مجمع الزوائد ومنبع الفوائد

سیدنا ابوسعید خدری رضی اللہ عنہ بیان کرتے ہیں : دو بستیوں کے درمیان ایک شخص مقتول ( راوی کو شک ہے شاید یہ الفاظ ہیں : ) میت کے طور پر پایا گیا ۔ نبی اکرم صلی اللہ علیہ وسلم نے حکم دیا دونوں بستیوں کے درمیان پیمائش کی گئی کہ وہ شخص کون سی بستی کے زیادہ قریب ہے ، تو وہ ان دونوں بستیوں میں سے ایک بستی کے ایک بالشت زیادہ قریب تھا راوی بیان کرتے ہیں : گویا میں اس وقت بھی نبی اکرم صلی اللہ علیہ وسلم کی بالشت کی طرف دیکھ رہا ہوں تو نبی اکرم صلی اللہ علیہ وسلم نے اس کا معاملہ ان لوگوں کے خلاف قرار دیا جس ( بستی ) کے وہ زیادہ قریب تھا ۔
یہ روایت امام أحمد نے نقل کی ہے ، اور امام بزار نے نقل کی ہے ۔ اس کی سند میں ایک راوی عطیہ عوفی ہے ، اور وہ ضعیف ہے ۔

سیدنا عبدالرحمن بن عوف رضی اللہ عنہ بیان کرتے ہیں : غزوہ خیبر کے موقع پر ایک قتل کے بارے میں قسامت ہوئی تھی اس کی صورت یوں ہوئی کہ نبی اکرم صلی اللہ علیہ وسلم کے اصحاب میں سے انصار سے تعلق رکھنے والے ایک صاحب رات کے وقت غیر موجود پائے گئے انصار آئے اور انہوں نے بتایا کہ ہمارا ساتھی خون میں لت پت ( مقتول ) ملا ہے نبی اکرم صلی اللہ علیہ وسلم نے فرمایا : کیا تم لوگ اس کے قاتل سے واقف ہو انہوں نے جواب دیا : جی نہیں البتہ یہودیوں نے انہیں قتل کیا ہو گا نبی اکرم صلی اللہ علیہ وسلم نے فرمایا : تم لوگ ان میں سے پچاس افراد کو منتخب کرو وہ اللہ کے نام پر یہ قسم اٹھائیں اور پھر تم ان سے دیت وصول کر لینا تو انہوں نے ایسا ہی کیا ۔
یہ روایت امام بزار نے نقل کی ہے ۔ اس کی سند میں ایک راوی عبدالرحمن بن یامین ہے ، اور وہ ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : زمانہ جاہلیت میں قسامت لوگوں کے درمیان رکاوٹ ہوتی تھی اس میں ہوتا یہ تھا کہ جب کوئی شخص کوئی جھوٹی قسم اٹھاتا تھا اور اس قسم اٹھانے میں گناہ گار ہوتا تھا ، تو یہ بات سمجھی جاتی تھی کہ اب اس شخص کو اللہ تعالیٰ کی طرف سے سزا ملے گی جس کے ذریعے اسے اس بات کی سزا دی جائے گی کہ اس نے حرمت والے کام کے حوالے سے جرات کی ہے ، تو وہ لوگ جھوٹی قسم اٹھانے سے پرہیز کرتے تھے اور اس سے خوف زدہ رہتے تھے جب اللہ تعالیٰ نے اپنے نبی کو قسامت کے حکم کے ہمراہ مبعوث کیا ( یعنی آپ کو اس بارے میں حکم دیا ) تو مسلمان اس سے زیادہ خوف زدہ ہو گئے کیونکہ وہ اس بات سے واقف تھے نبی اکرم صلی اللہ علیہ وسلم نے انصار سے تعلق رکھنے والے دو گروہوں کے درمیان قسامت کا فیصلہ دیا ان لوگوں کو بنو حارثہ کہا: جاتا تھا اس کی صورت یوں ہوئی کہ یہودیوں نے سیدنا محیصہ رضی اللہ عنہ کو قتل کیا تھا اور یہودیوں نے اس بات سے انکار کر دیا تو نبی اکرم صلی اللہ علیہ وسلم نے قسامت کے لئے یہودیوں کو بلوایا کیونکہ ان لوگوں نے خون کا دعوی کیا تھا اور نبی اکرم صلی اللہ علیہ وسلم نے انہیں یہ حکم دیا کہ وہ پچاس افراد قسم اٹھائیں پچاس بڑے افراد اس قتل کے حوالے سے قسم اٹھائیں گے یہودیوں نے قسم اٹھانے سے انکار کیا ۔ نبی اکرم صلی اللہ علیہ وسلم نے بنو حارثہ کو بلوایا اور انہیں یہ ہدایت کی کہ وہ پچاس افراد قسمیں اٹھائیں جو پچاس افراد اٹھائیں گے کہ یہودیوں نے انہیں دھوکے کے ساتھ قتل کیا ہے ، اور اس کے نتیجے میں وہ اس کے حق دار ہو جائیں گے جو ان کا کہنا ہے کہ ان کے ساتھیوں کو یہودیوں نے قتل کیا ہے ۔ تو بنو حارثہ نے بھی قسم اٹھانے سے انکار کر دیا جب نبی اکرم صلی اللہ علیہ وسلم نے یہ صورت حال ملاحظہ فرمائی تو آپ نے اس مقتول کی دیت کی ادائیگی یہودیوں پر لازم قرار دی کیونکہ وہ مقتول ان لوگوں کے درمیان اور ان کے علاقے میں پایا گیا تھا ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

سیدنا ابوہریرہ رضی اللہ عنہ بیان کرتے ہیں : قسامت زمانہ جاہلیت سے تعلق رکھتی ہے نبی اکرم صلی اللہ علیہ وسلم نے اسے برقرار رکھا ہے کیونکہ اس طرح قتل و غارت گری کو لوگوں کے لئے روکا جا سکتا ہے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی محمد بن یوسف زبیدی ہے ، جسے ابن حبان نے ثقہ قرار دیا ہے وہ کہتے ہیں : بعض اوقات یہ غلطی کر جاتا ہے ، اور غریب روایت نقل کرتا ہے اس روایت میں امام طبرانی کے استاد موسیٰ بن عیسیٰ زبیدی ہیں میں ان سے واقف نہیں ہوں اس روایت کے بقیہ رجال ثقہ ہیں ۔

سیدنا عبداللہ بن وافد رضی اللہ عنہ بیان کرتے ہیں قتل کے بارے میں قسم اٹھانے کا رواج نبی اکرم صلی اللہ علیہ وسلم کے زمانہ اقدس میں بھی تھا ۔
یہ روایت امام طبرانی نے معجم اوسط میں عبدالمالک بن ساریہ عکی کے حوالے سے سیدنا عبداللہ بن وافد رضی اللہ عنہ سے نقل کی ہے ، اور میں ان سے واقف نہیں ہوں اس روایت کے بقیہ رجال ثقہ ہیں ۔