المستدرك على الصحيحين

عمرو بن شعیب اپنے والد اور وہ اپنے دادا سے روایت کرتے ہیں کہ رسول اللہ ﷺ نے فرمایا: ”کسی عورت کے لیے اپنے مال میں (بغیر اجازتِ شوہر) تصرف کرنا جائز نہیں ہے جب وہ رشتہ نکاح میں منسلک ہو جائے۔“
یہ حدیث صحیح الاسناد ہے لیکن شیخین نے اسے روایت نہیں کیا۔

میں نے حافظ علی بن عمر الحافظ کو فرماتے ہوئے سنا کہ میں نے ابوبکر بن زیاد فقیہ نیشاپوری کو فرماتے ہوئے سنا کہ میں نے محمد بن علی حمدان الوراق کو فرماتے سنا: میں نے امام احمد بن حنبل رحمہ اللہ سے دریافت کیا کہ کیا عمرو بن شعیب نے اپنے والد سے کچھ سنا ہے؟ تو انہوں نے جواب دیا: ”وہ عمرو بن شعیب بن محمد بن عبداللہ بن عمرو ہیں، اور تحقیق عمرو بن شعیب کا اپنے والد شعیب سے سماع صحیح ہے، اور شعیب کا اپنے دادا سیدنا عبداللہ بن عمرو رضی اللہ عنہما سے سماع صحیح ثابت ہے۔“

سیدنا صفوان بن امیہ رضی اللہ عنہ سے روایت ہے کہ نبی کریم ﷺ نے غزوہ حنین کے دن ان سے کچھ زرہیں عاریت (ادھار) مانگیں، تو انہوں نے پوچھا: اے محمد (ﷺ)! کیا یہ غصب (زبردستی لینا) ہے؟ آپ ﷺ نے فرمایا: ”نہیں، بلکہ یہ ایسی عاریت ہے جس کی واپسی کی ضمانت دی جاتی ہے۔“
اس کا ایک شاہد سیدنا ابن عباس رضی اللہ عنہما سے بھی مروی ہے۔

سیدنا عبداللہ بن عباس رضی اللہ عنہما سے روایت ہے کہ رسول اللہ ﷺ نے غزوہ حنین کے موقع پر سیدنا صفوان بن امیہ رضی اللہ عنہ سے کچھ زرہیں اور اسلحہ ادھار مانگا، تو انہوں نے پوچھا: اے اللہ کے رسول! کیا یہ ایسی عاریت ہے جو واپس کر دی جائے گی؟ آپ ﷺ نے فرمایا: ”ایسی ہی عاریت ہے جو واپس کر دی جائے گی۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔

سیدنا سمرہ بن جندب رضی اللہ عنہ سے روایت ہے کہ نبی کریم ﷺ نے فرمایا: ”ہاتھ پر اس چیز کی ذمہ داری ہے جو اس نے لی، یہاں تک کہ وہ اسے ادا کر دے۔“ پھر امام حسن بصری اپنی اس روایت کو بھول گئے اور فرمانے لگے کہ (جس کے پاس چیز رکھی جائے) وہ تو تمہارا امین ہے، اس پر کوئی ضمانت نہیں ہے۔
یہ حدیث صحیح الاسناد ہے اور امام بخاری کی شرط پر ہے لیکن شیخین نے اسے روایت نہیں کیا۔