مصنف ابن ابي شيبه

حضرت سعید بن جبیر اللہ تعالیٰ کے ارشاد { مَنِ اسْتَطَاعَ اِلَیْہِ سَبِیْلًا } کے متعلق فرماتے ہیں کہ جو شخص زاد راہ اور سواری پالے اس پر حج فرض ہے۔

حضرت ابن عمر رضی اللہ عنہما سے مروی ہے کہ ایک شخص نبی کریم صلی اللہ علیہ وآلہ وسلم کی طرف کھڑا ہوا اور عرض کیا کہ اے اللہ کے رسول (صلی اللہ علیہ وآلہ وسلم) ! کیا چیز حج کو واجب کرتی ہے ؟ آپ صلی اللہ علیہ وآلہ وسلم نے ارشاد فرمایا زاد راہ اور سواری، اس شخص نے عرض کیا اے اللہ کے رسول (صلی اللہ علیہ وآلہ وسلم) ! حج کس چیز کا نام ہے ؟ آپ صلی اللہ علیہ وآلہ وسلم نے ارشاد فرمایا : غبار آلود ہونا اور بدبودار ہونا، اس شخص نے عرض کیا اے اللہ کے رسول (صلی اللہ علیہ وآلہ وسلم) ! افضل حج کون سا ہے ؟ آپ صلی اللہ علیہ وآلہ وسلم نے ارشاد فرمایا جس میں بلند آواز سے تلبیہ پڑھا جائے اور قربانی کی جائے۔

حضرت مجاہد فرماتے ہیں کہ { مَنِ اسْتَطَاعَ اِلَیْہِ سَبِیْلًا } سے مراد زاد راہ اور سواری ہے۔

حضرت ابن زبیر فرماتے ہیں کہ اتنی خوراک کہ جس سے قوت اور طاقت حاصل ہو سکے۔

حضرت ابن عباس رضی اللہ عنہما اللہ تعالیٰ کے ارشاد { مَنِ اسْتَطَاعَ اِلَیْہِ سَبِیْلًا } کے متعلق فرماتے ہیں کہ زاد راہ اور سواری مراد ہے۔

حسن سے مروی ہے کہ نبی کریم صلی اللہ علیہ وآلہ وسلم نے ارشاد فرمایا زاد راہ اور سواری والے پر حج فرض ہے۔

نبی کریم صلی اللہ علیہ وآلہ وسلم سے اسی طرح مروی ہے۔

حسن اللہ تعالیٰ کے ارشاد { مَنِ اسْتَطَاعَ اِلَیْہِ سَبِیْلًا } کے متعلق فرماتے ہیں السبیل سے مراد زاد راہ اور سواری ہے۔

حضرت عمر اللہ تعالیٰ کے ارشاد { مَنِ اسْتَطَاعَ اِلَیْہِ سَبِیْلًا } کے متعلق فرماتے ہیں کہ زاد راہ اور سواری مراد ہے، اور حضرت ابن عباس رضی اللہ عنہما فرماتے ہیں کہ جو شخص گنجائش پائے اور اس کے درمیان کوئی چیز (رکاوٹ) حائل نہ ہو، حضرت عطاء نے فرمایا ہے سبیلا (راستہ) ہے جیسا کہ اللہ تعالیٰ نے ارشاد فرمایا ہے۔

حضرت عطاء فرماتے ہیں زاد راہ اور سواری مراد ہے۔

حضرت سعید بن جبیر فرماتے ہیں زاد راہ اور سواری ہو تو حج فرض ہے۔

حضرت سعید بن جبیر سے اسی طرح مروی ہے۔

حسن سے مروی ہے کہ ایک شخص نے عرض کیا کہ اے اللہ کے رسول (صلی اللہ علیہ وآلہ وسلم) ! اس کی طرف راستہ کیا ہے ؟ آپ صلی اللہ علیہ وآلہ وسلم نے فرمایا اس کے پاس زاد راہ اور سواری ہو۔

حضرت ابن زبیر فرماتے ہیں کہ اللہ تعالیٰ کے ارشاد { مَنِ اسْتَطَاعَ اِلَیْہِ سَبِیْلًا } سے مراد انسانی قوت کی بقدر ہے۔

حضرت ابن عباس رضی اللہ عنہما ارشاد فرماتے ہیں کہ جو شخص تین سو دراہم کا مالک ہو اس پر حج واجب ہے اور باندیوں سے نکاح کرنا اس پر حرام ہے۔

حضرت معمر بن خثیم فرماتے ہیں کہ میں نے حضرت ابو جعفر سے فرمایا اللہ تعالیٰ آپ پر رحم فرمائے، { مَنِ اسْتَطَاعَ اِلَیْہِ سَبِیْلًا } سے کیا مراد ہے ؟ آپ نے فرمایا کہ تیرے پاس سواری ہو، اور کچھ زاد راہ ہو تو کبھی پیدل چلے اور کبھی سوار ہو۔