مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : یہودیوں سے تعلق رکھنے والی ایک عورت نے زہر ملی ہوئی بکری ( کا گوشت ) نبی اکرم صلی اللہ علیہ وسلم کی خدمت میں تحفے کے طور پر پیش کیا ، نبی اکرم صلی اللہ علیہ وسلم نے اسے بلوا بھیجا اور آپ نے فرمایا : تم نے ایسا کیوں کیا ؟ اس نے کہا: میں یہ چاہتی تھی ( راوی کو شک ہے ، شاید یہ الفاظ ہیں : ) میں یہ پسند کرتی تھی کہ اگر آپ نبی ہوئے ، تو اللہ تعالیٰ آپ کو اس سے مطلع کر دے گا ، اور اگر آپ نبی نہ ہوئے ، تو میں لوگوں کو آپ سے نجات دلوا دوں گی ، راوی کہتے ہیں : نبی اکرم صلی اللہ علیہ وسلم کو جب بھی اس کی تکلیف محسوس ہوتی تھی ، تو آپ پچھنے لگوا لیتے تھے ، ایک مرتبہ آپ سفر کر رہے تھے ، آپ نے احرام باندھا ہوا تھا ، آپ کو تکلیف محسوس ہوئی ، تو آپ نے پچھنے لگوا لیے ۔
یہ روایت امام أحمد نے نقل کی ہے ، اور اس روایت کے رجال ” صحیح “ کے رجال ہیں ، صرف ہلال بن حباب کا معاملہ مختلف ہے ، اور وہ ثقہ ہے ۔

سیدنا انس رضی اللہ عنہ کے حوالے سے ، اس کی مانند روایت منقول ہے : تاہم اس میں یہ الفاظ زائد ہیں : ” ایک یہودی عورت نے ، نبی اکرم صلی اللہ علیہ وسلم کو بکری ( کا گوشت ) تحفے کے طور پر دیا ، جس میں زہر ملا ہوا تھا ، انہی اکرم صلی اللہ علیہ وسلم نے اپنا ہاتھ کھانے کے لئے اس گوشت کی طرف بڑھایا ، تو نبی اکرم صلی اللہ علیہ وسلم نے فرمایا : اس کے اعضاء میں سے ایک عضو نے مجھے بتایا ہے کہ اس میں زہر ملایا ہوا ہے ، تو نبی اکرم صلی اللہ علیہ وسلم اور آپ کے ساتھی اس سے رک گئے ، نبی اکرم صلی اللہ علیہ وسلم نے اس عورت کو پیغام بھیج کر بلوایا اور دریافت کیا : تم نے ایسا کیوں کیا کہ تم نے اسے ٹھیک کرنے کے بعد اسے خراب کر دیا ؟ اس نے کہا: میں یہ چاہتی تھی کہ میں جان لوں کہ اگر آپ نبی ہیں ، تو آپ کو اس کا پتہ چل جائے گا ، اور اگر آپ نبی نہ ہوئے ، تو میں لوگوں کو آپ سے نجات دلوا دوں گی ۔ “
یہ روایت امام بزار نے نقل کی ہے ، اور اس کے رجال ” صحیح “ کے رجال ہیں ، صرف مبارک بن فضالہ کا معاملہ مختلف ہے ، اور ثقہ ہے ، اور اس میں ضعف پایا جاتا ہے ۔

سیدنا ابوسعید خدری رضی اللہ عنہ بیان کرتے ہیں : ایک یہودی عورت نے ، نبی اکرم صلی اللہ علیہ وسلم کو ، بکری کا زہر ملا ہوا گوشت تحفے کے طور پر دیا ، جب لوگوں نے اپنے ہاتھ بڑھائے ، تو نبی اکرم صلی اللہ علیہ وسلم نے فرمایا : تم لوگ رک جاؤ ! کیونکہ اس کے اعضاء میں سے ایک عضو نے مجھے یہ بتایا ہے کہ اس میں زہر ملا ہے ، پھر نبی اکرم صلی اللہ علیہ وسلم نے اس عورت کو پیغام بھیج کر بلوایا اور دریافت کیا : کیا تم نے اپنے اس کھانے میں زہر ملایا ہے ؟ اس نے جواب دیا : جی ہاں ! نبی اکرم صلی اللہ علیہ وسلم نے دریافت کیا : تم نے ایسا کیوں کیا ہے ؟ اس نے کہا: میں نے یہ ارادہ کیا کہ اگر آپ جھوٹے ہوئے تو میں آپ سے لوگوں کو نجات دلوا دوں گی اور اگر آپ سچے ہوئے تو مجھے یہ پتہ ہے کہ اللہ تعالیٰ آپ کو اس سے مطلع کر دے گا ، نبی اکرم صلی اللہ علیہ وسلم نے اپنا ہاتھ بڑھایا اور فرمایا : اللہ کا نام لے کے کھاؤ ! راوی کہتے ہیں : ہم نے اُسے کھا لیا ، ہم نے اللہ کا نام بھی لے لیا ، تو اس نے ہم میں سے کسی کو بھی نقصان نہیں پہنچایا ۔
یہ روایت امام بزار نے نقل کی ہے ، اور اس کے رجال ثقہ ہیں ۔

سیدنا کعب بن مالک رضی اللہ عنہ بیان کرتے ہیں : یہودی عورت نے ، نبی اکرم صلی اللہ علیہ وسلم کو خیبر میں بکری کا گوشت تحفے کے طور بر دیا ، جو بھنا ہوا تھا ، نبی اکرم صلی اللہ علیہ وسلم نے اُس سے فرمایا : یہ کیا ہے ؟ اس نے کہا: یہ تحفہ ہے ، اس نے یہ کہنے سے گریز کیا کہ یہ صدقہ ہے ، نبی اکرم صلی اللہ علیہ وسلم اور آپ کے اصحاب اُسے کھانے لگے ، پھر نبی اکرم صلی اللہ علیہ وسلم نے اُن لوگوں سے فرمایا : تم لوگ رک جاؤ ! پھر آپ نے اس عورت سے دریافت کیا : کیا تم نے اس میں زہر ملایا ہے ؟ اس عورت نے پوچھا: آپ کو کس نے بتایا ہے ؟ نبی اکرم صلی اللہ علیہ وسلم نے فرمایا : اس ہڈی نے ، آپ نے بکری کی پنڈلی کی طرف اشارہ کر کے یہ بات ارشاد فرمائی ، جو آپ کے ہاتھ میں تھی ، اس عورت نے کہا: جی ہاں ! نبی اکرم صلی اللہ علیہ وسلم نے دریافت کیا : کیوں ( یعنی تم نے ایسا کیوں کیا ) ؟ اس نے کہا: میں نے سوچا کہ اگر آپ جھوٹے ہوئے ، تو آپ سے لوگوں کو نجات مل جائے گی ، اور اگر آپ نبی ہوئے تو یہ آپ کو نقصان نہیں پہنچائے گا ، تو نبی اکرم صلی اللہ علیہ وسلم نے کندھے کے قریب پچھنے لگوائے ، آپ صلی اللہ علیہ وسلم نے اپنے اصحاب کو حکم دیا ، انہوں نے بھی پچھنے لگوائے ، ان اصحاب میں سے ایک کا انتقال بھی ہو گیا تھا ۔ زہری بیان کرتے ہیں : اس عورت نے اسلام قبول کر لیا تھا ، لوگوں کا یہ کہنا ہے کہ نبی اکرم صلی اللہ علیہ وسلم نے اس عورت کو قتل کروا دیا تھا ۔
یہ روایت امام طبرانی نے نقل کی ہے ، اس کی سند میں ایک راوی أحمد بن بکر بالسی ہے ، جسے ابن حبان نے ثقہ قرار دیا ہے ، وہ کہتے ہیں : یہ غلطی کر جاتا ہے ، ابن عدی نے اسے ضعیف قرار دیا ہے ، اس روایت کے بقیہ رجال ” صحیح “ کے رجال ہیں ۔

یحیی بن عبدالرحمن بن لبیبہ ، اپنے والد کے حوالے سے ، اپنے والد کا یہ بیان نقل کرتے ہیں : نبی اکرم صلی اللہ علیہ وسلم کو ایک بکری کا گوشت پیش کیا گیا ، جو بھنا ہوا تھا ، اور اس میں زہر ملادیا گیا تھا ، نبی اکرم صلی اللہ علیہ وسلم اور سیدنا بشر بن براء بن معرور رضی اللہ عنہ نے اس گوشت میں سے کھا لیا ، یہ دونوں شدید بیمار ہو گئے ، سیدنا بشر رضی اللہ عنہ کا انتقال ہو گیا جب ان کا انتقال ہوا تو آپ صلی اللہ علیہ وسلم نے اس یہودی عورت کو پیغام بھیج کر بلوایا ، جس نے وہ آپ کو تحفے کے طور پر بھجوایا تھا ، آپ نے فرمایا : تمہارا ستیاناس ہو ، تم نے ہمیں کیا کھلایا ہے ؟ اس نے کہا: کہ میں نے آپ کو زہر کھلایا ہے ، نبی اکرم صلی اللہ علیہ وسلم نے دریافت کیا : تم نے ایسا کیوں کیا ؟ اس نے کہا: میں نے آپ کو ایک بات ذکر کرتے ہوئے سنا کہ آپ نبی ہیں ، تو مجھے یہ علم تھا کہ یہ آپ کو نقصان نہیں پہنچائے گا ، اور اگر آپ نبی نہ ہوئے تو میں نے یہ ارادہ کیا تھا کہ لوگوں کو آپ سے نجات دلوا دوں گی ، پھر نبی اکرم صلی اللہ علیہ وسلم نے اس عورت کے بارے میں حکم دیا ، تو اسے مصلوب کر دیا گیا ۔
یہ روایت امام طبرانی نے نقل کی ہے ، اور یحیی نامی راوی اگر تو ابن ابولبیبہ ہے ، تو امام ذہبی نے اس کا ذکر ” میزان الاعتدال “ میں کیا ہے ، اور اگر یہ ابن لبیبہ ہے تو پھر میں اس سے واقف نہیں ہوں ۔

سیدنا عمار بن یاسر رضی اللہ عنہ بیان کرتے ہیں : نبی اکرم صلی اللہ علیہ وسلم کوئی بھی تحفہ اس وقت تک نہیں کھاتے تھے ، جب تک آپ لانے والے فرد کو یہ ہدایت نہیں کرتے تھے کہ وہ خود بھی اُس میں سے کھا لے ، ایسا اس بکری کی وجہ سے ہوا ، جو خیبر میں آپ کو تحفے کے طور پر دی گئی تھی ۔
یہ روایت امام بزار نے اپنے استاد ابراہیم بن عبداللہ مخرمی کے حوالے سے نقل کی ہے ، جسے اسماعیلی نے ثقہ قرار دیا ہے ، اور دارقطنی نے اسے ضعیف قرار دیا ہے ، اور اس کی سند میں ایسا راوی ہے ، جس سے میں واقف نہیں ہوں ۔ ( علامہ ہیثمی فرماتے ہیں : ) میں یہ کہتا ہوں : اس سے پہلے غزوہ خیبر سے متعلق باب میں عروہ کی نقل کردہ ” مرسل “ روایت گزر چکی ہے ۔