مصنف ابن ابي شيبه

حضرت ابوہریرہ فرماتے ہیں کہ میں نے دیکھا کہ حضور صلی اللہ علیہ وآلہ وسلم نے اپنی جوتیوں میں نماز پڑھی اور جب باہر تشریف لائے تو آپ نے جوتیاں پہن رکھی تھیں۔

حضرت عمرو بن شعیب کے دادا فرماتے ہیں کہ نبی صلی اللہ علیہ وآلہ وسلم نے ننگے پاؤں بھی نماز پڑھی اور جوتیاں پہن کر بھی۔

حضرت ابن ابی اوس کے دادا فرماتے ہیں کہ نبی صلی اللہ علیہ وآلہ وسلم نے جوتوں میں نماز ادا فرمائی۔

ایک اور سند سے یونہی منقول ہے۔

حضرت عمرو بن حریث فرماتے ہیں کہ نبی صلی اللہ علیہ وآلہ وسلم نے جوتوں میں نماز ادا فرمائی۔

ایک اعرابی کہتے ہیں کہ میں نے رسول اللہ صلی اللہ علیہ وآلہ وسلم کو گائے کے چمڑے میں بنے جوتوں میں نماز پڑھتے دیکھا ہے۔

حضرت ابن جریج کہتے ہیں کہ میں نے حضرت عطاء سے سوال کیا کہ کیا آدمی اپنی جوتیوں میں نماز پڑھ سکتا ہے ؟ انہوں نے فرمایا کہ ہاں، رسول اللہ صلی اللہ علیہ وآلہ وسلم نے اپنی جوتیوں میں نماز ادا فرمائی ہے۔

حضرت عبدا لرحمن بن ابی لیلیٰ فرماتے ہیں کہ نبی صلی اللہ علیہ وآلہ وسلم نے اپنی جوتیوں میں نماز ادا فرمائی۔

حضرت عبدا لرحمن بن ابی لیلیٰ فرماتے ہیں کہ نبی صلی اللہ علیہ وآلہ وسلم نے اپنی جوتیوں میں نماز ادا فرمائی تو لوگ بھی جوتیاں پہن کر نماز پڑھنے لگے۔ آپ نے اپنے جوتے اتارے تو لوگوں نے بھی اپنے جوتے اتار دیئے۔ نماز سے فارغ ہونے کے بعد آپ نے فرمایا کہ جو اپنے جوتوں میں نماز پڑھنا چاہے جوتوں میں پڑھ لے اور جو جوتے اتار کر نماز پڑھنا چاہے وہ اپنے جوتے اتار کر نماز پڑھ لے۔

حضرت ابو مسلمہ کہتے ہیں کہ میں نے حضرت انس سے سوال کیا کہ کیا آدمی اپنے جوتے پہن کر نماز پڑھ سکتا ہے ؟ انہوں نے فرمایا کہ رسول اللہ صلی اللہ علیہ وآلہ وسلم نے جوتے پہن کر نماز ادا فرمائی ہے۔

ابراہیم فرماتے ہیں کہ نبی صلی اللہ علیہ وآلہ وسلم نے نماز میں اپنے جوتے اتارے تو لوگوں نے بھی اپنے جوتے اتار لئے، پھر آپ نے انہیں پہن لیا ، پھر اس کے بعد انہیں اتارتے ہوئے نہیں دیکھا گیا۔

حضرت عبداللہ جوتے پہن کر نماز ادا کیا کرتے تھے۔

حضرت عثمان بن حکیم فرماتے ہیں کہ حضرت ابو جعفر اور حضرت علی رضی اللہ عنہ بن حسین جوتے پہن کر نماز ادا کیا کرتے تھے۔

محمد کہتے ہیں کہ میں نے حضرت شریح سے سوال کیا کہ کیا میں اپنے جوتوں میں نماز پڑھ سکتا ہوں ؟ انہوں نے اسے مکروہ قرار دیا۔

حضرت ابن ابی خالد فرماتے ہیں کہ میں نے حضرت اسود کو جوتے پہن کر نماز پڑھتے دیکھا ہے اور حضرت ابو عمرو شیبانی نماز میں جوتے اتارنے پر لوگوں کو مارا کرتے تھے۔

نبی پاک حضور صلی اللہ علیہ وآلہ وسلم نے چمڑے کے ایک جوتے میں نماز ادا فرمائی۔

حضرت یزید بن ابی زیاد کہتے ہیں کہ میں نے ابراہیم کو دیکھا کہ وہ جوتے پہن کر لوگوں کو نماز پڑھا رہے تھے۔

حضرت عروہ جوتے پہن کر نماز ادا کیا کرتے تھے۔

حضرت ضحاک فرماتے ہیں کہ حضرت عمر نماز میں جوتے اتارنے کے معاملے میں لوگوں پر سختی فرمایا کرتے تھے۔

حضرت یزید مولی سلمہ کہتے ہیں کہ میں نے حضرت سلمہ کو جوتے پہن کر نماز پڑھتے دیکھا ہے۔

ابراہیم جوتے پہن کر نماز پڑھا کرتے تھے۔

حضرت ابو حمزہ کہتے ہیں کہ میں نے حضرت ابن عباس رضی اللہ عنہما کو جوتے پہن کر نماز پڑھتے دیکھا ہے۔

حضرت حسن بن عبیداللہ فرماتے ہیں کہ ابراہیم نماز میں جوتے اتارنے کو مکروہ خیال کرتے تھے اور فرماتے تھے کہ مجھے ڈر ہے کہ کہیں کوئی محتاج انسان مسجد آئے اور ان کے جوتے لے جائے۔

حضرت ابو جعفر جوتے پہن کر نماز پڑھتے تھے۔

حضرت ایاس حنفی کہتے ہیں کہ میں نے حضرت عثمان کو جوتے پہن کر نماز پڑھتے دیکھا ہے۔

حضرت عبید اللہ بن عمر فرماتے ہیں کہ میں نے حضرت قاسم اور حضرت سالم کو جوتے پہن کر نماز پڑھتے دیکھا ہے۔

حضرت ابو مقدا م فرماتے ہیں کہ میں نے حضرت سعید بن مسیب، حضرت عطاء بن یسار، حضرت سالم اور حضرت قاسم کو جوتے پہن کر نماز پڑھتے دیکھا ہے۔

حضرت عبدا لرحمن بن خضیر فرماتے ہیں کہ میں نے حضر ت مجاہد کو جوتے پہن کر نماز پڑھتے دیکھا ہے۔

حضرت عقبہ بن ابی صالح کہتے ہیں کہ میں ابراہیم کے پاس تھا، انہوں نے جوتے اتارے اور جب مؤذن نے اذان دی تو پہن لئے۔

حضرت یعقوب بن مجمع فرماتے ہیں کہ سب سے پہلے جوتوں میں عویم بن ساعدہ نے نماز پڑھی۔

حضرت ابو مجلز اپنے جوتے پہن کر نماز پڑھا کرتے تھے۔

حضرت جابر فرماتے ہیں کہ حضرت ابو جعفر جوتے اتارتے اور جب نماز پڑھنے لگتے تو پہن لیتے۔

حضرت ابو سعید خدری فرماتے ہیں کہ نبی صلی اللہ علیہ وآلہ وسلم نے نماز میں جوتے اتارے تو لوگوں نے بھی اپنے جوتے اتار لئے۔ جب آپ نے نماز مکمل کرلی تو لوگوں سے پوچھا کہ تم نے جوتے کیوں اتارے ؟ انہوں نے کہا کہ ہم نے آپ کو جوتے اتارتے دیکھا تو ہم نے بھی اپنے جوتے اتار دیئے۔ آپ نے فرمایا کہ جبریل میرے پاس آئے تھے اور انہوں نے مجھے بتایا تھا کہ میرے جوتوں میں گندگی لگی ہے۔ جب تم میں سے کوئی نماز پڑھنے آئے تو اپنے جوتوں کو الٹ پلٹ کر دیکھ لے، اگر ان میں گندگی لگی تو اسے زمین سے مل کر صاف کرلے اور انہی میں نماز پڑھ لے۔

حسن سے روایت ہے کہ نبی صلی اللہ علیہ وآلہ وسلم نے ارشاد فرمایا کہ اپنے جوتوں کو دیکھو اگر ان میں گندگی لگی ہو تو اسے صاف کرلو اور اگر نہ ہو تو انہی میں نماز پڑھ لو۔

حضرت عبداللہ فرماتے ہیں کہ نبی صلی اللہ علیہ وآلہ وسلم نے اپنے جوتوں میں نماز ادا فرمائی۔