صحيح الادب المفرد

مطرف سے روایت ہے، انہوں نے کہا: میں کوفہ سے بصرہ تک سیدنا عمران بن حصین رضی اللہ عنہ کے ساتھ رہا، وہ جس منزل پر بھی اترتے (تقریباً ہر جگہ) مجھے شعر سناتے، اور فرمایا: ”بیشک تعریض (ذو معنی گفتگو) میں جھوٹ سے بچنے کی گنجائش ہے۔“

سیدنا ابی بن کعب رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”بیشک بعض اشعار حکمت (پر مبنی) ہوتے ہیں۔“

سیدنا اسود بن سریع رضی اللہ عنہ سے روایت ہے، (انہوں نے کہا: میں شاعر تھا، تو میں نبی صلی اللہ علیہ وسلم کے پاس آیا اور) عرض کیا: اے اللہ کے رسول! میں نے اپنے رب عزوجل کی تعریف میں کچھ حمدیہ کلمات کہے ہیں۔ آپ صلی اللہ علیہ وسلم نے فرمایا: ”سنو! بیشک تمہارا رب حمد کو پسند کرتا ہے۔“ اور آپ نے اس سے زیادہ کچھ نہیں فرمایا۔

سیدنا ابوہریرہ رضی اللہ عنہ سے روایت ہے، انہوں نے کہا: رسول اللہ صلی اللہ علیہ وسلم نے فرمایا: ”کسی آدمی کا پیٹ پیپ سے بھر جائے (یہاں تک کہ) وہ اسے خراب کر دے، یہ اس سے بہتر ہے کہ وہ شعر سے بھر جائے۔“

سیدہ عائشہ رضی اللہ عنہا سے روایت ہے، انہوں نے فرمایا: سیدنا حسان بن ثابت رضی اللہ عنہ نے رسول اللہ صلی اللہ علیہ وسلم سے مشرکین کی ہجو کرنے کی اجازت طلب کی، تو رسول اللہ صلی اللہ علیہ وسلم نے فرمایا: ”تو میرے نسب کا کیا ہو گا؟“ انہوں نے عرض کیا: میں آپ کو ان میں سے اس طرح نکال لوں گا جیسے گوندھے ہوئے آٹے سے بال نکال لیا جاتا ہے۔

عروہ سے روایت ہے، انہوں نے کہا: میں سیدہ عائشہ رضی اللہ عنہا کے پاس سیدنا حسان رضی اللہ عنہ کو برا بھلا کہنے لگا تو انہوں نے فرمایا: انہیں برا نہ کہو، کیونکہ وہ ”رسول اللہ صلی اللہ علیہ وسلم کی طرف سے (کفار کو) جواب دیا کرتے تھے۔“