مجمع الزوائد ومنبع الفوائد

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مومن کی مثال ( کھیت کی ) بالی کی مانند ہے ، جو کبھی جھک جاتی ہے ، کبھی سیدھی ہو جاتی ہے ، اور کافر کی مثال صنوبر کے درخت کی مانند ہے ، جو ہمیشہ سیدھا رہتا ہے یہاں تک کہ ایک ہی مرتبہ گرتا ہے ، اور اسے پتہ بھی نہیں : چلتا “ ۔
یہ روایت امام أحمد نے نقل کی ہے ۔ اس کی سند میں ایک راوی ابن لہیعہ ہے اس کے بارے میں کلام کیا گیا ہے
یہ روایت امام بزار نے نقل کی ہے ، اور اس کے رجال ثقہ ہیں ۔

سیدنا ابی بن کعب رضی اللہ عنہ کے بارے میں یہ بات منقول ہے وہ بیان کرتے ہیں : نبی اکرم صلی اللہ علیہ وسلم کی خدمت میں ایک شخص حاضر ہوا نبی اکرم صلی اللہ علیہ وسلم نے دریافت کیا : تمہیں ” اُم ملدم “ آخری مرتبہ کب ہوا تھا ( راوی کہتے ہیں : ) یہ ایک تپش ہوتی ہے ، جو جلد اور گوشت کے درمیان محسوس ہوتی ہے ( شاید اس سے مراد بخار ہے ) اس نے کہا: یہ تکلیف تو مجھے کبھی لاحق نہیں ہوئی نبی اکرم صلی اللہ علیہ وسلم نے ارشاد فرمایا : ” مومن کی مثال ، پودے ( یا ترو تازہ گھاس ) کی مانند ہوتی ہے ، جو کبھی سرخ ہو جاتا ہے ، اور کبھی زرد ہو جاتا ہے “ ۔
یہ روایت امام أحمد نے نقل کی ہے ، اور اس کی سند میں ایسا راوی ہے ، جس کا نام بیان نہیں کیا گیا ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مومن کی مثال ( کھیت کی ) بالی کی مانند ہوتی ہے ، جو کبھی جھک جاتی ہے ، اور کبھی سیدھی ہو جاتی ہے “ ۔
یہ روایت امام ابویعلیٰ نے نقل کی ہے ۔ اس کی سند میں ایک راوی فہد بن حبان ہے ، اور وہ ضعیف ہے
یہ روایت امام بزار نے نقل کی ہے ، اور اس کی سند میں ایک راوی عبداللہ بن سلم ہے ، جو سابری کا شاگرد ہے میں اس سے واقف نہیں ہوں ، اس روایت کے بقیہ رجال ” صحیح “ کے رجال ہیں ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مومن کی مثال بے آب و گیاہ جگہ پر موجود ” پر “ کی طرح ہے ، جسے ہوائیں الٹتی پلٹتی رہتی ہیں “ ۔
یہ روایت امام بزار نے نقل کی ہے ۔ اس کی سند میں ایک راوی أحمد بن عبدالجبار عطاردی ہے جسے امام دارقطنی رحمہ اللہ اور دیگر حضرات نے ثقہ قرار دیا ہے ۔ ابن عدی کہتے ہیں : میں نے اہل عراق کو دیکھا ہے کہ وہ اس کے ضعیف ہونے پر متفق ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مومن کی مثال کھیت کی تازہ بالی کی مانند ہے ، جسے ہوائیں الٹتی پلٹتی رہتی ہیں ، یہاں تک کہ کبھی ہوا اسے بچھاڑ بھی دیتی ہے “ ۔ ( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں منقول ہے ، تا ہم اس میں یہ الفاظ نہیں ہیں : ” یہاں تک کہ کبھی ہوا اسے بچھاڑ بھی دیتی ہے “ ۔
یہ روایت امام بزار نے نقل کی ہے ۔ اس کی سند میں ایک راوی محمد بن اسحاق ہے ، اور وہ تدلیس کرنے والا ہے ۔

سیدنا عمار بن یاسر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مومن کی مثال ( کھیت کی ) بالی کی مانند ہے ، جو کبھی جھک جاتی ہے ، اور کبھی کھڑی ہو جاتی ہے ، اور کافر کی مثال صنوبر کے درخت کی مانند ہے کہ جو ( ایک ہی مرتبہ ) گر جاتا ہے ، اور اس کا پتہ بھی نہیں چلتا “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی مہلب بن العلاء ہے میں نے کسی کو اس کا ذکر کرتے ہوئے نہیں پایا ہے ۔ ( علامہ ہیثمی فرماتے ہیں : ) میں یہ کہتا ہوں : ادب سے متعلق باب میں آگے چل کر کچھ احادیث آئیں گی جو اس کی مانند ہوں گی باقی اللہ بہتر جانتا ہے ۔