مجمع الزوائد ومنبع الفوائد

سیدنا عبداللہ بن عمرو رضی اللہ عنہ بیان کرتے ہیں : سیدنا حمزہ بن عبدالمطلب رضی اللہ عنہ نبی اکرم صلی اللہ علیہ وسلم کی خدمت میں آئے ، اور عرض کی : یا رسول اللہ ! آپ مجھے کسی کام کا نگران مقرر کر دیں تاکہ اس کے ذریعے میں زندگی گزار سکوں ( یعنی روزی کما سکوں ) نبی اکرم صلی اللہ علیہ وسلم نے ارشاد فرمایا : ” اے حمزہ کسی جان کو زندگی دینا آپ کے نزدیک زیادہ محبوب ہے یا اسے موت دینا آپ کے نزدیک زیادہ محبوب ہے ؟ انہوں نے فرمایا : جی نہیں ۔ بلکہ کسی جان کو زندگی دینا محبوب ہے ، تو نبی اکرم صلی اللہ علیہ وسلم نے فرمایا : پھر آپ پر اپنے آپ کا خیال رکھنا لازم ہے ( یا اپنے آپ کو زندگی دینا لازم ہے ) “ ۔
یہ روایت امام أحمد نے نقل کی ہے ۔ اور اس کی سند میں ایک راوی ابن لہیعہ ہے اس کی نقل کردہ حدیث حسن ہے اس میں ضعف پایا جاتا ہے اس روایت کے بقیہ رجال ثقہ ہیں ۔

سیدنا حبان بن بح صدائی رضی اللہ عنہ بیان کرتے ہیں : میری قوم کے لوگ کافر تھے مجھے یہ بات بتائی گئی کہ نبی اکرم صلی اللہ علیہ وسلم ان کی طرف لشکر روانہ کرنے لگے ہیں میں نبی اکرم صلی اللہ علیہ وسلم کی خدمت میں حاضر ہوا میں نے عرض کی : میری قوم اسلام پر عمل پیرا ہے ۔ نبی اکرم صلی اللہ علیہ وسلم نے دریافت کیا : کیا ایسا ہی ہے ؟ میں نے عرض کی : جی ہاں راوی کہتے ہیں : میں رات بھر صبح ہونے تک نبی اکرم صلی اللہ علیہ وسلم کے ساتھ رہا پھر میں نے نماز کے لئے اذان دی پھر نبی اکرم صلی اللہ علیہ وسلم نے مجھے ایک برتن دیا تاکہ میں اس سے وضو کر لوں نبی اکرم صلی اللہ علیہ وسلم نے اپنی انگلیاں اس برتن میں ڈالیں ، تو ان انگلیوں سے پانی کے چشمے پھوٹ پڑے نبی اکرم صلی اللہ علیہ وسلم نے ارشاد فرمایا جو شخص وضو کرنا چاہتا ہو وہ وضو کر لے میں نے وضو کیا میں نے نماز ادا کی نبی اکرم صلی اللہ علیہ وسلم نے مجھے میری قوم کا امیر مقرر کیا اور مجھے ان کے صدقات وصول کرنے کا نگران مقرر کیا ایک شخص نبی اکرم صلی اللہ علیہ وسلم کی خدمت میں حاضر ہوا اس نے عرض کی : فلاں شخص نے میرے ساتھ زیادتی کی ہے ۔ نبی اکرم صلی اللہ علیہ وسلم نے ارشاد فرمایا مسلمان کے لئے امیر ہونے میں بھلائی نہیں ہے پھر ایک اور ایک شخص آپ کے پاس آیا اس نے آپ سے صدقہ مانگا ، تو نبی اکرم صلی اللہ علیہ وسلم نے ارشاد فرمایا صدقہ ، تو سر کا درد ہوتا ہے ، اور پیٹ میں آگ کا باعث ہوتا ہے ( راوی کو شک ہے شاید یہ الفاظ ہیں : ) بیماری کا باعث ہوتا ہے راوی کہتے ہیں : تو میں نے صحیفہ ( راوی کو شک ہے شاید یہ الفاظ ہیں : ) اپنے امیر ہونے اپنے صدقات وصول کرنے کا نگران ہونے کا صحیفہ نبی اکرم صلی اللہ علیہ وسلم کی خدمت میں پیش کر دیا نبی اکرم صلی اللہ علیہ وسلم نے فرمایا : تمہیں کیا ہوا ہے ؟ میں نے عرض کی : میں نے آپ کی زبانی یہ بات سن لی ہے ، تو اب میں اسے کیسے قبول کر سکتا ہوں ؟ نبی اکرم صلی اللہ علیہ وسلم نے ارشاد فرمایا : یہ ویسا ہی ہے جس طرح تم نے سنا ہے ۔
یہ روایت امام أحمد اور امام طبرانی نے نقل کی ہے ۔ اس کی سند میں ایک راوی ابن لہیعہ ہے اس کی نقل کردہ حدیث حسن ہے اس میں ضعف پایا جاتا ہے اس روایت کے بقیہ رجال ثقہ ہیں ۔

سیدہ عائشہ صدیقہ رضی اللہ عنہا بیان کرتی ہیں میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” امراء کے لئے بربادی ہے عرفاء کے لئے بربادی ہے ، اور امناء کے لئے بربادی ہے ( یعنی سرکاری اہلکاروں کے لئے بربادی ہے ) ان لوگوں پر ایک ایسا دن آئے گا کہ جب وہ شخص یہ آرزو کرے گا کہ اسے ستارے کے ساتھ لٹکا دیا جاتا لیکن وہ کسی ریاستی عہدے کا ذمہ دار نہ بنا ہوتا“ ۔
یہ روایت امام ابویعلیٰ نے اور امام طبرانی نے معجم اوسط میں نقل کی ہے ۔ اس کی سند میں ایک راوی عمر بن سعید نسری ہے ، اور وہ ضعیف ہے ، اور ایک راوی لیث بن ابوسلیم مدلس ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : امراء کے لئے بربادی ہے عرفاء کے لئے بربادی ہے امناء کے لئے بربادی ہے ( یعنی سرکاری اہلکاروں کے لئے بربادی ہے ) قیامت کے دن کچھ لوگ یہ آرزو کریں گے کہ ان کے بالوں کے ذریعے انہیں ثریا ستارے کے ساتھ لٹکا دیا جاتا وہ آسمان اور زمین کے درمیان جھول رہے ہوتے لیکن انہوں نے کوئی ریاستی ذمہ داری سرانجام نہ دی ہوتی “ ۔
یہ روایت امام أحمد نے نقل کی ہے ۔ اور چار میں سے دو طریق کے ان کے رجال ثقہ ہیں
یہ روایت امام ابویعلیٰ اور امام بزار نے بھی نقل کی ہے ۔

رافع طائی ، جو غزوہ ذات السلاسل میں سیدنا ابوبکر رضی اللہ عنہ کے ساتھ تھے وہ بیان کرتے ہیں : میں نے ان سے دریافت کیا : کہ ان لوگوں کی بیعت کے بارے میں جو کچھ کہا: گیا ہے ، تو انہوں نے یہ بتانا شروع کیا کہ انصار کا کیا موقف تھا ، اور انہوں نے ان لوگوں کے ساتھ کیا بات چیت کی سیدنا عمر بن خطاب رضی اللہ عنہ نے اس حوالے سے انصار سے کیا بات چیت کی اور کس طرح سیدنا عمر رضی اللہ عنہ نے ان لوگوں کو میری امامت کے بارے میں ترغیب دی کہ نبی اکرم صلی اللہ علیہ وسلم نے اپنی بیماری کے دوران جو حکم دیا تھا ( کہ میں امامت کروں ) تو انصار نے اس حوالے سے میری بیعت کر لی اور میں نے اس بیعت کو ان کے حوالے سے قبول کر لیا کیونکہ مجھے یہ اندیشہ تھا کہ کہیں کوئی فتنہ نہ آ جائے جس کے بعد مرتد ہونا ہو ۔
یہ روایت امام أحمد نے اپنے استاد علی بن عیاش کے حوالے سے نقل کی ہے ۔ اور میں اس سے واقف نہیں ہوں اس روایت کے بقیہ رجال ثقہ ہیں ۔

یزید بن موہب بیان کرتے ہیں : سیدنا عثمان رضی اللہ عنہ نے سیدنا عبداللہ بن عمر رضی اللہ عنہما سے کہا: آپ لوگوں کے درمیان فیصلہ کریں ( یعنی قاضی کے فرائض سر انجام دیں ) انہوں نے فرمایا : میں ، تو دو آدمیوں کے درمیان بھی فیصلہ نہیں دوں گا ، اور میں ، تو دو آدمیوں کی بھی امامت ( یا حکمرانی ) نہیں کروں گا کیا آپ نے نبی اکرم صلی اللہ علیہ وسلم کو یہ ارشاد فرماتے ہوئے نہیں سنا ہے ” جو شخص اللہ کی پناہ مانگتا ہے وہ زبردست پناہ لیتا ہے “ ۔ تو سیدنا عثمان رضی اللہ عنہ نے فرمایا : جی ہاں ، تو سیدنا عبداللہ بن عمر رضی اللہ عنہما نے فرمایا : میں اس بات سے اللہ کی پناہ مانگتا ہوں کہ آپ مجھے سرکاری اہلکار مقرر کریں ، تو سیدنا عثمان رضی اللہ عنہ نے انہیں چھوڑ دیا اور کہا: تم اس بارے میں کسی کو نہ بتانا ۔
یہ روایت امام أحمد نے نقل کی ہے ۔ یزید نامی راوی سے میں واقف نہیں ہوں اس روایت کے بقیہ رجال صحیح کے رجال ہیں ۔

سیدنا زید بن ثابت رضی اللہ عنہ بیان کرتے ہیں : وہ نبی اکرم صلی اللہ علیہ وسلم کے پاس موجود تھے انہوں نے کہا: حکومت ایک بری چیز ہے ۔ نبی اکرم صلی اللہ علیہ وسلم نے فرمایا : ” حکومت ایک اچھی چیز ہے اس شخص کے لئے جو اس کے حق کے ہمراہ اور اس کی حلال چیزوں کے ہمراہ اسے حاصل کرتا ہے ، اور حکومت اس شخص کے حق میں بری چیز ہے جو اسے ناحق طور پر حاصل کرتا ہے قیامت کے دن یہ اس شخص کے لئے حسرت کا باعث ہو گی “ ۔
یہ روایت امام طبرانی نے اپنے استاد حفص بن عمر بن صباح رقی کے حوالے سے نقل کی ہے ۔ جسے ابن حبان نے ثقہ قرار دیا ہے اس روایت کے بقیہ رجال صحیح کے رجال ہیں ۔

سیدنا شداد بن اوس رضی اللہ عنہ جو سیدنا حسان بن ثابت انصاری رضی اللہ عنہ کے بھائی ہیں اور انہوں نے سیدنا معاویہ بن ابوسفیان رضی اللہ عنہ کے لئے ایلیاء کو فتح کیا تھا انہوں نے سیدنا معاویہ رضی اللہ عنہ کے ساتھ گفتگو کرتے ہوئے امارت کا ذکر کرتے ہوئے یہ بات بیان کی میں نے نبی اکرم صلی اللہ علیہ وسلم کو امارت کا ذکر کرتے ہوئے سنا آپ صلی اللہ علیہ وسلم نے ارشاد فرمایا : ” اس کی پہلی چیز ملامت ہے دوسری ندامت ہے ، اور تیسری چیز قیامت کے دن اللہ تعالیٰ کی طرف سے ملنے والا عذاب ہو گا البتہ اس شخص کا معاملہ مختلف ہے جو رحم کرتا ہے ، اور عدل سے کام لیتا ہے ، اور اس اس طرح کرتا ہے ۔ نبی اکرم صلی اللہ علیہ وسلم نے اپنے دست مبارک کے ذریعے اشارہ کر کے مال کے بارے میں فرمایا ( کہ وہ مال کو اللہ کی راہ میں خرچ کرتا ہے ) پھر جب تک اللہ کو منظور تھا نبی اکرم صلی اللہ علیہ وسلم اس وقت تک خاموش رہے پھر آپ نے ارشاد فرمایا : رشتے داروں کی موجودگی میں عدل کیسے ہو سکتا ہے “ ۔
یہ روایت امام طبرانی نے نقل کی ہے ۔ اس کی سند میں ایک راوی اسحاق بن ابراہیم مزنی ہے ، اور وہ ضعیف ہے ۔

سیدنا عوف بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اگر تم چاہو تو میں تمہیں امارت کے بارے میں بتاتا ہوں کہ وہ کیا ہے ؟ راوی کہتے ہیں : ، تو میں نے تین مرتبہ بلند آواز میں آپ کو مخاطب کیا : یا رسول اللہ ! وہ کیا ہے ؟ نبی اکرم صلی اللہ علیہ وسلم نے فرمایا : ” اس کی پہلی چیز ملامت ہے دوسری ملامت ہے ، اور تیسری قیمت کے دن عذاب ہے البتہ اس شخص کا معاملہ مختلف ہے جو عدل سے کام لیتا ہے ، اور اپنے قرابت داروں کی موجودگی میں وہ کیسے عدل کر سکتا ہے ؟ “
یہ روایت امام بزار نے نقل کی ہے ۔ اور امام طبرانی نے معجم کبیر اور معجم اوسط میں اختصار کے ساتھ نقل کی ہے ۔ امام طبرانی کے معجم کبیر کے رجال صحیح کے رجال ہیں ۔

سیدنا ابوہریرہ رضی اللہ عنہ بیان کرتے ہیں : شریک نامی راوی کہتے ہیں : مجھے نہیں معلوم کہ انہوں نے مرفوع حدیث کے طور پر یہ حدیث نقل کی ہے ۔ یا مرفوع حدیث کے طور پر یہ حدیث نقل نہیں کی ہے وہ فرماتے ہیں : ” امارت کا ابتدائی حصہ ندامت ہے درمیانی حصہ تاوان ہے ، اور آخری حصہ قیامت کے دن عذاب ہے “ ۔
یہ روایت امام طبرانی نے معجم اوسط میں نقل کی ہے ۔ اور اس کے رجال ثقہ ہیں ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا مقداد بن اسود کندی رضی اللہ عنہ ” جریدہ خیل “ کا عامل مقرر کیا جب وہ آئے ، تو نبی اکرم صلی اللہ علیہ وسلم نے دریافت کیا : تم نے کیسا پایا ؟ تو انہوں نے عرض کی : میں نے ان لوگوں کو دیکھا کہ وہ بلند کرتے تھے اور وہ کام کرتے تھے یہاں تک کہ میں نے یہ گمان کیا کہ میں ایسا نہیں ہوں نبی اکرم صلی اللہ علیہ وسلم نے ارشاد فرمایا : ایسا ہی ہے ، سیدنا مقداد بن اسود رضی اللہ عنہ نے عرض کی : اس ذات کی قسم ! جس نے آپ کو حق کے ہمراہ مبعوث کیا ہے اب میں کبھی کوئی ریاستی ذمہ داری سرانجام نہیں دوں گا راوی کہتے ہیں : لوگ ان سے یہ کہا: کرتے تھے : آپ آگے بڑھ کے ہمیں نماز پڑھا دیں ، تو وہ یہ بات بھی نہیں مانتے تھے ۔
یہ روایت امام بزار نے نقل کی ہے ۔ اس کی سند میں ایک راوی سوار بن داؤد ابوحمزہ ہے ، جسے امام أحمد ابن حبان اور یحیی بن معین نے ثقہ قرار دیا ہے اس میں ضعف پایا جاتا ہے اس روایت کے بقیہ رجال صحیح کے رجال ہیں ۔

سیدنا مقداد بن اسود رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھے ایک جگہ بھیجا جب میں واپس آیا تو نبی اکرم صلی اللہ علیہ وسلم نے مجھ سے دریافت کیا : تم نے اپنے آپ کو کیسا پایا ؟ میں نے عرض کی : میں مسلسل یہی گمان کرتا رہا کہ میرے ساتھ میرے غلام ہیں ( جو میری فرمانبرداری کر رہے ہیں ) اللہ کی قسم ! اب میں اس کے بعد کبھی بھی دو آدمیوں کا امیر بھی نہیں بنوں گا “ ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں صرف عمیر بن اسحاق کا معاملہ مختلف ہے اسے ابن حبان اور دیگر حضرات نے ثقہ قرار دیا ہے یحیی بن معین اور دیگر حضرات نے اسے ضعیف کہا: ہے ، اور عبداللہ بن أحمد نامی ایک راوی ہے جو ثقہ اور مامون ہے ۔

مالک بن حارث نے ایک شخص کے حوالے سے یہ بات نقل کی ہے ۔ حضرمی کہتے ہیں : ابوکریب کی تحریر میں یہ بات ہے کہ حمید کے حوالے سے ایک شخص کے حوالے سے یہ بات منقول ہے وہ بیان کرتے ہیں : نبی اکرم صلی اللہ علیہ وسلم نے ایک شخص کو ایک جنگی مہم کا عامل مقرر کیا وہ شخص چلا گیا اور پھر جب وہ واپس نبی اکرم صلی اللہ علیہ وسلم کے پاس آیا تو نبی اکرم صلی اللہ علیہ وسلم نے اس سے دریافت کیا : تم نے امارت کو کیسا پایا ؟ اس نے عرض کی : میں ، تو لوگوں کی طرح ایک عام فرد تھا جب میں مائل ہوتا تھا تو وہ بھی مائل ہو جاتے تھے جب میں پڑاؤ کرتا تھا تو وہ بھی پڑاؤ کر لیتے تھے نبی اکرم صلی اللہ علیہ وسلم نے ارشاد فرمایا : ریاستی عہدہ رکھنے والا شخص عتاب کے دروازے پر ہوتا ہے البتہ جسے اللہ تعالیٰ محفوظ رکھے اس کا معاملہ مختلف ہے ۔ اس شخص نے کہا: اللہ کی قسم ! اب میں نہ ، تو آپ کے لئے ، اور نہ آپ کے علاوہ کسی اور کے لئے ، کبھی کسی کے لئے کوئی ذمہ داری سر انجام نہیں دوں گا ، تو نبی اکرم صلی اللہ علیہ وسلم مسکرا دیے یہاں تک کہ آپ کے اطراف کے دانت نظر آنے لگے ۔
یہ روایت امام طبرانی نے نقل کی ہے ۔ اس کی سند میں ایک راوی عطاء بن سائب ہے جو اختلاط کا شکار ہو گیا تھا اس روایت کے بقیہ رجال ثقہ ہیں ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم نے ایک شخص کو کسی کام کا اہلکار مقرر کیا اس نے عرض کی : یا رسول اللہ ! آپ میرے لئے کسی ایک صورت کو اختیار کر لیں نبی اکرم صلی اللہ علیہ وسلم نے فرمایا : تم اپنے گھر میں رہو ۔
یہ روایت امام طبرانی نے نقل کی ہے ۔ اس کی سند میں ایک راوی فرات بن ابوفرات ہے ، اور وہ ضعیف ہے ۔

سیدنا عصمہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ایک شخص کو زکوۃ کی وصولی کا اہلکار مقرر کیا اس نے عرض کی : یا رسول اللہ ! آپ میرے لئے کسی ایک صورت کو منتخب کر لیں نبی اکرم صلی اللہ علیہ وسلم نے فرمایا : تم اپنے گھر میں بیٹھے رہو ۔
یہ روایت امام طبرانی نے نقل کی ہے ۔ اس کی سند میں ایک راوی فضل بن مختار ہے ، اور وہ ضعیف ہے ۔

سیدنا رافع بن عمرو طائی رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا عمرو بن العاص رضی اللہ عنہ کو ذات سلال کے لشکر کا امیر مقرر کر کے بھیجا آپ نے اس لشکر کے ساتھ سیدنا ابوبکر رضی اللہ عنہ سیدنا عمر رضی اللہ عنہ اور جلیل القدر صحابہ کرام کو بھی بھیجا یہ لوگ روانہ ہوئے یہاں تک کہ انہوں نے طے کے دو پہاڑوں کے درمیان پڑاؤ کیا ، تو سیدنا عمرو رضی اللہ عنہ نے فرمایا : تم لوگ ایسے شخص کو ڈھونڈ لو جو راستے کے بارے میں رہنمائی کرے ، تو لوگوں نے کہا: ہمارے علم کے مطابق صرف رافع بن عمرو یہ کام کر سکتا ہے ، کیونکہ وہ ربیل ہے ( روایت کے ایک راوی کہتے ہیں : ) میں نے اپنے استاد سے دریافت کیا : ربیل سے مراد کیا ہے ؟ انہوں نے فرمایا : چور ، جو اکیلا لوگوں کے پاس جا کر چوری کر لیتا ہے ۔ سیدنا رافع رضی اللہ عنہ بیان کرتے ہیں : جب ہم نے اپنی جنگی مہم مکمل کر لی اور میں اس مقام پر پہنچا جہاں سے میں نکلا تھا تو میں نے وہاں سیدنا ابوبکر رضی اللہ عنہ کو پایا میں ان کے پاس آیا میں نے کہا: جناب میں نے آپ کے ساتھیوں میں سے آپ کو پایا ہے کہ آپ مجھے کوئی ایسی چیز بتائیں کہ جب میں اسے یاد کر لوں ، تو میں آپ میں سے ہو جاؤں اور آپ کی مانند ہو جاؤں انہوں نے فرمایا : کیا تم پانچ انگلیوں کے اوپر ( پانچ چیزیں ) یاد رکھ سکتے ہو ؟ میں نے کہا: جی ہاں انہوں نے فرمایا : پھر تم یہ گواہی دو کہ اللہ تعالیٰ کے علاوہ اور کوئی معبود نہیں ہے وہی ایک معبود ہے اس کا کوئی شریک نہیں ہے سیدنا محمد صلی اللہ علیہ وسلم اس کے بندے اور اس کے رسول ہیں اور تم نماز ادا کرو اور تم زکوۃ ادا کرو اور اگر تمہارے پاس مال موجود ہو تو تم بیت اللہ کا حج کرو اور رمضان کے روزے رکھو ، کیا تم یاد رکھو گے ؟ میں نے جواب دیا : جی ہاں ! انہوں نے فرمایا : ایک اور بات بھی ہے کہ تم کبھی بھی دو آدمیوں پر امیر نہ بننا میں نے کہا: کیا امیر ہونا صرف آپ لوگوں کے لیے مخصوص ہے جو اہل بدر ہیں ۔ انہوں نے فرمایا : ہو سکتا ہے کہ یہ آگے چل کے پھیل جائے یہاں تک کہ یہ تم تک بھی پہنچ جائے بلکہ تم سے نیچے کے افراد تک بھی پہنچ جائے اللہ تعالیٰ نے جب اپنے نبی کو مبعوث کیا ، تو لوگ اسلام میں داخل ہو گئے ان میں سے کچھ ایسے افراد تھے کہ جو اسلام میں داخل ہوئے اللہ تعالیٰ نے انہیں ہدایت دی تھی ان میں سے کچھ ایسے افراد تھے جنہیں تلوار نے مجبور کیا تھا ، لیکن یہ اللہ تعالیٰ کے مہمان اور اللہ تعالیٰ کے پڑوسی ہیں اور اللہ تعالیٰ کے ذمہ میں ہیں جب کوئی شخص امیر بنے اور لوگوں پر ظلم کرے اور ان میں سے ایک سے دوسرے کا حق نہ وصول کرے ، تو اللہ تعالیٰ اس شخص سے انتقام لے گا تم میں سے کوئی ایک شخص اپنے پڑوسی کی بکری کی وجہ سے گرفت میں آ جائے گا کہ وہ اپنے پڑوسی کے ساتھ ناراضگی کی وجہ سے اس پر قبضہ رکھے گا حالانکہ اس کے پڑوسی سے پرے ، اللہ تعالیٰ بھی ہے ۔ سیدنا رافع رضی اللہ عنہ کہتے ہیں : ایک سال گزر گیا پھر سیدنا ابوبکر رضی اللہ عنہ کو خلیفہ مقرر کر دیا گیا میں ان کے پاس آیا میں نے کہا: میں رافع ہوں میری آپ سے فلاں فلاں جگہ پر ملاقات ہوئی تھی سیدنا ابوبکر رضی اللہ عنہ نے جواب دیا : میں نے پہچان لیا ہے سیدنا رافع رضی اللہ عنہ نے کہا: آپ ، تو مجھے امیر بننے سے منع کرتے تھے اور آپ اس سے بڑے امیر بن گئے ہیں ۔ سیدنا محمد صلی اللہ علیہ وسلم کی پوری امت کے امیر بن گئے ہیں سیدنا ابوبکر رضی اللہ عنہ نے فرمایا : جی ہاں ! جو شخص ان میں اللہ کی کتاب ( کے احکام ) کو برقرار نہیں رکھے گا اس پر اللہ تعالیٰ کی ” بہلت ہو گی راوی کہتے ہیں : یعنی اللہ کی لعنت ہو گی ۔
یہ روایت امام طبرانی نے نقل کی ہے ۔ اور اس کے رجال ثقہ ہیں ۔

سیدنا عبدالرحمن بن عوف رضی اللہ عنہ بیان کرتے ہیں : میں سیدنا ابوبکر رضی اللہ عنہ کی اس بیماری کے دوران ، ان کی عیادت کرنے کے لئے ان کے پاس آیا جس بیماری کے دوران کا انتقال ہو گیا تھا میں نے انہیں سلام کیا ان سے دریافت کیا : آپ کا کیا حال ہے ، تو وہ سیدھے ہو کے بیٹھ گئے انہوں نے کہا: الحمدللہ اب میں بہتر ہوں انہوں نے فرمایا : مجھے جو تکلیف ہے وہ تم دیکھ رہے ہو اور اس تکلیف کے باوجود تم لوگوں نے مجھے ایک مصروفیت دی ہے میں نے تم لوگوں کے لئے اپنے بعد ایک عہد طے کیا ہے ، اور تمہارے لئے ایک ایسے شخص کو منتخب کیا ہے جو میرے نزدیک تم میں سب سے بہتر ہے حالانکہ تم میں سے ہر ایک شخص حکومت میں دلچپسی رکھتا ہے ، یہ امید رکھتے ہوئے کہ حکومت اس کو مل جائے میں نے دنیا کو دیکھا کہ وہ آ رہی ہے ، اور جب وہ آ رہی ہے تو سمجھ لو آ چکی ہے ، عنقریب تم اپنے گھروں کو ریشم کے پردوں اور دیباج کے کپڑوں کے ذریعے آراستہ کر لو گے اور اذربی اون کے بچھونوں سے تمہیں یوں الجھن ہو گی جس طرح کسی کو سعد ان کے کانوں پر رکھ دیا گیا ہے اللہ کی قسم ! تم میں سے کسی ایک شخص کو آگے کر کے کسی جرم کے بغیر اس کی گردن اڑا دی جائے یہ اس کے لئے اس سے زیادہ بہتر ہے کہ وہ دنیا میں ڈوب جائے پھر انہوں نے فرمایا : مجھے کسی بھی چیز پر اتنا افسوس نہیں ہے جتنا تین چیزوں پر ہے جو میں نے کی تھیں میری یہ خواہش ہے کہ میں نے وہ نہ کی ہوتیں ، اور تین ایسی چیزوں پر افسوس ہے کہ میں نے وہ نہیں کی ہیں ، میری یہ خواہش تھی کہ میں نے وہ کر لی ہوتیں اور تین ایسی چیزوں پر افسوس ہے کہ جن کے بارے میں میری یہ خواہش ہے کہ میں نے ان کے بارے میں نبی اکرم صلی اللہ علیہ وسلم سے دریافت کر لیا ہوتا جہاں تک ان تین چیزوں کا تعلق ہے جن کے بارے میں میری یہ خواہش ہے کہ میں نے وہ نہ کی ہوتیں ، تو میری یہ خواہش ہے کہ میں نے سیدہ فاطمہ رضی اللہ عنہا کے گھر کے پردے کو نہ ہٹایا ہوتا اور اسے چھوڑ دیا ہوتا اور یہ کہ میں نے لڑائی کو بند کر دیا ہوتا اور میری یہ خواہش ہے کہ بنو سقیفہ بنو ساعدہ کے دن میں نے حکومت کا معاملہ ابوعبیدہ یا عمر ، ان دونوں میں سے کسی ایک کی گردن میں ڈال دیا ہوتا وہ امیرالمؤمنین ہوتا اور میں وزیر ہوتا اور میری یہ خواہش ہے کہ جب میں نے خالد بن ولید کو مرتدین کی طرف بھیجا تھا تو میں خود زوالقصہ میں ٹھہر جاتا اگر مسلمان کامیاب ہو جاتے ، تو ہو جاتے ورنہ میں ان کو کمک پہنچانے اور مدد کرنے کے لئے موجود ہوتا ۔ جہاں تک ان تین چیزوں کا تعلق ہے کہ جن کی میری یہ خواہش ہے کہ میں نے وہ کر لی ہوتیں تو میری یہ خواہش ہے کہ جس دن میرے پاس اشعث کو قیدی بنا کر لایا گیا تھا اس دن میں نے اس کی گردن اڑا دی ہوتی کیونکہ مجھے یہ خیال آیا تھا کہ جو بھی خرابی ہو گی وہ اس کی طرف جائے گا ، اور میری یہ خواہش تھی کہ جس دن فجاة سلمی کو میرے پاس لایا گیا تھا میں نے اسے جلا دیا نہ ہوتا بلکہ آرام سے قتل کر دیا ہوتا یا اسے چھوڑ دیتا اور میری یہ خواہش تھی کہ جب میں نے خالد بن ولید کو شام کی طرف بھیجا تھا تو عمر کو عراق کی طرف بھیج دیتا تو یوں میں اپنے دائیں اور بائیں دونوں ہاتھوں کو اللہ کی راہ میں پھیلا دیتا ۔ جہاں تک ان تین چیزوں کا تعلق ہے جن کے بارے میں میری یہ خواہش ہے کہ میں نے نبی اکرم صلی اللہ علیہ وسلم سے ان کے بارے میں دریافت کر لیا ہوتا تو میری یہ خواہش ہے کہ میں نے نبی اکرم صلی اللہ علیہ وسلم سے یہ دریافت کر لیا ہوتا کہ حکومت کس کو ملے گی ؟ تاکہ کوئی شخص اس کے اہل شخص سے تنازع نہ کرتا اور میری یہ خواہش ہے کہ میں نے نبی اکرم صلی اللہ علیہ وسلم سے دریافت کر لیا ہوتا کیا حکومت میں انصار کا بھی کوئی حصہ ہو گا ، اور میری یہ خواہش ہے کہ میں نے نبی اکرم صلی اللہ علیہ وسلم سے پھوپھی اور بھتیجی ( کی وراثت ) کے بارے میں دریافت کیا ہوتا کیونکہ ان دونوں کے حوالے سے میرے ذہن میں ضرورت محسوس ہوتی ہے ۔
یہ روایت امام طبرانی نے نقل کی ہے ۔ اس کی سند میں ایک راوی علوان بن داؤد بجلی ہے ، اور وہ ضعیف ہے ، اور یہ اصل ان روایات میں سے ہے جنہیں منکر قرار دیا گیا ہے ۔

سیدنا زیاد بن حارث صدائی رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا میں نے آپ کی بیعت کی ( یعنی آپ کے دست اقدس پر اسلام قبول کیا ) مجھے یہ اطلاع ملی کہ آپ میری قوم کی طرف کوئی لشکر روانہ کرنے کا ارادہ رکھتے ہیں میں نے عرض کی : یا رسول اللہ ! آپ لشکر کو روک لیں میں آپ کو ان کے اسلام اور فرما برداری کی ضمانت دیتا ہوں نبی اکرم صلی اللہ علیہ وسلم نے فرمایا : ٹھیک ہے میں نے اپنی قوم کو خط لکھا ان لوگوں کا وفد نبی اکرم صلی اللہ علیہ وسلم کی خدمت میں اسلام قبول کرنے کے لئے اور فرمانبرداری کرنے کے لئے حاضر ہوا ۔ نبی اکرم صلی اللہ علیہ وسلم نے ارشاد فرمایا : اے صداء قبیلے کے فرد تمہاری قوم میں تمہاری بات مانی جاتی ہے میں نے عرض کی : جی نہیں بلکہ اللہ تعالیٰ نے انہیں ہدایت نصیب کی ہے ، اور ان کے ساتھ اچھائی کی ہے ۔ نبی اکرم صلی اللہ علیہ وسلم نے ارشاد فرمایا کیا میں تمہیں ان لوگوں کا امیر مقرر نہ کر دوں ؟ میں نے عرض کی : ٹھیک ہے ۔ نبی اکرم صلی اللہ علیہ وسلم نے مجھے ان لوگوں کا امیر مقرر کر دیا اور اس بارے میں آپ نے میرے لئے تحریر لکھوا دی میں نے آپ سے یہ درخواست کی کہ آپ مجھے ان کے صدقات وصول کرنے کا نگران بھی بنا دیں ، تو نبی اکرم صلی اللہ علیہ وسلم نے ایسا بھی کر دیا ایک دن سفر کے دوران نبی اکرم صلی اللہ علیہ وسلم نے ایک جگہ پڑاؤ کیا ہوا تھا ہم لوگوں نے رات کے ابتدائی حصہ میں پڑاؤ کر لیا تھا میں نبی اکرم صلی اللہ علیہ وسلم کے ساتھ تھا میرے ساتھی ادھر ادھر چلے گئے تھے یہاں تک کہ نبی اکرم صلی اللہ علیہ وسلم کے ساتھ میرے علاوہ اور کوئی فرد نہیں رہا جب صبح صادق کا وقت ہوا تو نبی اکرم صلی اللہ علیہ وسلم نے مجھے حکم دیا میں نے اذان دی پھر آپ نے دریافت کیا : اے صداء قبیلے کے فرد ! کیا تمہارے پاس پانی ہے میں نے عرض کی : جی ہاں تھوڑا سا ہے وہ آپ کے لئے کفایت نہیں کرے گا ۔ نبی اکرم صلی اللہ علیہ وسلم نے فرمایا : اس کو برتن میں ڈالو اور پھر میرے پاس لے آؤ میں اسے نبی اکرم صلی اللہ علیہ وسلم کے پاس لے آیا نبی اکرم صلی اللہ علیہ وسلم نے اپنا دست مبارک اس میں داخل کیا ، تو میں نے دیکھا کہ آپ کی انگلیوں میں سے ہر دو انگلیوں کے درمیان سے پانی پھوٹ پڑا نبی اکرم صلی اللہ علیہ وسلم نے ارشاد فرمایا : اے صداء ، قبیلے کے فرد اگر مجھے اپنے پروردگار سے حیاء نہ آتی ہوتی ، تو ہم اسے پی بھی لیتے اور پینے کے لئے حاصل بھی کر لیتے تم لوگوں میں یہ اعلان کر دو کہ جو شخص وضو کرنا چاہتا ہے ( وہ آ جائے ) راوی کہتے ہیں : ، تو لوگوں نے وہ پانی حاصل کر لیا ( جب نماز کا وقت ہوا ) تو سیدنا بلال رضی اللہ عنہ اقامت کہنے لگے نبی اکرم صلی اللہ علیہ وسلم نے ارشاد فرمایا صداء قبیلے کے فرد نے اذان دی تھی اور جو اذان دے وہی اقامت کہتا ہے ، جب نبی اکرم صلی اللہ علیہ وسلم نے فجر کی نماز ادا کر لی ، تو اس پڑاؤ کی جگہ کے افراد آپ کے پاس آئے ، اور انہوں نے اپنے متعلقہ اہلکار کی شکایت کی اور یہ عرض کی : یا رسول اللہ ! اس نے ہم سے اپنے اور اپنی قوم کے درمیان موجود زمانہ جاہلیت کی ناراضگی کا بدلہ لیا ہے ۔ نبی اکرم صلی اللہ علیہ وسلم اپنے اصحاب کی طرف متوجہ ہوئے جن میں ، میں بھی شامل تھا آپ نے ارشاد فرمایا کسی مومن شخص کے لئے امارت میں بھلائی نہیں ہے راوی کہتے ہیں : یہ بات میرے دل میں بیٹھ گئی پھر ایک شخص آپ سے کچھ مانگنے کے لئے آیا نبی اکرم صلی اللہ علیہ وسلم نے فرمایا : جو شخص خوشحال ہونے کے باوجود لوگوں سے مانگتا ہے ، تو یہ چیز سر کا درد اور پیٹ کی بیماری ہے اس نے کہا: آپ صدقات میں سے مجھے کچھ دیدیں نبی اکرم صلی اللہ علیہ وسلم نے ارشاد فرمایا : اللہ تعالیٰ ، صدقات کے بارے میں کسی نبی کے حکم یا نبی کے علاوہ کسی کے حکم سے راضی نہیں ہوتا اس نے صدقات کے مستحق آٹھ قسم کے افراد بنائے ہیں اگر تم اُن میں سے ایک ہو تو میں تمہیں تمہارا حق دیدیتا ہوں جب اگلے دن صبح ہوئی ، تو میں نے عرض کی : یا رسول اللہ ! آپ اپنا ریاستی عہدہ واپس لے لیں ( جو آپ نے مجھے عطا کیا تھا ) مجھے اس کی ضرورت نہیں ہے ۔ نبی اکرم صلی اللہ علیہ وسلم نے دریافت کیا : وہ کیوں ؟ میں نے عرض کی : میں نے آپ کو یہ ارشاد فرماتے ہوئے سنا ہے : “ مومن شخص کے لئے امارت میں بھلائی نہیں ہے “ ۔ اور میں ایک مومن شخص ہوں ، اور میں نے آپ کو یہ بھی ارشاد فرماتے ہوئے سنا ہے : ” جو شخص خوشحالی کے باوجود لوگوں سے مانگے گا ، تو یہ چیز سر کا درد ہے ، اور پیٹ کی بیماری ہے “ ۔ تو میں نے ، تو اس حال میں یہ مانگا ہے کہ جب میں خوشحال ہوں نبی اکرم صلی اللہ علیہ وسلم نے ارشاد فرمایا یہ ایسا ہی ہے اگر تم چاہو تو اسے لے لو اور اگر چاہو تو اسے چھوڑ دو راوی بیان کرتے ہیں : میں نے کہا: پھر میں اسے چھوڑتا ہوں راوی بیان کرتے ہیں : نبی اکرم صلی اللہ علیہ وسلم نے فرمایا : پھر تم مجھے کسی ایسے فرد کے بارے میں بتاؤ جسے میں اس کا نگران مقرر کر دوں میں نے وفد میں سے ایک شخص کے بارے میں آپ کی خدمت میں گزارش کی ، تو آپ نے اسے امیر مقرر کر دیا لوگوں نے عرض کی : یا رسول اللہ ! ہمارا ایک کنواں ہے ، جب سردی کا موسم ہو تو اس کا پانی ہمارے لئے کفایت کر جاتا ہے ہم اس کے اردگرد اکٹھے ہو جاتے ہیں لیکن جب گرمی کا موسم آتا ہے ، تو اس کا پانی تھوڑا ہو جاتا ہے ، اور ہم اپنے ارد گرد مختلف پانیوں کی طرف بکھر جاتے ہیں پہلے ایسا ہوتا تھا ، لیکن اب ہم ایسا نہیں کر سکتے کہ ہم ادھر ادھر بکھر جائیں کیونکہ ہمارے ہر طرف دشمن موجود ہے آپ اللہ تعالیٰ سے یہ دعا کریں کہ اس کا پانی ہمارے لئے کفایت کر جائے راوی کہتے ہیں : نبی اکرم صلی اللہ علیہ وسلم نے سات کنکریاں لیں انہیں اپنی ہتھیلی پر پھیلایا اور پھر ارشاد فرمایا جب تم اس کنویں کے پاس جاؤ تو اللہ کا نام لے کر ایک ایک کنکری اس میں ڈالتے جانا ۔ ( راوی بیان کرتے ہیں : ) اس کے بعد ان لوگوں کو بھی اس کنویں کی نچلی تہہ نظر نہیں آئی ( یعنی اس کے بعد وہ ہمیشہ پانی سے بھرا رہتا تھا ) ( علامہ ہیثمی فرماتے ہیں : ) میں یہ کہتا ہوں سنن میں اس روایت کا ایک حصہ مذکور ہے ۔
یہ روایت امام طبرانی نے نقل کی ہے ۔ اس کی سند میں ایک راوی عبدالرحمن بن زیاد بن انعم ہے ، اور وہ ضعیف ہے أحمد بن صالح نے اسے ثقہ قرار دیا ہے ، اور اس شخص کے قول کو مسترد کیا ہے جس نے اس کے بارے میں کلام کیا ہے اس روایت کے بقیہ رجال ثقہ ہیں ۔

نافع بیان کرتے ہیں : جب سیدنا عثمان رضی اللہ عنہ کو شہید کر دیا گیا تو سیدنا علی رضی اللہ عنہ سیدنا عبداللہ بن عمر رضی اللہ عنہما کے پاس آئے ، اور بولے : لوگوں میں تم پسندیدہ شخصیت کے مالک ہو تم شام کی طرف جاؤ ( اور لوگوں کو میری اطاعت کی ترغیب دو ) تو سیدنا عبداللہ بن عمر رضی اللہ عنہما نے فرمایا : نبی اکرم صلی اللہ علیہ وسلم کے ساتھ اپنی قرابت اور اپنے صحابی ہونے اور ہمارے درمیان موجود رشتے داری کا واسطہ ہے کہ میں ایسا نہیں کروں گا ) تو سیدنا علی رضی اللہ عنہ نے دوبارہ انہیں نہیں کہا: ۔
یہ روایت امام طبرانی نے نقل کی ہے ۔ اس کی سند میں ایک راوی لیث بن ابوسلیم ہے ، اور وہ ثقہ ہے ، لیکن وہ مدلس ہے ۔