہیں دیتا “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی یزید بن عیاض ہے ، اور وہ متروک ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” تم اس وقت تک کھاتے پیتے رہو جب تک بلال اذان نہیں دے دیتا “ ۔
یہ روایت ابویعلیٰ نے نقل کی ہے ، اور اس کے رجال ثقہ ہیں ۔

حبیب بن عبدالرحمن بیان کرتے ہیں : میری پھوپھی جنہوں نے نبی اکرم صلی اللہ علیہ وسلم کے ساتھ حج کیا ہے وہ بیان کرتی ہیں : نبی اکرم صلی اللہ علیہ وسلم نے ارشاد فرمایا : ” بلال رات میں اذان دے دیتا ہے ، تو تم اس وقت تک کھاتے پیتے رہو جب تک ابن ام مکتوم اذان نہیں دیتا “ ۔ ( راوی خاتون بیان کرتی ہیں ) ایک صاحب چڑھ رہے ہوتے تھے ، اور دوسرے اتر رہے ہوتے تھے تو ہم ان سے کہتے تھے : ٹھہر جائیں ! ہمیں سحری کر لینے دیں ۔
یہ روایت امام طبرانی نے معجم کبیر میں نقل کی ہے ۔ امام نسائی رحمہ اللہ نے اس خاتون کے حوالے سے
یہ روایت نقل کی ہے : ” جب ابن ام مکتوم اذان دے تو اس میں سے اندھیرے میں ( یعنی صبح صادق ہونے سے پہلے ہی ) کھا لو “ ۔ امام طبرانی کے رجال ” صحیح“ کے رجال ہیں ۔

سیدنا ابوحذیفہ رضی اللہ عنہ کے غلام سیدنا سالم رضی اللہ عنہ بیان کرتے ہیں : وہ رمضان میں سیدنا ابوبکر رضی اللہ عنہ کے ساتھ چھت پر موجود تھے وہ نماز ادا کر رہے تھے پھر وہ ان کے پاس آئے اور ان سے بولے : اے اللہ کے رسول کے خلیفہ ! کیا آپ ( کچھ ) کھائیں گے نہیں ؟ تو سیدنا ابوبکر رضی اللہ عنہ نے ہاتھ کے ذریعے اشارہ کیا ایسا دو مرتبہ ہوا جب تیسری مرتبہ ہوا تو انہوں نے فرمایا : تم میرے پاس اپنا کھانا لے آؤ پھر انہوں نے کھانا کھایا پھر انہوں نے دو رکعات ادا کیں پھر وہ مسجد میں آئے ، تو نماز کھڑی ہو چکی تھی ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح“ کے رجال ہیں ۔

مطیر شیبانی بیان کرتے ہیں : ہم نے سیدنا عبداللہ رضی اللہ عنہ کے ساتھ سحری کی پھر ہم نکلے تو نماز کھڑی ہو چکی تھی ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح“ کے رجال ہیں ۔

عمرو بن حریث بیان کرتے ہیں : نبی اکرم صلی اللہ علیہ وسلم کے اصحاب سب سے جلدی افطار کرتے تھے ، اور سب سے زیادہ تاخیر سے سحری کرتے تھے ( یعنی افطاری ابتدائی وقت میں کر لیتے تھے ، اور سحری آخری وقت میں کرتے تھے ) ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔

عمرو بن میمون بیان کرتے ہیں : نبی اکرم صلی اللہ علیہ وسلم کے اصحاب سب سے جلدی افطاری کرتے تھے ، اور سب سے زیادہ تاخیر سے سحری کرتے تھے ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔