مجمع الزوائد ومنبع الفوائد

محمد بن مالک بیان کرتے ہیں : میں نے سیدنا براء رضی اللہ عنہ کو سونے کی انگوٹھی پہنے ہوئے دیکھا ، لوگوں نے اُن سے کہا: آپ نے سونے کی انگوٹھی پہنی ہوئی ہے ، جبکہ نبی اکرم صلی اللہ علیہ وسلم نے اس سے منع کیا ہے سیدنا براء رضی اللہ عنہ نے فرمایا : ایک مرتبہ ہم نبی اکرم صلی اللہ علیہ وسلم کے پاس موجود تھے آپ کے سامنے مال غنیمت موجود تھا ، آپ نے اس میں قیدیوں اور گھر کے ساز و سامان کو تقسیم کر دیا راوی کہتے ہیں : نبی اکرم صلی اللہ علیہ وسلم نے اسے تقسیم کر دیا یہاں تک کہ یہ انگوٹھی باقی رہ گئی نبی اکرم صلی اللہ علیہ وسلم نے نگاہ اٹھا کر اپنے صحابہ کی طرف دیکھا پھر نگاہ کو جھکا لیا پھر آپ نے نگاہ اٹھا کر ان کی طرف دیکھا پھر آپ نے نگاہ کو جھکا لیا پھر آپ نے نگاہ اٹھا کر دیکھا پھر اسے جھکا لیا پھر آپ نے نگاہ اٹھا کر ان کی طرف دیکھا پھر فرمایا : اے براء میں آپ کی خدمت میں حاضر ہوا یہاں تک کہ آپ کے سامنے آ کر بیٹھ گیا نبی اکرم صلی اللہ علیہ وسلم نے انگوٹھی لی پھر میری کلائی کو پکڑا اور فرمایا : تم یہ لو اور اسے پہن لو جو اللہ تعالیٰ اور اس کے رسول نے تمہیں پہننے کے لئے دیا ہے راوی بیان کرتے ہیں : سیدنا براء رضی اللہ عنہ یہ کہتے تھے کہ تم مجھے یہ کیسے کہہ سکتے ہو کہ میں اس چیز کو اتار دوں کہ جس کے بارے میں نبی اکرم صلی اللہ علیہ وسلم نے یہ فرمایا ہے کہ تم وہ چیز پہن لو جو اللہ اور اس کے رسول نے تمہیں پہنائی ہے ۔
یہ روایت امام أحمد نے نقل کی ہے ۔ امام ابویعلیٰ نے اسے اختصار کے ساتھ نقل کیا ہے ۔ محمد بن مالک نامی راوی سیدنا براء رضی اللہ عنہ کا غلام ہے اسے ابن حبان اور ابوحاتم نے ثقہ قرار دیا ہے ، لیکن ابن حبان یہ کہتے ہیں : اس نے سیدنا براء رضی اللہ عنہ سے سماع نہیں کیا ہے میں یہ کہتا ہوں انہوں نے اس کی توثیق کی گئی ہے اس راوی نے یہ بیان کیا ہے : میں نے سیدنا براء رضی اللہ عنہ پر دیکھا ، تو یہ اس بات کی صراحت ہے اس روایت کے بقیہ رجال ثقہ ہیں ۔

عمار بن ابوعمار بیان کرتے ہیں : سیدنا عمر بن خطاب رضی اللہ عنہ نے یہ بات بیان کی کہ نبی اکرم صلی اللہ علیہ وسلم نے ایک شخص کے ہاتھ میں سونے کی انگوٹھی دیکھی ، تو فرمایا : اسے اتار دو اس شخص نے اسے اتار دیا پھر اس شخص نے لوہے کی انگوٹھی پہن لی ، تو نبی اکرم صلی اللہ علیہ وسلم نے فرمایا : یہ اس سے زیادہ بری ہے پھر اس شخص نے چاندی کی انگوٹھی پہن لی ، تو نبی اکرم صلی اللہ علیہ وسلم نے اسے کچھ نہیں کہا: ۔
یہ روایت امام أحمد نے نقل کی ہے ۔ اور اس کے رجال صحیح کے رجال ہیں ، البتہ عمار بن ابوعمار نامی راوی نے سیدنا عمر رضی اللہ عنہ سے سماع نہیں کیا ہے ۔

سیدنا عبداللہ بن عمرو بن العاص رضی اللہ عنہ کے بارے میں یہ بات منقول ہے کہ انہوں نے سونے کی انگوٹھی پہنی نبی اکرم صلی اللہ علیہ وسلم نے ان کی طرف دیکھا تو اس پر ناگواری کا اظہار کیا انہوں نے اسے اتار دیا پھر انہوں نے لوہے کی انگوٹھی پہن لی ، تو نبی اکرم صلی اللہ علیہ وسلم نے فرمایا : یہ زیادہ خبیث ہے یہ زیادہ خبیث ہے ۔ انہوں نے اسے اتار دیا پھر انہوں نے چاندی کی انگوٹھی پہنی ، تو نبی اکرم صلی اللہ علیہ وسلم نے انہیں کچھ نہیں کہا: ۔
یہ روایت امام أحمد اور امام طبرانی نے نقل کی ہے ۔

امام أحمد کی ایک روایت میں یہ الفاظ ہیں : لوہے کی انگوٹھی کے بارے میں نبی اکرم صلی اللہ علیہ وسلم نے یہ فرمایا تھا ” یہ اہل جہنم کا زیور ہے “ ۔ امام أحمد کی دو اسناد میں سے ایک کے رجال ثقہ ہیں ۔

سالم بن ابوالجعد ، اپنی قوم کے ایک آدمی کے حوالے سے یہ بات نقل کرتے ہیں : ( وہ صاحب کہتے ہیں : ) میں نبی اکرم صلی اللہ علیہ وسلم کی خدمت میں حاضر ہوا میں نے سونے کی انگوٹھی پہنی ہوئی تھی نبی اکرم صلی اللہ علیہ وسلم نے چھٹری لی اور اس کے ذریعے میری ہتھیلی پر مارا اور فرمایا اسے اتار دو ! وہ صاحب کہتے ہیں : میں وہاں سے نکلا میں نے اسے اتار دیا نبی اکرم صلی اللہ علیہ وسلم نے دریافت کیا : انگوٹھی کا کیا بنا ؟ میں نے عرض کی : میں نے اسے پھینک دیا نبی اکرم صلی اللہ علیہ وسلم نے فرمایا : میں نے تمہیں یہ ہدایت کی تھی کہ تم اس سے نفع حاصل کرو ( یعنی اسے فروخت کر کے قیمت حاصل کر لو ) تم نے اسے پھینکنا نہیں تھا ۔
یہ روایت امام أحمد نے دو اسناد کے ساتھ نقل کی ہے ۔ ان دونوں میں سے ایک کے رجال صحیح کے رجال ہیں ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم سیدنا ابوبکر رضی اللہ عنہ اور سیدنا عمر رضی اللہ عنہ اپنی انگوٹھیاں پہنتے نہیں تھے ( صرف مہر لگانے کے لئے استعمال کرتے تھے ) یہاں تک کہ ابان ، سیدنا عمر رضی اللہ عنہ کے پاس آ گئے راوی کہتے ہیں : یعنی وہ لوگ رکھتے تھے انہیں پہنتے نہیں تھے ۔
یہ روایت امام بزار نے نقل کی ہے ۔ اور اس کے رجال صحیح کے رجال ہیں صرف ، بن لہیعہ کا معاملہ مختلف ہے وہ اگرچہ حسن الحدیث ہے ، لیکن اس سے
یہ روایت حاصل نہیں کی جاتی کیونکہ اس نے ان ثبت راویوں کے برخلاف نقل کیا ہے ، جنہوں نے سیدنا عبداللہ بن عمر رضی اللہ عنہما کے حوالے سے یہ بات نقل کی ہے ۔ کہ نبی اکرم صلی اللہ علیہ وسلم انگوٹھی پہنتے تھے ۔

سیدنا خالد بن سعد رضی اللہ عنہ بیان کرتے ہیں : وہ نبی اکرم صلی اللہ علیہ وسلم کی خدمت میں حاضر ہوئے ان کے ہاتھ میں انگوٹھی تھی نبی اکرم صلی اللہ علیہ وسلم نے فرمایا : اے خالد یہ انگوٹھی کیا ہے ۔ انہوں نے عرض کی : یہ انگوٹھی ہے جو میں نے پہنی ہوئی ہے ۔ نبی اکرم صلی اللہ علیہ وسلم نے فرمایا : یہ اتار کر مجھے دکھاؤ راوی کہتے ہیں : میں نے اسے اتارا وہ لوہے کی بنی ہوئی انگوٹھی تھی جس پر چاندی لگی ہوئی تھی نبی اکرم صلی اللہ علیہ وسلم نے فرمایا : اس پر کیا نقش ہے ؟ میں نے عرض کی ہے : محمد رسول اللہ ، نبی اکرم صلی اللہ علیہ وسلم نے وہ لی اور اسے پہن لیا یہ وہی انگوٹی ہے ، جو نبی اکرم صلی اللہ علیہ وسلم کے دست مبارک میں رہی ۔
یہ روایت امام طبرانی نے نقل کی ہے ۔ اس کی سند میں ایک راوی یحیی بن عبدالحمید حمانی ہے ، اور وہ ضعیف ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم سیدنا ابوبکر رضی اللہ عنہ سیدنا عمر رضی اللہ عنہ انگوٹھیاں پہنتے نہیں تھے اور نہ ہی تحریروں پر مہر لگایا کرتے تھے یہاں تک کہ زیاد بن ابوسفیان نے سیدنا عمر رضی اللہ عنہ کو خط لکھا کہ آپ کچھ چیزوں کے بارے میں ہماری طرف مکتوب بھیج دیتے ہیں لیکن ہمیں اس پر مہر نہیں ملتی اس وقت سیدنا عمر رضی اللہ عنہ نے انگوٹھی بنوائی اور اس کے ذریعے وہ مہر لگاتے تھے ۔
یہ روایت امام طبرانی نے نقل کی ہے ۔ اس کی سند میں ایک راوی ابن لہیعہ ہے ، اور یہ صیح احادیث کے برخلاف ہے ۔

سیدنا عبادہ بن صامت رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” سیدنا سلیمان بن داؤد علیہما السلام کی انگوٹھی کا نگینہ آسمان سے آیا ہوا تھا وہ ان پر ڈالا گیا انہوں نے اسے لیا اور انہوں نے اسے اپنی انگوٹھی میں لگا لیا اس پر یہ نقش تھا : میں اللہ ہوں میرے علاوہ اور کوئی معبود نہیں ہے محمد میرا بندہ اور میرا رسول ہے ۔
یہ روایت امام طبرانی نے نقل کی ہے ۔ اس کی سند میں ایک راوی محمد بن مخلد رعینی ہے ، اور وہ انتہائی ضعیف ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم نے سونے کی انگوٹھی تین دن تک پہنی جب آپ کے اصحاب نے آپ کو دیکھا تو انہوں نے بھی سونے کی انگوٹھیاں پہن لیں ، پھر نبی اکرم صلی اللہ علیہ وسلم نے اسے اتار دیا ہمیں نہیں پتہ کہ اس کا کیا ہوا ؟ پھر نبی اکرم صلی اللہ علیہ وسلم نے چاندی کی انگوٹھی بنوائی اور یہ حکم دیا کہ اس پر ” محمد رسول اللہ “ نقش کیا جائے وہ انگوٹھی نبی اکرم صلی اللہ علیہ وسلم کے دست مبارک میں رہی یہاں تک کہ آپ کا وصال ہو گیا پھر سیدنا ابوبکر رضی اللہ عنہ کے ہاتھ میں رہی یہاں تک کہ ان کا وصال ہو گیا پھر سیدنا عمر رضی اللہ عنہ کے ہاتھ میں رہی یہاں تک کہ ان کا وصال ہو گیا پھر سیدنا عثمان رضی اللہ عنہ کے ہاتھ میں دو سال رہی جب ان کے پاس تحریریں زیادہ ہو گئیں ، تو انہوں نے وہ ایک انصاری شخص کے حوالے کر دی وہ اس کے ذریعے مہر لگا دیتا تھا ایک مرتبہ وہ انصاری شخص سیدنا عثمان رضی اللہ عنہ کے ایک گڑھے ( یا کنویں ) کی طرف گیا تو وہ انگوٹھی اس سے گر گئی پھر وہ نہیں ملی سیدنا عثمان رضی اللہ عنہ نے اس کے جیسی ایک انگوٹھی تیار کرنے کا حکم دیا اور اس میں محمد رسول اللہ نقش کروایا ۔ ( علامہ ہیثمی فرماتے ہیں : ) میں یہ کہتا ہوں سیدنا عبداللہ بن عمر رضی اللہ عنہما سے منقول حدیث صحیح میں اختصار کے ساتھ منقول ہے ۔
یہ روایت امام بزار نے نقل کی ہے ۔ اور امام طبرانی نے معجم اوسط میں نقل کی ہے ۔ اس کی سند میں ایک راوی مغیرہ بن زیاد ہے ، جسے یحیی بن معین اور دیگر حضرات نے ثقہ قرار دیا ہے ۔ امام أحمد اور دیگر حضرات نے اسے ضعیف کہا: ہے ۔ اس روایت کے بقیہ رجال صحیح کے رجال ہیں ۔

سیدنا ابوموسیٰ اشعری رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھے ملاحظہ فرمایا : میں نے شہادت کی انگلی اور درمیانی انگلی میں انگوٹھی پہنی ہے ، تو نبی اکرم صلی اللہ علیہ وسلم نے فرمایا : انگوٹھی اس اور اس ( انگلی ) کے لئے ہوتی ہے یعنی سب سے چھوٹی اور اس کے ساتھی والی انگلی کے لئے ہوتی ہے ۔
یہ روایت امام طبرانی نے نقل کی ہے ۔ اس کی سند میں ایک راوی محمد بن عبیداللہ ہے اگر تو وہ عرزمی ہے ، تو پھر وہ ضعیف ہے اس روایت کے بقیہ رجال ثقہ ہیں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم اپنے دائیں دست مبارک میں انگوٹھی پہنا کرتے تھے جب آپ کا وصال ہوا تو وہ آپ کے دائیں دست مبارک میں تھی ۔
یہ روایت امام بزار نے نقل کی ہے ۔ اس کی سند میں ایک راوی عبید بن قاسم ہے ، اور وہ متروک ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم دائیں ہاتھ میں انگوٹھی پہنتے تھے ۔ ( علامہ ہیثمی فرماتے ہیں : ) میں یہ کہتا ہوں امام ابوداؤد نے سیدنا عبداللہ بن عمر رضی اللہ عنہما کے حوالے یہ حدیث نقل کی ہے ۔ کہ نبی اکرم صلی اللہ علیہ وسلم بائیں ہاتھ میں انگوٹھی پہنتے تھے ۔
یہ روایت امام طبرانی نے معجم اوسط میں نقل کی ہے ۔ اور اس کے رجال صحیح کے رجال ہیں ۔

سیدنا ابوامامہ رضی اللہ عنہ بیان کرتے ہیں : نبی اکرم صلی اللہ علیہ وسلم دائیں ہاتھ میں انگوٹھی پہنتے تھے ۔
یہ روایت امام طبرانی نے نقل کی ہے ۔ اس کی سند میں ایک راوی جعفر بن زبیر ہے ، اور وہ ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم دائیں ہاتھ میں انگوٹھی پہنتے تھے ۔
یہ روایت امام طبرانی نے دو ضعیف حوالوں سے نقل کی ہے ۔

سیدنا جعفر بن ابوطالب رضی اللہ عنہ کے بارے میں یہ بات منقول ہے : وہ دائیں ہاتھ میں انگوٹھی پہنتے تھے ۔
یہ روایت امام طبرانی نے نقل کی ہے ۔ اس کی سند میں ایسا راوی ہے جس سے میں واقف نہیں ہوں ۔

سیدنا عبداللہ بن مسعود رضی اللہ عنہ بیان کرتے ہیں : نبی اکرم صلی اللہ علیہ وسلم کی انگوٹھی سیدنا ابوبکر رضی اللہ عنہ کے عہد خلافت میں ان کے پاس رہی سیدنا عمر رضی اللہ عنہ کے عہد خلافت میں ان کے پاس رہی سیدنا عثمان رضی اللہ عنہ کے عہد خلافت کے کچھ حصے میں ان کے پاس رہی ایک مرتبہ وہ بئر اریس کے کنارے بیٹھے ہوئے تھے وہ انگوٹھی ان سے اس کنویں میں گر گئی لوگوں نے کنویں کا سارا پانی نکال لیا لیکن انہیں وہ انگوٹھی نہیں ملی ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ابوعبداللہ ترمذی ہے ابن جوزی کہتے ہیں : اس کی توثیق نہیں کی گئی ہے ، اور ایک راوی امام طبرانی کا استاد ہے میں اس سے واقف نہیں ہوں ۔ اس روایت کے بقیہ رجال ثقہ ہیں ۔

سیدنا سائب بن یزید رضی اللہ عنہ بیان کرتے ہیں : نبی اکرم صلی اللہ علیہ وسلم کی انگوٹھی سیدنا ابوبکر رضی اللہ عنہ کے ہاتھ میں رہی یہاں تک کہ ان کا انتقال ہو گیا پھر سیدنا عمر رضی اللہ عنہ کے ہاتھ میں رہی یہاں تک کہ ان کا انتقال ہو گیا پھر سیدنا عثمان رضی اللہ عنہ کے ہاتھ میں رہی یہاں تک کہ وہ بئر اریس میں گر گئی ۔
یہ روایت امام طبرانی نے نقل کی ہے ۔ اس کی سند میں ایک راوی عیسیٰ بن بشر بن عباد ہے ، اور میں اس سے واقف نہیں ہوں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم کی انگوٹھی کا چھلہ چاندی سے بنا ہوا تھا ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں ۔

جمیل بن عبداللہ بیان کرتے ہیں : میں نے نبی اکرم صلی اللہ علیہ وسلم کے اصحاب میں سے پانچ افراد کو سونے کی انگوٹھیاں پہنتے ہوئے دیکھا ہے ( وہ حضرات یہ ہیں : ) سیدنا زید بن حارثہ رضی اللہ عنہ سیدنا زید بن ارقم رضی اللہ عنہ سیدنا براء بن عاذب رضی اللہ عنہ سیدنا انس بن مالک رضی اللہ عنہ اور سیدنا عبداللہ بن یزید رضی اللہ عنہ ۔
یہ روایت امام طبرانی نے نقل کی ہے ۔ جمیل نامی راوی سے میں واقف نہیں ہوں ۔ اس کے بقیہ رجال کی توثیق کی گئی ہے ۔

سیدنا مسلم بن عبدالرحمن رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو دیکھا کہ فتح مکہ کے سال صفا کی پہاڑی پر آپ نے خواتین سے بیعت لی ایک خاتون آپ کے پاس آئی اس کا ہاتھ مرد کے ہاتھ کی طرح تھا آپ نے اس سے بیعت نہیں لی یہاں تک وہ چلی گئی اور اس نے سرخ یا زدر رنگ کے ذریعے اپنے ہاتھوں کو تبدیل کیا ( یعنی مہندی لگا لی ) ایک شخص آپ کے پاس آیا اس نے لوہے کی انگوٹھی پہنی تھی نبی اکرم صلی اللہ علیہ وسلم نے ارشاد فرمایا : اللہ تعالیٰ ایسے ہاتھ کو پاک نہیں کرتا جس میں لوہے کی انگوٹھی موجود ہو ۔
یہ روایت امام بزار نے نقل کی ہے ۔ امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک خاتون شمیسہ بنت نبہان ہے میں اس سے واقف نہیں ہوں ۔ اس روایت کے بقیہ رجال ثقہ ہیں ۔

سیدنا عبداللہ بن عمرو رضی اللہ عنہ بیان کرتے ہیں نبی اکرم صلی اللہ علیہ وسلم نے سونے کی انگوٹھی اور لوہے کی انگوٹھی سے منع کیا ہے ۔
یہ روایت امام طبرانی نے معجم اوسط میں نقل کی ہے ۔ اور اس کے رجال ثقہ ہیں ۔

سیدنا ابوسعید خدری رضی اللہ عنہ بیان کرتے ہیں : ایک شخص بحرین سے نبی اکرم صلی اللہ علیہ وسلم کی خدمت میں حاضر ہوا نبی اکرم صلی اللہ علیہ وسلم نے اسے سلام کا جواب نہیں دیا اس کے ہاتھ میں سونے کی انگوٹھی تھی اور اس نے ریشمی جبہ پہنا ہوا تھا وہ شخص پریشان ہو کر واپس چلا گیا اس نے اس بات کی شکایت اپنی بیوی کے سامنے کی ، تو اس کی بیوی نے اس سے کہا: شاید نبی اکرم صلی اللہ علیہ وسلم کو تمہارا جبہ اور تمہاری انگوٹھی پسند نہیں آئی تم ان دونوں کو اتار دو اس نے ان دونوں کو اتار دیا اگلے دن جب وہ نبی اکرم صلی اللہ علیہ وسلم کی خدمت میں حاضر ہوا ، تو نبی اکرم صلی اللہ علیہ وسلم نے اسے سلام کا جواب دیا اس نے عرض کی : یا رسول اللہ ! میں آپ کے پاس پہلے آیا تھا تو آپ نے مجھ سے منہ موڑ لیا تھا ۔ نبی اکرم صلی اللہ علیہ وسلم نے ارشاد فرمایا : تمہارے ہاتھ میں آگ کا انگارہ تھا اس نے عرض کی : ایسی صورت میں ، تو میں بہت سے انگارے لے کے آیا ہوں نبی اکرم صلی اللہ علیہ وسلم نے ارشاد فرمایا : تم وہ چیز لے کے آئے ہو جو ہمارے نزدیک پتھریلی زمین کے پتھروں سے زیادہ اہم نہیں ہے یہ دنیاوی زندگی کا ساز و سامان ہے اس شخص نے دریافت کیا : پھر میں کس چیز کی انگوٹھی پہنوں ؟ نبی اکرم صلی اللہ علیہ وسلم نے ارشاد فرمایا : چاندی یا لوہے یا پیتل کے چھلے والی ( انگوٹھی پہنو ) ۔ ( علامہ ہیثمی فرماتے ہیں : ) میں یہ کہتا ہوں امام نسائی رحمہ اللہ نے اس روایت کا ابتدائی کچھ حصہ نقل کیا ہے ۔
یہ روایت امام طبرانی نے معجم اوسط میں نقل کی ہے ۔ ابونجیب نامی راوی کو ابن حبان نے ثقہ قرار دیا ہے اس روایت کے بقیہ رجال ثقہ ہیں ۔

سیدنا ابوامامہ رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا اس نے پیتل کی انگوٹھی پہنی ہوئی تھی نبی اکرم صلی اللہ علیہ وسلم نے دریافت کیا : یہ انگوٹھی کس لئے ہے ؟ اس نے عرض کی : واہنہ ( نامی بیماری کے لئے ) نبی اکرم صلی اللہ علیہ وسلم نے فرمایا : یہ تمہاری کمزوری میں اضافہ ہی کرے گی ۔
یہ روایت امام طبرانی نے نقل کی ہے ۔ اس کی سند میں ایک راوی عفیر بن معدان ہے ، اور وہ ضعیف ہے ۔

سیدنا ثوبان رضی اللہ عنہ بیان کرتے ہیں : نبی اکرم صلی اللہ علیہ وسلم اپنے اصحاب میں سے ایک شخص کے پاس سے گزرے اس کے ہاتھ میں تانبے کی انگوٹھی تھی نبی اکرم صلی اللہ علیہ وسلم نے دریافت کیا : یہ کس لئے ہے ؟ اس نے عرض کی : یہ واہنہ ( نامی تکلیف کے لئے ہے ) نبی اکرم صلی اللہ علیہ وسلم نے فرمایا : اسے اتار دو ۔
یہ روایت امام طبرانی نے نقل کی ہے ۔ ابوسلمہ کلاعی نامی تابعی سے میں واقف نہیں ہوں ، اور ایک راوی احوص بن حکیم ہے ، جسے ابن مدینی اور دیگر حضرات نے ضعیف قرار دیا ہے ، جبکہ یحیی بن معین اور دیگر حضرات نے اسے ثقہ کہا: ہے ۔ اس روایت کے بقیہ رجال ثقہ ہیں ۔

سیدہ فاطمہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : ” جو شخص عقیق ( نای نگینے والی ) انگوٹھی پہنے گا وہ مسلسل بھلائی دیکھتا رہے گا “ ۔
یہ روایت امام طبرانی نے معجم اوسط میں نقل کی ہے ۔ عمرو بن ثرید نامی راوی نے سیدہ فاطمہ رضی اللہ عنہا سے سماع نہیں کیا ہے ، اور زہیر بن عباد رواسی نامی راوی کو ابوحاتم نے ثقہ قرار دیا ہے اس روایت کے بقیہ رجال صحیح کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں : سیدنا جعفر بن ابوطالب رضی اللہ عنہ کے ایک صاحبزادے نبی اکرم صلی اللہ علیہ وسلم کی خدمت میں حاضر ہوئے انہوں نے عرض کی : یا رسول اللہ ! میرے ماں باپ آپ پر قربان ہوں آپ میرے ساتھ کسی ایسے شخص کو بھیجیں جو میرے لئے جوتا اور انگوٹھی خرید ہوے ، تو نبی اکرم صلی اللہ علیہ وسلم نے سیدنا بلال رضی اللہ عنہ کو بلایا اور فرمایا : تم بازار جاؤ اور اس کے لئے جوتا خریدو اور نیا خریدنا اور وہ سیاہ رنگ کا نہ ہو اور اس کے لئے انگوٹھی خریدو اور اس کا نگینہ عقیق ہونا چاہیے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی محمد بن ایوب بن سوید ہے ، اور وہ انتہائی ضعیف ہے ۔

مجاہد بیان کرتے ہیں : پہلی خواتین میں سے کوئی خاتون ، اپنی قمیص کی آستین کے لیے ، بٹن بناتی تھی جس کو وہ اپنی انگلیوں میں رکھتی تھی اور اس کے ذریعے اپنی انگوٹھی کو چھپا لیتی تھی ( تاکہ اس کی زینت ظاہر نہ ہو ) ۔
یہ روایت امام ابویعلیٰ نے نقل کی ہے ۔ اور اس کے رجال صحیح کے رجال ہیں ۔