المعجم الكبير للطبراني

سیدنا ابی بن کعب رضی اللہ عنہ سے روایت ہے کہ رسول اللہ ﷺ نے فرمایا: ”مجھ سے جبرائیل علیہ السلام نے فرمایا: اسلام عمر رضی اللہ عنہ کی موت پر روئے۔“

معروف بن ابی معروف موصلی بیان کرتے ہیں: جب عمر رضی اللہ عنہ زخمی ہوئے تو میں نے ایک آواز سنی: ”جو رونا چاہے وہ اسلام پر روئے، لوگ ہلاکت کے قریب ہیں حالانکہ زمانہ ابھی پرانا نہیں ہوا، دنیا پیٹھ پھیر چکی ہے اور اس کی بھلائی جا چکی ہے، اور جو وعدے پر ایمان رکھتا تھا وہ اس سے اکتا چکا ہے۔“

مسور بن مخرمہ رضی اللہ عنہ بیان کرتے ہیں: عمر بن خطاب رضی اللہ عنہ دس سال خلیفہ رہے، پھر ان کی وفات ہوئی۔

سیدنا ابن عباس رضی اللہ عنہما سے روایت ہے کہ عمر بن خطاب رضی اللہ عنہ کی وفات چھیاسٹھ برس کی عمر میں ہوئی۔

شعبی بیان کرتے ہیں کہ عمر بن خطاب رضی اللہ عنہ کی وفات تریسٹھ برس کی عمر میں ہوئی۔

سیدنا جریر رضی اللہ عنہ سیدنا معاویہ رضی اللہ عنہ سے روایت کرتے ہیں، وہ فرماتے ہیں: ”رسول اللہ ﷺ کی وفات تریسٹھ برس کی عمر میں ہوئی، ابوبکر رضی اللہ عنہ کی وفات بھی تریسٹھ برس کی عمر میں ہوئی، اور عمر رضی اللہ عنہ کی وفات بھی تریسٹھ برس کی عمر میں ہوئی۔“

قتادہ بیان کرتے ہیں: عمر رضی اللہ عنہ اکسٹھ برس کی عمر میں شہید کیے گئے۔

ابن شہاب بیان کرتے ہیں: عمر رضی اللہ عنہ کی وفات پچپن برس کی عمر میں ہوئی۔

سالم بن عبداللہ بیان کرتے ہیں کہ عمر رضی اللہ عنہ کی وفات پچپن برس کی عمر میں ہوئی۔

سیدنا ابن عمر رضی اللہ عنہما سے روایت ہے، وہ فرماتے ہیں: ”عمر رضی اللہ عنہ کی وفات پچپن برس کی عمر میں ہوئی۔“

سیدنا ابن عمر رضی اللہ عنہما فرماتے ہیں: ”عمر رضی اللہ عنہ کی وفات پچپن برس کی عمر میں ہوئی۔“ اور عمر رضی اللہ عنہ نے خود فرمایا تھا: ”مجھ میں بڑھاپا میرے ننھیال، بنو مغیرہ کی طرف سے، جلدی آیا۔“

سیدنا سہل بن سعد انصاری رضی اللہ عنہ بیان کرتے ہیں: عمر رضی اللہ عنہ کو بدھ کے دن، ذی الحجہ کی چار راتیں باقی رہتے، سن تئیس ہجری میں دفن کیا گیا۔

یحییٰ بن بکیر بیان کرتے ہیں: عمر رضی اللہ عنہ رجب سن تیرہ ہجری میں خلیفہ بنائے گئے، اور ذی الحجہ سن تئیس ہجری کے آخر میں شہید کیے گئے۔ زخمی ہونے کے بعد وہ تین دن زندہ رہے، پھر ذی الحجہ کے آخر میں وفات پائی۔ صہیب رضی اللہ عنہ نے ان کی نماز جنازہ پڑھائی، اور ان کے بیٹے عبداللہ بن عمر نے انہیں غسل دیا، اور پانچ کپڑوں میں کفن دیا گیا، اور رسول اللہ ﷺ کے ساتھ دفن کیے گئے۔ انہیں بدھ کے دن، ذی الحجہ کی نو راتیں باقی رہتے، زخمی کیا گیا۔ بعض لوگوں کا کہنا ہے کہ وہ اسی دن فوت ہو گئے تھے۔ اور ان کی وفات کے وقت ان کی عمر کے بارے میں — جیسا کہ میں نے مالک بن انس سے سنا — وہ رسول اللہ ﷺ کی عمر یعنی تریسٹھ برس کو پہنچ چکے تھے۔ اور بعض لوگ کہتے ہیں: انسٹھ برس، اور بعض کہتے ہیں: ترپن یا پچپن برس، اور بعض کہتے ہیں: چون برس۔ اور ان کی خلافت دس سال، چار مہینے اور کچھ دن رہی۔

لیث بن سعد بیان کرتے ہیں: امیر المومنین عمر رضی اللہ عنہ حجاج کی واپسی کے موقع پر شہید کیے گئے، اور یہ سن تئیس ہجری میں ہوا۔

ابوحفص عمرو بن علی بیان کرتے ہیں: کہا جاتا ہے کہ عمر رضی اللہ عنہ تریسٹھ برس کی عمر میں شہید کیے گئے، لیکن صحیح بات یہ ہے کہ وہ اٹھاون برس کے تھے۔

ابوبکر بن ابی شیبہ بیان کرتے ہیں: عمر رضی اللہ عنہ کی وفات سن تئیس ہجری میں ہوئی، اور ان کی خلافت دس سال رہی۔

سیدنا ابن عباس رضی اللہ عنہما سے روایت ہے کہ عمر رضی اللہ عنہ کو سحری کے وقت خنجر مارا گیا، انہیں ابولؤلؤہ نے، جو مغیرہ بن شعبہ کا غلام تھا اور مجوسی تھا، زخمی کیا تھا۔

سیدنا ابن عمر رضی اللہ عنہما بیان کرتے ہیں: جب عمر رضی اللہ عنہ زخمی ہوئے تو لوگوں نے ایک طبیب کو بلا بھیجا، انصار کا ایک آدمی آیا اور انہیں دودھ پلایا، تو دودھ ناف کے نیچے کے زخم سے سفید حالت میں نکل آیا، طبیب نے کہا: اپنی وصیت کر لیجیے، مجھے نہیں لگتا کہ آپ شام تک زندہ رہیں گے۔ عمر رضی اللہ عنہ نے فرمایا: ”اس نے مجھ سے سچ کہا۔“

عبدالرحمن بن یسار بیان کرتے ہیں: میں عمر بن خطاب رضی اللہ عنہ کی موت کے وقت موجود تھا، اس دن سورج گرہن ہوا۔