مجمع الزوائد ومنبع الفوائد

سیدنا معاذ بن انس رضی اللہ عنہ نبی اکرم صلی اللہ علیہ وسلم کے بارے میں یہ بات نقل کرتے ہیں : آپ نے اپنے اصحاب کو ایک جنگی مہم میں جانے کا حکم دیا ایک صاحب نے اپنی بیوی سے کہا: میں پیچھے رہ جاتا ہوں نبی اکرم صلی اللہ علیہ وسلم کی اقتداء میں ظہر کی نماز ادا کرنے کے بعد میں آپ کی خدمت میں سلام پیش کروں گا ، اور رخصت ہو جاؤں گا آپ مجھے دعا دیں گے ، جو قیامت کے دن شفاعت کرنے والی ہو گی جب نبی اکرم صلی اللہ علیہ وسلم نے نماز ادا کر لی اور وہ شخص آپ کی خدمت میں سلام کرنے کے لئے حاضر ہوا تو نبی اکرم صلی اللہ علیہ وسلم نے اس سے دریافت کیا : کیا تم جانتے ہو تمہارے ساتھی تم سے کتنی سبقت لے گئے ہیں ؟ اس نے جواب دیا : جی ہاں ۔ وہ آج صبح چلے گئے تھے اس حوالے سے سبقت لے گئے ہیں نبی اکرم صلی اللہ علیہ وسلم نے ارشاد فرمایا : ” اس ذات کی قسم ! جس کے دست قدرت میں میری جان ہے فضیلت کے اعتبار سے وہ تم سے اتنی سبقت لے گئے ہیں جتنا دونوں مشرقوں اور دونوں مغربوں کے درمیان فاصلہ ہے اس سے زیادہ ( وہ تم سے سبقت لے گئے ہیں ) “ ۔
یہ روایت امام أحمد نے نقل کی ہے ۔ اس کی سند میں ایک راوی زبان بن فائد ہے جسے ابوحاتم نے ثقہ قرار دیا ہے اور ایک جماعت نے اسے ضعیف کہا: ہے ۔ اس روایت کے بقیہ رجال ثقہ ہیں ۔

سیدنا معاویہ بن خدیج رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” اللہ کی راہ میں صبح کرنا یا شام کرنا ، دنیا اور اس میں موجود ( تمام ) چیزوں سے زیادہ بہتر ہے “ ۔
یہ روایت امام أحمد اور امام طبرانی نے نقل کی ہے ۔ اس کی سند میں ایک راوی ابن لہیعہ ہے اور وہ حسن الحدیث ہے ۔ اس روایت کے بقیہ رجال ثقہ ہیں ۔

سیدنا سفیان بن وہب خولانی رضی اللہ عنہ کے بارے میں یہ بات منقول ہے کہ حجتہ الوداع کے دن وہ نبی اکرم صلی اللہ علیہ وسلم کی سواری کے سائے کے نیچے موجود تھے ( راوی کو شک ہے شاید یہ الفاظ ہیں : ) ایک شخص نے انہیں یہ بات بتائی نبی اکرم صلی اللہ علیہ وسلم اس وقت اس پر تھے نبی اکرم صلی اللہ علیہ وسلم نے فرمایا : کیا میں نے تبلیغ کر دی ہے ؟ ہم نے یہ گمان کیا کہ شاید آپ ہمیں مخاطب کر رہے ہیں ، انہوں نے عرض کی : جی ہاں ! نبی اکرم صلی اللہ علیہ وسلم نے تین مرتبہ یہ بات دہرائی پھر آپ نے جو بات ارشاد فرمائی اس میں ایک بات یہ بھی تھی : ” اللہ کی راہ میں شام کرنا دنیا اور اس پر موجود تمام چیزوں سے زیادہ بہتر ہے اور اللہ کی راہ میں صبح کرنا دنیا اور اس پر موجود تمام چیزوں سے زیادہ بہتر ہے اور ایک مومن کی عزت اس کا مال اور اس کی جان دوسرے مومن کے لئے اسی طرح قابل احترام ہیں ، جس طرح اس دن کی حرمت ہے “ ۔
یہ روایت امام أحمد اور امام طبرانی نے نقل کی ہے ۔ امام أحمد کے رجال ثقہ ہیں ۔

سیدنا زبیر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ کی راہ میں صبح کرنا یا شام کرنا دنیا اور اس میں موجود ( تمام چیزوں ) سے زیادہ بہتر ہے “ ۔
یہ روایت امام ابویعلیٰ اور امام بزار نے نقل کی ہے ۔ اس کی سند میں ایک راوی عمرو بن صفوان مزنی ہے اور میں اس سے واقف نہیں ہوں اس روایت کے بقیہ رجال ثقہ ہیں ۔

سیدنا عمران بن حصین رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اللہ کی راہ میں صبح کرنا یا شام کرنا ( یا صبح کے وقت جانا یا شام کے وقت جانا ) دنیا اور اس میں موجود سب چیزوں سے زیادہ بہتر ہے “ ۔
یہ روایت امام بزار نے نقل کی ہے ۔ اس کی سند میں ایک راوی یوسف بن خالد سمتی ہے اور وہ ضعیف ہے ۔