مجمع الزوائد ومنبع الفوائد

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اے اللہ ! تو عمر بن خطاب یا ابوجہل بن ہشام کے ذریعے اسلام کو غلبہ عطا فرما ۔ “ تو اللہ تعالیٰ نے سیدنا عمر بن خطاب رضی اللہ عنہ کے حق میں نبی اکرم صلی اللہ علیہ وسلم کی دعا کو قبول کیا اور ان کے ذریعے اسلام کو مضبوط کیا اور بتوں کو منہدم کیا ۔
یہ روایت امام طبرانی نے معجم کبیر میں نقل کی ہے ، اور معجم اوسط میں اس کی مانند روایت اختصار کے ساتھ نقل کی ہے ، جس میں یہ الفاظ ہیں : ” اسلام کی تائید فرما ۔ “ معجم کبیر کے رجال ” صحیح “ کے رجال ہیں ، صرف مجالد بن سعید کا معاملہ مختلف ہے ، اور اس کی توثیق کی گئی ہے ۔

سیدنا ابوبکر صدیق رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” اے اللہ ! عمر بن خطاب کے ذریعے اسلام کو مضبوط کر دے ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی محمد بن حسن بن زبالہ ہے ، اور وہ متروک ہے ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم نے جمعرات کی شام دعا کرتے ہوئے یہ کہا: ” اے اللہ ! عمر بن خطاب یا عمرو بن ہشام کے ذریعے اسلام کو غلبہ عطا فرما ۔ “ تو اگلے دن جمعہ کے دن سیدنا عمر رضی اللہ عنہ نے اسلام قبول کر لیا ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی قاسم بن عثمان بصری ہے ، اور وہ ضعیف ہے ۔

سیدنا عمر بن خطاب رضی اللہ عنہ بیان کرتے ہیں : میں اسلام قبول کرنے سے پہلے نبی اکرم صلی اللہ علیہ وسلم کی تلاش میں نکلا ، آپ مجھ سے پہلے مسجد میں پہنچے ہوئے تھے ، میں آپ کے پیچھے کھڑا ہو گیا ، آپ نے سورت حاقہ پڑھنی شروع کی ، تو قرآن کے نظم کے حوالے سے میں بہت حیران ہوا ، سیدنا عمر رضی اللہ عنہ کہتے ہیں : میں نے سوچا اللہ کی قسم ! یہ صاحب شاعر ہیں ، جس طرح قریش یہ بات کہتے ہیں ، سیدنا عمر رضی اللہ عنہ کہتے ہیں : اسی دوران نبی اکرم صلی اللہ علیہ وسلم نے یہ آیت تلاوت کی : ” یہ معزز رسول کا ( نقل کیا ہوا ) کلام ہے ، یہ شاعر کا کلام نہیں ہے ( مگر ) تم کم ہی یقین رکھتے ہو ۔ “ میں نے سوچا کہ یہ کاہن ہیں ، تو نبی اکرم صلی اللہ علیہ وسلم نے یہ آیت تلاوت کی : ” یہ کسی کاہن کا کلام نہیں ہے ( مگر ) تم کم ہی نصیحت حاصل کرتے ہو ۔ “ سیدنا عمر رضی اللہ عنہ کہتے ہیں : تو اس وقت اسلام مکمل طور پر میرے دل میں گھر کر گیا ۔
یہ روایت امام أحمد نے نقل کی ہے ، اور اس کے رجال ثقہ ہیں ، البتہ شریح بن عبید نامی راوی نے سیدنا عمر رضی اللہ عنہ کا زمانہ نہیں پایا ہے ۔

سیدنا ثوبان رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اے اللہ ! عمر بن خطاب کے ذریعے اسلام کو غلبہ عطا فرما “ ( راوی بیان کرتے ہیں : ) رات کے ابتدائی حصے میں سیدنا عمر رضی اللہ عنہ نے اپنی بہن کی پٹائی کی تھی ، جو یہ آیت پڑھ رہی تھیں : ” تم اپنے پروردگار کے اسم کے ہمراہ پڑھو جس نے پیدا کیا ہے ۔ “ سیدنا عمر رضی اللہ عنہ نے ان کی اتنی پٹائی کی کہ انہیں یہ لگا کہ شاید وہ اس خاتون کو قتل کر دیں گے ، پھر وہ صبح کے وقت اٹھے تو انہوں نے اس خاتون کو یہ پڑھتے ہوئے سنا : ” تم اپنے پروردگار کے اسم کے ہمراہ پڑھو جس نے پیدا کیا ہے ۔ “ تو سیدنا عمر رضی اللہ عنہ نے کہا: اللہ کی قسم ! یہ نہ تو شعر ہے ، اور نہ ہی ہمہمہ ( یعنی نغمہ ) ہے ، پھر وہ گئے اور نبی اکرم صلی اللہ علیہ وسلم کی خدمت میں حاضر ہوئے ، انہوں نے سیدنا بلال رضی اللہ عنہ کو دروازے پر پایا ، انہوں نے دروازے پر دستک دی ، سیدنا بلال رضی اللہ عنہ نے پوچھا: کون ہے ؟ انہوں نے جواب دیا : عمر بن خطاب ، سیدنا بلال رضی اللہ عنہ نے کہا: پہلے میں نبی اکرم صلی اللہ علیہ وسلم سے اجازت لے لوں ، سیدنا بلال رضی اللہ عنہ نے عرض کی : یا رسول اللہ ! دروازے پر عمر ہے ۔ نبی اکرم صلی اللہ علیہ وسلم نے فرمایا : اللہ تعالیٰ نے عمر کے بارے میں اگر بھلائی کا ارادہ کر لیا ہے ، تو وہ اسے دین میں داخل کروا دے گا ، آپ نے سیدنا بلال رضی اللہ عنہ سے فرمایا : دروازہ کھول دو ، نبی اکرم صلی اللہ علیہ وسلم نے سیدنا عمر رضی اللہ عنہ کے دونوں پہلوؤں کو پکڑ کر انہیں ہلایا اور بولے : تم کیا چاہتے ہو اور کس لئے آئے ہو ؟ سیدنا عمر رضی اللہ عنہ نے آپ کی خدمت میں عرض کی : آپ میرے سامنے وہ چیز بیان کیجئے جس کی طرف آپ دعوت دیتے ہیں ، تو نبی اکرم صلی اللہ علیہ وسلم نے فرمایا : تم اس بات کی گواہی دو کہ اللہ تعالیٰ کے علاوہ اور کوئی معبود نہیں ہے ، صرف وہی ایک معبود ہے ، اس کا کوئی شریک نہیں ہے ، اور سیدنا محمد صلی اللہ علیہ وسلم اس کے بندے اور اس کے رسول ہیں ، تو سیدنا عمر رضی اللہ عنہ نے اسی جگہ اسلام قبول کر لیا ، نبی اکرم صلی اللہ علیہ وسلم نے فرمایا : اب تم چلے جاؤ ( یا سیدنا عمر رضی اللہ عنہ نے دریافت کیا : کیا میں چلا جاؤں ) ۔
یہ روایت امام طبرانی نے نقل کی ہے ۔ اس کی سند میں ایک راوی یزید بن ربیعہ رحبی ہے ، اور وہ متروک ہے ، ابن عدی کہتے ہیں ، مجھے یہ امید ہے کہ اس میں کوئی حرج نہیں ہو گا ، اس روایت کے بقیہ رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : جب سیدنا عمر رضی اللہ عنہ نے اسلام قبول کیا ، تو قوم ( یعنی مشرکین مکہ ) نے کہا: اب ہماری تعداد نصف رہ گئی ہے ۔
یہ روایت امام طبرانی نے نقل کی ہے ۔ اس کی سند میں ایک راوی نضر ابوعمر ہے ، اور وہ متروک ہے ۔

سیدنا عبداللہ بن مسعود رضی اللہ عنہ فرماتے ہیں : سیدنا عمر رضی اللہ عنہ کا اسلام قبول کرنا کشادگی کا باعث تھا ، ان کی ہجرت مدد کا باعث تھی ، ان کی حکومت رحمت تھی ، اللہ کی قسم ! ہم اس وقت تک ( کھلے عام ) نماز ادا کرنے کی استطاعت نہیں رکھ پائے تھے جب تک سیدنا عمر رضی اللہ عنہ نے اسلام قبول نہیں کر لیا ، جب سیدنا عمر رضی اللہ عنہ نے اسلام قبول کر لیا تو انہوں نے لوگوں کے ساتھ لڑائی کی ، یہاں تک کہ انہوں نے ہمیں یہ موقع دیا کہ ہم ( کھلے عام ) نماز ادا کریں ۔
یہ روایت امام طبرانی نے نقل کی ہے ۔

ایک روایت میں یہ الفاظ ہیں : ” ہم یہ استطاعت نہیں رکھتے تھے کہ خانہ کعبہ کے پاس کھلے عام نماز ادا کریں ۔ “ اس روایت کے رجال ” صحیح“ کے رجال ہیں ، البتہ قاسم نامی راوی نے اپنے دادا سیدنا عبداللہ بن مسعود رضی اللہ عنہ کا زمانہ نہیں پایا ہے ۔

سیدنا عبداللہ بن عباس رضی اللہ عنہما بیان کرتے ہیں : سب سے پہلے اپنے اسلام کا کھلے عام اظہار سیدنا عمر بن خطاب رضی اللہ عنہ نے کیا تھا ۔
یہ روایت امام طبرانی نے نقل کی ہے ، اور اس کی سند حسن ہے ۔