مجمع الزوائد ومنبع الفوائد

ابوحازم بیان کرتے ہیں : میں سیدنا امام حسین رضی اللہ عنہ کے پاس موجود تھا جب سیدنا امام حسن رضی اللہ عنہ کا انتقال ہوا تو وہ ( یعنی سیدنا امام حسین رضی اللہ عنہ ) سعید بن العاص کی گردن پکڑ کر انہیں آگے کر رہے تھے ، اور یہ کہہ رہے تھے کہ آپ آگے ہوں اگر یہ چیز سنت نہ ہوتی تو میں آپ کو آگے نہ کرتا ( راوی کہتے ہیں : ) سعید بن العاص ان دنوں مدینہ منورہ کے گورنر تھے ۔
یہ روایت امام طبرانی نے معجم کبیر میں نقل کی ہے ، اور امام بزار نے بھی نقل کی ہے ، اور اس کے رجال کی توثیق کی گئی ہے ۔

ابوحویرث بیان کرتے ہیں : سیدنا جابر بن عبداللہ رضی اللہ عنہما کا انتقال ہو گیا : بنو سلمہ کے محلے میں ہم ان کے دروازے کے پاس موجود تھے ، جب ان کے حجرے سے ان کی میت کی چارپائی نکلی تو حسن بن حسن چارپائی کے دو ستونوں کے درمیان تھے حجاج بن یوسف نے انہیں یہ حکم دیا کہ وہ دو پایوں کے درمیان سے نکل جائیں تو انہوں نے ایسا کرنے سے انکار کر دیا ، لوگوں نے ان کے ساتھ زبردستی کرنی چاہی ، سیدنا جابر رضی اللہ عنہ کے صاحبزادوں نے ان سے درخواست کی ، تو وہ نکل گئے ، جب وہ نکلے تو حجاج آیا اور دو پایوں کے درمیان ٹھہر گیا اور اس وقت تک رہا جب تک ان کی میت کو رکھ نہیں دیا گیا اس نے ان کی نماز جنازہ پڑھائی پھر جب وہ قبر کے پاس آیا ، تو حسن بن حسن قبر میں اتر چکے تھے حجاج نے حکم دیا کہ وہ باہر آ جائیں انہوں نے یہ بات نہیں مانی ، سیدنا جابر رضی اللہ عنہ کے صاحبزادوں نے کہا: اللہ کا واسطہ ہے ، تو وہ باہر آ گئے ، پھر حجاج نے انہیں قبر میں اتارا ، یہاں تک کہ وہ اس سے فارغ ہوا ۔
یہ روایت امام طبرانی نے معجم کبیر میں نقل کی ہے ۔ ابوحویرث نامی رادی کو ابن حبان نے ” ثقہ “ قرار دیا ہے ۔ امام مالک اور دیگر حضرات نے اسے ضعیف کہا: ہے ۔

سیدنا ابوامامہ بن ثعلبہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ان لوگوں کو بدر کی طرف نکلنے کے بارے میں بتایا تو سیدنا ابوامامہ بن ثعلبہ رضی اللہ عنہ نے نبی اکرم صلی اللہ علیہ وسلم کے ساتھ نکلنے کا پختہ ارادہ کر لیا ان کے ماموں سیدنا ابوبردہ بن نیار رضی اللہ عنہ نے ان سے کہا: اے میرے بھانجے تم اپنی ماں کے پاس ٹھہرے رہو سیدنا ابوامامہ رضی اللہ عنہ نے ان سے کہا: بلکہ آپ اپنی بہن کے پاس ٹھہرے رہیں جب انہوں نے اس بات کا تذکرہ نبی اکرم صلی اللہ علیہ وسلم سے کیا ، تو نبی اکرم صلی اللہ علیہ وسلم نے سیدنا ابوامامہ رضی اللہ عنہ کو یہ حکم دیا کہ وہ اپنی والدہ کے پاس ٹھہرے رہیں اور سیدنا ابوبردہ رضی اللہ عنہ کو ساتھ لے گئے جب نبی اکرم صلی اللہ علیہ وسلم واپس تشریف لائے تو ان خاتون کا انتقال ہو گیا تو نبی اکرم صلی اللہ علیہ وسلم نے ان کی والدہ کی نماز جنازہ پڑھائی ۔
یہ روایت امام طبرانی نے معجم کبیر میں نقل کی ہے ، اور اس کے رجال ثقہ ہیں ۔

جنادہ بن سلم بیان کرتے ہیں : سیدنا جابر بن سمرہ رضی اللہ عنہ کا انتقال ہو گیا تو عمرو بن حریث نے ان کی نماز جنازہ پڑھائی ۔
یہ روایت امام طبرانی نے معجم کبیر میں نقل کی ہے ۔ جنادہ نامی راوی کو ابن حبان نے ” ثقہ “ قرار دیا ہے ابوزرعہ اور ابوحاتم نے انہیں ضعیف کہا: ہے ۔

قیس بن ابوحازم بیان کرتے ہیں : سیدنا جریر رضی اللہ عنہ اور سیدنا اشعت ایک جنازے میں اکھٹے ہوئے تو سیدنا اشعث رضی اللہ عنہ نے سیدنا جریر رضی اللہ عنہ کو آگے کیا ، تو انہوں نے نماز جنازہ پڑھائی ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔

ثابت بنانی بیان کرتے ہیں : عائذ بن عمرو نے یہ وصیت کی کہ سیدنا ابوبرزہ اسلمی رضی اللہ عنہ ان کی نماز جنازہ پڑھائیں عبیداللہ بن زیاد ان کی نماز جنازہ پڑھانے کے لئے سوار ہو کر آیا جب وہ ہشام کے قصر کے پاس پہنچا تو اسے یہ بتایا گیا کہ انہوں نے تو یہ وصیت کی ہے کہ سیدنا ابوبرزہ رضی اللہ عنہ ان کی نماز جنازہ پڑھائیں تو وہ اپنی سواری پر سوار ہو کر واپس چلا گیا ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔

سیدنا حارث بن وہب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میری امت کے لوگ اس وقت تک دین پر گامزن رہیں گے جب تک وہ جنائز کو ان کے اہل خانہ کے سپرد نہیں کریں گے “ ۔
یہ روایت امام طبرانی نے معجم کبیر میں نقل کی ہے ، اور اس کے رجال ثقہ ہیں ۔

سیدنا عبداللہ بن مسعود رضی اللہ عنہ فرماتے ہیں : ہمارے لئے نماز جنازہ میں کوئی قرأت یا کوئی مخصوص دعا مقرر نہیں کی گئی ہے ، جب امام تکبیر کہے ، تو تم بھی تکبیر کہو ، اور عمدہ گفتگو کثرت کے ساتھ کرو ( یعنی اچھے الفاظ میں میت کے لئے دعا کرو ) ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم ہر نماز میں اور نماز جنازہ میں تکبیر کہتے وقت رفع یدین کرتے تھے ۔
( علامہ ہیثمی فرماتے ہیں : ) میں یہ کہتا ہوں : یہ روایت ” صحیح “ میں منقول ہے ، تاہم یہ الفاظ نہیں ہیں : ” نماز جنازہ میں “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عبداللہ بن محرر ہے ، اور وہ مجہول ہے ۔

سیدنا ابوامامہ رضی اللہ عنہ بیان کرتے ہیں : نبی اکرم صلی اللہ علیہ وسلم نے نماز جنازہ پڑھائی آپ کے ساتھ سات افراد تھے آپ نے تین آدمیوں کی ایک صف بنائی دو آدمیوں کی ایک صف بنائی اور دو آدمیوں کی ایک صف بنائی ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی ابن لہیعہ ہے ، اور اس کے بارے میں کلام کیا گیا ہے ۔

سیدہ اسماء بنت یزید رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” جب تم نماز جنازہ ادا کرو تو سورت فاتحہ پڑھ لو “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی معلی بن حمران ہے میں نے کسی کو اس کا ذکر کرتے ہوئے نہیں پایا ہے ۔ اس روایت کے بقیہ رجال کی توثیق کی گئی ہے ، اور اس کے بعض رجال ( کے بارے میں کلام کیا گیا ہے ) ۔

سیدہ ام عفیف رضی اللہ عنہا بیان کرتی ہیں : جب نبی اکرم صلی اللہ علیہ وسلم نے خواتین سے بیعت لی تھی تو ہم نے نبی اکرم صلی اللہ علیہ وسلم کی بیت کی تھی آپ نے خواتین سے یہ بیعت لی تھی کہ تم کسی غیر محرم کے ساتھ بات چیت نہیں کرو گی ، اور آپ نے ہمیں یہ حکم دیا تھا کہ ہم اپنے مردوں پر سورت فاتحہ پڑھیں گی ( یعنی نماز جنازہ میں سورت فاتحہ پڑھیں گی ) ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی عبدالمنعم ابوسعید ہے ، اور وہ ضعیف ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے نماز جنازہ میں چار مرتبہ سورت «الحمدلله رب العالمين» پڑھی تھی ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ناہض بن قاسم ہے میں نے کسی کو اس کے حالات بیان کرتے ہوئے نہیں پایا ہے ۔ اس روایت کے بقیہ رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : سیدنا جابر بن عتیک رضی اللہ عنہ ( راوی کو شک ہے شاید یہ الفاظ ہیں : ) سیدنا سہل بن عتیک رضی اللہ عنہ کا جنازہ لایا گیا یہ وہ پہلے فرد ہیں جن کی نماز جنازہ ، جنازگاہ میں ادا کی گئی نبی اکرم صلی اللہ علیہ وسلم آگے بڑھے آپ نے تکبیر پڑھی پھر آپ نے سورت فاتحہ پڑھی اور اسے بلند آواز میں پڑھا پھر آپ نے دوسری تکبیر کہی پھر آپ نے تیسری تکبیر کہی آپ نے میت کے لئے دعا کرتے ہوئے یہ کہا: ” اے اللہ ! تو اس کی مغفرت کر دے تو اس پر رحم کر تو اس کے درجہ کو بلند کر دے “ ۔ پھر آپ نے چوتھی تکبیر کہی پھر آپ نے مومن مردوں اور مومن خواتین کے لئے دعا کی اور پھر سلام پھیر دیا ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی یزید بن عبدالملک نوفلی ہے ، اور وہ ضعیف ہے ۔

سیدنا ابوقتادہ رضی اللہ عنہ بیان کرتے ہیں : وہ ایک نماز جنازہ میں نبی اکرم صلی اللہ علیہ وسلم کے ساتھ موجود تھے وہ بیان کرتے ہیں : میں نے نبی اکرم صلی اللہ علیہ وسلم کو یہ دعا کرتے ہوئے سنا : ” اے اللہ ! تو ہمارے زندہ افراد ہمارے مرحومین ہمارے موجود افراد ہمارے غیر موجود افراد ہمارے چھوٹوں ہمارے بڑوں ہمارے مردوں اور ہماری خواتین کی مغفرت کر دے “ ۔ ابوسلمہ نامی راوی نے یہ الفاظ زائد نقل کیے ہیں : ” تو ہم میں سے جس کو زندہ رکھے گا اسے اسلام پر زندہ رکھنا اور تو ہم میں سے جسے موت دے گا اسے ایمان پر موت دینا “ ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

ابوسلمہ بن عبدالرحمن بن عوف اپنے والد کے حوالے سے یہ بات نقل کرتے ہیں : نبی اکرم صلی اللہ علیہ وسلم نے نماز جنازہ میں یہ دعا کی : ” اے اللہ ! تو ہمارے زندہ ہمارے مرحومین ہمارے موجود افراد غیر موجود افراد ہمارے مردوں ہماری خواتین ہمارے چھوٹوں ہمارے بڑوں کی مغفرت کر دے ہم میں سے جسے تو زندہ رکھے گا ، اس کو اسلام پر زندہ رکھنا اور ہم میں سے جسے تو موت دے گا اسے ایمان پر موت دینا “ ۔
یہ روایت امام بزار نے نقل کی ہے ۔ اس کی سند میں ایک راوی محمد بن ابولیلی ہے ، اور اس کے بارے میں کلام کیا گیا ہے ۔

سیدہ عائشہ صدیقہ رضی اللہ عنہا بیان کرتی ہیں : میں نے نبی اکرم صلی اللہ علیہ وسلم کو نماز جنازہ میں یہ پڑھتے ہوئے سنا : ” اے اللہ ! تو اس کی مغفرت کر دے تو اس پر رحمت نازل کر اور اسے اپنے رسول کے حوض پر لے آنا “ ۔
یہ روایت ابویعلیٰ نے اور امام طبرانی نے معجم اوسط میں نقل کی ہے ۔ انہوں نے اس میں یہ الفاظ زائد نقل کیے ہیں : ” تو اس میں برکت رکھ دے “ ۔ اس روایت کی سند میں ایک راوی عاصم بن ہلال ہے ، جسے ابوحاتم نے ” ثقہ “ قرار دیا ہے ، اور دیگر حضرات نے ضعیف کہا: ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کے بارے میں یہ بات نقل کرتے ہیں : جب آپ نماز جنازہ ادا کرتے تھے تو اس میں یہ دعا پڑھتے تھے : ” اے اللہ ! یہ تیرا بندہ ہے تیرے بندے کا بیٹا ہے یہ اس بات کی گواہی دیتا تھا کہ تیرے علاوہ اور کوئی معبود نہیں ہے ، اور سیدنا محمد صلی اللہ علیہ وسلم تیرے بندے اور تیرے رسول ہیں تو اس کے بارے میں زیادہ بہتر جانتا ہے اگر یہ اچھائی کرنے والا تھا ، تو اس کی اچھائی میں اضافہ کر دے اور اگر یہ برائی کرنے والا تھا ، تو اس کی مغفرت کر دے تو ہمیں اس کے اجر سے محروم نہ رکھنا اور اس کے بعد ہمیں آزمائش کا شکار نہ کرنا“ ۔
یہ روایت امام ابویعلیٰ نے نقل کی ہے ، اور اس کے رجال ” صحیح “ کے رجال ہیں ۔

ابوصدیق ناجی بیان کرتے ہیں : ہم نے سیدنا ابوسعید رضی اللہ عنہ سے نماز جنازہ کے بارے میں دریافت کیا ، تو انہوں نے جواب دیا ہم یہ پڑھا کرتے تھے : ” اے اللہ ! تو ہمارا اور اس کا پروردگار ہے ، تو نے اسے پیدا کیا ، تو نے اسے رزق عطا کیا ، تو نے اسے زندگی دی تو اس کا کفیل ہوا تو ہماری اور اس کی مغفرت کر دے تو ہمیں اس کے اجر سے محروم نہ رکھنا اور اس کے بعد تو ہمیں گمراہ نہ کرنا “ ۔
یہ روایت امام بزار نے نقل کی ہے ۔ امام بزار کے استاد کے علاوہ اس کے بقیہ رجال ” صحیح“ کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نماز جنازہ میں یہ دعا کرتے تھے : ” اے اللہ ! تو ہمارے زندوں ، ہمارے مرحومین ہمارے موجود افراد ہمارے غیر موجود افراد ہماری خواتین ہمارے مردوں کی مغفرت کر دے ہم میں سے جسے تو زندگی دے گا اسے اسلام پر زندہ رکھنا اور ہم میں سے جسے تو موت دے گا اسے ایمان پر موت دینا اے اللہ ! تیری معافی کا سوال ہے تیری معافی کا سوال ہے “ ۔
یہ روایت امام طبرانی نے معجم کبیر اور معجم اوسط میں نقل کی ہے ، اور اس کی سند حسن ہے ۔

سیدنا حارث رضی اللہ عنہ بیان کرتے ہیں : نبی اکرم صلی اللہ علیہ وسلم نے انہیں نماز جنازہ کی تعلیم دیتے ہوئے انہیں ( اس دعا کی تعلیم دی تھی ) ” اے اللہ ! ہمارے زندہ لوگوں اور ہمارے مرحومین کی مغفرت کر دے ہمارے معاملات کو ٹھیک کر دے ہمارے دلوں کے درمیان الفت پیدا کر دے اے اللہ ! یہ تیرا بندہ فلاں بن فلاں ہے ہمیں صرف بھلائی کا علم ہے ، اور تو اس کے بارے میں زیادہ بہتر جانتا ہے ، تو ہماری اور اس کی مغفرت کر دے “ ۔ راوی بیان کرتے ہیں : میں نے آپ کی خدمت میں عرض کی : حالانکہ میں ان میں سب سے کمسن تھا کہ اگر مجھے بھلائی کا علم نہ ہو ؟ تو آپ نے فرمایا : تم صرف وہ بات کہو جو تم جانتے ہو “ ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی لیث بن ابوسلیم ہے وہ ثقہ ہے ، لیکن وہ تدلیس کرنے والا ہے ۔

سیدنا یزید بن رکانہ رضی اللہ عنہ بیان کرتے ہیں : نبی اکرم صلی اللہ علیہ وسلم جب نماز جنازہ ادا کرتے تھے تو چار تکبیریں کہتے تھے ، اور یہ دعا کرتے تھے : ” اے اللہ ! یہ تیرا بندہ ہے ، اور تیری کنیز کا بیٹا ہے یہ تیری رحمت کا محتاج ہے ، اور تو اس کو عذاب دینے سے بے نیاز ہے اگر یہ اچھائی کرنے والا تھا ، تو تو اس کی اچھائی میں اضافہ کر دے اور اگر یہ برائی کرنے والا تھا ، تو تو اس سے درگزر فرما لے “ ۔ پھر جو اللہ کو منظور ہوتا تھا آپ وہ دعا کرتے تھے ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی یعقوب بن حمید ہے ، اور اس کے بارے میں کلام کیا گیا ہے ۔

سیدنا انس بن مالک رضی اللہ عنہ بیان کرتے ہیں : سیدنا ابوطلحہ رضی اللہ عنہ کے صاحبزادے انتقال کر گئے نبی اکرم صلی اللہ علیہ وسلم نے ان کی نماز جنازہ پڑھائی سیدہ ام سلیم رضی اللہ عنہا سیدنا ابوطلحہ رضی اللہ عنہ کے پیچھے کھڑی ہوئی تھیں ، یوں لگتا تھا جیسے وہ لوگ مرغ کی کلغی ہیں ۔
یہ روایت امام أحمد نے نقل کی ہے ، اس کی سند میں ایک راوی اُم یحیی ہے ، میں نے کسی کو اس خاتون کے حالات بیان کرتے ہوئے نہیں پایا ہے ۔

عبداللہ بن ابوطلحہ بیان کرتے ہیں : سیدنا ابوطلحہ رضی اللہ عنہ نے نبی اکرم صلی اللہ علیہ وسلم کو عمیر بن ابوطلحہ کے انتقال پر ان کی نماز جنازہ کے لئے بلایا نبی اکرم صلی اللہ علیہ وسلم ان لوگوں کے ہاں تشریف لائے نبی اکرم صلی اللہ علیہ وسلم نے ان لوگوں کے گھر میں اس بچے کی نماز جنازہ پڑھائی نبی اکرم صلی اللہ علیہ وسلم آگے ہو گئے سیدنا ابوطلحہ رضی اللہ عنہ آپ کے پیچھے تھے سیدہ ام سلیم رضی اللہ عنہا سیدنا ابوطلحہ رضی اللہ عنہ کے پیچھے تھیں اور ان کے ساتھ ان کے علاوہ کوئی اور نہیں تھا ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔

سیدنا ابوموسی اشعری رضی اللہ عنہ بیان کرتے ہیں : ہم نے نبی اکرم صلی اللہ علیہ وسلم کی اقتداء میں نماز جنازہ ادا کی ، تو آپ نے دائیں طرف اور بائیں طرف سلام پھیرا ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی خالد بن نافع اشعری ہے ، جسے الوزرعہ نے ” ضعیف“ قرار دیا ہے ۔

سیدنا عبداللہ بن مسعود رضی اللہ عنہ فرماتے ہیں : کچھ کام ایسے ہیں جو نبی اکرم صلی اللہ علیہ وسلم کیا کرتے تھے ، اور لوگوں نے انہیں ترک کر دیا ہے ، ان میں سے ایک امام کا نماز جنازہ میں اس طرح سلام پھیرنا ہے ، جس طرح وہ عام نماز میں سلام پھیرتا ہے ۔
یہ روایت امام طبرانی نے معجم کبیر میں نقل کی ہے ، اور اس کے رجال ثقہ ہیں ۔