مجمع الزوائد ومنبع الفوائد

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بیمار کی عیادت کرو ، جنازے کے ساتھ چل کے جاؤ یہ چیز تمہیں آخرت کی یاد دلائے گی“ ۔
یہ روایت امام أحمد اور امام بزار نے نقل کی ہے ، اور اس کے رجال ثقہ ہیں ۔

سیدنا عثمان بن عفان رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے ساتھ حضر اور سفر میں ساتھ ہوتے تھے ۔ نبی اکرم صلی اللہ علیہ وسلم بیمار مسلمانوں کی عیادت کرتے تھے ، اور جنازوں میں شریک ہوتے تھے ( راوی کو شک ہے شاید یہ الفاظ ہیں : ) جنازوں کے ساتھ جاتے تھے “ ۔
یہ روایت امام بزار نے نقل کی ہے ، اور اس کے رجال ثقہ ہیں ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” مرنے کے بعد آدمی کو جو سب سے پہلی جزا دی جاتی ہے وہ یہ ہے کہ اس کے جنازے میں شریک ہونے والے تمام افراد کی مغفرت کر دی جاتی ہے “ ۔
یہ روایت امام بزار نے نقل کی ہے ۔ اس کی سند میں ایک راوی مروان بن سالم شامی ہے ، اور وہ ضعیف ہے ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص نماز جنازہ ادا کرتا ہے اسے ایک قیراط ثواب ملتا ہے ، اور جو شخص میت کے دفن ہونے تک اس کے ساتھ رہتا ہے اسے دو قیراط ملتے ہیں ایک قیراط احد پہاڑ کی مانند ہے “ ۔
یہ روایت امام بزار نے امام أحمد نے اور ابویعلیٰ نے نقل کی ہے ، اور اس کی اسناد حسن ہیں ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص جنازے کے ساتھ جاتا ہے ، اور اسے کندھا دیتا ہے اسے قبر میں اتارتا ہے ، اور بیٹھا رہتا ہے یہاں تک کہ اسے واپسی کی اجازت دی جائے تو وہ اجر کے دو قیراط لے کر واپس آتا ہے ، جن میں سے ہر ایک قیراط اُحد پہاڑ کی مانند ہوتا ہے “ ۔ ( علامہ ہیثمی فرماتے ہیں : ) میں یہ کہتا ہوں : سیدنا ابوہریرہ رضی اللہ عنہ کے حوالے سے منقول حدیث ” صحیح “ میں اختصار کے ساتھ مذکور ہے ، اور وہ اس کے علاوہ ہے ۔
یہ روایت امام أحمد نے نقل کی ہے ۔ اس کی سند میں ایک راوی ابن لہیعہ ہے ، اور اس کے بارے میں کلام کیا گیا ہے ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص جنازے کے ساتھ جاتا ہے یہاں تک کہ اس کی نماز جنازہ ادا کرتا ہے ، تو اسے ایک قیراط ملتا ہے نبی اکرم صلی اللہ علیہ وسلم سے قیراط کے بارے میں دریافت کیا گیا : تو آپ نے ارشاد فرمایا : احد پہاڑ کی مانند ہوتا ہے “ ۔

ایک روایت میں یہ الفاظ ہیں : لوگوں نے عرض کی : یا رسول اللہ ! یہ ہمارے ان قیراطوں کی مانند ہوتا ہے ؟ نبی اکرم صلی اللہ علیہ وسلم نے ارشاد فرمایا : جی نہیں بلکہ اُحد پہاڑ کی مانند ہوتا ہے ( راوی کو شک ہے شاید یہ الفاظ ہیں : ) اُحد پہاڑ سے بڑا ہوتا ہے ۔
یہ روایت امام أحمد نے امام طبرانی نے معجم اوسط میں نقل کی ہے ، تاہم انہوں نے معجم کبیر میں یہ الفاظ نقل کیے ہیں ۔ نبی اکرم صلی اللہ علیہ وسلم سے یہ بات منقول ہے ( آپ نے ارشاد فرمایا : ) ” جو شخص جنازے کے ساتھ جاتا ہے یہاں تک کہ اس کی نماز جنازہ ادا کرتا ہے پھر جب واپس آتا ہے ، تو اسے ایک قیراط ملتا ہے اور جو شخص نماز جنازہ ادا کرتا ہے اور پھر جنازے کے ساتھ جاتا ہے یہاں تک کہ اسے دفن کر دیتا ہے ، تو اسے دو قیراط ملتے ہیں عرض کی گئی : یا رسول اللہ ! دو قیراط کتنے ہوتے ہیں ؟ نبی اکرم صلی اللہ علیہ وسلم نے ارشاد فرمایا : اُحد پہاڑ کی مانند ۔
یہ روایت امام أحمد نے اس کی مانند نقل کی ، اور اس کے رجال ثقہ ہیں ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو بھی مسلمان کسی مسلمان شخص کے جنازے میں شریک ہوتا ہے ، تو اسے اجر کا ایک قیراط ملتا ہے اگر وہ بیٹھا رہے یہاں تک کہ اسے برابر کر دیا جائے ( یعنی میت کو دفن کر دیا جائے ) تو اس شخص کو اجر کے دو قیراط ملتے ہیں جن میں سے ہر ایک قیراط اُحد پہاڑ کی مانند ہوتا ہے “ ۔ ایک روایت میں یہ الفاظ ہیں : ” جو شخص نماز جنازہ ادا کرتا ہے اس کے لئے ایک قیراط نوٹ کر لیا جاتا ہے “ ۔
یہ روایت امام ابویعلیٰ نے اور امام طبرانی نے معجم اوسط میں ان الفاظ کے ساتھ نقل کی ہے : ” جو شخص جنازے کے ساتھ جاتا ہے ، اور نماز جنازہ ادا کرتا ہے لوگوں نے عرض کی : یا رسول اللہ ! قیراط سے مراد کیا ہے ؟ نبی اکرم صلی اللہ علیہ وسلم نے ارشاد فرمایا : اُحد پہاڑ کی مانند “ ۔ ان دونوں کی سند میں سے ایک سند میں ایک راوی محسب ہے ، اور دوسری میں ایک راوی روح بن عطاء ہے ، اور یہ دونوں ضعیف ہیں ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص جنازے والے گھر میں آتا ہے اسے ایک قیراط ملتا ہے اگر وہ جنازے کے ساتھ جاتا ہے ، تو اسے ایک قیراط ملتا ہے اگر وہ اس کی نماز جنازہ ادا کرتا ہے ، تو اسے ایک قیراط ملتا ہے ، اور اگر وہ دفن ہونے تک اس کا انتظار کرتا ہے ، تو اسے ایک قیراط ملتا ہے “ ۔ ( علامہ ہیثمی فرماتے ہیں : ) میں یہ کہتا ہوں : ان کے حوالے سے ایک حدیث ” صحیح “ میں مذکور ہے ، جو اس کے علاوہ ہے ۔
یہ روایت امام بزار نے نقل کی ہے ۔ اس کی سند میں ایک راوی معدی بن سلیمان ہے ۔ امام ترمذی نے اس کی حدیث کو صحیح قرار دیا ہے ابوحاتم اور دیگر حضرات نے اسے ثقہ کہا: ہے ۔ امام نسائی رحمہ اللہ اور ابوزرعہ نے اسے ” ضعیف“ قرار دیا ہے ۔ اس روایت کے بقیہ رجال ” صحیح“ کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اس کے میزان میں دو قیراط رکھے جائیں گے جن میں سے ہر ایک قیراط احد پہاڑ کی ماند ہو گا “ ۔ ( راوی بیان کرتے ہیں ) اس سے مراد یہ ہے کہ ایسا اس شخص کے ساتھ ہو گا ، جو جنازے میں شریک ہوا ہو ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی نافع ابوہرمز ہے ، اور وہ متروک ہے ۔

عبداللہ بن یسار بیان کرتے ہیں : عمرو بن حریث سیدنا امام حسن بن علی رضی اللہ عنہ کی عیادت کرنے کے لئے آئے سیدنا علی رضی اللہ عنہ نے ان سے کہا: تم حسن کی عیادت کرنے کے لئے آئے ہو جبکہ تمہارے من میں جو ہے وہ ہے ، تو عمرو نے ان سے کہا: آپ میرے پروردگار نہیں ہیں کہ میرے دل کو جیسے چاہیں پھیر دیں سیدنا علی رضی اللہ عنہ نے فرمایا : ہمیں تمہیں نصیحت کرنے سے یہ بات مجبور کر رہی ہے کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو مسلمان اپنے بھائی کی عیادت کرتا ہے ، تو اللہ تعالیٰ اس کے لئے ستر ہزار فرشتے بھیج دیتا ہے ، جو اس کے لئے دعائے رحمت کرتے رہتے ہیں اگر وہ دن کی کسی گھڑی میں گیا ہو تو شام تک ایسا ہوتا رہتا ہے ، اور اگر وہ شام کی کسی بھی گھڑی میں گیا ہو تو صبح ہونے تک ایسا ہوتا رہتا ہے “ ۔ عمرو بن حریث نے سیدنا علی رضی اللہ عنہ سے دریافت کیا : جنازے کے ساتھ جانے کے بارے میں آپ کی کیا رائے ہے ؟ اس کے آگے چلنا چاہیے یا اس کے پیچھے چلنا چاہیے ؟ تو سیدنا علی رضی اللہ عنہ نے اس سے فرمایا اس کے آگے چلنے پر اس کے پیچھے چلنے کو وہی فضیلت حاصل ہے ، جو با جماعت فرض نماز ادا کرنے کو تنہا نماز ادا کرنے پر حاصل ہے عمرو بن حریث نے کہا: میں نے تو سیدنا ابوبکر رضی اللہ عنہ اور سیدنا عمر رضی اللہ عنہ کو جنازے سے آگے چلتے ہوئے دیکھا ہے ، تو سیدنا علی رضی اللہ عنہ نے فرمایا : وہ دونوں حضرات اس بات کو ناپسند کرتے تھے کہ لوگوں کو حرج کا شکار کریں ۔ ( علامہ ہیثمی فرماتے ہیں : ) میں یہ کہتا ہوں : امام ابوداؤد نے اس روایت میں سے صرف بیمار کی عیادت کرنے والا حصہ نقل کیا ہے ، اور عیادت کرنے والے شخص کے بارے میں یہ کہا: ہے کہ وہ عیادت کرنے والے سیدنا ابوموسی اشعری رضی اللہ عنہ تھے ، جبکہ یہاں یہ منقول ہے کہ وہ عمرو بن حریث تھے ۔
یہ روایت امام أحمد نے نقل کی ہے ۔ امام بزار نے اسے اختصار کے ساتھ نقل کیا ہے ۔ امام أحمد کے رجال ثقہ ہیں ۔ آگے چل کے سیدنا علی رضی اللہ عنہ کے حوالے سے منقول ایک روایت آئے گی جو اس سے زیادہ واضح ہے یہ اس باب میں آئے گی کہ میت کو قبر میں داخل کرتے وقت کیا پڑھنا چاہیے ۔

ابراہیم بن مسلم ہجری بیان کرتے ہیں : میں سیدنا عبداللہ بن ابواوفی رضی اللہ عنہ کے صاحبزادے کے جنازے میں شریک ہوا وہ ایک سیاہ رنگ کے خچر پر موجود تھے خواتین نے ، اس خچر کو لے کر چلنے والے سے ، یہ کہنا شروع کیا کہ انہیں جنازے کے آگے لے کے چلو اس نے ایسا ہی کیا ، تو میں نے انہیں اس شخص کو یہ کہتے ہوئے سنا کہ جنازہ کہاں ہے اس شخص نے کہا: آپ کے پیچھے ہے راوی کہتے ہیں : ایک یا شاید دو مرتبہ ایسا ہوا ، پھر انہوں نے فرمایا : کیا میں نے تمہیں اس بات سے منع نہیں کیا کہ تم مجھے جنازے کے آگے لے کے جاؤ راوی کہتے ہیں : اسی دوران انہوں نے ایک خاتون کے مرثیہ پڑھنے کی آواز سنی تو انہوں نے فرمایا : رک جاؤ کیا میں نے تم خواتین کو اس چیز سے منع نہیں کیا نبی اکرم صلی اللہ علیہ وسلم نے ہمیں مرثیہ کہنے سے منع کیا ہے تم میں سے کوئی ایک عورت جتنی چاہے آنسو بہا سکتی ہے ۔
( علامہ ہیثمی فرماتے ہیں : ) میں یہ کہتا ہوں : امام ابن ماجہ نے اس روایت میں سے صرف مرثیہ کی ممانعت والا حصہ نقل کیا ہے ۔
یہ روایت امام أحمد نے نقل کی ہے ۔ ابراہیم ہجری نامی راوی کے بارے میں کلام کیا گیا ہے ۔

سیدنا سہل بن سعد رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو جنازے کے پیچھے چلتے ہوئے دیکھا ہے ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی سلیمان بن سلمہ جنائزی ہے ، اور وہ ضعیف ہے ۔

دراج بیان کرتے ہیں : میں نے سیدنا عبداللہ بن عمرو بن العاص رضی اللہ عنہ کو ایک سواری پر سوار ہو کر جنازے سے آگے چلتے ہوئے دیکھا یہاں تک کہ جب وہ قبرستان آئے ، تو سواری سے نیچے اتر گئے اور جنازے کے آنے سے پہلے بیٹھ گئے ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی ابن لہیعہ ہے ، اور اس کے بارے میں کلام کیا گیا ہے ۔