مجمع الزوائد ومنبع الفوائد

رفاعہ قتبانی بیان کرتے ہیں : میں مختار کے پاس آیا اس نے میرے لئے تکیہ رکھا اور بولا: اگر میرا بھائی جبریل اس کے پاس سے اٹھ کے ابھی نہ گیا ہوتا تو اسے میں تمہارے لئے رکھ دیتا رفاعہ کہتے ہیں : میں نے یہ ارادہ کیا کہ اس کی گردن اڑا دوں پھر مجھے ایک حدیث یاد آ گئی ، جو سیدنا عمرو بن حمق رضی اللہ عنہ نے مجھے بیان کی تھی وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جو مومن کسی دوسرے مومن کو اس کی جان کے حوالے سے امان دے اور پھر اسے قتل کر دے ، تو میں ایسے قاتل سے لاتعلق ہوؤں گا “ ۔ ( علامہ ہیثمی فرماتے ہیں : ) میں یہ کہتا ہوں : امام ابن ماجہ نے ان صحابی کے حوالے سے
یہ روایت نقل کی ہے : ” جو شخص کسی شخص کو اس کی جان کے حوالے سے امان دیدے اور پھر اسے قتل کر دے ، تو وہ قیامت کے دن عہد شکنی کا جھنڈا اٹھائے ہوئے ہو گا “ ۔
یہ روایت امام أحمد اور امام طبرانی نے نقل کی ہے اور اس کے رجال ثقہ ہیں ۔

سیدنا عمرو بن حمق رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص کسی شخص کو اس کی جان کے حوالے سے امان دیدے اور پھر اسے قتل کر دے ، تو میں قاتل سے بری الذمہ ہوں اگرچہ قتل ہونے والا شخص کافر ہی کیوں نہ ہو “ ۔
یہ روایت امام طبرانی نے کئی اسانید کے ساتھ نقل کی ہے ، اور ان میں سے ایک روایت ایسی ہے جس کے رجال ثقہ ہیں ۔

رفاعہ قتبانی بیان کرتے ہیں : ان کے ایک ساتھی نے کہا: اگر ہم مختار بن ابوعبید کے پاس جائیں تو یہ مناسب ہو گا کیونکہ وہ نبی اکرم صلی اللہ علیہ وسلم کے اہل بیت کی مدد کرنے کی طرف دعوت دے رہا ہے ہم لوگ وہاں گئے ، خورنق ( نامی محل ) میں ، اس کے پاس آئے ، وہ بیٹھا ہوا تھا اس نے کہا: کیا میں تم لوگوں کو تلوار نہ دکھاؤں پھر اس نے ایک تلوار منگوائی جو ایک میان میں تھی ، اور اس پر تین تہیں تھیں ، اس نے میان میں سے تلوار نکالی ، تو انگوٹی چل کر اس کے پاس آئی ، پھر وہ چل کر تلوار کی میان کی طرف گئی ، اس نے وہ لی اور اسے اپنی انگلی میں ڈال دیا میں نے کہا: اللہ کی قسم ! یہ تو جادوگر ہے میں تلوار کے قبضے کی طرف جھکا لیکن پھر مجھے سیدنا سلیمان بن مسہر رضی اللہ عنہ کی بات یاد آ گئی ، جو انہوں نے نبی اکرم صلی اللہ علیہ وسلم کے حوالے سے نقل کی ہے کہ آپ نے ارشاد فرمایا ہے : ” جب کوئی شخص تمہیں امان دیدے ، تو تم اسے قتل نہ کرو “ ۔
یہ روایت امام طبرانی نے نقل کی ہے وہ بیان کرتے ہیں : ابومسہر نے سیدنا سلیمان بن مسہر رضی اللہ عنہ کے حوالے سے اس روایت کو اسی طرح نقل کیا ہے ، اور یہ وہم ہے درست روایت وہ ہے جو سدی اور دیگر حضرات نے رفاعہ کے حوالے سے سیدنا عمرو بن حمق رضی اللہ عنہ سے نقل کیا ہے ۔ انہوں نے اسے عبداللہ بن میسرہ حارثی واسطی کے حوالے سے ابوعکاشہ کے حوالے سے رفاعہ سے نقل کیا ہے انہیں اس کی سند میں وہم ہوا ہے ، اور وہ روایت آگے آ رہی ہے ۔

ابوعکاشہ بیان کرتے ہیں : رفاعہ بجلی مختار بن ابوعبید کے پاس آئے مختار نے ان سے کہا: ابھی جبریل میرے پاس سے اٹھ کے گئے ہیں رفاعہ کہتے ہیں : مجھے ایک حدیث یاد آ گئی ، جو سیدنا رفاعہ بن صرد رضی اللہ عنہ نے مجھے بیان کی تھی کہ نبی اکرم صلی اللہ علیہ وسلم نے ارشاد فرمایا ہے : ” جو شخص دوسرے شخص کو اس کی جان کے حوالے سے امان دیدے ، تو وہ اسے قتل نہ کرے “ ۔ رفاعہ کہتے ہیں : میں مختار کو اس کی جان کے حوالے سے امان دے چکا تھا اگر یہ بات نہ ہوتی تو میں نے اس کا سر اڑا دینا تھا ۔
یہ روایت امام طبرانی نے نقل کی ہے ، اور انہوں نے عبداللہ بن میسرہ پر یہ حکم عائد کیا ہے کہ اسے اس روایت میں وہم ہوا ہے ۔

سیدنا معاذ رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” جو شخص کسی کو امان دیدے اور پھر اسے قتل کر دے ، تو اس شخص کے لئے جہنم واجب ہو جاتی ہے اگرچہ قتل ہونے والا شخص کافر ہی کیوں نہ ہو “ ۔
یہ روایت امام طبرانی نے نقل کی ہے ۔ اس کی سند میں ایک راوی سلیمان بن أحمد واسطی ہے ، اور وہ متروک ہے ۔