مجمع الزوائد ومنبع الفوائد

سیدنا انس رضی اللہ عنہ بیان کرتے ہیں : ایک خاتون نبی اکرم صلی اللہ علیہ وسلم کی خدمت میں حاضر ہوئی اس نے عرض کی : یا رسول اللہ ! میری بیٹی ایسی ہے اس نے اپنی بیٹی کے حسن و جمال کا ذکر کیا ، اور یہ کہا: کہ میں اس کا رشتہ آپ کے ساتھ کرنا چاہتی ہوں نبی اکرم صلی اللہ علیہ وسلم نے فرمایا : میں اسے قبول کرتا ہوں وہ عورت مسلسل اس لڑکی کی تعریفیں بیان کرتی رہی یہاں تک کہ اس نے یہ بھی ذکر کیا کہ وہ لڑکی کبھی بیمار نہیں ہوئی اور اسے کبھی کسی بیماری کی شکایت نہیں ہوئی تو نبی اکرم صلی اللہ علیہ وسلم نے ارشاد فرمایا : مجھے تمہاری بیٹی میں کوئی دلچپسی نہیں ہے ۔
یہ روایت امام أحمد اور امام ابویعلیٰ نے نقل کی ہے ، اور اس کے رجال ثقہ ہیں ۔

سیدنا ابوہریرہ رضی اللہ عنہ بیان کرتے ہیں : ایک دیہاتی نبی اکرم صلی اللہ علیہ وسلم کی خدمت میں حاضر ہوا نبی اکرم صلی اللہ علیہ وسلم نے اس سے دریافت کیا : تمہیں کبھی بخار ہوا ہے ؟ اس نے دریافت کیا : بخار کیا ہوتا ہے نبی اکرم صلی اللہ علیہ وسلم نے فرمایا : یہ ایک تپش ہوتی ہے ، جو جلد اور گوشت کے درمیان ہوتی ہے اس نے کہا: میں نے یہ صورت حال کبھی نہیں پائی ہے نبی اکرم صلی اللہ علیہ وسلم نے دریافت کیا : تمہیں کبھی صداع ہوا ہے ؟ اس نے دریافت کیا : صداع کیا ہوتا ہے ؟ نبی اکرم صلی اللہ علیہ وسلم نے ارشاد فرمایا : یہ ایک رگ ہے ، جو انسان کے سر میں ضرب لگاتی ہے ( شاید اس سے مراد بلند فشار دم ہے ) اس نے کہا: میں نے یہ صورت حال بھی کبھی نہیں پائی ہے ، جب وہ شخص چلا گیا تو نبی اکرم صلی اللہ علیہ وسلم نے ارشاد فرمایا : جو شخص یہ چاہتا ہو کہ کسی جہنمی کو دیکھے اسے اس شخص کو دیکھ لینا چاہیے “ ۔
یہ روایت امام أحمد اور امام بزار نے نقل کی ہے ۔ ایک روایت میں امام أحمد نے یہ الفاظ نقل کیے ہیں : ” نبی اکرم صلی اللہ علیہ وسلم کا گزر ایک دیہاتی کے پاس سے ہوا اس کی صحت اور جسمانی حالت آپ کو اچھی لگی آپ نے اسے بلوایا “ اس کے بعد راوی نے حسب سابق حدیث ذکر کی ہے ، اور اس کی سند حسن ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” کیا میں تم لوگوں کو اہل جنت کے بارے میں نہ بتاؤں ؟ لوگوں نے عرض کی : جی ہاں ۔ یا رسول اللہ ! نبی اکرم صلی اللہ علیہ وسلم نے فرمایا : ضعیف اور مظلوم لوگ ( اہل جنت ہیں ) نبی اکرم صلی اللہ علیہ وسلم نے فرمایا : کیا میں تمہیں اہل جنم کے بارے میں نہ بتاؤں ؟ لوگوں نے عرض کی : جی ہاں ! یا رسول اللہ ! نبی اکرم صلی اللہ علیہ وسلم نے ارشاد فرمایا : ہر سخت مزاج سرکش ، یہ وہ لوگ ہیں جنہیں سر میں درد بھی نہیں ہوتا“ ۔
یہ روایت امام أحمد نے نقل کی ہے ۔ اس کی سند میں ایک راوی براء بن یزید غنوی ہے ۔ ابن عدی کہتے ہیں : یہ میرے نزدیک سچائی سے زیادہ قریب ہے ۔ ( علامہ ہیثمی فرماتے ہیں : ) میں یہ کہتا ہوں : امام أحمد اور دیگر حضرات نے اسے ” ضعیف“ قرار دیا ہے ۔

سیدنا انس رضی اللہ عنہ بیان کرتے ہیں : ایک دیہاتی نبی اکرم صلی اللہ علیہ وسلم کی خدمت میں حاضر ہوا نبی اکرم صلی اللہ علیہ وسلم نے دریافت کیا : تمہیں اُم ملدم آخری مرتبہ کب ہوا تھا ؟ اس نے دریافت کیا : ام ملدم کیا ہوتا ہے ؟ نبی اکرم صلی اللہ علیہ وسلم نے ارشاد فرمایا : ایک تپش جو جلد اور ہڈیوں کے درمیان ہوتی ہے ، اور خون چوس لیتی ہے ، اور گوشت کو کھا لیتی ہے اس نے کہا: مجھے یہ بیماری کبھی لاحق نہیں ہوئی نبی اکرم صلی اللہ علیہ وسلم نے ارشاد فرمایا : جو شخص یہ چاہتا ہو کہ وہ جہنمی کو دیکھے اُسے اس شخص کو دیکھ لینا چاہیے پھر نبی اکرم صلی اللہ علیہ وسلم نے ارشاد فرمایا : اسے میرے پاس سے لے جاؤ “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی حسن بن ابوجعفر ہے ، عمرو بن علی بیان کرتے ہیں : یہ صدوق اور منکر الحدیث ہے ۔ ابن عدی کہتے ہیں : یہ صدوق ہے یہ ان افراد میں سے ایک ہے ، جو جان بوجھ کر غلط بیانی نہیں کرتے ہیں اس کے حوالے سے صالح احادیث منقول ہیں ۔