مجمع الزوائد ومنبع الفوائد

سیدنا ابوموسیٰ اشعری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : جو شخص روزانہ فرض نماز کے علاوہ بارہ رکعات ( سنتیں ) ادا کرے گا ، اللہ تعالیٰ اس کے لئے جنت میں گھر بنا دے گا “ ۔
یہ روایت امام أحمد نے اور امام طبرانی نے معجم اوسط اور معجم اور کبیر میں ، اور امام بزار نے نقل کی ہے ، وہ بیان کرتے ہیں : اس حدیث میں ہارون بن اسحاق کی متابعت نہیں کی گئی ہے ۔

سیدنا علی بن ابوطالب رضی اللہ عنہ بیان کرتے ہیں : نبی اکرم صلی اللہ علیہ وسلم رات کے وقت آٹھ رکعات نفل ادا کرتے تھے ، اور دن کے وقت بارہ رکعات ادا کرتے تھے ۔
یہ روایت امام ابویعلیٰ نے نقل کی ہے ، اور اس کے رجال ” صحیح “ کے رجال ہیں ، صرف عاصم بن حمزہ کا معاملہ مختف ہے ، وہ ” ثقہ “ اور ثبت ہے ۔

سیدنا ابوامامہ رضی اللہ عنہ بیان کرتے ہیں : میں نے دس سال ، نبی اکرم صلی اللہ علیہ وسلم کی اقتداء میں نمازیں ادا کی ہیں ، آپ صلی اللہ علیہ وسلم روزانہ دس رکعات ( سنتیں ) ادا کرتے تھے ، فجر سے پہلے دو رکعات ، ظہر سے پہلے دو رکعات ، مغرب کے بعد دو رکعات ، اور عشاء کے بعد دو رکعات ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی فضالہ بن حصین ہے ، امام ابوحاتم کہتے ہیں : وہ مضطرب الحدیث ہے ، اس روایت کے بقیہ رجال ” صحیح “ کے رجال ہیں ۔

سیدنا بریدہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : ” ہر دو اذانوں ( یعنی اذان اور اقامت ) کے درمیان ( نفل ) نماز ادا کی جائے گی ، البتہ مغرب کی نماز کا معاملہ مختلف ہے “ ۔
یہ روایت امام بزار نے نقل کی ہے ، اس کی سند میں ایک راوی حبان بن عبیداللہ ہے ، جس کا ذکر ابن عدی نے کیا ہے ، ایک قول کے مطابق وہ اختلاط کا شکار ہو گیا تھا ۔

سیدنا عبداللہ بن زبیر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” ہر فرض نماز سے پہلے ، دو رکعات ادا کی جائیں گی “ ۔
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی سوید بن عبدالعزیز ہے ، اور وہ ” ضعیف“ ہے ۔

ابوعبیدہ بیان کرتے ہیں : سیدنا عبداللہ رضی اللہ عنہ کا معمول یہ تھا کہ وہ دن کے وقت ظہر سے پہلے چار رکعات ، اس کے بعد دو رکعات مغرب کے بعد دو رکعات ، عشاء کے بعد دو رکعات ، فجر سے پہلے دو رکعات ادا کرتے تھے ، وہ عصر سے پہلے ، یا اُس کے بعد کوئی ( نفل یا سنت ) نماز ادا نہیں کرتے تھے ۔
یہ روایت امام طبرانی نے معجم کبیر میں نقل کی ہے ، ابوعبیدہ نامی راوی نے اپنے والد سے سماع نہیں کیا ہے ۔

یحیی بن ابوکثیر بیان کرتے ہیں : ( سیدنا عبداللہ بن مسعود رضی اللہ عنہ کے صاحبزادے ) ابوعبیدہ بن عبداللہ نے مجھے خط لکھا ( جس میں یہ تحریر تھا : ) ” اما بعد ! میں تمہیں سیدنا عبداللہ بن مسعود رضی اللہ عنہ کے طریقہ کار اور نماز کے بارے میں اُن کے قول اور فعل کے بارے میں بتاتا ہوں ، انہوں نے یہ بات بیان کی ہے : نبی اکرم صلی اللہ علیہ وسلم کو جامع کلمات عطا کیے گئے تھے ، آپ صلی اللہ علیہ وسلم ہمیں اس بات کی تعلیم دیا کرتے تھے کہ ہمیں نماز میں کیا پڑھنا چاہیے ؟ ( نماز میں تشہد کے کلمات یہ ہیں : ) ” ہر طرح کی زبانی ، جسمانی اور مالی عبادات ، اللہ تعالی کے لئے مخصوص ہیں ، اے نبی ! آپ پر سلام ہو ، اللہ تعالی کی رحمتیں اور اس کی برکتیں نازل ہوں ، ہم پر اور اللہ تعالی کے تمام نیک بندوں پر سلام ہو ، میں اس بات کی گواہی دیتا ہوں کہ اللہ تعالیٰ کے علاوہ اور کوئی معبود نہیں ہے ، اور میں اس بات کی گواہی دیتا ہوں کہ سیدنا محمد صلی اللہ علیہ وسلم اس کے بندے اور اس کے رسول ہیں“ ۔ ( پھر سیدنا عبداللہ بن مسعود رضی اللہ عنہ صلی اللہ علیہ وسلم نے فرمایا : یا شاید نبی اکرم صلی اللہ علیہ وسلم نے ارشاد فرمایا : ) اُس کے بعد جو تمہیں مناسب لگے ، تم وہ سوال کرو ، اور اللہ تعالیٰ کی رحمت اور اس کی مغفرت کے حوالے سے اس کی بارگاہ میں رغبت کا اظہار کرو ، جو مناسب الفاظ کے ذریعے ہو ، تم زیادہ دیر تک قعدہ نہ کرو ، وہ یہ کہا: کرتے تھے : مجھے یہ بات پسند ہے کہ جب تم میں سے کوئی ایک شخص نماز میں قعدہ میں بیٹھا ہوا ہو ، اور تشہد کے کلمات پڑھ لے ، تو پھر وہ اللہ تعالٰی کی بارگاہ میں یوں دعا کرے : ” تو ہر عیب سے پاک ہے ، تیرے علاوہ اور کوئی معبود نہیں ہے ، تو میرے گناہ کی مغفرت کر دے ، میرے عمل کو ٹھیک کر دے ، بے شک تو جس کی چاہتا ہے ، اس کے گناہوں کی مغفرت کر دیتا ہے ، اور تو مغفرت کرنے والا رحم کرنے والا ہے ، اے بہت زیاہ مغفرت کرنے والے ، تو میری مغفرت کر دے ، اے بہت زیادہ توبہ قبول کرنے والے ، تو میری توبہ قبول فرما لے ، اے بہت زیادہ رحم کرنے والے ، مجھ پر رحم فرما ، اے معاف کرنے والے ، تو مجھ سے درگزر فرما ، اے مہربان تو میرے ساتھ مہربانی کا معاملہ فرما ، اے میرے پروردگار ! تو مجھے یہ توفیق عطا کر کہ میں تیری اُس نعمت کا شکر ادا کروں ، جو نعمت تو نے مجھ پر کی ہے ، اور مجھے اچھے طریقے سے اپنی عبادت کرنے کی توفیق نصیب فرما دے ، اے میرے پروردگار ! میں تجھ سے ہر قسم کی بھلائی کا سوال کرتا ہوں ، اور ہر قسم کے شر سے تیری پناہ مانگتا ہوں ، اے میرے پروردگار ! تو میرے لئے بھلائی کو کھول دے ، اور میرے لئے بھلائی پر مہر لگا دے ، اور مجھے اپنی بارگاہ میں حاضری کا شوق عطا کر دے ، ایسی حاضری جو کسی نقصان دہ صورت اور کسی گمراہ کرنے والے فتنے کے بغیر ہو ، اور تو مجھے برائیوں سے بچا لے ، جسے تو برائیوں سے بچا لے گا ، تو گویا تو نے اُس پر رحم کر دیا اور یہ بہت بڑی کامیابی ہے “ ۔ اس کے بعد تمہاری جو بھی دعا ہو ، تو اُس میں گریہ وزاری اور اخلاص ہونا چاہیے ، کیونکہ بندے کا اللہ تعالیٰ کی بارگاہ میں گریہ وزاری کرنا وہ پسند کرتے تھے ۔ پھر سیدنا عبداللہ بن مسعود رضی اللہ عنہ دوپہر کے وقت جب سورج بلند ہو جاتا تھا ، اُس وقت وہ کھڑے ہو کر چار رکعات ادا کرتے تھے جن میں وہ قرآن سے تعلق رکھنے والی طوال اور قصار سورتوں کی تلاوت کرتے تھے ، اس کے تھوڑی دیر بعد وہ ظہر کی نماز ادا کر لیتے تھے جس میں وہ پہلی دو رکعات میں طویل قیام کرتے تھے ، اور وہ ان دو رکعات میں سورت الم تنزیل السجدۃ کی تلاوت کرتے تھے ، اور دوسری رکعت میں اُس کی مانند تلاوت کرتے تھے ، جب وہ ظہر کی نماز ادا کر لیتے تھے ، تو اس کے بعد دو رکعات ادا کرتے تھے ، اس کے بعد وہ تھوڑی دیر تک ٹھہرے رہتے تھے ، جب سورج کچھ اور ڈھل جاتا تھا اور ابھی دن کا خاصہ حصہ باقی ہوتا تھا ، تو اس وقت وہ عصر کی نماز ادا کر لیتے تھے ، وہ اس کی پہلی دو رکعات میں مثانی یا مفصل سے تعلق رکھنے والی دو سورتوں کی تلاوت کرتے تھے ، لیکن یہ دونوں رکعات ، ظہر کی نماز سے مختصر ہوتی تھیں ، جب وہ عصر کی نماز ادا کر لیتے تھے ، تو اس کے بعد وہ کوئی اور نماز ادا نہیں کرتے تھے ، یہاں تک کہ سورج غروب ہو جاتا تھا ، جب وہ سورج کو دیکھتے تھے کہ وہ چھپ گیا ہے ، تو وہ مغرب کی نماز ادا کر لیتے تھے ، جسے تم شام کی نماز کہتے ہو ، وہ اس کی دو رکعات میں قصار فصل سے تعلق رکھنے والی دو سورتیں سورت والیل اور سورت الاعلیٰ کی تلاوت کرتے تھے ، یا اس کی مانند قصار مفصل سے تعلق رکھنے والی کسی اور سورت کی تلاوت کرتے تھے ، اس کے بعد وہ دو رکعات ادا کرتے تھے ، وہ ان رکعات کے حوالے سے قسم اٹھایا کرتے تھے ، حالانکہ وہ اور کسی بھی نماز کے حوالے سے قسم نہیں اٹھاتے تھے ، وہ اُس اللہ کے نام کی قسم اٹھاتے تھے جس کے علاوہ اور کوئی معبود نہیں ہے کہ یہ وہ گھڑی ہے ، جو اس نماز کا مخصوص وقت ہے ، اور وہ اس کی تصدیق میں یہ آیت تلاوت کیا کرتے تھے : ” تم سورج کے ڈھلنے سے لے کر رات کے پھیلنے تک ، نماز قائم کرو اور فجر کی تلاوت ، بے شک فجر کی تلاوت میں حاضری ہوتی ہے “ ۔ یہ وہ نماز ہے ، جسے تم صبح کی نماز کا نام دیتے ہو ، اس وقت محافظ فرشتے اکھٹے ہوتے ہیں ، انہیں یہ بات بہت گراں گزرتی تھی کہ وہ اس گھڑی میں کسی شخص کو کلام کرتے ہوئے سن لیں ، البتہ اللہ کے ذکر ، یا قرآن کی تلاوت کا معاملہ مختلف ہے ، اس کے بعد وہ ٹھہرے رہتے تھے ، یہاں تک کہ وہ عشاء کی نماز ادا کرتے تھے ، جسے تم لوگ ” عتمہ “ کہتے ہو ، وہ اس میں آل عمران کی آخری یہ آیات تلاوت کرتے تھے : ” بے شک آسمانوں اور زمین کی تخلیق میں ۔ ۔ ۔ ۔ ۔ ۔ ۔ ۔ ۔ “ یہاں سے لے کر سورت کے آخر تک ، اور ( دوسری رکعت میں ) سورت الفرقان کی آخری آیات تلاوت کرتے تھے : ” برکت والی ہے ، وہ ذات جس نے آسمان میں بروج بنائے ہیں ۔ ۔ ۔ ۔ ۔ ۔ ۔ ۔ ۔ “ یہاں سے لے کر آخر تک کی تلاوت ٹھہر ، ٹھہر کر او عمدہ آواز میں کرتے تھے ۔ اور وہ یہ فرمایا کرتے تھے : قرآن کو اچھی آواز میں پڑھنا ، اس کی زینت ہے ، اگر وہ ان رکعات میں ، ان دو سورتوں کی اختتامی آیات نہیں پڑھتے تھے ، تو اس کی مانند تلاوت کیا کرتے تھے ، جس کا تعلق مثانی یا مفصل سے تعلق رکھنے والی سورتوں سے تھا ، جب وہ عشاء کی نماز ادا کر لیتے تھے ، تو اُس کے بعد دو رکعات ادا کرتے تھے ، وہ ہر فرض نماز کے بعد صرف دو رکعات ہی ادا کیا کرتے تھے ، صرف جمعہ کی نماز کا معاملہ مختلف ہے ، تو وہ اس کے بعد چار رکعات ادا کیا کرتے تھے ، یہاں تک کہ جب رات کا آخری حصہ ہوتا تھا ، وہ اُٹھ کر ، جو اللہ تعالیٰ نے ان کے نصیب میں نماز لکھی ہوتی تھی ، وہ ادا کرتے تھے ، وہ وتر ادا کرتے تھے ، خواہ وہ نو ہوں ، یا سات ہوں ، یا اس سے زیادہ ہوں ، یہاں تک کہ جب صبح صادق ہو جاتی تھی ، اور وہ افق کو دیکھ لیتے تھے ، اور ابھی رات کی تاریکی باقی ہوتی تھی ، تو وہ اٹھ کر صبح کی نماز ادا کرنا شروع کرتے تھے ، ان دو رکعات میں وہ دو طویل سورتوں کی تلاوت کرتے تھے ، جیسے سورۂ رعد ، یا اس جیسی مثانی سے تعلق رکھنے والی کسی سورت کی تلاوت کرتے تھے ، یہاں تک کہ یہ وہم ہوتا تھا کہ شاید صبح روشن ہو چکی ہے ۔ ہر نماز میں ، وہ جب بھی کھڑے ہوتے تھے ، تو تکبیر کہتے تھے ، جب وہ ( رکوع سے ) سر کو اٹھاتے تھے ، تو سمع اللہ لمن حمد کہتے تھے یہاں تک کہ سیدھے کھڑے ہو جاتے تھے ، پھر وہ اپنے پروردگار کی حمد اور اس کی تسبیح بیان کرتے تھے ، جو قیام کے دوران کرتے تھے ، پھر وہ سجدے کے لئے تکبیر کہتے تھے ، یہاں تک کہ سجدے میں چلے جاتے تھے ، پھر وہ تکبیر کہتے ہوئے سجدے سے سر کو اٹھاتے تھے پھر سیدھے ہو کر بیٹھ جاتے تھے ، اپنے پروردگار کی حمد اور اس کی تسبیح بیان کرتے تھے ، پھر وہ دوسرے سجدے کے لئے تکبیر کہتے تھے پھر وہ اس وقت تکبیر کہتے تھے ، جب سجدے سے سر کو اٹھاتے تھے پھر وہ اُس وقت تکبیر کہتے تھے ، جب وہ قعدہ کے بعد اٹھا کرتے تھے جب وہ کوئی نماز ادا کرتے تھے ، تو وہ دو مرتبہ سلام پھیرا کرتے تھے ، اور ادھر ادھر توجہ نہیں دیتے تھے ، یا ہاتھ کے ذریعے اشارہ نہیں کرتے تھے ، پھر وہ اُس کے ( یعنی نماز ختم کرنے کے ) بعد اپنی حاجت کی طرف بڑھ جاتے تھے ، خواہ وہ دائیں طرف ہو ، یا بائیں طرف ہو ( یعنی وہ نماز سے فارغ ہونے کے بعد کسی بھی طرف سے اُٹھ جاتے تھے ) وہ جب نماز ادا کرنے کے لئے کھڑے ہوتے تھے ، تو اپنی آواز کو اور دونوں ہاتھوں کو پست رکھتے تھے ، قیام کے دوران وہ زیادہ تر تسبیح پڑھا کرتے تھے ، اور نماز میں اُن کی تسبیح یہ ہوتی تھی : ” تو ہر عیب سے پاک ہے ، تیرے علاوہ اور کوئی معبود نہیں ہے “ ۔ اس میں کوئی وقفہ نہیں ہوتا تھا ۔
( علامہ ہیثمی فرماتے ہیں : ) میں یہ کہتا ہوں : ” صحیح “ میں اس روایت کا ایک حصہ مذکور ہے ، جو تشہد کے بارے میں ہے ۔
یہ روایت امام طبرانی نے معجم کبیر میں نقل کی ہے ، ابوعبیدہ نامی راوی نے اپنے والد ( سیدنا عبداللہ بن مسعود رضی اللہ عنہ ) سے سماع نہیں کیا ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم ہر نماز کے بعد دو رکعات ادا کیا کرتے تھے ، صرف صبح کی نماز میں ایسا نہیں کیا کرتے تھے ، آپ صلی اللہ علیہ وسلم اُس میں دو رکعات نماز سے پہلے ادا کر لیتے تھے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی حبیب بن حسان بن اشرس ہے ، امام ذہبی کہتے ہیں : محدثین نے اسے ضعیف قرار دیا ہے ۔

مسروق بیان کرتے ہیں : میں نے سیدہ عائشہ رضی اللہ عنہا سے نبی اکرم صلی اللہ علیہ وسلم کی سفر کے دوران نفل نماز کے بارے میں دریافت کیا : تو انہوں نے فرمایا : ہر نماز کے بعد دو رکعات ہوتی تھیں ۔
یہ روایت امام طبرانی نے معجم اوسط میں نقل کی ہے ، اور اس کی سند میں ایک راوی سعید بن زنبور ہے ، جسے ابن حبان نے ” ثقہ “ قرار دیا ہے ۔

سیدنا ابوہریرہ رضی اللہ عنہ بیان کرتے ہیں : میرے خلیل صلی اللہ علیہ وسلم نے مجھے فجر کی دو رکعات کی وصیت کی تھی ، کیونکہ ان دونوں میں ہمیشہ رغبت پائی جاتی ہے ، اور چاشت کی دو رکعات کی وصیت کی تھی ، کیونکہ یہ نیکوکار لوگوں کی نماز ہے ، ظہر سے پہلے دو رکعات ادا کرنے اس کے بعد دو رکعات ادا کرنے ، عصر کے بعد دو رکعات ادا کرنے ، مغرب کے بعد دو رکعات ادا کرنے ، اور عشاء کے بعد دو رکعات ادا کرنے کی اور ہر مہینے میں تین دن روزے رکھنے کی ( وصیت کی تھی ) آپ صلی اللہ علیہ وسلم نے فرمایا تھا : یہ ہمیشہ روزہ رکھنے کے مترادف ہے ، اور یہ کہ میں وتر ادا کیے بغیر رات بسر نہ کروں ، نبی اکرم صلی اللہ علیہ وسلم نے مجھ سے فرمایا تھا : اے ابوہریرہ ! دن کے ابتدائی حصے میں تم دو رکعات ادا کر لینا ، میں اُس کے آخری حصے تک کی ضمانت دوں گا“ ۔ ( علامہ ہیثمی فرماتے ہیں : ) میں یہ کہتا ہوں : ” صحیح “ میں اس کچھ حصہ منقول ہے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عمر بن عبدالجبار ہے ، اور وہ ” ضعیف“ ہے ۔