مجمع الزوائد ومنبع الفوائد

سیدنا ابوذر غفاری رضی اللہ عنہ بیان کرتے ہیں : ایک مرتبہ نبی اکرم صلی اللہ علیہ وسلم خطبہ دے رہے تھے اسی دوران ایک دیہاتی کھڑا ہوا جس کے مزاج میں تیزی پائی جاتی تھی اس نے عرض کی : اے سیدنا محمد ! قحط سالی نے ہمیں کھا لیا ہے ۔ نبی اکرم صلی اللہ علیہ وسلم نے فرمایا : تم لوگوں کے بارے میں مجھے اس کے علاوہ کا زیادہ اندیشہ ہے کہ تم پر دنیا کو انڈیل دیا جائے گا ، اور افسوس کہ میری امت صرف سونے کو زیور کے طور پر پہنے گی ۔
یہ روایت امام أحمد اور امام بزار نے اور امام طبرانی نے معجم اوسط میں نقل کی ہے ۔ اور امام أحمد کے رجال صحیح کے رجال ہیں ۔

زید بن وہب نے ایک صاحب کے حوالے سے یہ بات نقل کی ہے ۔ ایک دیہاتی نبی اکرم صلی اللہ علیہ وسلم کی خدمت میں حاضر ہوا اس نے عرض کی : یا رسول اللہ ! قحط سالی نے ہمیں کھا لیا ہے ۔ نبی اکرم صلی اللہ علیہ وسلم نے ارشاد فرمایا : مجھے تم لوگوں کے بارے میں ، قحط سالی کے علاوہ کا زیادہ اندیشہ ہے ، وہ یہ کہ عنقریب دنیا تم پر انڈیل دی جائے گی کاش میری امت سونا نہ پہنے “ ۔
یہ روایت امام أحمد اور امام بزار نے نقل کی ہے ۔ اس کی سند میں ایک راوی یزید بن ابوزیاد ہے ، اور وہ ضعیف ہے اس کی حدیث کو نوٹ کیا جائے گا اس روایت کے بقیہ رجال صحیح کے رجال ہیں ۔

سیدنا ابوامامہ رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” جو شخص اللہ تعالیٰ اور آخرت کے دن پر ایمان رکھتا ہو وہ ریشم اور سونا نہ پہنے “ ۔
یہ روایت امام أحمد نے نقل کی ہے ۔ اور اس کے رجال ثقہ ہیں ۔

سیدنا عبدالرحمن بن غنم رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص سونے کا زیور پہنے ( راوی کو شک ہے شاید یہ الفاظ ہیں : ) اس کو پہنایا جائے ، تو قیامت کے دن اسے اس چیز ( یعنی سونے ) کے ذریعے داغا جائے گا “ ۔
یہ روایت امام أحمد نے نقل کی ہے ۔ اس کی سند میں ایک راوی شہر بن حوشب ہے ، اور وہ ضعیف ہے اس کی حدیث کو نوٹ کیا جائے گا ۔ اس روایت کے بقیہ رجال صحیح کے رجال ہیں ۔

سیدنا سہل بن سعد رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص یہ پسند کرتا ہو کہ اپنے بچے کو آگ کا کنگن پہنائے اسے اس کو سونے کا کنگن پہنا دینا چاہیے البتہ چاندی کو تم جیسے چاہو استعمال کر سکتے ہو “ ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی عبدالرحمن بن زید بن اسلم ہے ، اور وہ ضعیف ہے ۔

اسید بن ابواسید نے ابوموسیٰ کے حوالے سے ان کے والد سے یا ابن ابوقتادہ کے حوالے سے ان کے والد کے حوالے سے یہ بات نقل کی ہے ۔ نبی اکرم صلی اللہ علیہ وسلم نے ارشاد فرمایا : ” جو شخص یہ پسند کرتا ہو کہ اپنی محبوب شخصیت کو آگ کا کڑا پہنائے اسے اس کو سونے کا کڑا پہنانا چاہیے اور جو شخص یہ پسند کرتا ہو کہ وہ اپنی محبوب شخصیت کو آگ کا کنگن پہنائے تو اسے اس کو سونے کا کنگن پہنانا چاہیے ، البتہ تم چاندی کو استعمال کر سکتے ہو “ ۔
یہ روایت امام أحمد نے نقل کی ہے ۔ اسید نامی اس راوی نے موسیٰ بن سیدنا ابوموسیٰ اشعری اور عبداللہ بن سیدنا ابوقتادہ کے حوالے سے روایات نقل کی ہیں اگرچہ یہ دونوں مبہم ہیں لیکن یہ حدیث حسن ہے ، اور اگر ان دونوں کے علاوہ کوئی اور شخصیت مراد ہے ، تو میں ان دونوں سے واقف نہیں ہوں ۔

نبی اکرم صلی اللہ علیہ وسلم کی زوجہ محترمہ سیدہ ام سلمہ رضی اللہ عنہا بیان کرتی ہیں : انہوں نے نبی اکرم صلی اللہ علیہ وسلم سے سونے کے بارے میں دریافت کیا : کہ کیا اس کے ذریعے مشک کو باندھا جا سکتا ہے ( راوی کو شک ہے شاید یہ الفاظ ہیں : ) کیا ہم اس کے ذریعے مشک کو باندھ لیں ؟ نبی اکرم صلی اللہ علیہ وسلم نے ارشاد فرمایا : تم اسے چاندی میں رکھو اور اس پر زعفران لگا دو “ ۔
یہ روایت امام أحمد نے نقل کی ہے ۔ اور اس کے رجال صحیح کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں : جب نبی اکرم صلی اللہ علیہ وسلم نے سونا پہننے سے منع کر دیا تو ہم نے عرض کی : یا رسول اللہ ! کیا ہم مشک کو تھوڑے سے سونے میں باندھ نہ دیں نبی اکرم صلی اللہ علیہ وسلم نے فرمایا : تم لوگ اسے چاندی میں کیوں نہیں باندھ دیتے پھر اس پر زعفران مل دو تو وہ سونے کی طرح ہو جائے گا ۔
یہ روایت امام أحمد نے نقل کی ہے ۔ اور اس کے رجال صحیح کے رجال ہیں اور
یہ روایت امام ابویعلیٰ نے بھی نقل کی ہے ۔

سیدہ ام سلمہ رضی اللہ عنہا بیان کرتی ہیں : میں نے ایک ہار پہنا جس میں سونے کے کچھ بال تھے سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم نے اسے ملاحظہ فرمایا تو میری طرف سے منہ پھیر لیا آپ نے فرمایا : کیا تم خود کو اس بات سے محفوظ سمجھتی ہو کہ قیامت کے دن اللہ تعالیٰ اس کی جگہ تمہیں آگ کے بنے ہوئے بال پہنا دے سیدہ ام سلمہ رضی اللہ عنہا بیان کرتی ہیں ، تو میں نے اسے اتار دیا ۔
یہ روایت امام أحمد اور امام طبرانی نے نقل کی ہے ۔ اس کی سند میں ایک راوی لیث بن ابوسلیم ہے ، اور وہ مدلس ہے اس روایت کے بقیہ رجال صحیح کے رجال ہیں ۔

سیدہ ام سلمہ رضی اللہ عنہا بیان کرتی ہیں : میں نے اپنی گردن میں سونے کا بنا ہوا ہار گلے میں پہن لیا ، نبی اکرم صلی اللہ علیہ وسلم تشریف لائے ، تو آپ نے سیدہ ام سلمہ رضی اللہ عنہا سے منہ پھیر لیا انہوں نے عرض کی : کیا آپ میری زینت کی طرف نہیں دیکھیں گے ۔ نبی اکرم صلی اللہ علیہ وسلم نے فرمایا : میں نے تمہاری زینت سے منہ پھیرا ہے راوی کہتے ہیں : لوگوں کا یہ بیان کرنا ہے کہ نبی اکرم صلی اللہ علیہ وسلم نے فرمایا : تم خواتین کو یہ چیز نقصان نہیں پہنچائے گی کہ اگر وہ چاندی کی انگوٹھی ( یا بالی ) لے اور پھر اس پر زعفران لگا لے ۔
یہ روایت امام أحمد اور امام طبرانی نے نقل کی ہے ۔ اس کا سیاق زیادہ عمدہ ہے اس میں یہ الفاظ ہیں : کہ جب میں نے اسے کاٹ دیا تو نبی اکرم صلی اللہ علیہ وسلم نے میری طرف رخ کیا ۔ امام أحمد کے رجال صحیح کے رجال ہیں ۔

سیدنا عبادہ بن صامت رضی اللہ عنہ بیان کرتے ہیں : نبی اکرم صلی اللہ علیہ وسلم سے خواتین اور ان کی زینت اختیار کرنے کے بارے میں دریافت کیا گیا : ( یعنی ان کے زیور پہننے کے بارے میں دریافت کیا گیا : ) تو آپ نے ارشاد فرمایا : یہ ایک یا دو داغ ہیں خواہ جو بھی ہو ( یا جتنے بھی ہوں ) ۔
یہ روایت امام طبرانی نے نقل کی ہے ۔ اسحاق نامی راوی نے سیدنا عبادہ رضی اللہ عنہ کا زمانہ نہیں پایا ہے اس روایت کے بقیہ رجال ثقہ ہیں ۔

ام کرام بیان کرتی ہیں : وہ حج کے لئے گئیں مکہ میں ان کی ملاقات ایک بھاری بھرکم خاتون سے ہوئی جس کے جسم پر کوئی زیور نہیں تھا صرف چاندی تھی میں نے اس سے دریافت کیا : کیا وجہ ہے آپ کے جسم پر کوئی زیور نظر نہیں آ رہا صرف چاندی ہے ، تو اس خاتون نے بتایا کہ میرے دادا نبی اکرم صلی اللہ علیہ وسلم کے پاس موجود تھے میں اپنے دادا کے ساتھ تھی میرے جسم پر سونے کی بنی ہوئی دو بالیاں تھیں ، نبی اکرم صلی اللہ علیہ وسلم نے ارشاد فرمایا : آگ کی بنی ہوئی دو بالیاں ہیں ۔ تو اس خاتون نے بتایا : ) ہمارے خاندان کی عورتیں کوئی زیور نہیں پہنتی ہیں صرف چاندی پہنتی ہیں ۔
یہ روایت امام أحمد نے نقل کی ہے ۔ ام کرام نامی خاتون سے میں واقف نہیں ہوں ۔ اس روایت کے بقیہ رجال ثقہ ہیں ۔

سیدہ اسماء بنت یزید رضی اللہ عنہا بیان کرتی ہیں : میں نبی اکرم صلی اللہ علیہ وسلم کی خدمت میں بیعت کرنے کے لئے حاضر ہوئی میں قریب ہوئی ، تو میرے جسم پر دو کنگن تھے ۔ نبی اکرم صلی اللہ علیہ وسلم نے ان دونوں کی چمک دمک کو ملاحظہ فرمایا تو نبی اکرم صلی اللہ علیہ وسلم نے ارشاد فرمایا : اے اسماء ! تم ان دونوں کو اتار دو ! کی تم ڈرتی نہیں ہو کہ اللہ تعالیٰ تمہیں قیامت کے دن آگ کے بنے ہوئے کنگن پہنا دے ؟ وہ خاتون بیان کرتی ہیں ، تو میں نے ان دونوں کو اتار دیا مجھے نہیں معلوم کہ کس نے ان دونوں کو حاصل کیا ۔ علامہ ہیثمی فرماتے ہیں : ) میں یہ کہتا ہوں امام ابوداؤد نے
یہ روایت اختصار کے ساتھ نقل کی ہے ۔
یہ روایت امام أحمد نے نقل کی ہے ۔ اس کی سند میں ایک راوی شہر بن حوشب ہے اس کی حدیث کو نوٹ کیا جائے گا ایک راوی داؤداودی ہے ، جسے یحیی بن معین نے ایک روایت کے مطابق ثقہ قرار دیا ہے ، اور دوسری روایت کے مطابق انہوں نے اسے ضعیف کہا: ہے ۔

سیدہ اسماء بنت یزید رضی اللہ عنہا بیان کرتی ہیں : نبی اکرم صلی اللہ علیہ وسلم نے بیعت کے لئے اہل ایمان کی خواتین کو اکٹھا کیا ، تو سیدہ اسماء رضی اللہ عنہا نے عرض کی : یا رسول اللہ ! کیا آپ ہمارے لئے اپنا دست مبارک آگے نہیں کریں گے ؟ نبی اکرم صلی اللہ علیہ وسلم نے ان سے فرمایا : میں خواتین کے ساتھ مصافحہ نہیں کرتا ہوں میں ان سے ( ہاتھ ملائے بغیر ) بیعت لے لوں گا ( راوی خاتون بیان کرتی ہیں ) خواتین میں میری خالہ بھی تھیں جنہوں نے سونے کے دو کنگن اور سونے کی انگوٹھیاں پہنی ہوئی تھیں نبی اکرم صلی اللہ علیہ وسلم نے ان سے فرمایا : اے خاتون ! کیا تم یہ پسند کرتی ہو کہ اللہ تعالیٰ قیامت کے دن جہنم کے انگاروں سے بنے ہوئے دو کنگن اور انگوٹھیاں تمہیں زیور کے طور پر پہنائے ، تو اس خاتون نے عرض کی : اے اللہ کے نبی ! میں اللہ سے پناہ مانگتی ہوں سیدہ اسماء رضی اللہ عنہا فرماتی ہیں : میں نے کہا: اے خالہ آپ نے جو زیور پہنا ہوا ہے اسے اتار دیں ، تو اس خاتون نے اسے اتار دیا ۔ ( راوی بیان کرتے ہیں : ) سیدہ اسماء رضی اللہ عنہا نے مجھے یہ بات بتائی کہ اللہ کی قسم ! اے میرے بیٹے ! میں نے انہیں رکھ دیا اور مجھے نہیں معلوم کہ اس کی جگہ سے کس نے اس کو حاصل کیا ہم میں سے کسی ایک نے مڑ کر اس کی طرف نہیں دیکھا ۔ سیدہ اسماء رضی اللہ عنہا بیان کرتی ہیں : میں نے عرض کی : یا رسول اللہ ! ہم خواتین میں سے کوئی ایک جب اپنے شوہر کے سامنے تیار نہیں ہو گی اور زیور نہیں پہنے گی ، تو شوہر کے نزدیک اس کی حیثیت کم ہو جائے گی نبی اکرم صلی اللہ علیہ وسلم نے ارشاد فرمایا : تم خواتین میں سے کسی ایک پر کوئی حرج نہیں کہ اگر وہ چاندی کی بنی ہوئی دو انگوٹھیاں لے اور چاندی کے بنے ہوئے دو موتی ( یعنی نگینے ) لے اور پھر اپنے پوروں کے اوپر زعفران لگا کر اس پر مل دے ، تو وہ سونے کی طرح چمکنے لگیں گی ۔
یہ روایت امام أحمد اور امام طبرانی نے نقل کی ہے ۔ اس کی سند میں ایک راوی شہر بن حوشب ہے ، اور وہ ضعیف ہے اس کی حدیث کو نوٹ کیا جائے گا ۔

امام أحمد کی ایک روایت جو شہر بن حوشب سے منقول ہے اس میں یہ الفاظ ہیں : سیدہ اسماء رضی اللہ عنہا نبی اکرم صلی اللہ علیہ وسلم کی خدمت کیا کرتی تھیں ۔ انہوں نے عرض کی : ایک مرتبہ میں آپ کی خدمت میں موجود تھی اسی دوران میری خالہ آ گئیں سیدہ اسماء رضی اللہ عنہا بیان کرتی ہیں : اس خاتون نے نبی اکرم صلی اللہ علیہ وسلم سے سوال کرنا شروع کیے اس خاتون نے سونے کے بنے ہوئے دو کنگن پہنے ہوئے تھے ۔ ۔ ۔ ۔ ۔ ۔ ۔ اس کے بعد راوی نے حسب سابق روایت ذکر کی ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم گھر تشریف لائے ، تو میں نے سونے کے دو کنگن پہنے ہوئے تھے ۔ نبی اکرم صلی اللہ علیہ وسلم نے فرمایا : کیا میں تمہاری رہنمائی اس چیز کی طرف نہ کروں جو تمہارے لیے اس سے بہتر اور زیادہ اچھی ہو ؟ میں نے عرض کی : جی ہاں ! نبی اکرم صلی اللہ علیہ وسلم نے فرمایا : تم چاندی کے کنگن بنواؤ اور پھر اس پر خلوق مل لو تو یہ سونے کی طرح ہو جائیں گے ۔
یہ روایت امام بزار نے نقل کی ہے ۔ اس کی سند میں ایک راوی صالح بن ابوخضر ہے اور وہ ضعیف ہے ویسے اس کی توثیق کی گئی ہے ۔

سیدہ خلیدہ بنت قعنب رضی اللہ عنہا جوان خواتین میں سے ایک ہیں جو نبی اکرم صلی اللہ علیہ وسلم کی خدمت میں آپ کی بیعت کرنے کے لئے حاضر ہوئی تھیں وہ خاتون بیان کرتی ہیں : ایک خاتون آپ کے پاس آئی نبی اکرم صلی اللہ علیہ وسلم نے اس کی بیعت لینے سے انکار کر دیا وہ خاتون ہجوم میں سے نکل کے گئی اس نے کنگن اتارا ، پھر نبی اکرم صلی اللہ علیہ وسلم نے اس سے بیعت لی پھر وہ کنگن تلاش کرنے کے لئے نکلی تاکہ اس کو دیکھے ، تو وہ کوئی لے گیا تھا ۔
یہ روایت امام طبرانی نے نقل کی ہے ۔ اس کی سند میں ایک راوی حمید بن عبدالرحمن بن حماد بن ابوخوار ہے ، اور وہ ضعیف ہے ابن حبان نے اسے ثقہ قرار دیا ہے وہ یہ کہتے ہیں : یہ غلطی کر جاتا ہے اس کی استانی تغلب بنت خوار ہے میں اس خاتون سے واقف نہیں ہوں ۔ اس کی سند کے بقیہ رجال ثقہ ہیں ۔

سیدہ ام عطیہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ہمیں سونا پہننے اور پیالوں پر چاندی لگانے سے منع کیا تھا خواتین نے سونا پہننے کے بارے میں آپ سے بات چیت کی ، تو آپ نے ہمیں اجازت نہیں دی البتہ آپ نے پیالوں پر چاندی لگانے کی ہمیں اجازت دیدی ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی عمر بن یحیی ابلی ہے میں اس سے واقف نہیں ہوں ۔ اس روایت کے بقیہ رجال ثقہ ہیں ۔

سیدہ فاطمہ بنت قیس رضی اللہ عنہا بیان کرتی ہیں : نبی اکرم صلی اللہ علیہ وسلم نے ہمیں سونا پہننے اور اسے پرونے سے منع کیا ، تو ایک خاتون نے سونے کے کنگن اتار دیے ، وہ چند دن تک مسجد میں پڑے رہے کسی نے انہیں نہیں لیا ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی حریث بن ابومطر ہے ، اور وہ ضعیف ہے ۔

سیده زینب بنت نبیط بن جابر رضی اللہ عنہا جو سیدنا انس بن مالک رضی اللہ عنہ کی اہلیہ ہیں ، وہ بیان کرتی ہیں : سیدنا ابوامامہ رضی اللہ عنہ نے میری والدہ اور میری خالہ کو یہ تلقین کی کہ وہ نبی اکرم صلی اللہ علیہ وسلم کے پاس جائیں نبی اکرم صلی اللہ علیہ وسلم کے پاس سونے اور موتیوں کا زیور آیا ہے ، جسے ” رعاث “ کہا: جاتا تھا تو نبی اکرم صلی اللہ علیہ وسلم نے ان خواتین کو رعاث نامی زیور پہننے کے لئے دیا ۔
یہ روایت امام طبرانی نے مختلف اسانید کے ساتھ نقل کی ہے ۔ جن میں سے ایک کے رجال صحیح کے رجال ہیں صرف محمد بن عمارہ حزمی کا معاملہ مختلف ہے ، اور وہ ثقہ ہے اگر سیدہ زینب رضی اللہ عنہا صحابیہ ہوں ۔

سیده زینب بنت نبیط بن جابر رضی اللہ عنہا بیان کرتی ہیں : میری والدہ اور میری خالہ نے مجھے یہ بات بتائی ہے کہ نبی اکرم صلی اللہ علیہ وسلم نے انہیں سونے سے بنا ہوا ” رعاث “ ( نامی زیور ) پہننے کے لئے دیا تھا ۔
یہ روایت امام طبرانی نے نقل کی ہے ۔ اس کی سند میں ایک راوی محمد بن عمرو بن علقمہ ہے ، اور اس حدیث کا سب سے کم مرتبہ یہ ہے کہ یہ حسن ہے اس کی اسناد کے بقیہ رجال ثقہ ہیں ۔

حماد بنت محمد بن عبدالرحمن بن ابولیلی ، جو محمد بن عبدالرحمن بن ابولیلی کی سب سے بڑی صاحبزادی ہیں وہ بیان کرتی ہیں : میں نے اپنی پھوپھی کو یہ بیان کرتے ہوئے سنا : میں نے سیدہ ام لیلی رضی اللہ عنہا کو پایا کہ ان کے لئے قمیص اور چادر کو ، اور اوڑھنے والے لحاف کو ہر مہینے میں ایک مرتبہ رنگا جاتا تھا ، اور وہ اپنے دونوں ہاتھوں اور دونوں پاؤں پر ایک مرتبہ مہندی لگاتی تھیں وہ بیان کرتی تھیں نبی اکرم صلی اللہ علیہ وسلم نے اس پر ہم سے بیعت لی تھی وہ خاتون بیان کرتی ہیں : میں نے انہیں دیکھا کہ ان کے دونوں ہاتھوں میں سونے کے بنے ہوئے کنگن تھے لوگ یہ سمجھتے تھے وہ دونوں مال فئے میں ملے تھے عبدالرحمن بن ابولیلیٰ اس خاتون کے لئے رنگ کیا کرتے تھے ۔
یہ روایت امام طبرانی نے نقل کی ہے ۔ اس کی سند میں ایک راوی یحیی بن عبدالحمید حمانی ہے ، اور وہ ضعیف ہے ۔

سیده ام لیلی رضی اللہ عنہا بیان کرتی ہیں : نبی اکرم صلی اللہ علیہ وسلم نے ہمیں یہ حکم دیا تھا کہ ہم میں سے جب کوئی ایک عورت پر قدرت رکھتی ہو کہ وہ اپنے ہاتھوں میں چاندی کے کنگن پہن لے ( تو وہ ایسا کر لے ) اور اگر وہ اس کی قدرت نہیں رکھتی ، تو وہ دونوں ہاتھوں پر ( مہندی کے طور پر ) کوئی چیز لگا لے خواہ وہ ” سیر “ ( نامی بوٹی ) ہو ، آپ نے فرمایا : تم خواتین مردوں کے ساتھ مشابہت اختیار نہ کرو ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایسا راوی ہے جس سے میں واقف نہیں ہوں ۔