مجمع الزوائد ومنبع الفوائد

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم کو جب چھینک آتی تھی تو آپ اپنا چہرہ ڈھانپ لیتے تھے ، اور آپ اپنی آواز کو پست رکھتے تھے ۔
یہ روایت امام طبرانی نے معجم اوسط میں نقل کی ہے ، اور اس کی سند میں ایک راوی اسماعیل بن عمرو بجلی ہے ، اور ایک راوی مندل بن علی ہے ان دونوں کی توثیق کی گئی ہے ایک جماعت نے ان دونوں کو ضعیف قرار دیا ہے ۔ اس روایت کے بقیہ رجال صحیح کے رجال ہیں ۔

سیدنا عبداللہ بن جعفر ( یہ سیدنا جعفر رضی اللہ عنہ وہ ہیں ) جو ذوالجناحین ہیں ( یعنی پروں والے ہیں ) وہ ( یعنی عبداللہ بن جعفر ) بیان کرتے ہیں : نبی اکرم صلی اللہ علیہ وسلم کو جب چھینک آتی تھی تو آپ اللہ کی حمد بیان کرتے تھے ، آپ سے یہ کہا: جاتا تھا اللہ تعالیٰ آپ پر رحم کرے ، تو آپ یہ فرماتے تھے : اللہ تعالیٰ تمہیں ہدایت پر ثابت قدم رکھے اور تمہارے معاملات ٹھیک کرے ۔
یہ روایت امام أحمد اور امام طبرانی نے نقل کی ہے ۔ اس کی سند میں ایک راوی ابن لہیعہ ہے اور وہ حسن الحدیث ہے اگرچہ اس میں ضعف پایا جاتا ہے ۔ اس روایت کے بقیہ رجال ثقہ ہیں ۔

سیدنا عبداللہ بن عمر رضی اللہ عنہما بیان کرتے ہیں : ہم لوگ نبی اکرم صلی اللہ علیہ وسلم کے پاس بیٹھے ہوئے تھے ، آپ صلی اللہ علیہ وسلم کو چھینک آئی آپ نے اللہ تعالیٰ کی حمد بیان کی ، لوگوں نے کہا: اللہ تعالیٰ آپ رحم کرے ، تو نبی اکرم صلی اللہ علیہ وسلم نے فرمایا : اللہ تعالیٰ تم لوگوں کو ہدایت پر ثابت قدم رکھے اور تمہارے معاملات ٹھیک کرے ۔
یہ روایت امام طبرانی نے نقل کی ہے ۔ اس کی سند میں ایک راوی اسباط بن عزرہ ہے ، اور میں اس سے واقف نہیں ہوں ، اس روایت کے بقیہ رجال صحیح کے رجال ہیں ۔

سیدنا عبداللہ بن مسعود رضی اللہ عنہ بیان کرتے ہیں : نبی اکرم صلی اللہ علیہ وسلم ہمیں یہ تعلیم دیتے تھے کہ جب ہم میں سے کسی ایک کو چھینک آ جائے ، تو ہم اُسے چھینک کا جواب دیں ۔
یہ روایت امام طبرانی نے نقل کی ہے ، اور اس کی سند عمدہ ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم کے پاس ایک شخص کو چھینک آ گئی ، اس نے دریافت کیا : یا رسول اللہ ! میں کیا کہوں ؟ نبی اکرم صلی اللہ علیہ وسلم نے فرمایا : تم الحمدللہ کہو ! لوگوں نے دریافت کیا : یا رسول اللہ ! ہم اسے کیا کہیں ؟ نبی اکرم صلی اللہ علیہ وسلم نے فرمایا : تم اسے یہ کہو : اللہ تعالیٰ تم پر رحم کرے ، اُس شخص نے دریافت کیا : یا رسول اللہ ! پھر میں انہیں کیا کہوں ؟ نبی اکرم صلی اللہ علیہ وسلم نے فرمایا : تم ان سے یہ کہو : اللہ تعالیٰ تم لوگوں کو ہدایت پر ثابت قدم رکھے اور تمہارے معاملات ٹھیک کرے ۔
یہ روایت امام أحمد نے نقل کی ہے اور امام ابویعلیٰ نے نقل کی ہے ، اس کی سند میں ایک راوی ابومعشر نجیح ہے ، اور وہ حدیث میں کمزور ہے ، اس روایت کے بقیہ رجال ثقہ ہیں ۔

سیدنا عبداللہ بن مسعود رضی اللہ عنہ بیان کرتے ہیں : نبی اکرم صلی اللہ علیہ وسلم ہمیں یہ تعلیم دیتے تھے کہ جب کوئی شخص چھینکے تو وہ الحمدللہ کہے ، اور اس کے پاس موجود شخص یرحمک اللہ کہے ، جب وہ شخص یہ کہہ دے تو ( چھینکنے والا شخص ) یہ کہے : اللہ تعالیٰ میری اور تمہاری مغفرت کرے ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی عطاء بن سائب ہے جو اختلاط کا شکار ہو گیا تھا ۔

سیدنا ابومالک اشعری رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : ” جب کوئی شخص چھینکے تو وہ یہ کہے : ہر حال میں اللہ کا شکر ہے ، اور اس کے آس پاس موجود افراد یہ کہیں : اللہ تعالیٰ تم پر رحم کرے ، اور اس شخص کو اپنے آس پاس موجود افراد سے یہ کہنا چاہیے : اللہ تعالیٰ تمہیں ہدایت پر ثابت قدم رکھے اور تمہارے معاملات ٹھیک رکھے ۔
یہ روایت امام طبرانی نے نقل کی ہے ۔ اس کی سند میں ایک راوی محمد بن اسماعیل بن عیاش ہے اور وہ ضعیف ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” جب کوئی شخص چھینکے تو وہ الحمدللہ کہے ، تو فرشتے یہ کہتے ہیں : رب العالمین ( یعنی اس اللہ کے لئے حمد مخصوص ہے ، جو تمام جہانوں کا پروردگار ہے ) اور جب بندے نے ساتھ رب العالمین بھی کہا: ، تو فرشتے یہ کہتے ہیں : اللہ تعالیٰ تم پر رحم کرے ۔ “
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی عطاء بن سائب ہے ، جو اختلاط کا شکار ہو گیا تھا ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” جب تم میں سے کسی ایک شخص کو چھینک آئے ، تو اسے الحمد للہ کہنا چاہیے ، راوی کہتے ہیں : میرا خیال ہے روایت میں یہ الفاظ بھی ہیں : ہر حال میں اور اس کو یہ کہا: جانا چاہیے اللہ تعالیٰ تم پر رحم کرے اور اس شخص کو یہ کہنا چاہیے کہ اللہ تعالیٰ ہماری اور تمہاری مغفرت کرے ۔ “
( علامہ ہیثمی فرماتے ہیں : ) میں یہ کہتا ہوں امام ترمذی نے اس کا کچھ حصہ نقل کیا ہے ۔
یہ روایت امام بزار نے نقل کی ہے ۔ اس کی سند میں ایک راوی اسباط بن عزرہ ہے اور میں اس سے واقف نہیں ہوں ۔ اس روایت کے بقیہ رجال ثقہ ہیں ۔

سیدنا علی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب تم میں سے کسی ایک شخص کو چھینک آئے ، تو اسے الحمدللہ کہنا چاہیے اور اس کے پاس موجود شخص کو یرحمک اللہ کہنا چاہیے اور اس شخص کو یہ کہنا چاہیے : اللہ تعالیٰ تمہیں ہدایت پر ثابت قدم رکھے اور تمہارے معاملات ٹھیک رکھے ۔ “
یہ روایت امام طبرانی نے معجم اوسط میں نقل کی ہے اور اس کی سند میں ایک راوی یحیی بن عبدالحمید حمانی ہے ، اور وہ ضعیف ہے ۔