مجمع الزوائد ومنبع الفوائد

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ایک شخص کو کھڑے ہو کر پیتے ہوئے دیکھا تو ارشاد فرمایا اسے قے کر دو اس نے عرض کی : وہ کیوں نبی اکرم صلی اللہ علیہ وسلم نے فرمایا : کیا تمہیں یہ بات پسند ہے کہ تمہارے ساتھ بلی بھی پانی پیئے اس نے جواب دیا : جی نہیں نبی اکرم صلی اللہ علیہ وسلم نے فرمایا : تو تمہارے ساتھ وہ پی رہا ہے جو اس سے زیادہ برا ہے ( شاید راوی کہتے ہیں : ) یعنی شیطان ۔
یہ روایت امام أحمد اور امام بزار نے نقل کی ہے ۔ امام أحمد کے رجال ثقہ ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اگر کھڑے ہو کر پینے والے شخص کو یہ پتہ چل جائے کہ اس کے پیٹ میں کیا ہو رہا ہے ، تو وہ اس کو قے کر دے “ ۔ ( علامہ ہیثمی فرماتے ہیں : ) میں یہ کہتا ہوں : اس صحابی کے حوالے سے ” صحیح “ میں ایک حدیث مذکور ہے ، جو اس سیاق کے بغیر ہے ۔
یہ روایت امام أحمد نے دو اسناد کے ساتھ نقل کی ہے ۔ اور امام بزار نے نقل کی ہے ۔ امام أحمد کی دو اسناد میں سے ایک کے رجال صحیح کے رجال ہیں ۔

سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم نے اس بات سے منع کیا ہے کہ آدمی کھڑا ہو کر کچھ پیئے ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں ۔

زاذان بیان کرتے ہیں : سیدنا علی بن ابوطالب رضی اللہ عنہ نے کھڑے ہو کر پیا لوگ انہیں دیکھ رہے تھے ۔ لوگوں کو اس پر حیرت ہوئی ، تو سیدنا علی رضی اللہ عنہ نے فرمایا : یہ لوگ کیا دیکھ رہے ہیں اگر میں کھڑا ہو کر پیتا ہوں ، تو میں نے نبی اکرم صلی اللہ علیہ وسلم کو کھڑے ہو کر پیتے ہوئے دیکھا ہے ، اور اگر میں بیٹھ کر پیتا ہوں ، تو میں نے نبی اکرم صلی اللہ علیہ وسلم کو بیٹھ کر بھی پیتے ہوئے دیکھا ہے ۔ ( علامہ ہیثمی فرماتے ہیں : ) میں یہ کہتا ہوں : ” صحیح “ میں اس میں سے صرف کھڑے ہو کر پینے کا ذکر ہے ۔
یہ روایت امام أحمد نے نقل کی ہے ۔ اس کی سند میں ایک راوی عطاء بن سائب ہے جو اختلاط کا شکار ہو گیا تھا اس روایت کے بقیہ رجال صحیح کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم انصار سے تعلق رکھنے والی ایک خاتون کے ہاں تشریف لے گئے گھر میں ایک مشکیزہ لٹکا ہوا تھا ، نبی اکرم صلی اللہ علیہ وسلم نے اس کو منہ لگایا اور کھڑے ہو کر پی لیا ۔
یہ روایت امام أحمد نے نقل کی ہے اور اس کے رجال ثقہ ہیں ۔

سیدہ ام سلیم رضی اللہ عنہا بیان کرتی ہیں : نبی اکرم صلی اللہ علیہ وسلم ان کے ہاں تشریف لائے ان کے ہاں ایک مشکیزہ لٹکا ہوا تھا تو نبی اکرم صلی اللہ علیہ وسلم نے کھڑے ہو کر اس مشکیزے میں سے پی لیا ، سیدہ ام سلیم رضی اللہ عنہا مشکیزے کے منہ کی طرف بڑھیں اور انہوں نے اس کو کاٹ لیا ۔
یہ روایت امام أحمد اور امام طبرانی نے نقل کی ہے ۔ اس کی سند میں ایک راوی براء بن زید ہے اسے کسی نے ضعیف قرار نہیں دیا اس روایت کے بقیہ رجال صحیح کے رجال ہیں ۔

مسلم بیان کرتے ہیں : میں نے سیدنا ابوہریرہ رضی اللہ عنہ سے کھڑے ہو کر پینے کے بارے میں دریافت کیا ، تو انہوں نے فرمایا : اے میرے بھتیجے ! میں نے نبی اکرم صلی اللہ علیہ وسلم کو دیکھا آپ نے اپنی سواری کو باندھ دیا ، جبکہ وہ بیٹھی ہوئی تھی اور میں نے اس کی لگام کو پکڑا ہوا تھا ، اور میں نے اپنا ایک پاؤں اس کے بازو پر رکھا ہوا تھا ، قریش سے تعلق رکھنے والے کچھ افراد آئے ، اور نبی اکرم صلی اللہ علیہ وسلم کے اردگرد کھڑے ہو گئے ، نبی اکرم صلی اللہ علیہ وسلم کے پاس دودھ کا برتن لایا گیا ، آپ نے اسے پی لیا حالانکہ آپ اس وقت اپنی سواری پر موجود تھے ، پھر آپ نے اسے اپنے دائیں طرف موجود فرد کی طرف بڑھایا ، تو اس نے کھڑے ہو کر اسے پی لیا ، یہاں تک کہ سب لوگوں نے اسے کھڑے ہو کر پیا ۔
یہ روایت امام أحمد نے نقل کی ہے ۔ مسلم نامی اس راوی کی توثیق کرتے ہوئے ، یا اس پر جرح کرتے ہوئے ، میں نے کسی کو نہیں پایا ہے اس روایت کے بقیہ رجال ثقہ ہیں ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم نے کھڑے ہو کر پی لیا تھا ۔
یہ روایت امام ابویعلیٰ نے نقل کی ہے ۔ اور امام بزار نے نقل کی ہے ۔ تاہم انہوں نے یہ الفاظ نقل کیے ہیں : آپ صلی اللہ علیہ وسلم نے دودھ پیا تھا ۔
یہ روایت امام طبرانی نے معجم اوسط میں نقل کی ہے ۔ تاہم انہوں نے یہ الفاظ نقل کیے ہیں : نبی اکرم صلی اللہ علیہ وسلم ان کی مسجد میں تشریف لائے آپ صلی اللہ علیہ وسلم نے کھڑے ہو کر پی لیا ۔ امام ابویعلیٰ اور امام بزار کے رجال صحیح کے رجال ہیں ۔

سیدنا سعد بن ابی وقاص رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو کھڑے ہو کر پیتے ہوئے دیکھا ہے ۔
یہ روایت امام بزار اور امام طبرانی نے نقل کی ہے ۔ اور ان دونوں کے رجال ثقہ ہیں ۔

سیدنا امام حسین بن علی رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو کھڑے ہو کر پیتے ہوئے دیکھا ہے ۔
یہ روایت امام طبرانی نے نقل کی ہے ۔ اس کی سند میں ایک راوی زیاد بن منذر ہے ، اور وہ متروک ہے ۔

سعید بن جبیر بیان کرتے ہیں : سیدنا ابوہریرہ رضی اللہ عنہ نے مجھے یہ بات بتائی ہے کہ انہوں نے نبی اکرم صلی اللہ علیہ وسلم کو کھڑے ہو کر آب زمزم پیتے ہوئے دیکھا ہے ۔
یہ روایت امام طبرانی نے معجم صغیر اور معجم اوسط میں نقل کی ہے ۔ اس میں راویوں کی ایک جماعت ایسی ہے ، جن سے میں واقف نہیں ہوں ۔

سیدہ عائشہ صدیقہ رضی اللہ عنہا بیان کرتی ہیں : میں نے نبی اکرم صلی اللہ علیہ وسلم کو کھڑے ہو کر اور بیٹھ کر ( دونوں حالتوں میں ) پیتے ہوئے دیکھا ہے ۔
یہ روایت امام طبرانی نے معجم اوسط میں نقل کی ہے ۔ اور اس کے رجال ثقہ ہیں ۔