المستدرك على الصحيحين

جامع بن شداد بیان کرتے ہیں کہ میں نے عبد اللہ بن مرداس کو یہ کہتے ہوئے سنا: ”سیدنا عبد اللہ بن مسعود رضی اللہ عنہ ہر جمعرات کو کھڑے ہو کر ہمیں خطبہ دیا کرتے تھے، وہ ایسے مختصر اور جامع کلمات ارشاد فرماتے کہ ہم یہی تمنا کرتے کہ وہ اپنی گفتگو کو مزید طویل فرمائیں۔“

حبہ عرنی بیان کرتے ہیں کہ میں نے اہل کوفہ کے نام سیدنا عمر رضی اللہ عنہ کا خط پڑھا جس میں درج تھا: ”حمد و ثنا کے بعد! بلاشبہ تم لوگ عربوں کے سردار اور ان کا سر ہو، تم میرا وہ تیر ہو جسے میں (دشمنوں کی طرف) پھینکتا ہوں خواہ وہ کسی بھی سمت سے آئیں، میں نے تمہاری طرف سیدنا عبد اللہ بن مسعود کو بھیجا ہے اور میں نے انہیں تمہارے لیے منتخب کیا ہے، اور تمہیں ان کے معاملے میں خود پر ترجیح دی ہے۔“

حبہ عرنی سے روایت ہے کہ کچھ لوگ سیدنا علی رضی اللہ عنہ کی خدمت میں حاضر ہوئے اور انہوں نے سیدنا عبد اللہ بن مسعود رضی اللہ عنہ کی تعریف کی، اس پر سیدنا علی رضی اللہ عنہ نے فرمایا: ”میں ان کے بارے میں وہی کہتا ہوں جو ان لوگوں نے کہا بلکہ اس سے بھی بہتر، انہوں نے قرآن پڑھا، اس کے حلال کو حلال اور حرام کو حرام جانا، وہ دین کے فقیہ اور سنت کے عالم ہیں۔“

سیدنا ابو مسعود عقبہ بن عمرو رضی اللہ عنہ سے روایت ہے، انہوں نے کہا: میری نظر میں کوئی ایسا شخص نہیں جو اللہ تعالیٰ کی طرف سے محمد ﷺ پر نازل کردہ علم کا عبد اللہ بن مسعود رضی اللہ عنہ سے بڑھ کر جاننے والا ہو، تو سیدنا ابو موسیٰ اشعری رضی اللہ عنہ نے فرمایا: ”اگر آپ یہ فرما رہے ہیں تو بلاشبہ وہ اس وقت بھی (فرمانِ نبوی) سنتے تھے جب ہم نہیں سنتے تھے اور وہ (نبی کریم ﷺ کی بارگاہ میں) اس وقت بھی داخل ہوتے تھے جب ہمیں داخلے کی اجازت نہیں ہوتی تھی۔“

ابراہیم تیمی اپنے والد سے روایت کرتے ہیں کہ سیدنا عبد اللہ بن مسعود رضی اللہ عنہ نے (غایتِ عجز سے) فرمایا: ”اگر تم لوگ میرے گناہوں کے بارے میں جان لو تو دو شخص بھی میرے پیچھے نہ چلیں اور تم لوگ میرے سر پر مٹی ڈال دو، اور بلاشبہ میں یہ تمنا کرتا ہوں کہ اللہ تعالیٰ میرے گناہوں میں سے کوئی ایک گناہ معاف فرما دے چاہے (اس کے بدلے) مجھے ”عبد اللہ بن روثہ“ پکارا جائے۔“