مجمع الزوائد ومنبع الفوائد

سیدنا ابودرداء رضی اللہ عنہ نبی اکرم صلی اللہ علیہ وسلم تک مرفوع حدیث کے طور پر یہ بات نقل کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اللہ تعالیٰ کسی شخص کے پیٹ میں اللہ کی راہ کے غبار اور جہنم کے دھویں کو جمع نہیں کرے گا ، جس شخص کے دونوں پاؤں اللہ کی راہ میں غبار آلود ہوں گے اللہ تعالیٰ اس کے پورے جسم کو جہنم پر حرام قرار دیدے گا ، اور جو شخص اللہ کی راہ میں ایک دن کا روزہ رکھے گا اللہ تعالیٰ اس سے جہنم کو ایک ہزار برس کی مسافت جتنا دور کر دے گا ، جس مسافت کو کوئی تیز رفتار سوار طے کرتا ہے اور جس شخص کو اللہ کی راہ میں کوئی زخم آئے گا اسے شہداء کی مہر لگا دی جائے گی اور وہ زخم قیامت کے دن اس شخص کے لئے نور ہو گا ، جس کا رنگ زعفران کے رنگ کی مانند ہو گا ، اور اس کی خوشبو مشک کی خوشبو کی مانند ہو گی جس کے ذریعے اسے تمام پہلے والے اور بعد والے لوگ پہچان لیں گے اور یہ کہیں گے فلاں شخص پر شہداء کی مہر ہے اور جو شخص اونٹنی کا دودھ دوہنے جتنے عرصہ کے لئے اللہ کی راہ میں جنگ میں حصہ لے گا اس کے لیے جنت واجب ہو جائے گی “ ۔
یہ روایت امام أحمد نے نقل کی ہے اور اس کے رجال ثقہ ہیں البتہ خالد بن دریک نے سیدنا ابودرداء رضی اللہ عنہ سے سماع نہیں کیا ہے اس نے ان کا زمانہ بھی نہیں پایا ہے ۔

ابومصبح بیان کرتے ہیں : ایک مرتبہ ہم درب قلمتہ میں چل رہے تھے اسی دوران امیر مالک بن عبداللہ خثعمی نے ایک شخص کو بلند آواز میں پکارا جو اپنے گھوڑے کو پہاڑ کی طرف لے کے چل رہا تھا ، اور یہ کہا: اے ابوعبداللہ ! آپ سوار کیوں نہیں ہوتے ؟ تو انہوں نے بتایا میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جس شخص کے دونوں پاؤں اللہ کی راہ میں غبار آلود ہوں گے تو وہ دونوں جہنم پر حرام ہوں گے “ ۔
یہ روایت امام أحمد نے نقل کی ہے اور امام ابویعلیٰ نے بھی نقل کی ہے دو طریقوں میں سے ایک روایت میں ان کے الفاظ یہ ہیں : ” دن کی ایک گھڑی کے لئے “ ۔ دو طریقوں میں سے ایک میں امام أحمد کے رجال صحیح کے رجال ہیں صرف ابومصبح کا معاملہ مختلف ہے اور وہ ثقہ ہے دوسری روایت کے مطابق امام أحمد نے بھی یہ الفاظ نقل کیے ہیں : ” دن کی ایک گھڑی کے لئے “ ۔

سیدنا مالک بن عبداللہ خثعمی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جس کے دونوں پاؤں اللہ کی راہ میں غبار آلود ہوں اللہ تعالیٰ اسے جہنم پر حرام قرار دیدے گا “ ۔
یہ روایت امام أحمد اور امام طبرانی نے نقل کی ہے ۔ امام أحمد کے رجال ثقہ ہیں ۔

سیدنا عثمان غنی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جس شخص کے دونوں پاؤں اللہ کی راہ میں غبار آلود ہو جائیں اللہ تعالیٰ اسے جہنم پر حرام قرار دیدے گا “ ۔ راوی بیان کرتے ہیں : میں نے اس دن سے زیادہ پیدل چلنے والے افرد کبھی نہیں دیکھے ہم اس وقت دروب سے پیچھے تھے ۔
یہ روایت امام ابویعلیٰ نے معجم کبیر میں نقل کی ہے اور امام بزار نے نقل کی ہے ۔ اس کی سند میں ایک راوی محمد بن عبداللہ بن عبید بن عمیر ہے اور وہ متروک ہے ۔

سلیمان بن موسیٰ بیان کرتے ہیں : سیدنا مالک بن عبداللہ خثعمی رضی اللہ عنہ گزر رہے تھے ( شاید یہاں عربی متن میں کچھ الفاظ نقل ہونے سے رہ گئے ہیں ، مطبوعہ نسخے میں یہ الفاظ ہیں : ) وہ روم کی سرزمین میں موجود ” صائفہ “ نام کی جگہ پر لوگوں کے امیر تھے ، وہ اپنے جانور کو ہانک کر لے جا رہے تھے ۔ انہوں نے ان سے کہا: آپ سوار ہو جائیں ، کیونکہ میں دیکھ رہا ہوں آپ کا جانور مضبوط پشت والا ( یعنی سواری کے قابل ) ہے ، تو انہوں نے جواب دیا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جس بندے کے دونوں قدم اللہ کی راہ میں غبار آلود ہو جائیں ، اللہ تعالیٰ ان دونوں پر جہنم حرام قرار دیدے گا “ ۔ راوی کہتے ہیں : مالک بھی نیچے اتر آیا اور دوسرے لوگ بھی نیچے اتر آئے اور پیدل چلنے لگے اس دن سے زیادہ پیدل چلنے والے افراد نہیں دیکھے گئے ۔
یہ روایت امام ابویعلیٰ نے نقل کی ہے اور اس کے رجال ثقہ ہیں ۔

عبداللہ بن سلیمان بن ابوزینب بیان کرتے ہیں : مالک بن عبداللہ جہنی کا گزر سیدنا حبیب بن مسلمہ رضی اللہ عنہ کے پاس سے ہوا یا شاید حبیب کا گزر مالک کے پاس سے ہوا جو اپنے گھوڑے کو ہانک کر لے جا رہے تھے اور خود پیدل چل رہے تھے ۔ انہوں نے کہا: آپ اس پر سوار کیوں نہیں ہوتے ؟ اللہ تعالیٰ نے یہ آپ کو سواری کے لئے دیا ہے ، تو انہوں نے جواب دیا : نبی اکرم صلی اللہ علیہ وسلم نے ارشاد فرمایا ہے : ” جس شخص کے دونوں پاؤں اللہ کی راہ میں غبار آلود ہوں اللہ تعالیٰ اس شخص کو جہنم پر حرام قرار دے دیتا ہے “ ۔
یہ روایت امام طبرانی نے نقل کی ہے اور عبداللہ بن سلیمان نامی راوی سے میں واقف نہیں ہوں اس روایت کے بقیہ رجال کی توثیق کی گئی ہے ۔

سیدنا ابوبکر صدیق رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جس شخص کے دونوں پاؤں اللہ کی راہ میں غبار آلود ہوں اللہ تعالیٰ ان دونوں کو جنم پر حرام کر دیتا ہے “ ۔
یہ روایت امام بزار نے نقل کی ہے اس کی سند میں ایک راوی کوثر بن حکیم ہے اور وہ متروک ہے ۔

عمر بن قیس کندی بیان کرتے ہیں : ہم لوگ سیدنا ابودرداء رضی اللہ عنہ کے ساتھ تھے اور صائفہ سے واپس آ رہے تھے ۔ انہوں نے فرمایا : اے لوگو ! اکٹھے ہو جاؤ ! میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جس شخص کے دونوں پاؤں اللہ کی راہ میں غبار آلود ہوں اللہ تعالیٰ اس شخص کے پورے جسم کو جہنم پر حرام کر دیتا ہے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی صدقہ بن موسیٰ دقیقی ہے جسے جمہور نے ضعیف قرار دیا ہے اور مسلم بن ابراہیم نے اسے ثقہ کہا: ہے ۔

سیدنا عبادہ بن صامت رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اللہ کی راہ کا غبار اور جہنم کا دھواں کسی مسلمان شخص کے پیٹ میں اکٹھے نہیں ہوں گے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی سلیمان بن ابوداؤ حرانی ہے اور وہ ضعیف ہے اس کا ذکر اس کے بیٹے محمد کے حالات میں ہوا ہے ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ کی راہ کا غبار اور جہنم کا دھواں کسی بندے کے نتھنوں میں اکٹھے نہیں ہوں گے “ ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی موسیٰ بن عمیر قریشی اعمی ہے اور وہ متروک ہے ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جس بھی شخص کا چہرہ اللہ کی راہ میں غبار آلود ہو اللہ تعالیٰ قیامت کے دن اسے جہنم کے دھویں سے محفوظ رکھے گا ، اور جس بھی شخص کے دونوں پاؤں اللہ کی راہ میں غبار آلود ہوں اللہ تعالیٰ قیامت کے دن اس کے دونوں پاؤں کو جہنم سے محفوظ رکھے گا “ ۔
یہ روایت امام طبرانی نے نقل کی ہے ۔ اس کی سند میں ایک راوی جمیع بن ثوب ہے ، جو زبر کے ساتھ ہے اور ایک قول کے مطابق پیش کے ساتھ ہے اور یہ راوی متروک ہے ۔

سیدنا ربیع بن زید رضی اللہ عنہ بیان کرتے ہیں : ایک مرتبہ نبی اکرم صلی اللہ علیہ وسلم راستے کے درمیان چلتے ہوئے جا رہے تھے اسی دوران آپ نے قریش سے تعلق رکھنے والے ایک شخص کو دیکھا جو راستے سے ہٹ کر چل رہا تھا ۔ نبی اکرم صلی اللہ علیہ وسلم نے دریافت کیا : کیا یہ فلاں شخص نہیں ہے ؟ لوگوں نے عرض کی : جی ہاں ۔ نبی اکرم صلی اللہ علیہ وسلم نے فرمایا : اسے بلاؤ وہ شخص آیا تو نبی اکرم صلی اللہ علیہ وسلم نے اس سے دریافت کیا : کیا وجہ ہے تم راستے سے کیوں ہٹے ہوئے تھے اس نے جواب دیا : میں غبار کو ناپسند کرتا ہوں نبی اکرم صلی اللہ علیہ وسلم نے فرمایا : تم راستے سے نہ ہٹو اس ذات کی قسم جس کے دست قدرت میں میری جان ہے یہ ( یعنی اللہ کی راہ کا غبار ) جنت کا ” ذریرہ “ ( مخصوص قسم کی خوشبو ) ہے “ ۔
یہ روایت امام طبرانی نے نقل کی ہے اور اس کے رجال ثقہ ہیں ۔