صحيح الادب المفرد

سیدنا عبداللہ بن عمرو رضی اللہ عنہما سے روایت ہے، انہوں نے کہا: رسول اللہ صلی اللہ علیہ وسلم نے فرمایا: ”شعر بھی کلام ہی کی طرح ہے، اس کا اچھا اچھے کلام کی طرح ہے اور اس کا برا برے کلام کی طرح ہے۔“

سیدہ عائشہ رضی اللہ عنہا سے روایت ہے کہ وہ فرمایا کرتی تھیں: ”شعر میں کچھ اچھا ہوتا ہے اور کچھ برا، اچھے کو لے لو اور برے کو چھوڑ دو۔ اور میں نے سیدنا کعب بن مالک (رضی اللہ عنہ) کے بہت سے اشعار روایت کیے ہیں، ان میں ایک قصیدہ ایسا بھی ہے جس میں چالیس اشعار ہیں، اور کچھ اس سے کم (والے بھی ہیں)۔“

شریح سے روایت ہے، انہوں نے کہا: میں نے سیدہ عائشہ رضی اللہ عنہا سے پوچھا: کیا رسول اللہ صلی اللہ علیہ وسلم کوئی شعر بطور مثال پڑھا کرتے تھے؟ تو انہوں نے فرمایا: آپ سیدنا عبداللہ بن رواحہ (رضی اللہ عنہ) کے شعر میں سے کچھ بطور مثال پڑھا کرتے تھے: «ويأتيك بالأخبار من لم تزود» ”اور تیرے پاس خبریں وہ شخص لائے گا جسے تو نے زاد راہ نہیں دیا۔“