مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نماز ادا کر رہے تھے آپ اس وقت مکہ میں تھے آپ اس وقت بیت المقدس کی طرف رُخ کر کے نماز ادا کرتے تھے جب کہ خانہ کعبہ آپ کے سامنے ہوتا تھا مدینہ منورہ ہجرت کرنے کے بعد آپ سولہ ماہ تک ( بیت المقدس کی طرف رخ کر کے نماز ادا کرتے رہے ) پھر آپ کا رخ خانہ کعبہ کی طرف کر دیا گیا ۔
یہ روایت امام أحمد نے امام طبرانی نے معجم کبیر میں اور امام بزار نے نقل کی ہے ، اور اس کے رجال ” صحیح “ کے رجال ہیں ۔

سیدنا ابوسعید بن معلی رضی اللہ عنہ بیان کرتے ہیں : نبی اکرم صلی اللہ علیہ وسلم کے زمانہ اقدس میں ہم لوگ صبح کے وقت روانہ ہوتے تھے ، اور ہم کسی مسجد کے پاس سے گزرتے تھے تو اس میں نماز ادا کر لیتے تھے ایک دن ہم گزرے نبی اکرم صلی اللہ علیہ وسلم اس وقت منبر پر تشریف فرما تھے آپ نے ارشاد فرمایا : آج ایک عظیم واقعہ رونما ہوا ہے راوی کہتے ہیں : میں نبی اکرم صلی اللہ علیہ وسلم کے قریب ہو گیا آپ نے یہ آیت تلاوت کی : ” ہم آسمان میں تمہارے چہرے کا اوپر کی طرف اٹھنا دیکھ رہے ہیں“ ۔ نبی اکرم صلی اللہ علیہ وسلم نے یہ پوری آیت تلاوت کی میرے پہلو میں میرا ساتھی موجود تھا میں نے اپنے ساتھی سے کہا: تم دو رکعات ادا کر لو اس نے کہا: جی نہیں جب تک میں اس بات کا جائزہ نہیں لیتا کہ نبی اکرم صلی اللہ علیہ وسلم کیا کرتے ہیں پھر نبی اکرم صلی اللہ علیہ وسلم منبر سے نیچے اترے آپ نے لوگوں کو اس دن ظہر کی نماز خانہ کعبہ کی طرف رُخ کر کے پڑھائی ۔ ( علامہ ہیثمی فرماتے ہیں : ) میں یہ کہتا ہوں : امام نسائی رحمہ اللہ نے اس کا یہ حصہ نقل کیا ہے : ہم مسجد کے پاس سے گزرتے تھے تو اس میں نماز ادا کر لیتے تھے ۔
یہ روایت امام بزار نے اور امام طبرانی نے معجم کبیر میں نقل کی ہے ، تاہم انہوں نے یہ الفاظ نقل کیے ہیں : میں نے اپنے ساتھی سے کہا: آؤ ہم نبی اکرم صلی اللہ علیہ وسلم کے منبر سے نیچے اترنے سے پہلے دو رکعات ادا کر لیں تو ہم نماز ادا کرنے والے پہلے فرد بن جائیں گے ، تو ہم ذرا ہٹ گئے تو ہم نے یہ دو رکعات ادا کر لیں پھر نبی اکرم صلی اللہ علیہ وسلم منبر سے نیچے تشریف لائے ۔ ۔ ۔ اس کے بعد راوی نے حسب سابق حدیث ذکر کی ہے ۔ علامہ ہیثمی فرماتے ہیں : ) سیدنا عبداللہ بن عمرو رضی اللہ عنہ سے منقول حدیث سورۃ بقرہ کی تفسیر سے متعلق باب میں آئے گی اگر اللہ نے چاہا سیدنا ابوسعید رضی اللہ عنہ سے منقول حدیث میں ایک راوی عبداللہ بن صالح ہے ، جو لیث کا کاتب ہے ، اسے جمہور نے ضعیف قرار دیا ہے عبدالملک بن شعیب بن لیث کہتے ہیں : یہ ” ثقہ “ اور مامون ہے ۔

کثیر بن عبداللہ بن عوف اپنے والد کے حوالے سے اپنے دادا کا یہ بیان نقل کرتے ہیں : ہم لوگ نبی اکرم صلی اللہ علیہ وسلم کے ساتھ تھے جب آپ مدینہ منورہ تشریف لائے تو آپ سترہ ماہ تک بیت المقدس کی طرف رُخ کر کے نماز ادا کرتے رہے پھر آپ کا رخ خانہ کعبہ کی طرف کر دیا گیا ۔
یہ روایت امام بزار نے اور امام طبرانی نے معجم کبیر میں نقل کی ہے کثیر نامی راوی ” ضعیف “ ہے امام ترمذی نے اس کی نقل کردہ حدیث کو حسن قرار دیا ہے ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم کا رخ بیت المقدس کی طرف تھا آپ ظہر کی نماز ادا کر رہے تھے نماز کے دوران آپ نے اپنا چہرہ خانہ کعبہ کی طرف پھیر لیا تو لوگوں میں سے بے وقوف لوگوں نے یہ کہا: ( جس کا ذکر قرآن میں ان الفاظ میں ہے : ) ” ان لوگوں کو ان کے قبلہ سے کس چیز نے پھیر دیا ہے ، جس قبلہ پر یہ پہلے تھے “ ۔ ( علامہ ہیثمی فرماتے ہیں : ) میں یہ کہتا ہوں : سیدنا انس رضی اللہ عنہ کے حوالے سے منقول حدیث ” صحیح “ میں مذکور ہے ، تاہم وہاں یہ ذکر ہوا ہے کہ یہ صبح کی نماز کا واقعہ ہے ، جب کہ یہاں یہ ذکر ہوا ہے کہ یہ ظہر کی نماز کا واقعہ ہے ۔
یہ روایت امام بزار نے نقل کی ہے ، اس کی سند میں ایک راوی عثمان سعید ہے ، جسے یحیی القطان اور یحییٰ بن معین اور ابوزرعہ نے ضعیف قرار دیا ہے حافظ ابونعیم نے اسے ” ثقہ “ قرار دیا ہے ابوحاتم کہتے ہیں : یہ بزرگ ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم کا منادی ( کچھ لوگوں کے پاس ) آیا اور بولا: قبلہ کا رخ بدل دیا گیا ہے امام اس وقت نماز کی حالت میں تھا اس نے دو رکعات ادا کر لی ہوئی تھیں اس منادی نے کہا: قبلہ کا رخ خانہ کعبہ کی طرف کر دیا گیا ہے ، تو تم باقی کی دو رکعات خانہ کعبہ کی طرف رُخ کر کے ادا کرو ۔ “
یہ روایت امام بزار نے نقل کی ہے ، اور اس کی سند حسن ہے ۔

سیدنا عماره بن رویبہ رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کی اقتداء میں شام کی دو نمازوں میں سے ایک ادا کر رہے تھے جب آپ کا رخ قبلہ کی طرف پھیر دیا گیا نبی اکرم صلی اللہ علیہ وسلم گھوم گئے آپ کی اقتداء میں ہم بھی گھوم گئے یہ دور رکعات ادا کرنے کی بعد کی بات ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عبدالملک بن حسین ابومالک نخعی ہے ، اور وہ ” ضعیف “ ہے ۔

سیدنا عمارہ بن اوس رضی اللہ عنہ جنہوں نے دونوں قبلوں کی طرف رُخ کر کے نماز ادا کی ہوئی ہے وہ بیان کرتے ہیں : ہم شام کی دو نمازوں میں سے ایک نماز پڑھ رہے تھے اسی دوران ( مسجد کے دروازے پر ) منادی نے پکار کر کہا: قبلہ ، خانہ کعبہ کی طرف پھیر دیا گیا ہے ، تو میں اپنے امام کے بارے میں گواہی دے کر یہ بات بیان کرتا ہوں کہ ان کا رخ خانہ کعبہ کی طرف کر دیا گیا مردوں عورتوں بچوں نے بھی ایسا ہی کیا تو ہم میں سے بعض نے اس طرف رُخ کر کے نماز ادا کی اور بعض نے اس طرف رخ کر کے نماز ادا کی ۔
یہ روایت امام طبرانی نے معجم کبیر میں نقل کی ہے ، اور امام ابویعلیٰ نے بھی اسے نقل کیا ہے ، تاہم انہوں نے یہ الفاظ نقل کیے ہیں : ” وہ فرماتے ہیں : میں اپنے گھر میں موجود تھا جب دروازے پر منادی نے پکا کر کہا: “ ۔ ۔ ۔ ۔ ۔ ۔ ۔ ۔ اس کے بعد راوی نے پوری حدیث ذکر کی ہے ، اس روایت کی سند میں ایک راوی قیس بن ربیع ہے ، جسے شعبہ اور ثوری نے ” ثقہ “ قرار دیا ہے ، اس سے استدلال کرنے کے بارے میں اختلاف کیا گیا ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم کا رخ شام ( یعنی بیت المقدس ) سے قبلہ کی طرف پھیر دیا گیا تو آپ نے رجب کے مہینے میں مدینہ منورہ تشریف آوری کے بعد سترہویں مہینے میں خانہ کعبہ کی طرف رُخ کر کے نماز ادا کی ۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔

سیدنا سہل بن سعد رضی اللہ عنہ بیان کرتے ہیں : نبی اکرم صلی اللہ علیہ وسلم بیت المقدس کی طرف رُخ کر کے نماز ادا کرتے رہے ، جب آپ کا رخ تبدیل کر دیا گیا تو ایک شخص اہل قباء کی طرف گیا اس نے ان لوگوں کو صبح کی نماز ادا کرتے ہوئے پایا تو اس نے بتایا نبی اکرم صلی اللہ علیہ وسلم کو یہ حکم دیا گیا ہے کہ آپ خانہ کعبہ کی طرف رُخ کر کے نماز ادا کریں تو ان لوگوں کا امام گھوم گیا یہاں تک کہ انہوں نے قبلہ کی طرف رُخ کر لیا ۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔

سیدنا عثمان بن حنیف رضی اللہ عنہ بیان کرتے ہیں : نبی اکرم صلی اللہ علیہ وسلم مکہ سے ( مدینہ منورہ ) تشریف لانے سے پہلے لوگوں کو اللہ تعالی پر ایمان رکھنے اور اس بات کی قول کے ذریعے تصدیق کرنے کی طرف دعوت دیتے تھے جس میں عمل شامل نہیں ہوتا تھا اس وقت قبلہ بیت المقدس کی طرف تھا جب آپ ہجرت کر کے ہماری طرف آ گئے تو فرائض کا حکم نازل ہوا اور مدینہ منورہ کے احکام نے مکہ کے احکام کو منسوخ کر دیا اور بیت الحرام سے متعلق حکم نے بیت المقدس کے حکم کو منسوخ کر دیا تو اب ایمان قول اور عمل کا مجموعہ بن گیا ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی سعد بن عمران ہے ابوحاتم کہتے ہیں ۔ یہ واقدی کی مانند ہے ، اور واقدی متروک ہے ۔

سیدہ تویلہ بنت اسلم رضی اللہ عنہا جو نبی اکرم صلی اللہ علیہ وسلم کے دست اقدس پر اسلام قبول کرنے والی خواتین میں سے ایک ہیں وہ بیان کرتی ہیں : ہم بنو حارثہ کے علاقے میں اپنی جگہ پر نماز ادا کر رہے تھے کہ عباد بن بشر بن قبطی نے یہ کہا: کہ نبی اکرم صلی اللہ علیہ وسلم نے بیت الحرام اور خانہ کعبہ کی طرف رُخ کر لیا ہے ، تو مرد گھوم کر خواتین کی جگہ آ گئے اور خواتین مردوں کی جگہ چلی گئیں تو ان لوگوں نے باقی کی دو رکعات خانہ کعبہ کی طرف رُخ کر کے ادا کیں ۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔

سیدہ تویله بنت مسلم رضی اللہ عنہا بیان کرتی ہیں : ہم نے بنو حارثہ کی مسجد میں ظہر یا شاید عصر کی نماز ادا کی ہم نے مسجد ایلیاء کی طرف رُخ کیا ہوا تھا ہم دو رکعات ادا کر چکے تھے اسی دوران ایک شخص ہمارے پاس آیا جس نے ہمیں یہ بتایا : نبی اکرم صلی اللہ علیہ وسلم نے بیت الحرام کی طرف رخ کر لیا ہے ، تو مرد گھوم کر عورتوں کی جگہ پر آ گئے اور عورتیں مردوں کی جگہ چلی گئیں ہم نے باقی کی دو رکعات بیت الحرم کی طرف رُخ کر کے ادا کیں ۔ بنو حارثہ سے تعلق رکھنے والے ایک شخص نے مجھے یہ بات بتائی کہ نبی اکرم صلی اللہ علیہ وسلم نے یہ ارشاد فرمایا : کہ یہ وہ لوگ ہیں جو غیب پر ایمان رکھتے ہیں ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی اسحاق بن ادریس اسواری ہے جو ضعیف اور متروک ہے ۔

سیدہ عائشہ صدیقہ رضی اللہ عنہا بیان کرتی ہیں : ایک مرتبہ میں نبی اکرم صلی اللہ علیہ وسلم کے پاس موجود تھی اسی دوران ایک یہودی شخص نے اندر آنے کی اجازت مانگی نبی اکرم صلی اللہ علیہ وسلم نے اسے اجازت عطا کر دی اس نے کہا: السام علیک ( یعنی آپ کو موت آئے ) نبی اکرم صلی اللہ علیہ وسلم نے فرمایا : تمہیں بھی ، سیدہ عائشہ رضی اللہ عنہا فرماتی ہیں میں نے کچھ بات کہنے کا ارادہ کیا سیدہ عائشہ رضی اللہ عنہا کہتی ہیں پھر وہ دوسری مرتبہ آیا تو اس نے پھر اس کی مانند کلمات کہے ، تو نبی اکرم صلی اللہ علیہ وسلم نے فرمایا : تمہیں بھی سیدہ عائشہ رضی اللہ عنہا فرماتی ہیں پھر وہ تیسری مرتبہ آیا تو اس نے کہا: السام علیک ( یعنی آپ کو موت آئے ) سیدہ عائشہ رضی اللہ عنہا کہتی ہیں تو میں نے کہا: بلکہ تمہیں موت آئے اور تم پر اللہ کا غضب نازل ہو تم لوگ بندر اور خنزیروں کے بھائی ہو کیا تم اللہ کے رسول کو اس کے برخلاف طریقے سے سلام کرتے ہو ، جس طریقے سے اللہ تعالیٰ نے ان پر سلام بھیجا ہے سیدہ عائشہ رضی اللہ عنہا بیان کرتی ہیں : نبی اکرم صلی اللہ علیہ وسلم نے میری طرف دیکھا اور فرمایا رک جاؤ اللہ تعالیٰ بدزبانی اور بدگوئی کو پسند نہیں کرتا ہے ان لوگوں نے ایک بات کہی تھی ہم نے انہیں جواب دے دیا ان کی بات ہمیں کوئی نقصان نہیں پہنچائے گی ، اور ان لوگوں پر قیامت کے دن تک کے لئے لازم ہو جائے گی یہ لوگ کسی بھی چیز کے حوالے سے اتنا حسد نہیں کرتے ہیں جتنا جمعہ کے دن کے حوالے سے ہمارے ساتھ حسد کرتے ہیں جس کے بارے میں اللہ تعالی نے ہماری رہنمائی کر دی اور ان لوگوں کو اسی سے گمراہ کر دیا اور اس قبلہ کے حوالے سے ہم سے حسد کرتے ہیں جس کے بارے میں اللہ تعالی نے ہماری رہنمائی کر دی اور ان لوگوں کو اس کے حوالے سے گمراہ کر دیا اور امام کے پیچھے ہمارے آمین کہنے سے ہم سے حسد کرتے ہیں “ ۔ ( علامہ ہیثمی فرماتے ہیں : ) میں یہ کہتا ہوں : ” صحیح “ میں اس کا کچھ حصہ منقول ہے ۔
یہ روایت امام أحمد نے نقل کی ہے ، اس کی سند میں ایک راوی علی بن عاصم ہے ، جو امام أحمد کا ستاد ہے ، اس کی بکثرت غلطیوں اور خطاؤں کی وجہ سے اس کے بارے میں کلام کیا گیا ہے امام أحمد فرماتے ہیں : جہاں تک میرا تعلق ہے ، تو میں اس کے حوالے سے حدیث روایت کرتا ہوں ، اور مجھے اس کے حوالے سے حدیث بیان کی گئی ہیں اس روایت کے بقیہ رجال ” ثقہ “ ہیں ۔