مجمع الزوائد ومنبع الفوائد

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو بھی شخص دس یا اس سے زیادہ آدمیوں کے معاملے کا نگران بنتا ہے ، تو قیامت کے دن جب وہ اللہ تعالیٰ کی بارگاہ میں حاضر ہو گا ، تو اس کے ہاتھ گردن پر بندھے ہوئے ہوں گے اس کی نیکی اسے چھڑوا دے گی یا اس کا گناہ اسے پابند کروا دے گا اس ( یعنی ولایت یعنی حکومت ) کی ابتداء ملامت ہے درمیانی حصہ ندامت ہے ، اور آخری حصہ قیامت کے دن رسوائی ہے “ ۔
یہ روایت امام أحمد اور امام طبرانی نے نقل کی ہے ۔ اس کی سند میں ایک راوی یزید بن ابومالک ہے ، جسے ابن حبان اور دیگر حضرات نے ثقہ قرار دیا ہے اس روایت کے بقیہ رجال ثقہ ہیں ۔

سیدنا عبادہ بن صامت رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” جو شخص ، دس آدمیوں کا امیر ہو گا وہ بھی جب قیامت کے دن آئے گا ، تو اس کے ہاتھ گردن پر بندھے ہوئے ہوں گے یہاں تک کہ حق اسے آزاد کروا دے گا یا ( ظلم ) اسے بندھوائے رکھے گا ، اور جو شخص قرآن سیکھے اور پھر اسے بھول جائے وہ اللہ تعالیٰ کی بارگاہ میں حاضر ہو گا ، تو وہ جذام زدہ ہو گا “ ۔
یہ روایت امام أحمد اور ان کے صاحبزادے نے نقل کی ہے ۔

ایک شخص نے سیدنا سعد بن عبادہ رضی اللہ عنہ کا یہ بیان نقل کیا ہے وہ شخص کہتا ہے : میں نے انہیں ایک مرتبہ نہیں دو مرتبہ نہیں ( اس سے زیادہ مرتبہ یہ بیان کرتے ہوئے سنا ہے ) نبی اکرم صلی اللہ علیہ وسلم نے ارشاد فرمایا : ” جو بھی شخص دس آدمیوں کا بھی امیر ہو گا ، تو اسے قیامت کے دن لایا جائے گا ، تو اس کے ہاتھ بندھے ہوئے ہوں گے اور زیادتی اسے نہیں چھڑوا سکے گی صرف عدل چھڑوائے گا“ ۔
یہ روایت امام أحمد امام بزار اور امام طبرانی نے نقل کی ہے ۔ اس کی سند میں ایک راوی ایسا ہے جس کا نام بیان نہیں کیا گیا ہے امام أحمد کی اسناد میں سے ایک کے رجال صحیح کے رجال ہیں ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص دس آدمیوں کا امیر ہو گا وہ بھی جب قیامت کے دن آئے گا ، تو اس کے ہاتھ بندھے ہوئے ہوں گے یہاں تک کہ عدل اسے چھڑوا دے گا یا ظلم اسے بندھوا دے گا “ ۔

ایک روایت میں یہ الفاظ ہیں : ” اگر وہ زیادتی کرنے والا ہو گا ، تو اس کی بندش میں اضافہ ہو جائے گا “ ۔
یہ روایت امام بزار نے نقل کی ہے ۔ اور امام طبرانی نے پہلی روایت معجم اوسط میں نقل کی ہے ۔ پہلی روایت کے امام بزار کے رجال صحیح کے رجال ہیں ۔

امام طبرانی نے معجم اوسط میں ایک روایت میں یہ الفاظ نقل کیے ہیں : ” اللہ تعالیٰ جسے چاہے گا اسے عافیت عطا کر دے گا ، اور جسے چاہے گا اسے سزا دے گا “ ۔

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” قیامت کے دن ظالم حکمران کو لایا جائے گا رعایا اس کے ساتھ جھگڑا کرے گی اور اس کے خلاف ان لوگوں کو کامیاب قرار دیا جائے گا ، اور اس حکمران سے کہا: جائے گا : تم جہنم کے ارکان میں سے ایک رکن ( یا کونے ) کو بھر دو “ ۔
یہ روایت امام بزار نے نقل کی ہے ۔ اس کی سند میں ایک راوی اغلب بن تمیم ہے ، اور وہ ضعیف ہے ۔

ابووائل شقیق بن سلمہ بیان کرتے ہیں : سیدنا عمر بن خطاب رضی اللہ عنہ نے بشر بن عاصم کو ہوازن کے صدقات وصول کرنے کا اہلکار مقرر کیا ۔ بشر وہاں نہیں گئے سیدنا عمر رضی اللہ عنہ کی ان سے ملاقات ہوئی ، تو انہوں نے دریافت کیا : تم کیوں نہیں گئے ؟ کیا تم پر اطاعت و فرمانبرداری لازم نہیں ہے ؟ انہوں نے عرض کی : جی ہاں ! لیکن میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص مسلمانوں کے معاملے میں سے کسی بھی چیز کا نگران بنے گا اسے قیامت کے دن لایا جائے گا ، اور اسے جہنم کے پل پر کھڑا کیا جائے گا ، اگر وہ اچھائی کرنے والا ہو گا ، تو نجات پا جائے گا ، اگر وہ برائی کرنے والا ہو گا ، تو وہ پل اسے نیچے گرا دے گا ، اور وہ ستر برس تک جہنم میں گرتا رہے گا “ ۔ ( راوی بیان کرتے ہیں : ) تو سیدنا عمر رضی اللہ عنہ وہاں سے غمگین اور پریشان ہو کر نکلے سیدنا ابوذر غفاری رضی اللہ عنہ کی ان سے ملاقات ہوئی ، انہوں نے کہا: کیا وجہ ہے میں آپ کو غمگین اور پریشان دیکھ رہا ہوں انہوں نے فرمایا : میں کیوں غمگین اور پریشان نہ ہوؤں جبکہ میں نے بشر بن عاصم کو یہ بیان کرتے ہوئے سنا ہے وہ کہتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص مسلمانوں کے معاملے میں سے کسی چیز کا نگران بنے گا اسے قیامت کے دن لایا جائے گا ، اور جہنم کے پل پر کھڑا کر دیا جائے گا ، اگر وہ اچھائی کرنے والا ہو گا ، تو اس سے نجات پا جائے گا ، اور اگر وہ برائی کرنے والا ہو گا ، تو وہ پل ایسے نیچے گرا دے گا ، اور وہ شخص جہنم میں ستر برس تک گرتا رہے گا “ ۔ سیدنا ابوذر غفاری رضی اللہ عنہ نے دریافت کیا : کیا آپ نے نبی اکرم صلی اللہ علیہ وسلم کی زبانی یہ بات نہیں سنی ہے ؟ سیدنا عمر رضی اللہ عنہ نے جواب دیا : جی نہیں ، تو سیدنا ابوذر غفاری رضی اللہ عنہ نے جواب دیا : میں اس بات کی گواہی دیتا ہوں کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص لوگوں میں سے کسی ایک کے معاملے کا نگران بنے گا ، تو اسے قیامت کے دن لایا جائے گا یہاں تک کہ قیامت کے دن اسے جہنم کے پل پر ٹھہرا دیا جائے گا ، اگر وہ اچھائی کرنے والا ہوا ، تو نجات پا جائے گا ، اور اگر وہ برائی کرنے والا ہوا ، تو وہ پل اُسے نیچے گرا دے گا ، اور وہ شخص جہنم میں ستر برس تک گرتا رہے گا ، اور وہ جہنم سیاہ تاریک ہے “ ۔ ( سیدنا ابوذر غفاری رضی اللہ عنہ نے دریافت کیا : ) ان دو روایت میں سے کون سی آپ کے لئے زیادہ پریشانی کا باعث ہے ؟ سیدنا عمر رضی اللہ عنہ نے فرمایا : ان دونوں نے مجھے پریشان کر دیا ہے اس ( حکومت ) میں جو خرابی پائی جاتی ہے ، تو پھر کون اس کو حاصل کرے گا ، تو سیدنا ابوذر غفاری رضی اللہ عنہ نے فرمایا : ” وہ شخص کہ جس کی ناک کو اللہ تعالیٰ نے کاٹ دیا ہو ، اور جس کے رخسار کو زمین سے ملا دیا ہو جہاں تک ہمارا تعلق ہے ، تو ہمیں صرف بھلائی کا علم ہے اور عنقریب اس کا نگران وہ شخص بنے گا ، جو اس کے بارے میں نہ عدل سے کام لے گا ، اور نہ ہی اس کے گناہ سے نجات پائے گا “ ۔
یہ روایت امام طبرانی نے نقل کی ہے ۔ اس کی سند میں ایک راوی سوید بن عبدالعزیز ہے ، اور وہ متروک ہے ۔

قیس بن عاصم اپنے والد کے حوالے سے یہ بات نقل کرتے ہیں : سیدنا عمر بن خطاب رضی اللہ عنہ نے انہیں ( یعنی ان کے والد کو ) کسی جگہ سے صدقات وصول کرنے کے لئے بھیجا تو انہوں نے سیدنا عمر رضی اللہ عنہ کے لئے یہ کام کرنے سے انکار کر دیا پھر انہوں نے یہ بات بیان کی کہ انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” قیامت کے دن والی کے بارے میں حکم دیا جائے گا اسے جہنم کے پل پر کھڑا کر دیا جائے گا اللہ تعالیٰ پل کو حکم دے گا وہ ہلے گا ، تو اس شخص کی ہر ایک ہڈی اپنی جگہ سے ہٹ جائے گی پھر اللہ تعالیٰ ان ہڈیوں کو حکم دے گا وہ دوبارہ اپنی جگہ پر واپس چلی جائیں گی ، پھر اللہ تعالیٰ اس سے حساب لے گا ، اگر وہ شخص اللہ تعالیٰ کا فرمانبردار ہو گا ، تو اللہ تعالیٰ اسے بچا لے گا ، اور اسے اجر کے دو کفل عطا کرے گا ، اور اگر وہ شخص اللہ تعالیٰ کا نافرمان ہو گا ، تو پل اسے نیچے گرا دے گا ، اور وہ شخص ستر سال تک جہنم میں گرتا رہے گا “ ۔
یہ روایت امام طبرانی نے نقل کی ہے ۔ اس کی سند میں ایسا راوی ہے جس سے میں واقف نہیں ہوں ۔ اس نوعیت کی کچھ احادیث اس سے پہلے احکام سے متعلق باب میں گزر چکی ہیں ۔

سیدنا عبداللہ بن عباس رضی اللہ عنہما مرفوع حدیث کے طور پر یہ بات نقل کرتے ہیں ۔ نبی اکرم صلی اللہ علیہ وسلم نے ارشاد فرمایا : ” جو بھی شخص دس آدمیوں کا بھی نگران بنے گا ، تو جب وہ قیامت کے دن آئے گا تو اس کے ہاتھ گردن پر بندھے ہوئے ہوں گے یہاں تک کہ اس شخص اور ان لوگوں کے درمیان فیصلہ ہو گا “ ۔ ( یا اس وقت تک بندھے رہیں گے ، جب تک اس شخص اور ان لوگوں کے درمیان فیصلہ نہیں ہو جاتا ) ۔
یہ روایت امام طبرانی نے معجم اوسط اور معجم کبیر میں نقل کی ہے ۔ اور اس کے رجال ثقہ ہیں ۔

سیدنا عبداللہ بن عباس رضی اللہ عنہما روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” جو شخص دس آدمیوں کا نگران بنتا ہے ، اور ان کے درمیان ایسا فیصلہ دیتا ہے ، جسے وہ پسند کرتے ہیں یا جسے وہ ناپسند کرتے ہیں ، تو اس شخص کو قیامت کے دن لایا جائے گا ، تو اس شخص کے ہاتھ گردن پر بندھے ہوئے ہوں گے اگر اس نے اللہ تعالیٰ کے نازل کردہ حکم کے مطابق فیصلہ دیا ہو گا ، اور فیصلہ دینے میں کوئی زیادتی نہیں کی ہو گی ۔ اور رشوت نہیں لی ہو گی ، تو اس کو کھول دیا جائے گا “ اس وقت عطاء کے پاس بیٹھے ہوئے افراد میں سے کسی نے کہا: اے ابومحمد پھر تو ملاوٹ ( یا زیادتی ) کی کوئی گنجائش نہیں ہے ؟ انہوں نے کہا: جی ہاں اس عمارت کے پروردگار کی قسم ! انہوں نے اپنے ہاتھ کے ذریعے خانہ کعبہ کی طرف اشارہ کر کے یہ بات کہی ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی سعدان بن ولید ہے ، اور میں اس سے واقف نہیں ہوں ۔

سیدنا ابودرداء رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” تین آدمیوں کا بھی جو نگران ہو گا وہ اللہ تعالیٰ کی بارگاہ میں ایسی حالت میں حاضر ہو گا کہ اس کا ہاتھ بندھا ہوا ہو گا عدل اسے چھڑوا دے گا یا ظلم اسے پابند رکھے گا “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ابراہیم بن ہشام بن یحیی عنسانی ہے ، جسے ابن حبان اور دیگر حضرات نے ثقہ قرار دیا ہے ۔ ابوحاتم اور ابوزرعہ نے اسے جھوٹا کہا: ہے اس روایت کے بقیہ رجال ثقہ ہیں ۔

سیدنا بریدہ رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” جو شخص دس آدمیوں کا بھی امیر ہو گا وہ قیامت کے دن اللہ تعالیٰ کی بارگاہ میں حاضر ہو گا ، تو اس کا ہاتھ گردن پر بندھا ہوا ہو گا ، اگر وہ اچھائی کرنے والا ہو گا ، تو اسے نجات مل جائے گی اور اگر وہ برائی کرنے والا ہو گا ، تو اس کی بندش میں اضافہ ہو جائے گا “ ۔
یہ روایت امام طبرانی نے معجم اوسط میں دو اسناد کے ساتھ نقل کی ہے ۔ اور ان دونوں کی سند میں ایسے راوی ہیں جو ضعیف ہیں اور ان کی توثیق نہیں کی گئی ہے ۔

سیدنا ثوبان رضی اللہ عنہ جو نبی اکرم صلی اللہ علیہ وسلم کے غلام ہیں وہ فرماتے ہیں : ہو سکتا ہے کہ تمہاری عمر زیادہ ہو اور تم دس آدمیوں کے امیر بن جاؤ ایسی جگہ جہاں لوگ آبادی سے ہٹ کے رہتے ہوں ، تو تم دس یا اس سے زیادہ لوگوں کے امیر بننے سے بچنے کی کوشش کرنا کیونکہ جس بھی شخص کو دس آدمیوں یا اس سے زیادہ آدمیوں کا امیر بنایا جائے ، جب وہ اللہ تعالیٰ کی بارگاہ میں حاضر ہو گا ، تو اس کا ہاتھ بندھا ہوا ہو گا اس نے جو زیادتی کی ہوئی ہو گی وہ اسے نہیں چھڑوائے گی ۔ صرف عدل اسے چھڑوا سکے گا ، اگر اس نے لوگوں کے درمیان عدل کیا ہوا ہو گا اور تم آبادی سے ہٹ کر موجود جگہ کو ہرگز آباد نہ کرنا ، کیونکہ آبادی سے ہٹ کر موجود جگہ کو آباد کرنے والا شخص ، قبروں کو آباد کرنے والے کی مانند ہے ۔
یہ روایت امام طبرانی نے معجم اوسط میں اپنے استاد مسلمہ بن رجاء کے حوالے سے نقل کی ہے ۔ اور میں اس سے واقف نہیں ہوں اس روایت کے بقیہ رجال ثقہ ہیں ۔