مجمع الزوائد ومنبع الفوائد

مرداس بن عروہ بیان کرتے ہیں : ایک شخص نے اپنے بھائی کو تیر مار کر اسے قتل کر دیا پھر وہ بھاگ کھڑا ہوا ہم نے اسے سیدنا ابوبکر رضی اللہ عنہ کے پاس پایا ہم اسے لے کر نبی اکرم صلی اللہ علیہ وسلم کے پاس آئے ، تو نبی اکرم صلی اللہ علیہ وسلم نے ہمیں اس سے بدلہ دلوایا ۔
یہ روایت امام طبرانی نے نقل کی ہے ۔ اس کی سند میں ایک راوی محمد بن جابر سحیمی ہے ، اور وہ ضعیف ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم نے اس بات سے منع کیا ہے کہ دو آدمیوں کے مقابلے میں کسی غلام سے بدلہ لیا جائے ۔
یہ روایت امام بزار نے نقل کی ہے ۔ اس کی سند میں ایک راوی محمد بن ثابت بنانی ہے ، اور وہ ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : ایک لڑکی سیدنا عمر بن خطاب رضی اللہ عنہ کے پاس آئی اور بولی: میرے مالک نے مجھ پر تہمت عائد کی ، اور اس نے مجھے آگ پر بٹھا دیا جس کے نتیجے میں میری شرمگاہ جل گئی ۔ سیدنا عمر رضی اللہ عنہ نے اس کنیز سے فرمایا : کیا اس نے تمہیں کچھ کرتے ہوئے دیکھا تھا اس نے کہا: جی نہیں ۔ سیدنا عمر رضی اللہ عنہ نے دریافت کیا : کیا تم نے اس کے سامنے کسی جرم کا اعتراف کیا تھا اس نے جواب دیا : جی نہیں ۔ سیدنا عمر رضی اللہ عنہ نے فرمایا : اسے میرے پاس لایا جائے اس شخص کو سیدنا عمر رضی اللہ عنہ کے پاس لایا گیا سیدنا عمر رضی اللہ عنہ نے فرمایا : کیا تم اللہ کے عذاب کی طرح عذاب دیتے ہو اس نے عرض کی : اے امیر المؤمنین میں نے اس کی ذات کے حوالے سے اس پر تہمت عائد کی تھی سیدنا عمر رضی اللہ عنہ نے دریافت کیا : کیا تم نے اسے ایسا کرتے ہوئے دیکھا تھا اس نے جواب دیا : جی نہیں ۔ سیدنا عمر رضی اللہ عنہ نے دریافت کیا : کیا اس نے تمہارے سامنے اعتراف کیا تھا اس شخص نے جواب دیا : جی نہیں ۔ سیدنا عمر رضی اللہ عنہ نے فرمایا : اس ذات کی قسم جس کے دست قدرت میں میری جان ہے اگر میں نے نبی اکرم صلی اللہ علیہ وسلم کو یہ ارشاد فرماتے ہوئے نہ سنا ہوتا : ” غلام کو اس کے مالک سے اور بچے کو اس کے باپ سے بدلہ نہیں دلوایا جائے گا “ ۔ تو میں نے اس عورت کو تم سے بدلہ دلوانا تھا پھر سیدنا عمر رضی اللہ عنہ اسے لوگوں کے سامنے لے کر آئے اور اسے ایک سو کوڑے لگوائے پھر سیدنا عمر رضی اللہ عنہ نے ( کنیز سے فرمایا : ) تم جاؤ ! تم اللہ کی ذات کی خاطر آزاد ہو اور تم اللہ اور اس کے رسول کی آزاد کی ہوئی کنیز ہو میں اس بات کی گواہی دیتا ہوں کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جسے آگ کے ذریعے جلایا جائے یا جس کا مثلہ کیا جائے تو وہ آزاد شمار ہو گا اور وہ اللہ اور اس کے رسول کی طرف سے آزاد کردہ شمار ہو گا “ ۔ ( علامہ ہیثمی فرماتے ہیں : ) میں یہ کہتا ہوں : امام ترمذی نے اس روایت کا کچھ حصہ نقل کیا ہے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عمر بن عیسیٰ قرشی ہے جس کا ذکر امام ذہبی نے ” میزان الاعتدال “ میں کیا ہے ۔ انہوں نے اس راوی کے حوالے سے یہ حدیث ذکر کی ہے ، اور انہوں نے اس راوی کے بارے میں کوئی جرح ذکر نہیں کی ہے ۔ انہوں نے اس کے حالات نقل کیے ہیں اس روایت کے بقیہ رجال کی توثیق کی گئی ہے ۔

سیدنا عبدالله بن عمرو بن العاص رضی اللہ عنہ بیان کرتے ہیں : زنباع ابوروح نے اپنے غلام کے ساتھ اپنی کنیز کو پایا تو اپنے غلام کی ناک کاٹ دی اور اس کی شرمگاہ کاٹ دی وہ نبی اکرم صلی اللہ علیہ وسلم کے پاس آیا ۔ نبی اکرم صلی اللہ علیہ وسلم نے اس سے دریافت کیا تمہارے ساتھ یہ سلوک کس نے کیا ہے اس غلام نے بتایا کہ زنباع نے نبی اکرم صلی اللہ علیہ وسلم نے زنباع کو بلوایا اور فرمایا تم نے ایسا کیوں کیا اس نے بتایا کہ اس غلام نے یہ یہ جرم کیا ہے نبی اکرم صلی اللہ علیہ وسلم نے غلام سے فرمایا : تم جاؤ تم آزاد ہو اس نے عرض کی : یا رسول اللہ ! میں کس کا آزاد کردہ غلام شمار ہوؤں گا ۔ نبی اکرم صلی اللہ علیہ وسلم نے فرمایا : اللہ اور اس کے رسول کے آزاد کردہ شمار ہو گے پھر نبی اکرم صلی اللہ علیہ وسلم نے اس غلام کے بارے میں مسلمانوں کو تلقین کی جب نبی اکرم صلی اللہ علیہ وسلم کا وصال ہو گیا تو وہ غلام سیدنا ابوبکر رضی اللہ عنہ کے پاس آیا اور اس نے کہا: اللہ اور اس کے رسول کی ہدایت کے مطابق کچھ کیجئے سیدنا ابوبکر رضی اللہ عنہ نے فرمایا : ٹھیک ہے تمہیں خرچ ملے گا تمہارے گھر والوں کو خرچ ملے گا سیدنا ابوبکر رضی اللہ عنہ نے اس کا خرچ مقرر کیا یہاں تک کہ جب سیدنا ابوبکر رضی اللہ عنہ کا انتقال ہو گیا اور سیدنا عمر رضی اللہ عنہ خلیفہ مقرر ہوئے تو وہ سیدنا عمر رضی اللہ عنہ کے پاس آیا اور بولا: اللہ کے رسول کی وصیت کے بارے میں ( آپ کیا کریں گے ) ۔ انہوں نے کہا: ٹھیک ہے تم کیا چاہتے ہو ؟ اس نے کہا: میں مصر جانا چاہتا ہوں ، تو سیدنا عمر رضی اللہ عنہ نے مصر کے گورنر کے نام خط لکھا کہ اسے اتنی زمین دے دی جائے کہ جہاں سے وہ کھا پی سکے ۔ ( علامہ ہیثمی فرماتے ہیں : ) میں یہ کہتا ہوں :
یہ روایت امام ابوداؤد نے اختصار کے ساتھ نقل کی ہے ۔
یہ روایت امام أحمد نے نقل کی ہے ، اور اس کے رجال ثقہ ہیں ۔ اس سے پہلے اس روایت کا ایک طریق غلام آزاد کرنے سے متعلق باب میں گزر چکا ہے ۔

سیدنا عبداللہ بن عمر رضی اللہ عنہما بیان کرتے ہیں : ایک مرتبہ نبی اکرم صلی اللہ علیہ وسلم نے جہاد کے بارے میں ترغیب دی تو لوگ آپ کے ارد گرد اکٹھے ہو گئے یہاں تک کہ بہت سے لوگ اکٹھے ہو گئے نبی اکرم صلی اللہ علیہ وسلم کے دست مبارک میں ایک چھڑی تھی جس کے پتے وغیرہ اتار لیے گئے تھے اور صرف چھڑی باقی تھی نبی اکرم صلی اللہ علیہ وسلم نے ارشاد فرمایا : تم لوگ مجھ سے پیچھے ہو جاؤ تم لوگوں نے مجھے ڈھانپ لیا ہے اس دوران نبی اکرم صلی اللہ علیہ وسلم کی چھڑی کسی شخص کے پیٹ پر لگی اور اس شخص کا خون نکل آیا ، تو وہ شخص یہ کہتے ہوئے چلا گیا کہ یہ تمہارے نبی کا طرز عمل ہے ، تو لوگوں کا کیا حال ہو گا ، سیدنا عمر رضی اللہ عنہ نے یہ بات سن لی تو انہوں نے فرمایا : تم نبی اکرم صلی اللہ علیہ وسلم کے پاس چلو اگر انہوں نے تمہیں تکلیف پہنچائی ہے ، تو وہ تمہیں حق دیں گے اور اگر تم نے جھوٹ بولا: ہو گا تو میں تمہارے عمامے کے ساتھ تمہیں گھسیٹوں گا یہاں تک کہ تم اصل بات بیان کرو اس شخص نے کہا: تم آرام سے چلو میں تمہارے ساتھ نہیں جانا چاہتا سیدنا عمر رضی اللہ عنہ نے کہا: میں تمہیں نہیں چھوڑوں گا ، پھر سیدنا عمر رضی اللہ عنہ اسے ساتھ لے کر نبی اکرم صلی اللہ علیہ وسلم کے پاس آئے اور عرض کی : اس شخص کا یہ کہنا ہے کہ آپ نے اسے تکلیف پہنچائی ہے جس کے نتیجے اس کے پیٹ سے خون نکلنے لگا ہے آپ اس بارے میں کیا کہتے ہیں ؟ نبی اکرم صلی اللہ علیہ وسلم نے فرمایا : کیا یہ بات ٹھیک ہے کہ میں نے اسے تکلیف پہنچائی ہے اس شخص نے کہا: جی ہاں اے اللہ کے نبی ! نبی اکرم صلی اللہ علیہ وسلم نے دریافت کیا : کیا کسی نے یہ بات دیکھی ہے راوی بیان کرتے ہیں : ہم بہت سے مسلمان موجود تھے نبی اکرم صلی اللہ علیہ وسلم نے فرمایا : اے اللہ میں ایک شخص کی گواہی کی بنیاد پر فیصلہ دے دوں گا جس نے ایسا دیکھا ہو اگر کسی نے دیکھا ہے ، تو وہ مجھے اس بارے میں بتائے تو مسلمانوں میں سے کچھ لوگوں نے عرض کی : یا رسول اللہ ! آپ کی وجہ سے اس کا خون نکل آیا تھا حالانکہ آپ نے اسے تکلیف پہنچانے کا ارادہ نہیں کیا تھا ۔ نبی اکرم صلی اللہ علیہ وسلم نے ارشاد فرمایا : میں نے جو تمہیں تکلیف پہنچائی ہے تم اس کے بدلے میں مال لے لو اور چلے جاؤ اس نے کہا: جی نہیں نبی اکرم صلی اللہ علیہ وسلم نے فرمایا : پھر تم اسے میری خاطر چھوڑ دو اس نے کہا: میں ایسا نہیں کروں گا نبی اکرم صلی اللہ علیہ وسلم نے دریافت کیا پھر تم کیا چاہتے ہو اس نے کہا: اے اللہ کے نبی ! میں آپ سے بدلہ لینا چاہتا ہوں ۔ نبی اکرم صلی اللہ علیہ وسلم نے فرمایا : ٹھیک ہے اس شخص نے آپ کی خدمت میں عرض کی : آپ ان لوگوں کے درمیان سے باہر آ جائیں نبی اکرم صلی اللہ علیہ وسلم ان لوگوں سے باہر آ گئے آپ نے اس شخص کو وہ چھڑی دی تاکہ وہ اس کے ذریعے آپ سے بدلہ لے اور خود اپنے پیٹ سے کپڑا ہٹا دیا سیدنا عمر رضی اللہ عنہ آئے تاکہ نبی اکرم صلی اللہ علیہ وسلم کو پیچھے سے روکیں نبی اکرم صلی اللہ علیہ وسلم نے فرمایا : ہمیں چھوڑ دو تمہارے جوتے کو ٹھوکر لگے اور تمہارے دانت ٹوٹ جائیں جب وہ شخص چبھونے کے لئے قریب ہوا تو اس نے چھڑی رکھ دی اور نبی اکرم صلی اللہ علیہ وسلم کی ناف کا بوسہ لیا اور بولا: اے اللہ کے نبی ! میرا یہی ارادہ تھا تاکہ آپ کے بعد میں ظالم حکمرانوں کا قلع قمع کر دوں تو سیدنا عمر رضی اللہ عنہ نے فرمایا : تمہارا عمل میرے مقابلے میں زیادہ قابل وثوق ہے ۔
یہ روایت امام ابویعلیٰ نے نقل کی ہے ۔ اس کی سند میں ایک راوی ولید بن محمد موقری ہے ، اور وہ متروک ہے ۔

سیدنا عبداللہ بن جبیر خزاعی رضی اللہ عنہ بیان کرتے ہیں : نبی اکرم صلی اللہ علیہ وسلم نے ایک شخص کے پیٹ میں کوئی چیز چبھوئی جو چھڑی تھی یا شاید مسواک تھی اس نے کہا: آپ نے مجھے تکلیف پہنچائی ہے آپ مجھے بدلہ دیئے ۔ نبی اکرم صلی اللہ علیہ وسلم نے وہ چھڑی اسے دی جو آپ کے پاس تھی اور آپ نے فرمایا : تم بدلہ لے لو اس شخص نے نبی اکرم صلی اللہ علیہ وسلم کے پیٹ پر بوسہ دیا اور پھر عرض کی : میں درگزر کرتا ہوں تاکہ آپ اس کی وجہ سے قیامت کے دن میری شفاعت کریں ۔
یہ روایت امام طبرانی نے نقل کی ہے ، اور اس کے رجال ثقہ ہیں ۔

طارق بن شہاب بیان کرتے ہیں : سیدنا خالد بن ولید رضی اللہ عنہ کے چچا زاد نے ہم میں سے کسی ایک کو تھپڑ مار دیا اس شخص کا چچا اپنا مقدمہ لے کر سیدنا خالد رضی اللہ عنہ کے پاس آیا اور بولا: اے قریش کے گروہ اللہ تعالیٰ نے تمہارے چہروں کو ہمارے چہروں پر فضیلت نہیں دی ہے اللہ تعالیٰ نے تم لوگوں کو صرف اپنے نبی کے حوالے سے فضیلت دی ہے ، تو سیدنا خالد بن ولید رضی اللہ عنہ نے فرمایا : تم بدلہ لے لو اس شخص نے اپنے بھتیجے سے کہا: تم بھی تھپڑ مارو جب اس شخص نے اپنا ہاتھ بلند کیا تو اس شخص نے کہا: اسے اللہ کی خاطر چھوڑ دو ۔
یہ روایت امام طبرانی نے نقل کی ہے ، اور اس کے رجال صحیح کے رجال ہیں ۔