مجمع الزوائد ومنبع الفوائد

سیدنا عبداللہ بن عمر رضی اللہ عنہما بیان کرتے ہیں : ان کے والد کے سامنے کے دانت گر گئے ، تو نبی اکرم صلی اللہ علیہ وسلم نے انہیں یہ حکم دیا کہ وہ سونے کے ذریعے انہیں باندھ لیں ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ابوربیع سمان ہے ، اور وہ متروک ہے ۔

سیدنا عبداللہ بن عبداللہ بن ابی رضی اللہ عنہ بیان کرتے ہیں : نبی اکرم صلی اللہ علیہ وسلم کے زمانہ اقدس میں ان کے دانت ٹوٹ گئے ، تو نبی اکرم صلی اللہ علیہ وسلم نے انہیں یہ حکم دیا کہ وہ سونے کے دانت لگوا لیں ۔
یہ روایت امام بزار نے نقل کی ہے ۔ اور اس کے رجال صحیح کے رجال ہیں صرف بشر بن معاذ کا معاملہ مختلف ہے ، اور وہ ثقہ ہے ، لیکن عروہ بن زبیر نے سیدنا عبداللہ بن عبداللہ بن ابی رضی اللہ عنہ کا زمانہ نہیں پایا ہے ۔

واقد بن عبداللہ تمیمی نے اس شخص کے حوالے سے یہ بات نقل کی ہے ۔ جس نے سیدنا عثمان رضی اللہ عنہ کو دیکھا کہ انہوں نے اپنے دانتوں پر سونا لگوایا تھا ۔
یہ روایت عبداللہ بن أحمد نے نقل کی ہے ۔ اس کی سند میں ایک راوی ایسا ہے جس کا نام بیان نہیں کیا گیا اس روایت کے بقیہ رجال ثقہ ہیں ۔

حماد بن ابوسلیمان بیان کرتے ہیں : میں نے مغیرہ بن عبداللہ کو دیکھا کہ انہوں نے سونے کے ذریعے اپنے دانت بندھوائے تھے ۔ اس کی سند میں ایک راوی ایسا ہے جس کا نام بیان نہیں کیا گیا اس روایت کے بقیہ رجال ثقہ ہیں ۔

حماد بن ابوسلیمان بیان کرتے ہیں : میں نے مغیرہ بن عبداللہ کو دیکھا کہ انہوں نے اپنے دانت بندھوائے تھے میں نے اس بات کا تذکرہ ابراہیم نخعی سے کیا ، تو انہوں نے فرمایا : اس میں کوئی حرج نہیں ہے ۔
یہ روایت عبداللہ بن أحمد نے نقل کی ہے ۔ اور اس کے رجال صحیح کے رجال ہیں ۔

سعدان بیان کرتے ہیں : میں نے سیدنا انس بن مالک رضی اللہ عنہ کو دیکھا کہ ان کے بیٹوں نے اپنے ہاتھوں پر انہیں اٹھا کر انہیں بیت اللہ کے گرد طواف کروایا تھا ، اور ان لوگوں نے سیدنا انس رضی اللہ عنہ کے دانت سونے سے بندھوائے ہوئے تھے ۔
یہ روایت امام طبرانی نے نقل کی ہے ۔ اور اس کی سند میں ایسے راوی ہیں جن سے میں واقف نہیں ہوں ۔

مروان بن نعمان بیان کرتے ہیں : میں نے سیدنا انس بن مالک رضی اللہ عنہ کو دیکھا کہ انہوں نے ایک ایسے عصا کے ساتھ ٹیک لگائی ہوئی تھی جس کے سرے پر چاندی لگی ہوئی تھی ۔
یہ روایت امام طبرانی نے نقل کی ہے ۔ مروان نامی راوی سے میں واقف نہیں ہوں ۔ اس روایت کے بقیہ رجال ثقہ ہیں ۔