مجمع الزوائد ومنبع الفوائد

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مجھے وضو کرواؤ ! میں آپ کے لئے وضو کا پانی لے کر آیا ، آپ صلی اللہ علیہ وسلم نے پہلے استنجاء کیا ، پھر اپنا ہاتھ مٹی میں ڈال کر اسے پونچھ کر اُسے دھو لیا ، پھر آپ نے وضو کرتے ہوئے موزوں پر مسح کیا ، میں نے عرض کی : یا رسول اللہ ! کیا آپ اپنے پاؤں نہیں دھوئیں گے ؟ آپ نے ارشاد فرمایا : میں نے ان دونوں کو جب موزوں میں داخل کیا تھا ، تو یہ دونوں پاک ( یعنی باوضو ) تھے ۔
یہ روایت امام أحمد نے نقل کی ہے ، اس کی سند میں ایک ایسا راوی ہے جس کا نام بیان نہیں کیا گیا ہے ۔

سیدنا ابوایوب رضی اللہ عنہ کے بارے میں یہ بات منقول ہے : انہوں نے موزے اُتارے ، لوگوں نے اُن کی طرف دیکھنا شروع کر دیا تو انہوں نے فرمایا : میں نے اللہ کے رسول کو ان دونوں پر مسح کرتے ہوئے دیکھا ہے ، لیکن مجھے وضو کرنا پسند ہے ۔
یہ روایت امام أحمد نے نقل کی ہے ۔

امام طبرانی نے معجم کبیر میں یہ روایت نقل کی ہے اور یہ الفاظ زائد نقل کئے ہیں : سیدنا ابوایوب انصاری رضی اللہ عنہ موزوں پر مسح کرنے کا حکم دیتے تھے اور خود پاؤں دھویا کرتے تھے ، اُن سے اس بارے میں بات کی گئی ، تو انہوں نے فرمایا : یہ تو میرے لیے بہت برا ہو گا ، کہ اگر اس کی سہولت تمہارے لئے ہو ، اور اس کا گناہ مجھ پر ہو ۔ اس کے رجال کی توثیق کی گئی ہے ۔

سیدنا مغیرہ بن شعبہ رضی اللہ عنہ بیان کرتے ہیں : ایک سفر کے دوران ، میں نے نبی اکرم صلی اللہ علیہ وسلم کو وضو کروایا ، آپ نے اپنا چہرہ اور دونوں بازو دھو لیے ، اپنے سر پر مسح کیا اور موزوں پر مسح کیا ، میں نے عرض کی : یا رسول اللہ صلی اللہ علیہ وسلم ! کیا میں آپ کے موزے اتار دوں ؟ آپ نے فرمایا : جی نہیں ! میں نے جب ان دونوں ( پاؤں کو موزوں میں ) داخل کیا تھا ، تو یہ دونوں پاک تھے ۔ راوی بیان کرتے ہیں : اُس کے بعد میں کبھی ننگے پاؤں نہیں چلا ،
یہ روایت امام أحمد نے نقل کی ہے ، یہ ” صحیح “ میں بھی منقول ہے ، تاہم اس میں یہ الفاظ نہیں ہیں : ” اس کے بعد میں کبھی بھی ننگے پاؤں نہیں چلا “ اس روایت کے رجال ” صحیح “ کے رجال ہیں ۔

سیدنا ثوبان رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو دیکھا ، آپ صلی اللہ علیہ وسلم نے وضو کرتے ہوئے موزوں اور چادر پر مسح کیا ۔
یہ روایت امام أحمد اور امام بزار نے نقل کی ہے ، اس کی سند میں ایک راوی عتبہ بن ابوامیہ ہے ، ابن حبان نے اس کا ذکر کتاب ” الثقات “ میں کیا ہے وہ فرماتے ہیں یہ ” مقطوع “ روایات نقل کرتا ہے ۔

سیدنا ابوبرزہ رضی اللہ عنہ نبی اکرم صلی اللہ علیہ وسلم کے حوالے سے حدیث روایت کرتے ہیں ۔ ۔ ۔ ۔ ۔ ۔ ۔ اس کے بعد راوی نے طویل حدیث نقل کی ہے ، جس میں یہ مذکور ہے : کہ نبی اکرم صلی اللہ علیہ وسلم نے وضو کرتے ہوئے موزوں پر مسح کیا ۔
یہ روایت امام بزار نے نقل کی ہے ، اس کی سند میں ایک راوی عبدالسلام ہے ، جس نے ازرق بن قیس سے روایت نقل کی ہے اور اس سے یزید بن ہارون نے روایت نقل کی ہے ، اگر تو وہ حرب کا بیٹا ہے ، تو پھر ٹھیک ہے ، ورنہ میں اُس سے واقف نہیں ہوں ۔

سیدنا عمر رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو موزوں پر مسح کرنے کا حکم دیتے ہوئے سنا ہے ، جبکہ آدمی نے انہیں باوضو حالت میں پہنا ہو ۔
یہ روایت امام ابویعلیٰ نے نقل کی ہے ، سیدنا عمر رضی اللہ عنہ کے حوالے سے ” صحیح “ میں سیدنا سعد رضی اللہ عنہ کا واقعہ منقول ہے ، جو اس کے علاوہ ہے ، اُن کے حوالے سے امام ابن ماجہ نے ایک اور حدیث بھی نقل کی ہے ، اس روایت کے رجال ثقہ ہیں ۔

سیدنا عبداللہ بن عمر رضی اللہ عنہما بیان کرتے ہیں : سیدنا عمر رضی اللہ عنہ قضائے حاجت کے لئے گئے ، جب وہ واپس آئے ( تو وضو کرتے ہوئے ) انہوں نے موزوں پر مسح کیا اور یہ بات بیان کی : نبی اکرم صلی اللہ علیہ وسلم بھی ( ایک مرتبہ قضائے حاجت کے لئے تشریف لے گئے تھے ) جب آپ واپس تشریف لائے ( تو وضو کرتے ہوئے ) آپ صلی اللہ علیہ وسلم نے موزوں پر مسح کیا تھا ۔
یہ روایت امام ابویعلیٰ نے نقل کی ہے ، امام بزار نے اس کی مانند روایت نقل کی ہے ، اس کی سند میں ایک راوی محمد بن ابوحمید ہے اور اس کے ضعیف ہونے پر اتفاق ہے ۔

عوسجہ ، اپنے والد کا یہ بیان نقل کرتے ہیں : میں نبی اکرم صلی اللہ علیہ وسلم کے ساتھ سفر کر رہا تھا ، آپ موزوں پر مسح کرتے رہے ۔
یہ روایت امام بزار نے نقل کی ہے ، وہ فرماتے ہیں : یہ عوسجہ کے حوالے سے ، اُن کے والد کے حوالے سے سیدنا علی رضی اللہ عنہ سے منقول ہے ، اور مہدی بن حفص نامی راوی نے اس میں غلطی کی ہے ۔
( علامہ ہیثمی فرماتے ہیں : ) میں یہ کہتا ہوں : انہوں نے اسی طرح کہا: ہے ، عوسجہ بن مسلم کے حوالے سے ، اُن کے والد سے منقول روایت آگے آئے گی ۔

سیدنا معقل بن یسار رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے پاس موجود تھے ، اسی دوران سیدنا مغیرہ بن شعبہ رضی اللہ عنہ اندر آئے انہوں نے موزے پہنے ہوئے تھے ، میں نے اسلام قبول کرنے کے بعد ، سب سے پہلے سیدنا مغیرہ رضی اللہ عنہ کو موزے پہنے ہوئے دیکھا لوگوں نے اُن پر ہاتھ پھیرنا شروع کیا اور دریافت کرنا شروع کیا : یہ کیا ہے ؟ انہوں نے بتایا : موزے ہیں ، نبی اکرم صلی اللہ علیہ وسلم نے ارشاد فرمایا : عنقریب تم لوگوں کو بکثرت موزے ملیں گے ، لوگوں نے عرض کی : یا رسول اللہ ! نماز کے لیے وضو کے حوالے سے آپ ہمیں کیا حکم دیتے ہیں ؟ نبی اکرم صلی اللہ علیہ وسلم نے ارشاد فرمایا : تم ان پر مسح کر لینا ، راوی کو شک ہے ، یا شاید یہ الفاظ ہیں : ان پر وضو کر لینا ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی حسن بن دینار ہے اور وہ متروک ہے ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم کے وصال سے ایک ماہ پہلے ، میں نے آپ صلی اللہ علیہ وسلم کو وضو کروایا ، تو آپ نے موزوں پر اور عمامہ پر مسح کیا ۔
یہ روایت امام طبرانی نے معجم اوسط میں نقل کی ہے ، اس کو امام ابن ماجہ نے بھی نقل کیا ہے ، تاہم اس میں یہ الفاظ نہیں ہیں : ” آپ کے وصال سے ایک ماہ پہلے ۔ ۔ ۔ ۔ ۔ ۔ “ ۔ اس روایت کی سند میں ایک راوی علی بن فضیل بن عبدالعزیز ہے ، میں نے کسی کو اس کا ذکر کرتے ہوئے نہیں پایا ہے ۔

سیدنا ابوطلحہ رضی اللہ عنہ بیان کرتے ہیں : نبی اکرم صلی اللہ علیہ وسلم نے وضو کرتے ہوئے موزوں اور چادر پر مسح کیا ۔
یہ روایت امام طبرانی نے معجم صغیر میں نقل کی ہے اور اس کے رجال کی توثیق کی گئی ہے ۔

سیدنا ابوسعید خدری رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے ہمراہ ایک غزوہ میں شریک ہوئے ، آپ ایک کنویں کے پاس تشریف لائے ، نبی اکرم صلی اللہ علیہ وسلم نے پڑاؤ کیا ، تو ہم بھی اپنی سواریوں سے اتر گئے ، نماز کا وقت ہوا ، نبی اکرم صلی اللہ علیہ وسلم نے ارشاد فرمایا : اے بلال ! اُٹھ کر اذان دے دو ! سیدنا بلال رضی اللہ عنہ گئے ، انہوں نے پیشاب کیا ، پھر وہ کنویں کے پاس آئے ، اپنے چہرے اور دونوں بازؤں کو دھویا ، پھر انہوں نے موزوں کی طرف ہاتھ بڑھایا ، انہوں نے سیاہ رنگ کے دو موزے پہنے ہوئے تھے ، نبی اکرم صلی اللہ علیہ وسلم انہیں دیکھ رہے تھے ، آپ صلی اللہ علیہ وسلم نے بلند آواز میں انہیں مخاطب کر کے فرمایا : اے بلال ! موزوں اور چادر پر مسح کر لو !
یہ روایت امام طبرانی نے معجم اوسط میں نقل کی ہے ، اس کی سند میں ایک راوی غسان بن عوف ہے ، ازدی کہتے ہیں : وہ ضعیف ہے ۔

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم کا گزر ایک شخص کے پاس سے ہوا ، جو وضو کر رہا تھا ، اُس نے موزوں بھی دھو لیے ، نبی اکرم صلی اللہ علیہ وسلم نے اُسے پاؤں مارا ، اور ارشاد فرمایا : سنت اس طرح نہیں ہے ، ہمیں موزوں پر اس طرح مسح کرنے کا حکم دیا گیا ہے ، نبی اکرم صلی اللہ علیہ وسلم نے اپنے دونوں ہاتھ دونوں موزوں پر پھیر کر یہ بات ارشاد فرمائی ۔
یہ روایت امام طبرانی نے معجم اوسط میں نقل کی ہے اور یہ بات بیان کی ہے ۔ بقیہ اسے نقل کرنے میں منفرد ہے ۔

سیدنا جابر بن عبداللہ رضی اللہ عنہ بیان کرتے ہیں : نبی اکرم صلی اللہ علیہ وسلم نے موزوں پر مسح کیا تھا ۔
یہ روایت امام طبرانی نے معجم اوسط میں نقل کی ہے اور اگر اللہ نے چاہا ، تو اس کی سند حسن ہو گی ۔

سیدنا جابر بن سمرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے موزوں پر مسح کیا تھا ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابوبلال اشعری ہے ، جسے امام دارقطنی رحمہ اللہ نے ” ضعیف “ قرار دیا ہے ۔

سیدنا ابوہریرہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو دیکھا ، آپ صلی اللہ علیہ وسلم نے وضو کرتے ہوئے اپنے عمامے پر مسح کیا اور موزوں پر مسح کیا ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عبدالحکم بن میسرہ ہے اور وہ ضعیف ہے ۔

سیدنا خزیمہ بن ثابت رضی اللہ عنہ بیان کرتے ہیں : نبی اکرم صلی اللہ علیہ وسلم موزوں اور چادر پر مسح کر لیتے تھے ۔
یہ روایت امام طبرانی نے معجم اوسط میں نقل کی ہے اور اس کی سند حسن ہے ۔

سیدنا عبداللہ بن عباس رضی اللہ عنہما بیان کرتے ہیں : سیدنا سعد رضی اللہ عنہ اور سیدنا عبداللہ بن عمر رضی اللہ عنہما نے سیدنا عمر رضی اللہ عنہ کے سامنے موزوں پر مسح کا ذکر کیا ، تو سیدنا عمر رضی اللہ عنہ نے ( سیدنا عبداللہ بن عمر رضی اللہ عنہما سے ) فرمایا : سعد ( دینی احکام کی ) تم سے زیادہ سمجھ بوجھ رکھتا ہے ، تو سیدنا عبداللہ بن عباس رضی اللہ عنہما نے کہا: اے سیدنا سعد ! ہم اس بات کا انکار نہیں کرتے ہیں ، کہ نبی اکرم صلی اللہ علیہ وسلم نے مسح کیا تھا ، لیکن ( سوال یہ ہے ) کہ کیا نبی اکرم صلی اللہ علیہ وسلم نے اس وقت مسح کیا تھا ، جب سورہ مائدہ نازل ہوئی تھی ، کیونکہ اس نے ہر چیز کو محکم کر دیا اور وہ قرآن میں ، نازل ہونے والی آخری سورت ہے ، کیا آپ نے اس چیز پر غور نہیں کیا ؟ راوی بیان کرتے ہیں : تو کسی نے بھی کوئی بات نہیں کی ۔
یہ روایت امام طبرانی نے معجم اوسط میں نقل کی ہے امام ابن ماجہ نے اس کا ایک حصہ نقل کیا ہے اس کی سند میں ایک راوی عبید بن عبیدہ تمار ہے ، ابن حبان نے اس کا تذکرہ کتاب ” الثقات “ میں کیا ہے اور یہ بات بیان کی ہے : یہ غریب روایات نقل کرتا ہے -

سیدنا اسامہ بن زید رضی اللہ عنہما بیان کرتے ہیں : نبی اکرم صلی اللہ علیہ وسلم نے موزوں پر مسح کیا ۔
یہ روایت امام طبرانی نے معجم کبیر میں نقل کی ہے ، اسے عبدالرحمن بن یزید نے ، اپنے والد کے حوالے سے ، عطاء بن یسار سے نقل کیا ہے ، میں نہ تو عبدالرحمن سے واقف ہوں ، اور نہ ہی یزید سے واقف ہوں ۔

عوسجہ بن مسلم ، اپنے والد کا یہ بیان نقل کرتے ہیں : میں نے نبی اکرم صلی اللہ علیہ وسلم کو دیکھا ، آپ صلی اللہ علیہ وسلم نے پیشاب کرنے کے بعد وضو کرتے ہوئے ، موزوں پر مسح کیا ۔
یہ روایت امام طبرانی نے معجم کبیر میں نقل کی ہے ، عوسجہ بن مسلم کا ذکر کرتے ہوئے میں نے کسی کو نہیں پایا ہے ، البتہ امام ذہبی نے یہ بات بیان کی ہے : یہ عوسجہ بن اقرم ہیں ، جس نے یحیی بن عوسجہ سے روایت نقل کی ہے ، اس کی نقل کردہ حدیث موزوں پر مسح کرنے کے بارے میں ہے اور وہ مستند نہیں ہے ، یہ بات امام بخاری رحمہ اللہ نے کہی ہے ۔

سیدنا ابوامامہ رضی اللہ عنہ بیان کرتے ہیں : غزوہ تبوک کے موقع پر ، نبی اکرم صلی اللہ علیہ وسلم نے موزوں اور عمامہ پر مسح کیا تھا ۔
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی عفیر بن معدان ہے اور وہ ضعیف ہے ۔

سیدنا شرید رضی اللہ عنہ بیان کرتے ہیں : نبی اکرم صلی اللہ علیہ وسلم نے موزوں پر مسح کیا ہے ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی ابن لہیعہ ہے اور وہ ضعیف ہے ۔

سیدنا ربیعہ بن کعب اسلمی رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو موزوں پر مسح کرتے ہوئے دیکھا ہے ۔
یہ روایت امام طبرانی نے معجم کبیر میں نقل کی ہے اور اس کی سند حسن ہے ۔

سیدنا ابوایوب رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو موزوں اور چادر پر مسح کرتے ہوئے دیکھا ہے ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی صلت بن دینار ہے اور وہ متروک ہے ۔

سیدنا عبداللہ بن مسعود رضی اللہ عنہ فرماتے ہیں : ” جو شخص موزوں پر مسح کرنے سے منہ موڑے گا ، وہ سیدنا محمد صلی اللہ علیہ وسلم کی سنت سے منہ موڑے گا “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی یوسف بن عطیہ ہے ، جس کی نسبت جھوٹ بولنے کی طرف کی گئی ہے ۔

سیدنا عبداللہ بن عباس رضی اللہ عنہما فرماتے ہیں : نبی اکرم صلی اللہ علیہ وسلم مسلسل موزوں پر مسح کرتے رہے ، یہاں تک کہ آپ صلی اللہ علیہ وسلم ( کی روح ) کو ، اللہ تعالیٰ نے قبض کر لیا ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی محمد بن ابولیلی ہے اور اپنے حافظے کی خرابی کی وجہ سے وہ ضعیف ہے ۔

سیدنا عبدالرحمن بن حسنہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو دیکھا ، آپ نے وضو کرتے ہوئے موزوں پر مسح کیا ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عمرو بن عبدالغفار ہے ، اور وہ متروک الحدیث ہے ۔

سیدنا عبداللہ بن رواحہ رضی اللہ عنہ اور سیدنا اسامہ بن زید رضی اللہ عنہما بیان کرتے ہیں : نبی اکرم صلی اللہ علیہ وسلم نے وضو کرتے ہوئے موزوں پر مسح کیا ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عبدالرحمن بن زید بن اسلم ہے اور وہ ضعیف ہے ، جبکہ عطاء بن یسار نامی راوی نے سیدنا عبداللہ بن رواحہ رضی اللہ عنہ کا زمانہ نہیں پایا ہے ۔

سیدنا عصمہ رضی اللہ عنہ بیان کرتے ہیں : ایک مرتبہ مدینہ منورہ کے کسی گلی میں ، نبی اکرم صلی اللہ علیہ وسلم ہمارے پاس تشریف لائے ، آپ کچرے کے ڈھیر کے پاس پہنچے اور ارشاد فرمایا : اے حذیفہ ! میرے لئے پردہ کر دو ! پھر نبی اکرم صلی اللہ علیہ وسلم کھڑے ہوئے ، آپ نے کھڑے ہو کر پیشاب کیا پھر آپ نے پانی منگوایا اور وہ وضو کرتے ہوئے موزوں پر مسح کیا اور نماز ادا کر لی ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی فضل بن مختار ہے اور وہ منکر الحدیث ہے ، وہ باطل روایات نقل کرتا ہے ۔

عبداللہ بن طفیل بیان کرتے ہیں : میں نے سیدنا عمرو بن حزم رضی اللہ عنہ کو موزوں پر مسح کرتے ہوئے دیکھا ، وہ بیان کرتے ہیں : میں نے نبی اکرم صلی اللہ علیہ وسلم کو موزوں پر مسح کرتے ہوئے دیکھا ہے ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی واقدی ہے اور وہ انتہائی ضعیف ہے ۔

سیدنا براء بن عازب رضی اللہ عنہ بیان کرتے ہیں : نبی اکرم صلی اللہ علیہ وسلم سورہ مائدہ کے نازل ہونے سے پہلے اور اس کے بعد اپنے وصال تک مسلسل موزوں پر مسح کرتے رہے ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی سوار بن مصعب ہے ، جس کے ضعیف ہونے پر اتفاق ہے ۔

سیدنا عبادہ بن صامت رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو دیکھا ، آپ صلی اللہ علیہ وسلم نے پیشاب کرنے کے بعد وضو کرتے ہوئے موزوں پر مسح کیا ۔
یہ روایت امام طبرانی نے معجم کبیر میں ، ابوعتبہ کی ، حسن سے نقل کردہ روایت کے طور پر نقل کی ہے ، اور میں نے کسی کو اس کا ذکر کرتے ہوئے نہیں پایا ہے ۔

سیدنا عبادہ رضی اللہ عنہ بیان کرتے ہیں : نبی اکرم صلی اللہ علیہ وسلم سے ایسے شخص کے بارے میں دریافت کیا گیا ، جو وضو کرتے ہوئے اچھی طرح وضو کرتا ہے اور پھر موزوں پر مسح کر لیتا ہے ، لیکن جب وہ نماز ادا کرنے لگتا ہے ، تو انہیں اتار کر وضو کر لیتا ہے ، تو نبی اکرم صلی اللہ علیہ وسلم نے ارشاد فرمایا : جی نہیں ! وہ اُن ( موزوں ) پر مسح کرے گا ۔
یہ روایت امام طبرانی نے معجم کبیر میں اسحاق بن یحیی کی سیدنا عبادہ رضی اللہ عنہ سے نقل کردہ روایت کے طور پر نقل کی ہے ، حالانکہ انہوں نے سیدنا عبادہ رضی اللہ عنہ کا زمانہ نہیں پایا ہے ۔

سیدنا ابوبرزہ رضی اللہ عنہ بیان کرتے ہیں : ہمیں ، نبی اکرم صلی اللہ علیہ وسلم کے حوالے سے ، موزوں پر مسح کرنے کے بارے میں ، رخصت بیان کی گئی ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عبدالسلام بن صالح ہے ، جسے دارقطنی نے ” ضعیف “ قرار دیا ہے ۔

سیدنا عبداللہ بن مسعود رضی اللہ عنہ کے بارے میں یہ بات منقول ہے : وہ جرابوں اور جوتوں پر مسح کرتے تھے ۔
یہ روایت امام طبرانی نے معجم کبیر میں نقل کی ہے اور اس کے رجال کی توثیق کی گئی ہے ۔

یریم بن اسد بیان کرتے ہیں : میں سیدنا قیس بن سعد رضی اللہ عنہ کے ساتھ تھا ، اُنہوں نے دس سال نبی اکرم صلی اللہ علیہ وسلم کی خدمت کی تھی ، اُنہوں نے وضو کرتے ہوئے موزوں پر مسح کیا ، میں موزوں پر ان کے انگلیوں کے نشان نہیں بھولا ، کیونکہ وہ دونوں ( موزے ) نئے تھے ۔
یہ روایت امام طبرانی نے معجم کبیر میں نقل کی ہے ، یریم نامی کا ذکر ، ابن ابوحاتم نے کیا ہے ، اور انہوں نے ابواسحاق سبیعی کے علاوہ اور ایسے کسی شخص کا ذکر نہیں کیا ، جس نے یریم سے روایت نقل کی ہو ۔

ہارون بن سلیمان بیان کرتے ہیں : میں نے عمرو بن حریث کو دیکھا ، انہوں نے پیشاب کرنے کے بعد پانی منگوایا ، راوی بیان کرتے ہیں : انہوں نے دونوں بازؤں اور چہرے پر مسح کیا ، اور جوتوں پر مسح کیا اور پھر کھڑے ہو کر نماز ادا کی ۔
یہ روایت امام طبرانی نے معجم کبیر میں نقل کی ہے اور اس کے رجال ثقہ ہیں ۔