المستدرك على الصحيحين

سیدنا ابو ثعلبہ خُشنی رضی اللہ عنہ سے روایت ہے کہ صحابہ کرام جب کسی مقام پر پڑاؤ ڈالتے تو گھاٹیوں اور وادیوں میں متفرق ہو جاتے، تب رسول اللہ ﷺ نے فرمایا: ”تمہارا ان گھاٹیوں اور وادیوں میں یوں بکھر جانا شیطان کی طرف سے ہے“، اس کے بعد وہ جب بھی کہیں پڑاؤ ڈالتے تو ایک دوسرے کے ساتھ اس طرح جڑ کر بیٹھتے کہ کہا جاتا کہ اگر ان پر ایک کپڑا تان دیا جائے تو وہ ان سب کو ڈھانپ لے۔
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا جابر بن عبداللہ رضی اللہ عنہما سے روایت ہے کہ رسول اللہ ﷺ (دورانِ سفر لشکر میں) سب سے پیچھے رہا کرتے تھے تاکہ کمزوروں کو آگے بڑھائیں، انہیں اپنی سواری پر بٹھائیں اور ان کے لیے دعا فرمائیں۔
یہ حدیث امام مسلم کی شرط پر صحیح ہے لیکن انہوں نے اسے روایت نہیں کیا۔

سیدنا فرات بن حیان رضی اللہ عنہ سے روایت ہے کہ رسول اللہ ﷺ نے انہیں (پہلے) قتل کرنے کا حکم دیا تھا کیونکہ وہ ابوسفیان کے جاسوس اور ایک انصاری کے حلیف تھے، انہوں نے عرض کیا: میں مسلمان ہوں، تو رسول اللہ ﷺ نے فرمایا: ”تم میں کچھ ایسے لوگ بھی ہیں جنہیں ہم ان کے ایمان کے سپرد کر دیتے ہیں (یعنی ان کے ظاہری دعوے کو مان لیتے ہیں)، فرات بن حیان بھی انہیں میں سے ایک ہے۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔

قیس بن عباد سے روایت ہے کہ نبی کریم ﷺ کے صحابہ قتال کے وقت (شور مچانے اور) آواز بلند کرنے کو ناپسند کرتے تھے۔

سیدنا ابوموسیٰ اشعری رضی اللہ عنہ سے روایت ہے کہ رسول اللہ ﷺ قتال کے وقت آواز بلند کرنے کو ناپسند فرماتے تھے۔
یہ اسناد شیخین کی شرط پر صحیح ہے لیکن انہوں نے اسے روایت نہیں کیا، اور ہشام دستوائی کی حدیث اس کی شاہد ہے اور وہی زیادہ محفوظ ہے۔

سیدنا براء بن عازب رضی اللہ عنہ سے روایت ہے کہ جب نبی کریم ﷺ کا غزوہ حنین کے دن مشرکین سے مقابلہ ہوا تو آپ ﷺ اپنے خچر سے نیچے اترے اور پیدل (میدان میں) چلے۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا، اور صرف اسی طریق سے یہ ثابت ہے کہ آپ ﷺ سواری سے اترے اور پیدل قتال فرمایا۔

سیدنا نعمان بن مقرن رضی اللہ عنہ سے روایت ہے کہ میں رسول اللہ ﷺ کے ساتھ (غزوات میں) حاضر رہا، آپ ﷺ کا معمول تھا کہ اگر دن کے ابتدائی حصے میں قتال شروع نہ فرماتے تو قتال کو اس وقت تک مؤخر کر دیتے جب سورج ڈھل جاتا اور ہوائیں چلنے لگتیں۔
یہ حدیث امام مسلم کی شرط پر صحیح ہے لیکن انہوں نے اسے روایت نہیں کیا۔

سیدنا انس رضی اللہ عنہ سے روایت ہے کہ سیدنا ابو طلحہ رضی اللہ عنہ غزوہ احد کے دن رسول اللہ ﷺ کے سامنے کھڑے ہو کر تیر اندازی کر رہے تھے اور آپ ﷺ ان کے پیچھے تھے، ابو طلحہ ماہر تیر انداز تھے، جب وہ تیر چلاتے تو نبی کریم ﷺ اپنا سر مبارک اٹھا کر دیکھتے کہ ان کا تیر کہاں جا کر لگا ہے، تب ابو طلحہ اپنا سینہ تان لیتے اور عرض کرتے: اے اللہ کے رسول! میرے ماں باپ آپ پر قربان ہوں، آپ (سر مبارک بلند نہ کریں) کہیں کوئی تیر آپ کو نہ لگ جائے، میرا سینہ آپ کے سینے کے سامنے ڈھال ہے، ابو طلحہ خود کو رسول اللہ ﷺ کے سامنے پیش کر دیتے اور عرض کرتے: اے اللہ کے رسول! میں توانا اور مضبوط ہوں، آپ مجھے جو چاہیں حکم دیں۔
یہ حدیث امام مسلم کی شرط پر صحیح ہے لیکن انہوں نے اسے روایت نہیں کیا۔