مجمع الزوائد ومنبع الفوائد

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص حیض والی عورت کے ساتھ صحبت کرتا ہے اگر ان دونوں کے نصیب میں اولاد ہو ، اور اسے جذام لاحق ہو جائے ، تو وہ شخص صرف اپنے آپ کو ہی ملامت کرے “ ۔
یہ روایت امام طبرانی نے معجم اوسط میں بکر بن سہل کے حوالے سے نقل کی ہے ۔ امام نسائی رحمہ اللہ نے اسے ضعیف قرار دیا ہے ۔
امام ذہبی کہتے ہیں : لوگوں نے اس پر تنقید کی ہے ، اور وہ مقارب الحدیث ہے ۔

سیدنا عبداللہ بن عباس رضی اللہ عنہما بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا اس نے عرض کی : یا رسول اللہ ! میں نے اپنی بیوی کے ساتھ اس کے حیض کے دوران صحبت کر لی ہے ۔ نبی اکرم صلی اللہ علیہ وسلم نے اسے حکم دیا کہ وہ ایک جان کو آزاد کرے ( راوی کہتے ہیں : ) ان دنوں جان کی قیمت ایک دینار تھی ۔
یہ روایت امام طبرانی نے نقل کی ہے ۔ اس کی سند میں ایک راوی عبدالرحمن بن یزید بن تمیم ہے ، اور وہ ضعیف ہے ۔

سیدنا عبادہ رضی اللہ عنہ بیان کرتے ہیں : نبی اکرم صلی اللہ علیہ وسلم سے سوال کیا گیا آدمی کے لئے اپنی حیض والی بیوی کے ساتھ کس حد تک تعلق رکھنا حلال ہے ؟ نبی اکرم صلی اللہ علیہ وسلم نے فرمایا : تہبند کے اوپر ، اس کا تہبند سے نیچے والا حصہ حرام ہے ۔
یہ روایت امام طبرانی نے نقل کی ہے ۔ اسحاق بن یحیی نامی راوی نے سیدنا عبادہ رضی اللہ عنہ کا زمانہ نہیں پایا ہے اس روایت کے بقیہ رجال ثقہ ہیں ۔