مجمع الزوائد ومنبع الفوائد

سیدنا عبداللہ بن مسعود رضی اللہ عنہ بیان کرتے ہیں : نبی اکرم صلی اللہ علیہ وسلم نے ان کی کنیت ابوعبدالرحمن رکھی تھی حالانکہ ان کے ہاں اولاد نہیں ہوئی تھی ۔
یہ روایت امام طبرانی نے نقل کی ہے ، اور اس کے رجال صحیح کے رجال ہیں ۔

سیدنا حمزہ بن عمر اسلمی رضی اللہ عنہ بیان کرتے ہیں : نبی اکرم صلی اللہ علیہ وسلم نے ان کی کنیت ابوصالح رکھی تھی ۔
یہ روایت امام طبرانی نے نقل کی ہے ۔ اس کی سند میں ایک راوی یعقوب بن محمد زہری ہے ، جسے ابن حبان نے ثقہ قرار دیا ہے ، اور جمہور ائمہ نے اسے ضعیف کہا: ہے ۔

سیدنا ابوورد رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھے ملاحظہ کیا ، آپ نے میرے چہرے میں سرخی ملاحظہ کی تو ارشاد فرمایا : تم ابوالورد ہو ۔
یہ روایت امام طبرانی نے نقل کی ہے ۔ اس کی سند میں ایک راوی جبارہ بن مغلس ہے ، جسے ابن نمیر نے ثقہ قرار دیا ہے ، اور ایک سے زیادہ افراد نے اس کی نسبت جھوٹ کی طرف کی ہے ۔