مجمع الزوائد ومنبع الفوائد

سیدنا عبداللہ بن عمرو رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : یہ چھوٹی قسم کا قوم لوط کا عمل ہے ۔ راوی بیان کہتے ہیں : اس سے مراد یہ ہے کہ آدمی کا اپنی بیوی کی پچھلی شرمگاہ میں صحبت کرنا ۔
یہ روایت امام أحمد نے اور امام بزار نے اور امام طبرانی نے معجم اوسط میں نقل کی ہے ۔ امام أحمد کے رجال اور امام بزار کے رجال صحیح کے رجال ہیں ۔

سیدنا عمر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم لوگ حیاء کرو لیکن اللہ تعالیٰ حق بات سے حیاء نہیں کرتا ہے تم عورتوں کے ساتھ ان کی پچھلی شرمگاہ میں صحبت نہ کرو “ ۔
یہ روایت امام ابویعلیٰ نے نقل کی ہے ۔ اور امام طبرانی نے معجم کبیر میں نقل کی ہے ۔ امام بزار نے بھی نقل کی ہے ۔ امام ابویعلیٰ کے رجال صحیح کے رجال ہیں صرف یعلی بن یمان نامی راوی کا معاملہ مختلف ہے ، اور وہ ثقہ ہے ۔

سیدنا علی بن ابوطالب رضی اللہ عنہ بیان کرتے ہیں : ایک دیہاتی نبی اکرم صلی اللہ علیہ وسلم کی خدمت میں حاضر ہوا اس نے عرض کی : یا رسول اللہ ! ہم ویرانے میں ہوتے ہیں ہم میں سے کسی ایک شخص کی تھوڑی سی ہوا خارج ہو جاتی ہے ، تو نبی اکرم صلی اللہ علیہ وسلم نے ارشاد فرمایا : بے شک اللہ تعالیٰ حق بات سے حیاء نہیں کرتا ہے ، جب تم میں سے کسی شخص کے ساتھ ایسا ہو ، تو اسے وضو کر لینا چاہیے اور تم عورتوں کے ساتھ ان کی پچھلی شرمگاہ میں صحبت نہ کرنا ( یہاں راوی نے ایک لفظ ایک مرتبہ مختلف نقل کیا ہے ) ۔
یہ روایت امام أحمد نے سیدنا علی بن ابوطالب رضی اللہ عنہ سے منقول حدیث کے طور پر نقل کی ہے ۔ اور اس کے رجال ثقہ ہیں ” سنن“ کے مصنفین نے اس روایت کو سیدنا علی بن طلق حنفی رضی اللہ عنہ سے منقول روایت کے طور پر نقل کیا ہے ۔

سیدنا جابر بن عبداللہ رضی اللہ عنہ بیان کرتے ہیں : نبی اکرم صلی اللہ علیہ وسلم نے خواتین کی پچھلی شرمگاہ میں ( صحبت کرنے ) سے منع کیا ہے ۔
یہ روایت امام طبرانی نے نقل کی ہے ۔ اور اس کے رجال ثقہ ہیں ۔

سیدنا عقبہ بن عامر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ ان لوگوں پر لعنت کرے جو خواتین کی پچھلی شرمگاہ میں صحبت کرتے ہیں “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عبدالصمد بن فضل ہے ، جسے امام ذہبی نے ثقہ قرار دیا ہے وہ کہتے ہیں : اس کے حوالے سے ایک حدیث منقول ہے ، جسے منکر قرار دیا گیا ہے ویسے یہ حالت کے اعتبار سے صالح ہے اگر اللہ نے چاہا ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص خواتین کے ساتھ ان کی پچھلی شرمگاہ میں صحبت کرتا ہے وہ کفر کا مرتکب ہوتا ہے “ ۔
یہ روایت امام طبرانی نے نقل کی ہے ۔ اور اس کے رجال ثقہ ہیں ۔